ទៅចុះ ចូរអ្នកប្រព្រឹត្តបែបយ៉ាងដូច្នោះដែរ
ខ្ញុំសូមលើកឡើងជាពិសេសពីពួកអ្នកផ្សព្វផ្សាយសាសនាទាំងនោះ ដែលត្រូវបានហៅឲ្យទទួលការចាត់តាំងផ្នែកសេវាកម្ម ។ ពួកគេជាគំរូដល់យើង ។
ខណៈព្រះអង្គសង្គ្រោះកំពុងធ្វើដំណើរកាត់បេតសៃដា មនុស្សខ្លះបាននាំមនុស្សខ្វាក់ម្នាក់មកកាន់ទ្រង់ ។ ប្រហែលជាពួកគេសង្ឃឹមថានឹងបានឃើញអព្ភូតហេតុដោយផ្ទាល់ ។ ព្រះអង្គសង្រ្គោះ « ក៏ចាប់ដៃមនុស្សខ្វាក់នោះនាំចេញទៅក្រៅភូមិ » ដើម្បីព្យាបាលគាត់ ។ ដំបូងឡើយ ការព្យាបាលហាក់ដូចជាមិនសូវមានប្រសិទ្ធភាពទេ ។ បុរសនោះ « ក៏ងើបភ្នែកឡើងទូលឆ្លើយថា ខ្ញុំឃើញមនុស្សដើរ មើលទៅដូចជាដើមឈើ » ។ ដោយសេចក្ដីអាណិតអាសូរ ព្រះយេស៊ូវ « ដាក់ព្រះហស្តលើភ្នែករបស់គាត់ម្តងទៀត ហើយប្រាប់ឲ្យងើបឡើងមើល » ។ ដោយការប៉ះព្រះហស្ដរបស់ព្រះអង្គសង្គ្រោះបន្ថែមទៀត បុរសខ្វាក់រូបនោះឥឡូវនេះ « ឃើញច្បាស់ទាំងអស់ » ។
នេះគ្រាន់តែជាឧទាហរណ៍មួយនៃរបៀបដែលព្រះជន្មរបស់ព្រះអង្គសង្គ្រោះត្រូវបានកំណត់លក្ខណៈដោយទង្វើនៃការបម្រើដ៏រាបសា ។ ទ្រង់បានរំឭកយើងថា ទ្រង់« មក មិនមែនឲ្យគេបម្រើលោកទេ គឺនឹងបម្រើគេវិញ » ហើយបន្ទាប់មកទ្រង់អញ្ជើញយើងឲ្យធ្វើតាមគំរូរបស់ទ្រង់ដោយឲ្យទៅអស់មួយយោជន៍ផ្ដល់ឲ្យដល់អស់អ្នកទាំងឡាយណាដែលសុំពីយើង ហើយស្រឡាញ់អ្នកជិតខាងរបស់យើង ។ នៅពេលសួរថា « តើអ្នកណាជាអ្នកជិតខាងខ្ញុំ ? » ព្រះគ្រីស្ទបានចែកចាយពាក្យប្រៀបប្រដូចពីសាសន៍សាម៉ារីចិត្តល្អ ជាមួយនឹងទំនួលខុសត្រូវឲ្យ « ទៅចុះ ចូរអ្នកប្រព្រឹត្តបែបយ៉ាងដូច្នោះដែរ » ។
ពួកអ្នកផ្សព្វផ្សាយសាសនានៃសាសនាចក្រនៃពួកបរិសុទ្ធថ្ងៃចុងក្រោយ គឺជាគំរូពីសាសន៍សាម៉ារីចិត្តល្អនៅសម័យទំនើប ដែលព្រះគ្រីស្ទអញ្ជើញយើងឲ្យធ្វើ ។ ខ្ញុំសូមលើកឡើងជាពិសេសពីពួកអ្នកផ្សព្វផ្សាយសាសនាទាំងនោះ ដែលត្រូវបានហៅឲ្យទទួលការចាត់តាំងផ្នែកសេវាកម្ម ។ ពួកគេគឺជាគំរូដល់យើងអំពីរបៀបដែលការបម្រើ (១) បើកដួងចិត្តឲ្យទទួលយកដំណឹងល្អនៃព្រះយេស៊ូវគ្រីស្ទ (២) អនុញ្ញាតឲ្យយើងទាំងអស់គ្នាបម្រើដោយមិនគិតពីកាលៈទេសៈរបស់យើង ហើយ (៣) នាំយកព្រះចេស្ដានៃព្រះគ្រីស្ទចូលមកក្នុងជីវិតរបស់យើង ។
ទីមួយ ការបម្រើបើកដួងចិត្តរបស់យើងឲ្យទទួលយកដំណឹងល្អ
នៅប្រមាណឆ្នាំ៩១ មុនគ.ស. អាំម៉ូន អ្នកផ្សព្វផ្សាយសាសនាក្នុងព្រះគម្ពីរមរមន បានណែនាំខ្លួនរបស់លោកទៅកាន់ស្តេចឡាម៉ូណៃ ដោយនិយាយថា « ទូលបង្គំចង់អាស្រ័យនៅក្នុងចំណោមប្រជាជននេះមួយរយៈពេលដែរ … [ ហើយ ] ទូលបង្គំនឹងធ្វើជាអ្នកបម្រើរបស់ទ្រង់វិញ » ។ ដោយសារតែការបម្រើរបស់លោកទៅកាន់ស្តេច អាំម៉ូនត្រូវបានប្រទានឱកាសឲ្យដើម្បី « និយាយដោយក្លាហានហើយប្រាប់[ ស្តេចឡាម៉ូណៃ ] … តើដោយអំណាចអ្វី » ដែលលោកបានធ្វើក្នុងការបម្រើរបស់លោក ។ ជាថ្នូរទៅវិញ ស្តេចបានសន្យាថា « អ្វីក៏ដោយដែល[ អាំម៉ូន ]ចង់បាន … [ ស្តេច ]នឹងឲ្យលោកដែរ » ។ ការស្នើសុំតែមួយគត់របស់អាំម៉ូនគឺ ទូលសុំឲ្យស្តេចស្ដាប់សារលិខិតនៃដំណឹងល្អរបស់ព្រះយេស៊ូវគ្រីស្ទ ។ ការបម្រើរបស់អាំម៉ូនបានផ្ដល់ជាលទ្ធផលក្នុងការនាំ « មនុស្សរាប់ពាន់នាក់[ ទៅកាន់ ]ការប្រែចិត្ត » ។
នៅសម័យរបស់យើង ការបម្រើបន្តដឹកនាំអ្នកដទៃទៅកាន់ដំណឹងល្អ ។ ស៊ីស្ទើរ ប៊ីវ៉ាន បានកំពុងបម្រើជាអ្នកផ្សព្វផ្សាយសាសនាផ្នែកការបង្រៀន នៅពេលគាត់បានចាប់ផ្ដើមមានបញ្ហាសុខភាព ដែលតម្រូវឲ្យគាត់ត្រឡប់ទៅផ្ទះវិញដើម្បីព្យាបាល ។ ជំនួសឲ្យការដោះលែង គាត់អាចបន្តបម្រើពីផ្ទះមក ជាអ្នកផ្សព្វផ្សាយសាសនាផ្នែកសេវាកម្ម ។
ខណៈពេលទៅលេងនៅសួនមួយ ស៊ីស្ទើរ ប៊ីវ៉ាន និងមិត្តភក្តិបានទទួលការបំផុសគំនិតឲ្យនិយាយជាមួយអ្នកម្តាយម្នាក់ដែលមានកូនតូចៗបួននាក់ ។ នៅថ្ងៃស្អែកឡើង ពួកគេបានត្រឡប់មកសួននោះវិញ ដោយអធិស្ឋានសុំឲ្យគ្រួសារនោះទៅទីនោះដែរ ។ ដោយជាអព្ភូតហេតុ ម្តាយរូបនោះបានអង្គុយនៅកន្លែងដដែល ដូចពីម្សិលមិញដែរ ។ លើកនេះស៊ីស្ទើរ ប៊ីវ៉ាន និងមិត្តភក្តិរបស់គាត់បានទៅនិយាយជាមួយម្តាយរូបនោះ សួរនាំម្តាយរូបនោះ ហើយបានដឹងថាគាត់ត្រូវការជំនួយខាងសាច់ឈាមជាខ្លាំង ។ ពួកគេបានផ្ដល់ជំនួយ ហើយបន្ទាប់មកបានអញ្ជើញគាត់ឲ្យរៀនអំពីដំណឹងល្អ ។
ដោយសារតែការបម្រើ និងការអញ្ជើញនោះ ម្តាយរូបនោះ និងកូនច្បងរបស់គាត់បានទទួលបុណ្យជ្រមុជទឹក កូនច្បងបន្ទាប់ក៏បានទទួលបុណ្យជ្រមុជទឹកមួយឆ្នាំក្រោយមកផងដែរ ។ ពួកគាត់បន្តនៅសកម្មនៅក្នុងសាសនាចក្រនៅសព្វថ្ងៃនេះ ។ ស៊ីស្ទើរ ប៊ីវ៉ាន បានដឹងថាបទពិសោធន៍នេះគឺត្រូវបានបំផុសគំនិតប្រកបដោយទេវភាព ហើយវា « ផ្ដល់ដល់[ គាត់ ]ថា [ គាត់ ]នៅចំកន្លែងដែលព្រះត្រូវការ[ គាត់ ]ឲ្យនៅ » ។
ដូចជាអាំម៉ូន និងស៊ីស្ទើរ ប៊ីវ៉ាន ផងដែរ នៅពេលយើងបម្រើអ្នកដទៃ នោះយើង « បង្ហាញនូវគំរូល្អទាំងឡាយដល់ពួកគេ » ហើយពួកគេចង់ដឹងពី « ហេតុនៃសេចក្តីសង្ឃឹម[ របស់យើង ] » ។
ព្រះយេស៊ូវអញ្ជើញយើងឲ្យ « ទៅចុះ ចូរអ្នកប្រព្រឹត្តបែបយ៉ាងដូច្នោះដែរ » ។
ទីពីរ ការបម្រើអនុញ្ញាតឲ្យយើងផ្ដល់ការងារបម្រើ ទោះជាកាលៈទេសៈរបស់យើងបែបណាក៏ដោយ
ប្រធាន រ័សុល អិម ណិលសុន បានអំពាវនាវឲ្យ « យុវជនគ្រប់រូប ដែលមានភាពស័ក្ដិសម ជាយុវជនដែលមានសមត្ថភាព ឲ្យរៀបចំខ្លួនដើម្បីបម្រើបេសកកម្ម » ហើយឲ្យយុវនារីគ្រប់រូបដែលមានសមត្ថភាព « អធិស្ឋានដើម្បីដឹងថា តើព្រះអម្ចាស់ឲ្យ[ នាង ]បម្រើបេសកកម្មដែរឬទេ » ។ លោកបានសន្យាថា « ការសម្រេចចិត្តរបស់អ្នកក្នុងការបម្រើបេសកកម្ម មិនថាជាអ្នកផ្សព្វផ្សាយដំណឹងល្អ ឬបេសកកម្មផ្នែកសេវាកម្មនោះទេ នឹងប្រទានពរដល់អ្នក និងមនុស្សជាច្រើនទៀត » ។ បេសកកម្មផ្នែកសេវាកម្មបានផ្លាស់ប្តូរនិយមន័យនៃពាក្យថា មានសមត្ថភាព ។ ឥឡូវនេះ យុវជន និងយុវនារីគ្រប់រូបដែលមានភាពស័ក្តិសម ដែលមានបំណងចង់បម្រើបេសកកម្មពេញម៉ោងសម្រាប់ព្រះអម្ចាស់ អាចធ្វើដូច្នេះបាន ដោយមាននូវការលើកលែងតិចតួចបំផុត ។
អែលឌើរ ហូលហ្គាដូ គឺជាគំរូមួយនៃការមានសមត្ថភាពបម្រើបាន មិនថាកាលៈទេសៈផ្ទាល់ខ្លួនបែបណានោះទេ ។ គាត់បានកើតមកដោយមានជម្ងឺហ្សែនដ៏កម្រមួយ ដែលរារាំងគាត់ពីការបម្រើជាអ្នកផ្សព្វផ្សាយសាសនាផ្នែកការបង្រៀន ។ អែលឌើរ ហូលហ្គាដូ ត្រូវបានហៅឲ្យបម្រើជាអ្នកផ្សព្វផ្សាយសាសនាផ្នែកសេវាកម្មនៅក្នុងឃ្លាំងរបស់ប៊ីស្សព ដែលគាត់អាចជួយអ្នកដទៃឲ្យទទួលបានជំនួយដែលពួកគេត្រូវការ ។ គាត់រៀបអីវ៉ាន់ដាក់លើធ្នើរ ដាក់បន្លែចូលក្នុងថង់ និងបត់ឡាំងក្រដាស ។
នៅពេលអែលឌើរ ហូលហ្គាដូ បានឡើងនិយាយនៅម៉ោងសាក្រាម៉ង់បន្ទាប់ពីបេសកកម្មរបស់គាត់ គាត់បានចែកចាយថា « ព្រះត្រូវការអ្នកផ្សព្វផ្សាយសាសនាផ្នែកសេវាកម្ម ។ ទ្រង់ត្រូវការបុគ្គលដែលស្រឡាញ់ និងបម្រើអ្នកដទៃ ។ បុគ្គលទាំងនេះដាក់ក្រដាសនៅបង្គន់ ដាក់ផ្កាខាត់ណាពណ៌បៃតងចូលក្នុងថង់ ធ្វើគ្រឿងសង្ហារិម និងមានចិត្តល្អចំពោះមនុស្សទូទៅ » ។
បងប្អូនមិនចាំបាច់ត្រូវការការចាត់តាំងឲ្យធ្វើការបម្រើ ឬពាក់ស្លាកឈ្មោះដើម្បីធ្វើល្អនោះទេ ។ រាល់ទង្វើនៃការបម្រើត្រូវបានទទួលស្គាល់ដោយព្រះអង្គសង្រ្គោះ ។ យើងទាំងអស់គ្នាអាចជួយអ្នកដទៃឲ្យមកកាន់ព្រះគ្រីស្ទបាន ដោយការបម្រើដែលពេញដោយសេចក្តីសប្បុរស និងក្តីស្រឡាញ់ ។ យើងទាំងអស់គ្នាអាចផ្ដល់ការងារបម្រើនៅក្នុងព្រះនាមរបស់ព្រះគ្រីស្ទទៅដល់មនុស្សម្នាក់បាន តាមរយៈព្រះចេស្ដានៃព្រះវិញ្ញាណបរិសុទ្ធ ហើយរស់នៅជាគំរូនៃសេចក្ដីជំនឿលើព្រះយេស៊ូវគ្រីស្ទ ។ ការបម្រើអនុញ្ញាតឲ្យយើងបង្ហាញថាខ្លួនយើងជាអ្នកលះបង់ដែលនៅមានជីវិតរស់ ជាអ្នកដែលព្រះទទួលយក ។
ព្រះយេស៊ូវអញ្ជើញយើងឲ្យ « ទៅចុះ ចូរអ្នកប្រព្រឹត្តបែបយ៉ាងដូច្នោះដែរ » ។
ទីបី ការបម្រើនាំមកនូវព្រះចេស្ដារបស់ព្រះគ្រីស្ទមកក្នុងជីវិតរបស់យើង
អ្នកផ្សព្វផ្សាយសាសនាវ័យក្មេងម្នាក់ដែលបានផ្ទេរពីការចាត់តាំងផ្នែកការបង្រៀន ទៅបេសកកម្មផ្នែកសេវាកម្ម បានពុះពារជាមួយនឹងបញ្ហាផ្ទាល់ខ្លួនមួយចំនួន ដែលនាំឲ្យគាត់ត្រូវការអំណាចព្យាបាលរបស់ព្រះគ្រីស្ទ ។ ការបម្រើដែលប្រកបដោយការឧទ្ទិសបាននាំមកនូវអំណាចនោះចូលមកក្នុងជីវិតរបស់គាត់ ។ គាត់បាននិយាយថា « ខ្ញុំមានអារម្មណ៍ថា នៅពេលខ្ញុំកំពុងជួបការលំបាក ខ្ញុំអាចមានអារម្មណ៍ថាព្រះគ្រីស្ទកំពុងលើកខ្ញុំឡើង ។ ការមើលឃើញទ្រង់ប្រទានពរដល់មនុស្ស មិនថានៅកន្លែងស្ដុកអាហារ នៅក្នុងព្រះវិហារបរិសុទ្ធ និងតាមរយៈដំណឹងល្អរបស់ទ្រង់ គឺជាអ្វីមួយពិសេសណាស់ » ។
អែលឌើររូបនេះចាប់ផ្តើមមានអំណរកាន់តែខ្លាំងឡើង ហើយភាពរីករាយដែលបានរកឃើញថ្មីរបស់គាត់បានផ្ដល់ពរដល់គាត់ និងក្រុមគ្រួសាររបស់គាត់ទាំងមូល ។ ព្រះវិញ្ញាណកាន់តែមានឡើងនៅក្នុងផ្ទះរបស់ពួកគេ ពួកគេបានចូលរួមព្រះវិហារបរិសុទ្ធជាមួយគ្នាកាន់តែទៀងទាត់ឡើង ហើយនៅក្នុងគ្រួសាររបស់ពួកគេក៏កាន់តែផ្ដោតលើព្រះគ្រីស្ទផងដែរ ។ អ្នកផ្សព្វផ្សាយសាសនារូបនេះជឿថា ព្រះគ្រីស្ទបានសង្គ្រោះជីវិតរបស់គាត់ ហើយបានប្រទានពរដល់គ្រួសារគាត់តាមរយៈការបម្រើ ។
ប្រធាន ណិលសុន បានបង្រៀនថា « ឆន្ទៈក្នុងការបម្រើ និងពង្រឹងអ្នកដទៃគឺជានិមិត្តរូបនៃការត្រៀមខ្លួនរបស់មនុស្សម្នាក់ដើម្បីបានជាសះស្បើយ » ដោយអំណាចដ៏ប្រោសលោះរបស់ព្រះអង្គសង្គ្រោះ ។
ព្រះយេស៊ូវអញ្ជើញយើងឲ្យ « ទៅចុះ ចូរអ្នកប្រព្រឹត្តបែបយ៉ាងដូច្នោះដែរ » ។
ពួកអ្នកផ្សព្វផ្សាយសាសនាផ្នែកសេវាកម្ម គឺជាគំរូនៃពួកសិស្សដែលប្រកបដោយការឧទ្ទិសរបស់ព្រះយេស៊ូវគ្រីស្ទ
នៅពេលបងប្អូន ឬសមាជិកណាម្នាក់ក្នុងគ្រួសារបងប្អូនបានទទួលពរពីការហៅក្នុងនាមជាអ្នកផ្សព្វផ្សាយសាសនាផ្នែកសេវាកម្ម នោះហើយគឺជាពេលវេលាដើម្បីអបអរ ។ ឥឡូវនេះ គ្រួសាររបស់បងប្អូននឹងមានអ្នកតំណាងឲ្យព្រះអម្ចាស់យេស៊ូវគ្រីស្ទ ដែលត្រូវបានញែកចេញ កំពុងតែរស់នៅក្នុងផ្ទះរបស់បងប្អូន ។ ការណ៍នោះនឹងផ្លាស់ប្តូរបងប្អូនទាំងអស់គ្នាសម្រាប់ការល្អ ។ មិនគួរមានការខកចិត្តក្នុងការហៅឲ្យបម្រើណាមួយនោះទេ ។ យើងច្រៀងថា « ខ្ញុំនឹងទៅដែលទ្រង់ឲ្យខ្ញុំទៅ » និង « ខ្ញុំនឹងធ្វើដែលទ្រង់ចង់ឲ្យខ្ញុំធ្វើ » ។ នេះគឺជាឱកាសដ៏ល្អមួយដើម្បីបង្ហាញថាយើងពិតជាធ្វើអ្វីដែលយើងនិយាយពិតប្រាកដមែន !
ចំពោះបងប្អូនទាំងអស់គ្នាដែលបម្រើ ហើយជាពិសេសចំពោះពួកអ្នកផ្សព្វផ្សាយសាសនាវ័យក្មេងជាង ៤,០០០នាក់ យើងស្រឡាញ់បងប្អូន ! ប្រសិនបើពួកអ្នកផ្សព្វផ្សាយសាសនាដែលមានការចាត់តាំងផ្នែកការបង្រៀនគឺជាព្រះឱស្ឋរបស់ព្រះអម្ចាស់ នោះបងប្អូនគឺជាព្រះហស្ដរបស់ព្រះអម្ចាស់ ហើយបងប្អូនមិនមែនជាពួកអ្នកផ្សព្វផ្សាយសាសនាដែលជាជម្រើសទីពីរនោះទេ ។ បងប្អូនម្នាក់ៗគឺសំខាន់ចំពោះការប្រមូលសាសន៍អ៊ីស្រាអែល ។ ប្រធាន ណិលសុន បង្រៀនថា « រាល់ពេលដែលយើងធ្វើអ្វីមួយដើម្បីជួយនរណាម្នាក់ … ដើម្បីចុះ និងរក្សាសេចក្តីសញ្ញារបស់ពួកគេជាមួយនឹងព្រះ នោះយើងកំពុងជួយប្រមូលពួកសាសន៍អ៊ីស្រាអែលហើយ » ។
បងប្អូនដែលជាអ្នកផ្សព្វផ្សាយសាសនាផ្នែកសេវាកម្ម កំពុងប្រមូលសាសន៍អ៊ីស្រាអែលតាមរបៀបជាច្រើន ហើយការបម្រើរបស់បងប្អូនបានផ្លាស់ប្តូរជីវិតជាច្រើន ។ ជាញឹកញាប់ បងប្អូនមិនដឹងទេថាតើនរណាជាអ្នកទទួលផលពីការបម្រើរបស់បងប្អូន ប៉ុន្តែព្រះជ្រាបដឹង ។ សូមចងចាំជានិច្ចថា « ដែលអ្នករាល់គ្នាបានធ្វើការ[ បម្រើ ]ដល់អ្នកតូចបំផុតក្នុងពួកបងប្អូន … បានធ្វើ[ ការបម្រើដល់ទ្រង់ ]ដែរ » ។ យើងឮសំឡេងរបស់បងប្អូន នៅពេលបងប្អូនធ្វើការស្ម័គ្រចិត្តនៅមជ្ឈមណ្ឌលហៅទូរសព្ទរបស់សាសនាចក្រ ។ យើងឃើញស្នាមញញឹមរបស់បងប្អូននៅពេលបងប្អូនជួយការងារក្នុងសហគមន៍ ។ ហើយយើងឃើញពន្លឺរបស់បងប្អូន ពេលបងប្អូនបម្រើនៅក្នុងព្រះវិហារបរិសុទ្ធនៅជុំវិញពិភពលោក ។ បងប្អូនផ្ដល់អាហារដល់អ្នកអត់ឃ្លាន ស្លៀកពាក់ឲ្យអ្នកអាក្រាត និងផ្ដល់ទឹកដល់អ្នកដែលស្រេក ។
យើងត្រូវការបងប្អូនទាំងអស់គ្នាឲ្យទៅចុះ ហើយចូរប្រព្រឹត្តបែបយ៉ាងដូច្នោះដែរ ។
ការបម្រើគឺជាសរសៃឈាមនៃជីវិតជាសិស្សរបស់ព្រះគ្រីស្ទ
ការបម្រើមានអំណាចដើម្បីបើកដួងចិត្តទាំងឡាយទៅកាន់ដំណឹងល្អ ហើយអនុញ្ញាតឲ្យយើងទាំងអស់គ្នាថ្វាយព្រលឹងទាំងមូលរបស់យើងដល់ព្រះគ្រីស្ទ ។ វាផ្លាស់ប្តូរដួងចិត្តរបស់យើងដើម្បីប្រែក្លាយកាន់តែដូចទ្រង់ ហើយនៅក្នុងដំណើរការនេះ យើងលើកអ្នកដទៃឡើងដូចគ្នា ។ ប្រធាន ណិលសុន នៅគ្រាមួយបានសួរថា « នៅក្នុងពិភពលោកដែលត្រូវវាយដោយការពុកផុយខាងវិញ្ញាណនេះ តើបុគ្គលម្នាក់ … អាចធ្វើឲ្យមានការខុសប្លែកឬទេ ? » ចម្លើយរបស់លោក ៖ « ពិតជាអាច !… ‹ រាស្រ្តនៃសេចក្តីសញ្ញារបស់ព្រះអម្ចាស់ … បំពាក់ … ដោយព្រះចេស្ដារបស់ព្រះនៅក្នុងសិរីរុងរឿងដ៏មហិមា › … អាចលើកស្ទួយដល់ជីវិតរបស់មនុស្សលោកទាំងអស់ » ។ តាមរយៈការបម្រើ យើងផ្លាស់ប្តូរដួងចិត្តជាច្រើន—និងពិភពលោក ។
ព្រះគ្រីស្ទ « បានយាងចុះឡើងធ្វើការល្អ » ។ ទ្រង់បានព្យាបាលអ្នកឈឺ បានធ្វើឲ្យមនុស្សខ្វាក់មើលឃើញ ហើយទៅសួរសុខទុក្ខអ្នកដែលត្រូវគេបណ្តេញចេញ ។ ទ្រង់ចម្អិនអាហារ ជួយនៅពិធីមង្គលការ ហើយប្រទានអាហារដល់មនុស្សរាប់ពាន់នាក់ដែលស្រេកឃ្លាន ។ នៅពេលយើងផ្តល់ការបម្រើដល់មនុស្សម្នាក់នៅក្នុងព្រះនាមរបស់ព្រះគ្រីស្ទ នោះយើងកាន់តែបរិសុទ្ធ និងមានភាពស័ក្ដិសមដើម្បីទទួលអំណោយទាននៃជីវិតដ៏នៅអស់កល្បជានិច្ច ។ ព្រះយេស៊ូវគ្រីស្ទមានព្រះជន្មរស់ ។ ទ្រង់ជាព្រះអង្គសង្គ្រោះរបស់បងប្អូន និងខ្ញុំ ។ ទ្រង់គឺជាព្រះប្រោសលោះរបស់យើង ។ ទ្រង់គឺជាគំរូដ៏អស្ចារ្យនៃការផ្ដល់ការងារបម្រើ ។ ខ្ញុំសូមអញ្ជើញយើងម្នាក់ៗឲ្យទៅ ហើយប្រព្រឹត្តបែបយ៉ាងដូច្នោះដែរ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕