សេចក្តីស្រឡាញ់ដ៏ធួនរបស់ព្រះគ្រីស្ទ
ការព្យាបាល និងការអត់ទោសនីមួយៗត្រូវបានរកឃើញក្នុងភាពពេញលេញរបស់វានៅក្នុងសេចក្តីស្រឡាញ់ដ៏ធួនរបស់ព្រះគ្រីស្ទ ។
ខ្ញុំសូមសម្តែងសេចក្តីស្រឡាញ់របស់ខ្ញុំចំពោះ ប្រធាន រ័សុល អិម ណិលសុន និងសេចក្តីដឹងគុណរបស់ខ្ញុំចំពោះឥទិ្ធពលដ៏អស្ចារ្យដែលលោកបានមានសម្រាប់យើងម្នាក់ៗ ។ ហើយសម្រាប់យើងរាល់គ្នា ខ្ញុំសូមអរព្រះគុណដល់ព្រះសម្រាប់ការថែរក្សា និងលើកតម្កើងជីវិតដ៏ថ្លៃថ្នូររបស់ប្រធាន ដាល្លិន អេក អូក ។
ពីមួយឆ្នាំទៅមួយឆ្នាំ ខ្ញុំកាន់តែមានអារម្មណ៍ស្រឡាញ់ព្រះអង្គសង្រ្គោះរបស់យើង ព្រះយេស៊ូវគ្រីស្ទ និងដង្វាយធួនពេញដោយក្តីមេត្តាករុណារបស់ទ្រង់ខ្លាំងទៅៗ ។ ពលិកម្មដ៏មហិមារបស់ទ្រង់ដែលជាការធានាបាននូវជ័យជំនះលើសេចក្តីស្លាប់ និងអំពើបាប គឺជាព្រឹត្តិការណ៍ដ៏សំខាន់បំផុតនៃប្រវត្តិសាស្ត្រមនុស្សជាតិទាំងអស់ ។ ការរៀនយល់ដឹងអំពីអំណោយទានដ៏ទេវភាពរបស់ទ្រង់សម្រាប់ខ្ញុំ គឺជាការបង្រៀនពីស្ថានសួគ៌ដែលនឹងបន្តលើសពីសេចក្តីស្លាប់ ។
សេចក្ដីមេត្ដាករុណាដ៏មានអានុភាពរបស់ព្រះអង្គសង្គ្រោះក្នុងការអត់ទោសដល់អំពើបាប និងក្នុងការព្យាបាលរបួសដែលបណ្តាលមកពីអំពើបាបរបស់អ្នកដទៃ គឺជាការបើកបង្ហាញដ៏អព្ភូតហេតុបំផុតនៃសេចក្ដីស្រឡាញ់របស់ព្រះ ។
បំណងប្រាថ្នារបស់ខ្ញុំ គឺផ្តល់នូវក្តីសង្ឃឹមសម្រាប់អ្នកដែលស្វែងរកការអត់ទោសចំពោះអំពើបាបដ៏ធ្ងន់ធ្ងរ ហើយផ្តល់ការលួងលោមដល់អ្នកដែលស្វែងរកការព្យាបាលពីរបួសដ៏ឈឺចាប់ដែលបណ្តាលមកពីអំពើបាបដ៏ធ្ងន់ធ្ងររបស់អ្នកដទៃ ។
ការព្យាបាល និងការអត់ទោសនីមួយៗត្រូវបានរកឃើញក្នុងភាពពេញលេញរបស់វានៅក្នុងសេចក្តីស្រឡាញ់ដ៏ធួនរបស់ព្រះគ្រីស្ទ ។
សេចក្ដីជំនឿលើព្រះយេស៊ូវគ្រីស្ទ
ប្រសិនបើបងប្អូនបានប្រព្រឹត្តអំពើបាបធ្ងន់ធ្ងរ ហើយកំពុងស្ថិតក្នុងដំណើរការប្រែចិត្ត ឬមានបំណងចង់ប្រែចិត្តពេញលេញ និងទទួលបាននូវអំណរនៃការអត់ទោសហួសពីពាក្យដែលអាចថ្លែងបាន សូមដឹងថា អព្ភូតហេតុនេះកំពុងរង់ចាំបងប្អូន ។ ព្រះអង្គសង្រ្គោះបន្តអំពាវនាវថា « ចូរមកឯខ្ញុំ » ។
ការពង្រឹងសេចក្តីជំនឿរបស់បងប្អូនលើព្រះអង្គសង្រ្គោះរបស់យើង គឺព្រះយេស៊ូវគ្រីស្ទ នឹងពង្រឹងបំណងប្រាថ្នាចង់ស្គាល់ទ្រង់ ជឿលើទ្រង់ ហើយថ្វាយដួងចិត្តរបស់បងប្អូនចំពោះទ្រង់ ។ អេណុសបានទូលសួរអំពីការអត់ទោសដល់កំហុសរបស់លោកថា ៖ « ឱព្រះអម្ចាស់អើយ ចុះតើការណ៍នេះបានធ្វើយ៉ាងណាទៅ ? » ព្រះអម្ចាស់បានឆ្លើយតបថា ៖ « ពីព្រោះមកពីសេចក្ដីជំនឿដែលអ្នកមានដល់ព្រះគ្រីស្ទ ដែលអ្នកពុំដែលបានឮ ឬឃើញពីមុនមកឡើយ » ។
ហើយមរ៉ូណៃបានបន្ថែមថា « បើសិនជាអ្នករាល់គ្នានឹងលះបង់ចោលនូវអស់ទាំងអំពើដ៏ឥតបរិសុទ្ធ ហើយស្រឡាញ់ព្រះឲ្យអស់ពីសមត្ថភាព អស់ពីគំនិត និងអស់ពីកម្លាំងរបស់អ្នក នោះព្រះគុណរបស់ទ្រង់ល្មមដល់អ្នកហើយ » ។
ការងាកចេញពីអំពើបាប ការងាកទៅរកព្រះ និងការពង្រឹងសេចក្តីជំនឿរបស់បងប្អូននៅលើព្រះយេស៊ូវគ្រីស្ទ គឺជាការចាប់ផ្ដើមដ៏ស្រស់ស្អាត ។ ការមានឆន្ទៈធ្វើតាមព្រះដោយរាបសា រួមទាំងចំណេះដឹងពីអំពើបាបធ្ងន់ធ្ងររបស់បងប្អូនទៅកាន់ប៊ីស្សព ឬប្រធានសាខា ប៉ុន្តែការអត់ទោសរបស់បងប្អូនទាំងស្រុងនឹងបានមកពីព្រះអង្គសង្រ្គោះ ។ ការអត់ទោសគឺជាអំណោយដ៏ទេវភាពដែលបានប្រទានឲ្យតាមរយៈព្រះគុណរបស់ព្រះយេស៊ូវគ្រីស្ទ ។
ភាពស្មោះត្រង់
បំណងប្រាថ្នាដើម្បីត្រឡប់ទៅរកព្រះយ៉ាងពិតប្រាកដអមដោយការប្តេជ្ញាចិត្ត គឺដើម្បីមានភាពទៀងត្រង់ទាំងស្រុងជាមួយព្រះវរបិតាសួគ៌របស់បងប្អូន ជាមួយខ្លួនឯង ជាមួយអស់អ្នកដែលរង់ការឈឺចាប់ និងជាមួយអ្នកដឹកនាំបព្វជិតភាពរបស់បងប្អូន ។ ព្រះវរបិតាសួគ៌របស់បងប្អូនរីករាយនឹងបំណងប្រាថ្នារបស់បងប្អូនមកកាន់ទ្រង់ ដោយចិត្តសង្រេង និងវិញ្ញាណទន់ទាប ។ ការមានវិញ្ញាណទន់ទាបគឺជាការដាក់ទីទុកចិត្តលើព្រះហស្ដរបស់ព្រះ ។ ការមានចិត្តសង្រេងនាំមកនូវអ្វីដែលសាវកប៉ុលបានពិពណ៌នាថា « ព្រោះសេចក្តីព្រួយដែលគាប់ព្រះហឫទ័យដល់ព្រះ » ជាការចង់បានយ៉ាងជ្រាលជ្រៅនៃព្រលឹងដើម្បីត្រឡប់ទៅរកទ្រង់វិញ ទោះតម្រូវឲ្យមានការខិតខំប្រឹងប្រែងអ្វីក៏ដោយ ។
ការស្តារឡើងវិញនូវអ្វីដែលបានខូចខាត
បំណងប្រាថ្នាចង់បានរបស់បងប្អូននាំឲ្យបងប្អូនចង់ជួសជុលនូវការខូចខាតទាំងអស់ដែលបងប្អូនបានធ្វើ ។ ប៉ុន្តែរឿងមួយចំនួនមិនស្ថិតក្រោមអំណាចរបស់បងប្អូនដើម្បីជួសជុលនោះទេ បងប្អូនអធិស្ឋានដោយក្លៀវក្លាទូលសូមឲ្យព្រះអម្ចាស់តាមរយៈព្រះគុណទ្រង់នឹងជួយព្យាបាលអស់អ្នកដែលបានរងឈឺចាប់ដោយសារទង្វើរបស់បងប្អូន ។
ឥទ្ធិពលនៃអំពើបាបដ៏ធ្ងន់ធ្ងរលើអ្នកដទៃ ជាញឹកញាប់តែងពិបាកនឹងយកឈ្នះដោយឈឺចាប់ ។ តើបងប្អូនកំពុងធ្វើតាមគំរូរបស់ពួកបុត្រានៃម៉ូសាយ ដែល « បានខំប្រឹងយ៉ាងអស់ពីចិត្ត ដើម្បីជួសជុលនូវការខូចខាតទាំងអស់ ដែលពួកគេបានធ្វើ » ឬទេ ? ចូរនិយាយជាមួយអ្នកដែលបងប្អូនគោរពអំពីអ្វីដែលបងប្អូនប្រហែលជាមិនបានដឹង ។
នៅពេលខ្ញុំរៀបចំសុន្ទរកថានេះ ខ្ញុំបានទទួលអ៊ីមែលមួយមកពីមនុស្សម្នាក់ដែលកំពុងរៀបចំខ្លួនដើម្បីប្រែចិត្ត និងចង់ត្រឡប់មកកាន់សាសនាចក្រវិញ ។ អតីតភរិយារបស់គាត់នៅតែឈឺចាប់ដោយសារការបែកបាក់ « អាពាហ៍ពិពាហ៍ដ៏នៅអស់កល្បជានិច្ច [ របស់ពួកគាត់ ] និង [ មានការលំបាកច្រើនជាមួយកូនៗ ] បាត់បង់សុវត្ថិភាពផ្នែកហិរញ្ញវត្ថុ … មិន [ អាច ] ផ្គត់ផ្គង់លើការចំណាយបាន [ និង ] មានអារម្មណ៍ឈឺចាប់យ៉ាងជ្រាលជ្រៅដោយសារការផិតក្បត់ » ។
គាត់បានចែកចាយជាមួយខ្ញុំនូវអ្វីដែលអ្នកដឹកនាំបព្វជិតភាពរបស់គាត់ « បានទទួលចំណាប់អារម្មណ៍ [ សុំឲ្យគាត់ ] ពិចារណាប្រកបដោយការអធិស្ឋាននូវអ្វី [ ដែលគាត់អាចធ្វើសម្រាប់អតីតភរិយា និងកូនៗរបស់គាត់ ] » ។ ដោយមានការអនុញ្ញាត ខ្ញុំសូមចែកចាយអ៊ីមែលរបស់គាត់ ។
« [ ដំបូង ] ខ្ញុំបានគិតថា [ លុយ ]ដែលខ្ញុំបង់ឲ្យដើម្បីបញ្ចប់ការលែងលះឲ្យដាច់ស្រេចនោះគឺលើសពីទឹកចិត្តសប្បុរសទៅទៀត ប៉ុន្តែប្រធានសាខារបស់ខ្ញុំបានលើកទឹកចិត្តឲ្យខ្ញុំតមអាហារ និងអធិស្ឋានអំពីរឿងនេះ ។ …
« ដំបូងឡើយ ខ្ញុំពិបាកនឹងគំនិតនៃការបង់សំណងបន្ថែមទៀត ។ ដោយសារអំពើបាបរបស់ខ្ញុំមិនមែនជាហិរញ្ញវត្ថុទេ នោះខ្ញុំបានងឿងឆ្ងល់ថាតើ ‹ សំណងចេញពីទឹកចិត្តសប្បុរស › មានអត្ថន័យពិតប្រាកដជាអ្វី … [ ប៉ុន្តែ ] មិនយូរប៉ុន្មានខ្ញុំបានដឹងថា វាមិនមែនគ្រាន់តែអំពីប្រាក់នោះទេ ។
« ថ្នាក់ដឹកនាំបព្វជិតភាពរបស់ខ្ញុំបានជួបជាមួយ[ អតីតភរិយារបស់ខ្ញុំ ] និងកូនៗរបស់ខ្ញុំ ហើយបានដឹងថាពួកគេនៅតែជួបការលំបាក ហើយមិនទាន់បានធូរស្រាលនៅឡើយទេ » ។
« គោលដៅថ្មីរបស់ខ្ញុំ គឺត្រូវឆ្ពោះទៅមុខដោយសេចក្តីជំនឿ ។ … ខ្ញុំបានបង្ហាញទឹកចិត្តចង់ជួយរបស់ខ្ញុំដោយពុំចង់បានការតបស្នងអ្វីឡើយ ។ … ខ្ញុំបានសម្រេចចិត្ត [ ផ្ញើទឹកប្រាក់មួយចំនួនទៅអតីតភរិយារបស់ខ្ញុំ ] រៀងរាល់ពេលបើកប្រាក់ខែ ដែលទឹកប្រាក់នោះគឺជាចំនួនដ៏ធំមួយពីប្រាក់កម្រៃដែលខ្ញុំទទួលបាន ។ នៅពេលហៀបនឹងបង់ប្រាក់ជាលើកដំបូងនោះ ព្រះអម្ចាស់[ បានបំផុសគំនិតខ្ញុំថា ខ្ញុំត្រូវ ] បង់ប្រាក់ [ ទ្វេដងនៃប្រាក់នោះ ] ។
« ខ្ញុំបានរៀនថា សំណងគឺមិនគ្រាន់តែអំពីប្រាក់នោះទេ ។ សំណងគឺអំពីការឧទ្ទិសខ្លួនដ៏រាបសារបស់ខ្ញុំចំពោះព្រះអម្ចាស់វិញទេតើ ។ … លុយគឺដើម្បីជួយជំនួសនូវអ្វីដែលខ្ញុំបានយកពីគ្រួសាររបស់ខ្ញុំដោយសារតែការជ្រើសរើសមិនល្អរបស់ខ្ញុំ ។ វាគឺអំពីការធ្វើ និងការរក្សាការសន្យាដោយគ្មានការរំពឹងទុកនូវការតបស្នង និងជួយនាងមិនឲ្យខ្វល់ខ្វាយពីការចំណាយ ដើម្បីឲ្យនាងអាចស្វែងរកព្រះវិញ្ញាណ » ។
ការខិតខំរបស់បងប្អូនដើម្បីស្ដារអ្វីដែលបងប្អូនធ្វើឲ្យខូចខាតឡើងវិញ អាចមិនទាក់ទងនឹងប្រាក់នោះទេ ប៉ុន្តែពេលបងប្អូនប្រឹក្សាជាមួយព្រះអម្ចាស់ដោយរាបសា នោះបងប្អូននឹងរកឃើញថាមានអ្វីជាច្រើនទៀតដែលបងប្អូនអាចធ្វើបាន ។
ការអនុម័តដ៏ទេវភាពតាមកម្រិត
នៅពេលបងប្អូនស្វែងរកការអត់ទោសរបស់ព្រះអម្ចាស់ ចូរមានចិត្តអត់ធ្មត់នៅពេលបងប្អូនរង់ចាំការអនុម័តរបស់ទ្រង់ពេញលេញ ។ សូមពិចារណាអំពីបទគម្ពីរនេះ ៖
« គេ …បានបន្ទាបខ្លួនចុះ … ដល់ជម្រៅនៃភាពទន់ទាប ហើយ … បានអំពាវនាវជាខ្លាំងទៅរកព្រះ មែនហើយ គឺពេញមួយថ្ងៃ ។… [ ប៉ុន្តែ ] ព្រះអម្ចាស់ទ្រង់ក្រឮសម្រែករបស់ពួកគេ ដោយសារតែអំពើទុច្ចរិតរបស់ពួកគេ » ។
« ទោះជាយ៉ាងណាក្ដី គង់តែព្រះអម្ចាស់ទ្រង់បានឮសម្រែករបស់គេដែរ ហើយបានចាប់ផ្ដើម … សម្រាលបន្ទុក … ហើយ …ពួកគេបានចាប់ផ្ដើមចម្រើនឡើងបន្តិចម្ដងៗ » ។
សូមមានចិត្តអត់ធ្មត់ នៅពេលទ្រង់ប្រទានពរជ័យរបស់ទ្រង់ដល់បងប្អូន ហើយយល់ព្រមផ្តល់ឲ្យបន្តិចម្តងៗ ។
នៅក្នុងសម័យរបស់ព្រះអម្ចាស់ បងប្អូននឹងបានឮព្រះសូរសៀងរបស់ទ្រង់ប្រាប់បងប្អូនថា « ពុំឲ្យរឿងទាំងនេះ ធ្វើឲ្យកូនកង្វល់ចិត្តតទៅទៀតទេ » ។ នៅថ្ងៃណាមួយដែលបងប្អូនបន្តទៅរកព្រះអង្គសង្រ្គោះ នោះព្រះវរបិតាសួគ៌របស់បងប្អូននឹងដកយក « ទោស[ របស់បងប្អូន ]ចេញពីក្នុងចិត្ត តាមរយៈបុណ្យគុណទាំងឡាយនៃព្រះរាជបុត្រារបស់ទ្រង់ » ។
របួស និង ការរងទុក្ខ
សម្រាប់បងប្អូនដែលបានរងរបួសដោយអយុត្តិធម៌ដោយអំពើបាបដ៏ធ្ងន់ធ្ងររបស់ដទៃ ខ្ញុំចង់ចែកចាយសេចក្ដីស្រឡាញ់ និងសេចក្ដីអាណិតអាសូររបស់ព្រះអង្គសង្គ្រោះ ការលួងលោម និងសេចក្តីសុខសាន្តរបស់ទ្រង់ ។
ការឈឺចាប់ដែលបងប្អូនបានទទួល ការខូចចិត្ត ការបាត់បង់ អារម្មណ៍ឈឺចាប់នៃការក្បត់ ការផ្លាស់ប្តូរជីវិតដែលបងប្អូនបានស្រមៃគិត—ខ្ញុំសូមផ្ដល់ឲ្យបងប្អូននូវការធានាដ៏ច្បាស់លាស់ថា ព្រះអង្គសង្រ្គោះស្គាល់បងប្អូន ហើយស្រឡាញ់បងប្អូន ។ សូមឈោងទៅរកទ្រង់ ។ ទ្រង់គឺជាអង្គលួងលោម និងជាកម្លាំងបងប្អូន ទ្រង់នឹងបញ្ជូនពួកទេវតារបស់ទ្រង់មកលើកទ្របងប្អូនឡើង ។ តើការឈឺចាប់របស់បងប្អូន ទុក្ខព្រួយដ៏ធំរបស់បងប្អូន ការចងចាំដែលមិនចង់បានរបស់បងប្អូននឹងត្រូវបំភ្លេចចោលនៅពេលណា ? ខ្ញុំមិនដឹងទេ ! ប៉ុន្តែខ្ញុំដឹងរឿងនេះ ៖ ទ្រង់មានព្រះចេស្ដាដើម្បីនាំមកនូវភួងលំអជំនួសផេះនៃការរងទុក្ខរបស់បងប្អូន ។
បងប្អូនប្រុសស្រីជាទីស្រឡាញ់របស់យើងដែលរស់នៅទីក្រុង ហ្គែ្រនដ៍ ប្លង់ រដ្ឋមីឈីហ្គែន ជាមួយនឹងក្តីជំនឿដ៏ឥតប្រែប្រួលលើព្រះយេស៊ូវគ្រីស្ទ ជាមួយនឹងភាពមិនអាត្មានិយម និងភាពក្លាហានរបស់ពួកគេ បានទទួលហើយនឹងទទួលនូវព្រះគុណ និងក្តីស្រឡាញ់ដ៏ឥតផ្ទឹមបានរបស់ព្រះអង្គសង្រោ្គះ នៅក្នុងប៉ុន្មានសប្តាហ៍និងប៉ុន្មានខែខាងមុខ ។
នៅពេលបងប្អូនបន្តដាក់ទីទុកចិត្តរបស់បងប្អូនលើទ្រង់ នោះពពកនៃភាពងងឹត និងទឹកភ្នែករបស់បងប្អូនដែលហូរមកនៅពេលយប់នឹងប្រែទៅជាទឹកភ្នែកនៃអំណរ និងសេចក្តីសុខសាន្តនៅក្នុងពន្លឺនាពេលព្រឹក ។ « សេចក្តីព្រួយរបស់យើងនឹងប្រែទៅជាអំណរវិញ ។ … នឹងឥតមានអ្នកណា [ ម្នាក់ ] ដកយកសេចក្តីអំណរនោះ ចេញពីអ្នករាល់គ្នាបានឡើយ » ។ គ្រានោះនឹងកើតឡើង ។ ខ្ញុំសូមថ្លែងថាវានឹងកើតឡើង ។
សេចក្ដីស្រឡាញ់ដ៏ធួនរបស់ព្រះយេស៊ូវគ្រីស្ទ អាចរកឃើញនៅក្នុងស្ថានភាពលំបាកបំផុត ប៉ុន្តែយើងទាំងអស់គ្នាត្រូវការព្រះគុណដ៏ធួនរបស់ព្រះអង្គសង្គ្រោះរបស់យើងជានិច្ច ។ ប្រធាន ដាល្លិន អេក អូក បានបង្រៀន ៖ « ដោយសារបទពិសោធន៍ដ៏ធួនរបស់ទ្រង់នៅក្នុងព្រះជន្មរមែងស្លាប់ នោះព្រះអង្គសង្គ្រោះអាចលួងលោម ព្យាបាល និងចម្រើនកម្លាំងដល់បុរស និងស្ត្រីគ្រប់រូបនៅគ្រប់ទីកន្លែង ប៉ុន្តែខ្ញុំជឿថាទ្រង់ធ្វើការណ៍នេះ ចំពោះអស់អ្នកដែលស្វែងរកទ្រង់ ហើយទូលសូមជំនួយពីទ្រង់តែប៉ុណ្ណោះ ។ សាវកយ៉ាកុបបានបង្រៀនថា ‹ ចូរបន្ទាបខ្លួននៅចំពោះព្រះអម្ចាស់ នោះទ្រង់នឹងតម្កើងអ្នករាល់គ្នាឡើង › ( យ៉ាកុប ៤:១០ ) ។ យើងស័ក្តិសមនឹងទទួលពរជ័យនោះ នៅពេលយើងជឿលើទ្រង់ ហើយអធិស្ឋានទូលសូមជំនួយពីទ្រង់ ។
អែលឌើរ រ៉ូប៊ឺត អ៊ី វ៉េលស៍
ខ្ញុំបានទទួលការអនុញ្ញាតពីមិត្តសម្លាញ់របស់ខ្ញុំ និងជាពួកចិតសិបនាក់មានសិទ្ធិអំណាចទូទៅដែលបានចូលនិវត្តន៍ គឺអែលឌើរ រ៉ូប៊ឺត អ៊ី វែលស៍ ដែលឥឡូវមានអាយុ៩៧ឆ្នាំ ដើម្បីចែកចាយបទពិសោធន៍របស់គាត់ជាង៦០ឆ្នាំមុន ៖
ខណៈកំពុងរស់នៅប្រទេសប៉ារ៉ាហ្គាយ នាឆ្នាំ១៩៦០ និងធ្វើការជាបុគ្គលិកអន្តរជាតិរបស់ធនាគារ រ៉ូប៊ឺត វែលស៍ ដែលនៅពេលនោះអាយុ៣២ឆ្នាំ និងភរិយារបស់លោក មើរីល ដែលម្នាក់ៗបើកយន្តហោះពីរខុសគ្នា ដោយហោះហើរពីអ៊ុយរូហ្គាយទៅកាន់ផ្ទះនៅប៉ារ៉ាហ្គាយ ។ ដោយសារពពកខ្មៅក្រាស់ រ៉ូប៊ឺត និង មើរីល មើលគ្នាលែងឃើញ ហើយការទាក់ទងគ្នាតាមវិទ្យុក៏លែងដំណើរការ ។ រ៉ូបឺតបានចុះចតភ្លាមៗ នៅកន្លែងដែលគាត់បានដឹងថា យន្តហោះរបស់ភរិយារបស់គាត់បានធ្លាក់ ។ ទាំងភរិយា និងមិត្តភក្តិទាំងពីរនាក់ដែលជិះយន្តហោះជាមួយនាងមិនបានរួចជីវិតនោះឡើយ ។ កូនៗរបស់គាត់នៅផ្ទះនៅឯទីក្រុងអាសុនស្យុង មានអាយុប្រាំពីរឆ្នាំ ប្រាំឆ្នាំ និងពីរឆ្នាំ ។
អែលឌើរ វែលស៍ បានមានប្រសាសន៍ពីទុក្ខសោករបស់គាត់ថា ៖
« ការឈឺចាប់មាននៅក្នុងខ្លួនខ្ញុំ មិនអាចថ្លែងជាពាក្យសម្តីបានឡើយ ការឈឺចាប់នោះបានគ្របដណ្ដប់លើសតិអារម្មណ៍របស់ខ្ញុំ និងស្មារតីរបស់ខ្ញុំ ។ ទឹកភ្នែកនៃទុក្ខព្រួយមិនឈប់ហូរឡើយ ។ រឿងដែលកាន់តែអាក្រក់នោះគឺ នៅពេលដែលចិត្តរបស់ខ្ញុំកំពុងព្យាយាមទទួលយកនូវមរណភាពរបស់ភរិយាខ្ញុំ ខ្ញុំប្រទះឃើញថា ខ្លួនឯងផ្ទាល់មានកំហុសធំណាស់ចំពោះការធ្លាក់យន្តហោះនេះ » ។
រ៉ូប៊ឺតបានស្តីបន្ទោសឲ្យខ្លួនឯងចំពោះការពិនិត្យមើលមិនបានដិតដល់ និងចំពោះការណែនាំក្នុងការហោះហើរដល់ភរិយារបស់គាត់មិនបានគ្រប់ជ្រុងជ្រោយ ។ គាត់មានអារម្មណ៍ថា គាត់មានកំហុសចំពោះការធ្វេសប្រហែសនោះ ។
រ៉ូប៊ឺតបាននិយាយ ៖
« គំនិតរបស់ខ្ញុំបានច្របូកច្របល់អស់ហើយ ។ ខ្ញុំរស់នៅកំដរតែជីវិតប៉ុណ្ណោះ—[ សម្រាប់ជាប្រយោជន៍ដល់កូនៗ ] គ្មានអ្វីក្រៅពីនោះទេ ។
« ខ្ញុំ … បានបាត់បង់បំណងប្រាថ្នាដើម្បីបន្តទៅមុខ » ។
នៅពេលនោះ រ៉ូប៊ឺតមានពរណាស់ដែលទទួលបាននូវបទពិសោធន៍ខាងវិញ្ញាណដ៏ជ្រាលជ្រៅមួយ ។ លោកបានតំណាល ៖
« នៅល្ងាចមួយ ប្រហែលមួយឆ្នាំក្រោយមក ពេលខ្ញុំលុតជង្គង់អធិស្ឋាន អព្ភូតហេតុមួយបានកើតឡើង ។ ពេលអធិស្ឋាន និងទូលអង្វរដល់ព្រះវរបិតាសួគ៌របស់ខ្ញុំ ខ្ញុំមានអារម្មណ៍ថា ដូចជាព្រះអង្គសង្គ្រោះបានយាងមកគង់នៅក្បែរខ្ញុំ ហើយខ្ញុំបានឮសំឡេងដ៏ច្បាស់មួយនិយាយពាក្យទាំងនេះមកកាន់ព្រលឹង និងត្រចៀកខ្ញុំថា ‹ រ៉ូប៊ឺត ពលិកម្មដ៏ធួនរបស់យើងបានបង់ថ្លៃសម្រាប់អំពើបាប និងកំហុសរបស់ឯងហើយ ។ ភរិយារបស់ឯងបានអត់ទោសឲ្យឯងហើយ ។ មិត្តភក្តិរបស់ឯងបានអត់ទោសឲ្យឯងហើយ ។ យើងនឹងសម្រាលបន្ទុករបស់ឯង ។ … ›
« ចាប់ពីពេលនោះមក បន្ទុកនៃកំហុស [ និងភាពអស់សង្ឃឹម ] ត្រូវបានដកចេញពីខ្ញុំយ៉ាងអស្ចារ្យ ។ ខ្ញុំបានទទួលការសង្រ្គោះ ! ខ្ញុំបានយល់ភ្លាមអំពីព្រះចេស្ដាដែលហ៊ុមព័ទ្ធនៃដង្វាយធួនរបស់ព្រះអង្គសង្គ្រោះ ហើយ … ដែលវាអនុវត្តចំពោះខ្ញុំដោយផ្ទាល់ ។ … ខ្ញុំ … បានដកពិសោធនូវពន្លឺ និងអំណរដែលខ្ញុំមិនធ្លាប់មានពីមុន ។ … ខ្ញុំត្រូវបានផ្ដល់ឲ្យនូវអំណោយទានដែលមិនអាចរកបាន—អំណោយទាននៃព្រះគុណរបស់ព្រះអម្ចាស់ ។ … ខ្ញុំមិនសមនឹងទទួលបានវាទេ—ខ្ញុំមិនបានធ្វើអ្វីដើម្បីជាប្រយោជន៍ទេ ប៉ុន្តែទោះជាយ៉ាងណាក៏ដោយ ទ្រង់បានប្រទានវាមកខ្ញុំ » ។
បងប្អូនប្រុសស្រី យើងម្នាក់ៗអាច « ត្រូវបានញែកចេញជាបរិសុទ្ធនៅក្នុងព្រះគ្រីស្ទ ដោយសារព្រះគុណនៃព្រះ ដោយការច្រួចព្រះលោហិតនៃព្រះគ្រីស្ទ … [ ប្រែក្លាយជា ] បរិសុទ្ធដោយគ្មានប្រឡាក់អ្វីសោះឡើយ » ។
ខ្ញុំសូមថ្លែងពីសេចក្តីស្រឡាញ់ សេចក្តីមេត្តាករុណា និងព្រះគុណរបស់ព្រះអង្គសង្រ្គោះ និងជាព្រះប្រោសលោះ ។ ទ្រង់មានព្រះជន្មរស់ ។ យើងគឺជាបុត្រាបុត្រីរបស់ទ្រង់ យើងគឺជាបុត្រាបុត្រីនៃសេចក្ដីសញ្ញា ។ នៅពេលយើងជឿលើទ្រង់ ធ្វើតាមទ្រង់ ហើយទុកចិត្តលើទ្រង់ នោះទ្រង់នឹងលើកយើងចេញពីទុក្ខព្រួយ និងអំពើបាបរបស់យើង ។ បន្ទាប់មក លើសពីជីវិតរមែងស្លាប់នេះ នៅក្នុងដំណាក់របស់ព្រះវរបិតារបស់យើង យើងនឹងរស់នៅជាមួយទ្រង់ជារៀងរហូត និងជារៀងរហូត ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕