ព្រះគម្ពីរមរមន—រតនសម្បត្តិដ៏មហិមាមួយនៅលើមាគ៌ាជីវិតរបស់យើង
នៅពេលយើងទទួលទានព្រះបន្ទូលនៃព្រះគ្រីស្ទដែលមាននៅក្នុងព្រះគម្ពីរមរមន នោះព្រះវិញ្ញាណនឹងជួយយើងយល់អំពីសេចក្ដីពិតដ៏អស់កល្ប ។
តើបងប្អូនចងចាំពីពេលវេលាមួយ នៅពេលនរណាម្នាក់ឲ្យអំណោយមួយដែលផ្លាស់ប្តូរជីវិតរបស់បងប្អូនដែរឬទេ ? ខែតុលាជាខែគម្រប់៤០ឆ្នាំ ចាប់តាំងពីខ្ញុំបានទទួលអំណោយដ៏អស្ចារ្យបំផុតមួយនៅក្នុងជីវិត ។ ពេលខ្ញុំរៀននៅវិទ្យាល័យ ខ្ញុំបានកត់សម្គាល់ថាមានមិត្តរបស់យើងម្នាក់មានពន្លឺ ដែលខុសប្លែកពីយុវវ័យដទៃទៀត ។ ខ្ញុំរីករាយនៅក្បែរគាត់ ។ នៅថ្ងៃមួយ គាត់បានប្រាប់ខ្ញុំថា គាត់គឺជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ រួចមកគាត់បានប្រគល់ព្រះគម្ពីរមរមនមួយក្បាលមកឲ្យខ្ញុំ ទុកជាអំណោយ ។ គាត់បានអញ្ជើញខ្ញុំឲ្យអានពីរបីទំព័រ បន្ទាប់មកជួបនឹងមិត្តពីរនាក់ទៀត ដែលអាចឆ្លើយសំណួររបស់ខ្ញុំ ។ មិត្តទាំងនោះគឺជាពួកអ្នកផ្សព្វផ្សាយសាសនា ។
នៅពេលខ្ញុំជួបនឹងពួកអ្នកផ្សព្វផ្សាយសាសនា ពួកគេបង្រៀនខ្ញុំអំពីគោលលទ្ធិនៃព្រះគ្រីស្ទ ហើយបានអញ្ជើញខ្ញុំឲ្យធ្វើតាមការអញ្ជើញរបស់ព្យាការីមរ៉ូណៃ ៖ « ហើយកាលណាអ្នករាល់គ្នាបានទទួលនូវការណ៍ទាំងនេះ នោះខ្ញុំសូមទូន្មានដល់អ្នករាល់គ្នា ឲ្យសូមសួរដល់ព្រះជាព្រះវរបិតាដ៏គង់នៅអស់កល្បជានិច្ចដោយនូវព្រះនាមនៃព្រះគ្រីស្ទ បើសិនជាការណ៍ទាំងនេះមិនពិត ហើយបើសិនជាអ្នករាល់គ្នា សូមសួរដោយចិត្តស្មោះសរ គឺដោយស្មោះអស់ពីចិត្ត ដោយមានសេចក្ដីជំនឿជឿដល់ព្រះគ្រីស្ទ នោះទ្រង់នឹងសម្ដែងសេចក្ដីពិតនៃការណ៍នេះដល់អ្នក ដោយព្រះចេស្ដានៃព្រះវិញ្ញាណបរិសុទ្ធ » ( មរ៉ូណៃ ១០:៤ ) ។
ខ្ញុំបានអានព្រះគម្ពីរមរមនជាច្រើនទំព័រ ហើយបានអធិស្ឋាន ។ ទោះជាខ្ញុំពុំទាន់មានការយល់ដឹងជ្រៅជ្រះអំពីរឿងទាំងអស់ដែលពួកអ្នកផ្សព្វផ្សាយសាសនាបានបង្រៀនខ្ញុំក្តី ក៏ខ្ញុំមានអារម្មណ៍ក្នុងចិត្តថាអ្វីដែលខ្ញុំកំពុងអានគឺល្អ ហើយវាមកពីព្រះ ។ ខ្ញុំបានទទួលការបញ្ជាក់ពីការសន្យារបស់មរ៉ូណៃថា « ដោយព្រះចេស្តានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្តីពិតនៃគ្រប់ការណ៍ទាំងអស់ » ( មរ៉ូណៃ ១០:៥ ) ។
បន្ទាប់ពីខ្ញុំបានជ្រមុជទឹកចូលក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មានមិត្តមួយចំនួនបានព្យាយាមបញ្ចុះបញ្ចូលខ្ញុំថា ខ្ញុំបានធ្វើការសម្រេចចិត្តខុស ។ ប៉ុន្តែរាល់ពេលនីមួយៗដែលខ្ញុំបានជួបនឹងភាពសង្ស័យ ឬការប្រឆាំងដូច្នោះ ខ្ញុំបានទទួលការបញ្ជាក់ជាថ្មីតាមរយៈការសិក្សាបទគម្ពីរ និងការអធិស្ឋានឲ្យបន្ដនៅស្មោះត្រង់ចំពោះសេចក្ដីសញ្ញាដែលខ្ញុំបានធ្វើជាមួយនឹងព្រះ ។ ចាប់តាំងពីពេលនោះមក ព្រះគម្ពីរមរមនបានធ្វើជាដៃគូរបស់ខ្ញុំ ហើយបានក្លាយជាររតនសម្បត្តិដ៏មហិមាមួយនៅលើមាគ៌ាជីវិតរមែងស្លាប់របស់ខ្ញុំ ។
ព្រះគម្ពីរមរមនគឺមិនមែនត្រឹមតែជាសៀវភៅមួយក្បាលនោះទេ ។ វាគឺជាសក្ខីបទមួយទៀតអំពីព្រះយេស៊ូវគ្រីស្ទដែលបានកត់ត្រាដោយពួកព្យាការីពីបុរាណជាច្រើនរូបតាមរយៈវិញ្ញាណនៃការព្យាករ និងវិវរណៈ ។
ព្រឹត្តិការណ៍ដ៏សំខាន់បំផុត ដែលមានកត់ត្រាទុកក្នុងព្រះគម្ពីរមរមន គឺជាការងារបម្រើរបស់ព្រះអម្ចាស់យេស៊ូវគ្រីស្ទផ្ទាល់នៅក្នុងចំណោមពួកសាសន៍នីហ្វៃ នៅមិនយូរប៉ុន្មានបន្ទាប់ពីទ្រង់មានព្រះជន្មរស់ឡើងវិញ ។ ព្រះគម្ពីរមរមន « នាំមកនូវគោលលទ្ធិទាំងឡាយនៃដំណឹងល្អ ផ្ដល់នូវចំណុចសំខាន់អំពីផែនការនៃសេចក្ដីសង្គ្រោះ ហើយប្រាប់ដល់មនុស្សទាំងឡាយអំពីអ្វីដែលគេត្រូវធ្វើដើម្បីឲ្យបានទទួលសេចក្ដីសុខសាន្ដនៅក្នុងជីវិតនេះ និងសេចក្ដីសង្គ្រោះដ៏នៅអស់កល្បជានិច្ចនៅក្នុងជីវិតខាងមុខ » ( បុព្វកថានៃព្រះគម្ពីរមរមន ) ។
ព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទច្បាប់ដំបូងគឺត្រូវបានបោះពុម្ពនៅក្នុងទីក្រុងតូចមួយនៅរដ្ឋនូវយ៉ោក នៅខែមិនាឆ្នាំ១៨៣០ ។ ព្យាការីយ៉ូសែប ស៊្មីធមានអាយុត្រឹមតែ ២៣ឆ្នាំប៉ុណ្ណោះ នៅពេលលោកបញ្ចប់ការបកប្រែព្រះគម្ពីរនៅឆ្នាំ១៨២៩ ។ លោកបានបកប្រែព្រះគម្ពីរនេះស្ទើរតែចប់ទាំងអស់ក្នុងរយៈពេលតិចជាង ៧៥ ថ្ងៃ ហើយដំណើរការនៃការបោះពុម្ពមានរយៈពេលប្រហែលប្រាំពីរខែ ។
សព្វថ្ងៃនេះ មានពួកអ្នកផ្សព្វផ្សាយសាសនាពេញម៉ោង ៨០,០០០ នាក់ក្នុងប្រទេសជាង ១៥០ប្រទេស ដែលកំពុងបម្រើជាអ្នកស្មគ្រ័ចិត្ត លះបង់ជីវិតរបស់ពួកគេដើម្បីថ្លែងជាសាក្សីថា ព្រះគម្ពីរមរមនគឺពិត ហើយថាព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ ។
នៅខែមិថុនាឆ្នាំនេះនៅក្នុងសិក្ខាសាលាសម្រាប់ប្រធានបេសកកម្មថ្មីនាពេលថ្មីៗនេះ ប្រធាន រ័សុល អិម ណិលសុន បានចែកចាយទីបន្ទាល់ដ៏មានអានុភាពរបស់លោកអំពីព្រះគម្ពីរមរមន ៖ « ព្រះគម្ពីរមរមនគឺ …ជាព្រះបន្ទូលរបស់ព្រះ ។ ព្រះគម្ពីរនេះបង្រៀនអំពីគោលលទ្ធិនៃព្រះគ្រីស្ទ ហើយពន្យល់អំពីដង្វាយធួនរបស់ព្រះអង្គសង្គ្រោះច្រើនជាងគម្ពីរណាៗទាំងអស់ » ។
ខ្ញុំចង់ផ្ដល់យោបល់ចំនួនបីដែលអាចជួយបង្កើនការផ្លាស់ប្រែចិត្តជឿរបស់យើងកាន់ខ្លាំងចំពោះព្រះយេស៊ូវគ្រីស្ទតាមរយៈការសិក្សាព្រះគម្ពីរមរមន ៖
១. ឧស្សាហ៍ព្យាយាម និងខ្ជាប់ខ្ជួននៅក្នុងការសិក្សាប្រចាំថ្ងៃរបស់បងប្អូន ។
ដូចជាអាលម៉ា និងបុត្រារបស់ម៉ូសាយ ពួកយើងត្រូវតែ « ព្យាយាម [ ស្រាវជ្រាវ ] បទគម្ពីរដើម្បីឲ្យ [ យើង ] ស្គាល់ព្រះបន្ទូលនៃព្រះ » ហើយត្រូវបានពង្រឹងនៅក្នុងសេចក្ដីពិត ( អាលម៉ា ១៧:២ ) ។
នៅពេលបម្រើជាថ្នាក់ដឹកនាំបេសកកម្ម នៅបេសកកម្ម ចចចារ អាត្លង់តា ភរិយារបស់ខ្ញុំ និងខ្ញុំបានលើកទឹកចិត្តអ្នកផ្សព្វផ្សាយសាសនាគ្រប់រូបឲ្យសិក្សាព្រះគម្ពីរមរមនយ៉ាងហោចណាស់រយៈពេល៣០នាទីជារៀងរាល់ថ្ងៃ ។ ការតាំងចិត្តនោះបានបង្កើនសេចក្តីជំនឿរបស់យើង ហើយជួយយើងឲ្យស្វែងរក និងរំពឹងអព្ភូតហេតុ ។
វាអាចទៅរួចដែលថាបន្ទាប់ពីបេសកកម្ម ពួកយើងមិនអាចមានពេលដូចនេះដើម្បីសិក្សាព្រះគម្ពីរប្រចាំថ្ងៃទេ ប៉ុន្តែខ្ញុំសន្យាថាបើបងប្អូនដាក់ការសិក្សាព្រះគម្ពីរជាអាទិភាពដោយស្មោះ ប្រកបដោយការអធិស្ឋានជារៀងរាល់ថ្ងៃ នោះបងប្អូននឹងរកបានកម្លាំងខាងវិញ្ញាណ ហើយមានទំនុកចិត្តទៅលើព្រះអម្ចាស់ និងការសន្យារបស់ទ្រង់កាន់តែខ្លាំង ។
២. ធ្វើឲ្យការសិក្សារបស់បងប្អូនកាន់តែមានអត្ថន័យដោយការទទួលទានព្រះបន្ទូលនៃព្រះគ្រីស្ទ ។
នីហ្វៃបានបង្រៀនថា « សូមទទួលទាននូវព្រះបន្ទូលទាំងឡាយនៃព្រះគ្រីស្ទ ត្បិតមើលចុះ ព្រះបន្ទូលទាំងឡាយនៃព្រះគ្រីស្ទនឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ » ( នីហ្វៃទី២ ៣២:៣ ) ។
ទទួលទានមានន័យជ្រាលជ្រៅជាងគ្រាន់តែ អាន—វាមានន័យថា ការក្រេបយករសជាតិ ការជញ្ជឹងគិត និងការអនុវត្ត ។ នៅពេលបងប្អូនសិក្សាព្រះគម្ពីរមរមន សូមពិចារណាអំពីរបៀបដែលធ្វើឲ្យការសិក្សាព្រះគម្ពីររបស់បងប្អូនកាន់តែមានអត្ថន័យ ។ ឧទាហរណ៍ ៖
-
ប្រើកម្មវិធីជំនួយការសិក្សានានាដែលមាននៅក្នុងកម្មវិធីបណ្ណាល័យដំណឹងល្អ ។
-
កំណត់នូវសេចក្ដីពិតដ៏អស់កល្បដែលជួយយើងយល់ឲ្យពីផែនការរបស់ព្រះ ហើយដឹកនាំយើងឲ្យធ្វើ និងរក្សាសេចក្ដីសញ្ញាជាមួយព្រះវរបិតាសួគ៌យើង ។
-
គូសចំណាំឃ្លាសំខាន់ៗ ហើយកត់ត្រាចំណាប់អារម្មណ៍របស់បងប្អូនដើម្បីរក្សាទុកនូវអ្វីដែលបងប្អូនបានរៀនអំឡុងការសិក្សារបស់បងប្អូន ។
ព្រះគម្ពីរមរមនមានអានុភាពដើម្បីឆ្លើយនូវសំណួរនៃព្រលឹងរបស់យើង ។ ដូចដែលនីហ្វៃបានមានប្រសាសន៍ថា យើងគួរតែ« ប្រៀបធៀបបទព្រះគម្ពីរទាំងអស់ទៅនឹងខ្លួនយើង ដើម្បីទុកជាប្រយោជន៍ និងការចេះដឹងដល់យើង » ( នីហ្វៃទី១ ១៩:២៣ ) ។
នៅពេលយើងទទួលទានព្រះបន្ទូលនៃព្រះគ្រីស្ទ ព្រះបន្ទូលទាំងនោះនឹងបើកទ្វាទៅកាន់វិវរណៈ ព្រមទាំងបង្ហាញដល់យើងនូវអ្វីដែលយើងចាំបាច់ត្រូវធ្វើនៅក្នុងស្ថានភាពផ្សេងៗនៃជីវិតរបស់យើង ដើម្បីខិតទៅកាន់តែជិតនឹងទ្រង់ ។
៣. ថ្លែងទីបន្ទាល់របស់បងប្អូនអំពីសេចក្តីពិតដ៏ពេញលេញនៃព្រះគម្ពីរមរមន
ដូចដែលលីហៃមាននូវបំណងប្រាថ្នាចែកចាយផ្លែនៃដើមជីវិតជាមួយនឹងគ្រួសារលោកដែរ ( សូមមើល នីហ្វៃទី១ ៨:១២ ) នៅពេលយើងទទួលបានទីបន្ទាល់អំពីព្រះគម្ពីរមរមន យើងបង្កើតនូវបំណងប្រាថ្នាមួយដើម្បីចែកចាយអំណរដែលកើតមានមកពីការស្គាល់ដំណឹងល្អនៃព្រះយេស៊ូវគ្រីស្ទ ។
អ្នកផ្សព្វផ្សាយសាសនាម្នាក់របស់យើង ស៊ីស្ទើរ ប៊ែនសុន ដែលកំពុងចូលរួមនៅក្នុងសម័យប្រជុំនេះជាមួយយើង បានចែកចាយជាមួយខ្ញុំនូវបំណងប្រាថ្នារបស់នាងដើម្បីជួយដល់ប្អូនប្រុសនាង ។ គ្រានោះ ប្អូនប្រុសនាងកំពុងរៀបចំចូលរៀនសាកលវិទ្យាល័យ ហើយមិនប្រាកដអំពីការបម្រើបេសកកម្មឡើយ ។ ខ្ញុំមានចំណាប់អារម្មណ៍ដើម្បីអញ្ជើញស៊ីស្ទើរ ប៊ែនសុន ឲ្យអានព្រះគម្ពីរមរមន អំឡុងពេលបួនខែដំបូងក្នុងបេសកកម្មរបស់នាង ដោយគូសចំណាំខគម្ពីរដែលនាងចូលចិត្ត ហើយផ្ញើវាទៅឲ្យប្អូនប្រុសរបស់នាង ។
ស៊ីស្ទើរ ប៊ែនសុនបានផ្ញើខគម្ពីរក្នុងព្រះគម្ពីរមរមនដែលនាងគូសចំណាំ ហើយបានអញ្ជើញប្អូនប្រុសរបស់នាងឲ្យអានវារាល់យប់ ។ ក្រោយមកនាងចែកចាយជាមួយខ្ញុំ ៖ « ពីមុនបេសកកម្មរបស់ខ្ញុំ ប្អូនប្រុសខ្ញុំពុំដឹងច្បាស់ថាតើគាត់ចង់បម្រើបេសកកម្មពេញម៉ោងឬអត់នោះទេ ។ យូរៗទៅ នៅពេលគាត់អានព្រះគម្ពីរមរមន គាត់បានរកឃើញអំណរកាន់តែច្រើនក្នុងជីវិតរបស់គាត់ ហើយចាប់ផ្ដើមពិចារណាអំពីការបម្រើបេសកកម្ម » ។
រយៈពេលពីរសប្ដាហ៍ពីមុនស៊ីស្ទើរ ប៊ែនសុន បានបញ្ចប់បេសកកម្មរបស់នាង ប្អូនប្រុសរបស់នាងបានទទួលការហៅបេសកកម្មរបស់គាត់ ។ ឥឡូវគាត់កំពុងបម្រើនៅបេសកកម្មម៉ិកស៊ីកូ តាក់ថ្លា គូទៀរេហ្ស ។ តាមរយៈព្រះគម្ពីរមរមន អែលឌើរ ប៊ែនសុនបានមានការយល់ដឹងខាងវិញ្ញាណពីគោលបំណងពិតនៃជីវិតរបស់គាត់ ដែលដឹកនាំគាត់ឲ្យបម្រើព្រះអម្ចាស់ ហើយទុកចិត្តថារឿងទាំងឡាយនឹងដំណើរការល្អ ។ ការសម្រេចចិត្តនោះគឺជាអព្ភូតហេតុ—ដែលបានជះឥទ្ធិពលមកពីព្រះចេស្ដានៃព្រះបន្ទូលរបស់ព្រះគ្រីស្ទ ។
បងប្អូនប្រុសស្រីជាទីស្រឡាញ់ ខ្ញុំសូមលើកទឹកចិត្តបងប្អូនម្នាក់ៗឲ្យបង្កើនការសិក្សាព្រះគម្ពីរមរមនរបស់បងប្អូនឲ្យកាន់តែស៊ីជម្រៅ ។ ខ្ញុំដឹងថា នៅពេលយើងទទួលទានព្រះបន្ទូលនៃព្រះគ្រីស្ទដែលមាននៅក្នុងព្រះគម្ពីរមរមន នោះព្រះវិញ្ញាណនឹងជួយយើងយល់អំពីសេចក្ដីពិតដ៏អស់កល្ប ហើយចែកចាយទីបន្ទាល់របស់យើងដោយភាពជឿជាក់ដល់អ្នកទាំងឡាយដែលព្រះអម្ចាស់បានរៀបចំដើម្បីឲ្យមកស្ដាប់ឮសារលិខិតរបស់ទ្រង់ ។ ព្រះអម្ចាស់បានមានបន្ទូលថា « ពួកដែលយើងបានរើសតាំង ឮសំឡេងរបស់យើង ហើយមិនពង្រឹងចិត្តរបស់ពួកគេឡើយ » ( គោលលទ្ធិ និង សេចក្ដីសញ្ញា ២៩:៧ ) ។ ខ្ញុំថ្លែងទីបន្ទាល់ថាអស់អ្នកដែលទូលសុំព្រះដោយជំនឿ នឹងទទួលបានទីបន្ទាល់អំពីសេចក្ដីពិត និងទេវភាពនៃព្រះគម្ពីរមរមនដោយព្រះចេស្ដានៃព្រះវិញ្ញាណបរិសុទ្ធ ។ ខ្ញុំសូមថ្លែងទីបន្ទាល់អំពីកិច្ចការនេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕