ការលើកដាក់ព្រះនាមនៃព្រះយេស៊ូវគ្រីស្ទ

ដោយអែលឌើរ ឌែល ជី រិនឡាន់

ក្នុងកូរ៉ុមនៃពួកសាវកដប់ពីរនាក់

កាលណាយើងកាន់តែកំណត់អត្តសញ្ញាណយើងតាមព្រះយេស៊ូវគ្រីស្ទ និងចងចាំទ្រង់ នោះយើងកាន់តែចង់ក្លាយដូចជាទ្រង់ ។

នៅឆ្នាំ២០១៨ សាកលវិទ្យាល័យយូថាហ៍បានបង្កើតឋានៈសាស្រ្តាចារ្យដ៏ពិសេសមួយ ដែលមានឈ្មោះថា « វេជ្ជបណ្ឌិត រ័សុល អិម ណិលសុន និង ដេនហ្សែល ដបុលយូ ណិលសុន ប្រធានផ្នែកវះកាត់បេះដូង ( Cardiothoracic Surgery ) »—ពាក្យ cardioមានន័យថា « បេះដូង » ហើយ thoracicមានន័យថា « ដើមទ្រូង » ។ វាផ្ដល់ជាកិត្តិយសដល់ការងារដ៏សំខាន់របស់ប្រធាន ណិលសុន ក្នុងនាមជាគ្រូពេទ្យវះកាត់បេះដូង និងការគាំទ្រដែលលោកទទួលបានពីភរិយារបស់លោក ដេនហ្សែល ដែលបានលាចាកលោកទៅហើយ ។ ឋានៈសាស្រ្តាចារ្យនេះទទួលបានប្រាក់ពីមូលនិធិមួយ ដែលត្រូវបានរចនាឡើងដើម្បីប្រើប្រាស់បានរហូតដល់ថ្ងៃខាងមុខទៀត ។ បុគ្គលដែលត្រូវបានជ្រើសរើសសម្រាប់ឋានៈសាស្រ្តាចារ្យដ៏មានកិត្យានុភាពបែបនេះ ទទួលបានការទទួលស្គាល់ ការគាំទ្រប្រាក់ខែ និងមូលនិធិស្រាវជ្រាវ ។

គ្រូពេទ្យវះកាត់ដំបូងគេដែលត្រូវបានជ្រើសរើស ដើម្បីកាន់ឋានៈសាស្រ្តាចារ្យនេះគឺវេជ្ជបណ្ឌិត ក្រេហ្គ អេច សេលមែន ជាគ្រូពេទ្យវះកាត់បេះដូងដ៏ជំនាញ ដែលមិនមែនជាសមាជិកសាសនាចក្រយើងទេ ។ នៅឯពិធីប្រគល់ឋានៈសាស្រ្តាចារ្យនេះដល់វេជ្ជបណ្ឌិត សេលមែន មានភ្ញៀវកិត្តិយសសំខាន់ៗជាច្រើនចូលរួម រួមទាំងប្រធាន ណិលសុន និងភរិយារបស់លោកស៊ីស្ទើរ វេនឌី ដបុលយូ ណិលសុន ផងដែរ ។ នៅអំឡុងការប្រជុំនេះ ប្រធាន ណិលសុន បានថ្លែងយ៉ាងរាបសាអំពីការត្រួសត្រាយផ្លូវនៃអាជីពវះកាត់របស់លោក ។

បន្ទាប់មក វេជ្ជបណ្ឌិត សេលមែន បានចែកចាយពីអត្ថន័យនៃការតែងតាំងឲ្យទទួលបានឋានៈសាស្រ្តាចារ្យនេះចំពោះគាត់ ។ គាត់បានរៀបរាប់ថា បួនថ្ងៃមុន បន្ទាប់ពីមួយថ្ងៃពេញនៅក្នុងបន្ទប់វះកាត់ គាត់បានរកឃើញថា អ្នកជំងឺម្នាក់របស់គាត់ត្រូវត្រឡប់មកវះកាត់ម្ដងទៀត ។ គាត់អស់កម្លាំង និងខកចិត្ត ដោយដឹងថា គាត់នឹងត្រូវចំណាយពេលមួយយប់ទៀតនៅក្នុងមន្ទីរពេទ្យ ។

វេជ្ជបណ្ឌិត សេលមែន ជាមួយស៊ីស្ទើរ និងប្រធានណិលសុន

ល្ងាចនេះ វេជ្ជបណ្ឌិត សេលមែន បានមានការសន្ទនាមួយជាមួយខ្លួនឯងផ្ទាល់ ដែលផ្លាស់ប្ដូរជីវិតគាត់ ។ នៅពេលនោះ គាត់គិតថា ៖ « នៅថ្ងៃសុក្រ ខ្ញុំនឹងទទួលបានការតែងតាំងឋានៈសាស្រ្តាចារ្យ ដែលដាក់ឈ្មោះតាមវេជ្ជបណ្ឌិត ណិលសុន ។ លោកតែងត្រូវបានគេស្គាល់ថាជាមនុស្សម្នាក់ ដែលគ្រប់គ្រងអារម្មណ៍របស់លោកបានជានិច្ច ប្រព្រឹត្តដាក់មនុស្សគ្រប់គ្នាដោយការគោរព និងមិនដែលខឹងច្រឡោតឡើយ ។ ឥឡូវនេះ ឈ្មោះរបស់ខ្ញុំនឹងត្រូវបានភ្ជាប់ជាមួយឈ្មោះលោក ខ្ញុំត្រូវព្យាយាមធ្វើដូចលោកឲ្យបានកាន់តែច្រើន » ។ វេជ្ជបណ្ឌិត សេលមែន គឺជាគ្រូពេទ្យវះកាត់ដែលចេះគិតដល់អ្នកដទៃខ្លាំងរួចទៅហើយ ។ ប៉ុន្ដែគាត់ចង់ក្លាយកាន់តែប្រសើរជាងនេះ ។

កាលពីមុន ក្រុមវះកាត់របស់គាត់អាចដឹងបានពីការអស់កម្លាំង និងការអន្ទះសារបស់គាត់ ដោយសារគាត់អាចបណ្ដោយឲ្យវាបង្ហាញចេញទៅតាមកាយវិការ និងការលើកដាក់សំឡេងរបស់គាត់ ។ ប៉ុន្តែនៅក្នុងបន្ទប់វះកាត់នៅយប់នោះ វេជ្ជបណ្ឌិត សេលមែន បានខិតខំដោយមានមនសិការដើម្បីគាំទ្រ និងយោគយល់ដល់ក្រុមរបស់គាត់ជាពិសេស ។ គាត់មានអារម្មណ៍ថា វាធ្វើឲ្យមានភាពខុសប្លែក ហើយបានប្តេជ្ញាចិត្តបន្តព្យាយាមធ្វើឲ្យកាន់តែដូចវេជ្ជបណ្ឌិត ណិលសុន ។

វេជ្ជបណ្ឌិត សេលមែន ពាក់កន្លាស់ RMN (<nb/>រ.អ.ណ.<nb/>)

ប្រាំឆ្នាំក្រោយមក ប្រធាន ណិលសុន បានបរិច្ចាគឯកសារវិជ្ជាជីវៈរបស់លោកដល់សាកលវិទ្យាល័យយូថាហ៍ ។ ឥស្សរជនមកពីសាកលវិទ្យាល័យបានមកថ្លែងអំណរគុណដល់ប្រធាន ណិលសុន ជាផ្លូវការ ។ នៅអំឡុងព្រឹត្តិការណ៍នេះ វេជ្ជបណ្ឌិត សេលមែន បានឡើងថ្លែងម្តងទៀត ។ ដោយយោងទៅអក្សរកាត់របស់ប្រធាន ណិលសុន RMN ( រ.អ.ណ. ) គាត់បានថ្លែងថា « មានសីលក្ខន្ធ ‹ RMN › ដែលឥឡូវនេះជ្រួតជ្រាតពេញផ្នែកវះកាត់បេះដូងនៅសាកលវិទ្យាល័យយូថាហ៍ » ។

នៅក្នុងស្ថានភាពដ៏អន្ទះសា វេជ្ជបណ្ឌិត សេលមែន បានពន្យល់ថា ៖ « ខ្ញុំធ្វើអ្វីដែលយើងបង្រៀនសិក្ខាកាមរបស់យើងឲ្យធ្វើឥឡូវនេះ—ផ្ចង់អារម្មណ៍ ឈប់គិតពីវាទៀត ហើយធ្វើឲ្យអស់ពីសមត្ថភាពដែលយើងអាចធ្វើបាន ។ យើងរស់នៅតាមសីលក្ខន្ធនេះជារៀងរាល់ថ្ងៃ ។ យើងចែកកន្លាស់ដល់សមាជិកគ្រប់រូបក្នុងផ្នែកវះកាត់ និងដល់សិក្ខាកាមថ្មីទាំងអស់ ។ នៅផ្នែកខាងក្រោមកន្លាស់នោះមានអក្សរ ‹ RMN › ។ សីលក្ខន្ធ RMN គឺជាមូលដ្ឋានគ្រឹះសម្រាប់ការបំពាក់បំប៉នរបស់យើង ហើយយើងបង្រៀនវាដល់មនុស្សគ្រប់គ្នា » ។ វេជ្ជបណ្ឌិត សេលមែន បានកែលម្អអាកប្បកិរិយា និងបំណងប្រាថ្នាពីមុនរបស់គាត់ដោយចេតនា ព្រោះឥឡូវនេះ ឈ្មោះរបស់គាត់បានភ្ជាប់ទៅនឹងឈ្មោះរបស់ប្រធាន ណិលសុន ។

លំហូរព្រឹត្តិការណ៍ដែលពាក់ព័ន្ធវេជ្ជបណ្ឌិត សេលមែន នេះបានធ្វើឲ្យខ្ញុំសួរខ្លួនឯងថា « តើខ្ញុំបានផ្លាស់ប្ដូរដោយរបៀបណា តាំងពីខ្ញុំបានភ្ជាប់ឈ្មោះខ្ញុំជាមួយព្រះនាមរបស់ព្រះយេស៊ូវគ្រីស្ទមក ? ជាលទ្ធផល តើខ្ញុំបានអនុវត្តតាមសីលក្ខន្ធដូចព្រះគ្រីស្ទដែរឬទេ ? តើខ្ញុំពិតជាបានព្យាយាមក្លាយជាកាន់តែប្រសើរ និងកាន់តែដូចទ្រង់ដែរឬទេ ? »

ក្នុងបទពិសោធន៍របស់វេជ្ជបណ្ឌិត សេលមែន យើងអាចមើលឃើញភាពស្របគ្នាយ៉ាងហោចណាស់ប្រាំ ទៅនឹងដំណើរការដែលយើងលើកដាក់មកលើខ្លួនយើងនូវព្រះនាមរបស់ព្រះយេស៊ូវគ្រីស្ទ ។ ទោះជាដំណើរការនោះចាប់ផ្តើមជាមួយនឹងពិធីបុណ្យជ្រមុជទឹកក្ដី ក៏វាមិនពេញលេញដែរ រហូតដល់យើងបានកាន់តែបរិសុទ្ធ និងក្លាយកាន់តែដូចជាទ្រង់សិន ។

ភាពស្របគ្នាដំបូងគឺការកំណត់អត្តសញ្ញាណ ។ ការតែងតាំងវេជ្ជបណ្ឌិត សេលមែន ឲ្យមានឋានៈសាស្ដ្រាចារ្យណិលសុន បានភ្ជាប់ឈ្មោះរបស់គាត់ទៅនឹងឈ្មោះរបស់ប្រធាន ណិលសុន ហើយវេជ្ជបណ្ឌិត សេលមែន បានចាប់ផ្ដើមកំណត់អត្តសញ្ញាណតាមប្រធាន ណិលសុន ។ នៅពេលយើងលើកដាក់មកលើខ្លួនយើងនូវព្រះនាមរបស់ព្រះយេស៊ូវគ្រីស្ទ នោះយើងភ្ជាប់ឈ្មោះយើងទៅនឹងព្រះនាមរបស់ទ្រង់ ។ យើងកំណត់អត្តសញ្ញាណយើងតាមទ្រង់ ។ យើងរីករាយដែលគេស្គាល់យើងថាជាគ្រីស្ទាន ។ យើងទទួលស្គាល់ព្រះអង្គសង្គ្រោះ ហើយឈរយ៉ាងក្លាហានដើម្បីត្រូវបានរាប់ជារាស្ដ្ររបស់ទ្រង់ ។

ទាក់ទងយ៉ាងជិតស្និទ្ធទៅនឹងការកំណត់អត្តសញ្ញាណគឺភាពស្របគ្នាមួយទៀត—គឺការចងចាំ ។ នៅពេលវេជ្ជបណ្ឌិត សេលមែន ដើរចូលក្នុងការិយាល័យរបស់គាត់ គាត់មើលទៅមេដាយដែលគាត់បានទទួល នៅពេលគាត់ទទួលបានការតែងតាំងឋានៈសាស្ដ្រាចារ្យណិលសុន ។ មេដាយនេះរំឭកគាត់ជារៀងរាល់ថ្ងៃអំពីសីលក្ខន្ធ RMN ។ សម្រាប់ពួកយើង ការទទួលទានសាក្រាម៉ង់ជារៀងរាល់សប្តាហ៍ ជួយយើងឲ្យចងចាំព្រះយេស៊ូវគ្រីស្ទពេញមួយសប្តាហ៍ ។ នៅពេលយើងទទួលទានសាក្រាម៉ង់ យើងធ្វើដូច្នេះដោយនូវការចងចាំដល់ទ្រង់ ដែលបានបង់ថ្លៃដើម្បីប្រោសលោះយើង ។ យើងរំឭកសេចក្ដីសញ្ញាដើម្បីចងចាំទ្រង់ម្ដងទៀត ទទួលស្គាល់ភាពអស្ចារ្យរបស់ទ្រង់ និងកោតសរសើរសេចក្ដីល្អរបស់ទ្រង់ ។ យើងទទួលស្គាល់ម្តងហើយម្តងទៀតថា វាមានតែនៅក្នុង និងតាមរយៈព្រះគុណរបស់ទ្រង់ប៉ុណ្ណោះ ទើបយើងត្រូវបានសង្គ្រោះពីការស្លាប់ខាងរូបកាយ និងខាងវិញ្ញាណ ។

ការចងចាំមានន័យថា យើងធ្វើតាមដំបូន្មានដែលផ្តល់ដោយព្យាការីអាលម៉ាក្នុងព្រះគម្ពីរមរមន ។ យើង « ធ្វើអ្វីៗទាំងអស់ចំពោះព្រះអម្ចាស់ ហើយទោះជាទីណាដែល [ យើង ] ទៅ គឺ [ យើង ] ទៅក្នុងព្រះអម្ចាស់ … [ យើង ] បំបែរមនោសញ្ចេតនាទាំងអស់របស់ [ យើង ] ឆ្ពោះទៅរកព្រះអម្ចាស់វិញ … [ ហើយយើង ] ដាក់ចិត្តមេត្រីរបស់ [ យើង ] ទៅលើព្រះអម្ចាស់ដរាបតទៅ » ។ សូម្បីពេលយើងជាប់រវល់នឹងកិច្ចការផ្សេងទៀតក្ដី ក៏យើងនៅតែនឹកចាំដល់ទ្រង់ គឺដូចជាយើងចាំឈ្មោះខ្លួនឯង មិនថាយើងផ្ដោតលើអ្វីផ្សេងនោះទេ ។

លទ្ធផលដ៏ធំនៃការចងចាំអ្វីដែលព្រះអង្គសង្គ្រោះបានធ្វើសម្រាប់យើង គឺជាភាពស្របគ្នាទីបី—ការធ្វើត្រាប់តាម ។ វេជ្ជបណ្ឌិត សេលមែន បានចាប់ផ្ដើមធ្វើត្រាប់តាមប្រធាន ណិលសុន និងសីលក្ខន្ធ RMN ។ ខ្ញុំជឿថា សីលក្ខន្ធរបស់ប្រធាន ណិលសុន គឺជាការបង្ហាញដ៏សាមញ្ញអំពីភាពជាសិស្សរបស់ព្រះយេស៊ូវគ្រីស្ទពេញមួយជីវិតរបស់លោក ។ សម្រាប់ពួកយើង កាលណាយើងកាន់តែកំណត់អត្តសញ្ញាណយើងតាមព្រះយេស៊ូវគ្រីស្ទ និងចងចាំទ្រង់ នោះយើងកាន់តែចង់ក្លាយដូចជាទ្រង់ ។ ក្នុងនាមជាសិស្សរបស់ទ្រង់ យើងផ្លាស់ប្ដូរបានកាន់តែប្រសើរ នៅពេលយើងផ្ដោតលើទ្រង់កាន់តែខ្លាំងឡើង ជាងពេលយើងផ្ដោតលើខ្លួនយើង ។ យើងខិតខំក្លាយដូចជាទ្រង់ និងព្យាយាមដើម្បីទទួលបានពរជ័យឲ្យមានគុណលក្ខណៈរបស់ទ្រង់ ។ យើងអធិស្ឋានយ៉ាងក្លៀវក្លាដើម្បីបានពោរពេញដោយសេចក្ដីសប្បុរស ជាសេចក្តីស្រឡាញ់ដ៏សុទ្ធសាធរបស់ព្រះគ្រីស្ទ ។

ដូចដែលប្រធាន ណិលសុន បានបង្រៀននៅខែមេសា ៖ « នៅពេលសេចក្ដីសប្បុរសក្លាយទៅជានិស្ស័យរបស់យើង នោះយើងនឹងឈប់និយាយបន្ទាបអ្នកដទៃ ។ យើងនឹងឈប់វិនិច្ឆ័យអ្នកដទៃ ។ យើងនឹងមានសេចក្ដីសប្បុរសចំពោះអ្នកទាំងឡាយណា ដែលមានស្ថានភាពជីវិតផ្សេងៗទាំងអស់ ។ សេចក្ដីសប្បុរសចំពោះមនុស្សគ្រប់រូប … គឺសំខាន់ណាស់នៅក្នុងការរីកចម្រើនរបស់យើង ។ សេចក្ដីសប្បុរសគឺជាគ្រឹះនៃចរិតលក្ខណៈដូចជាព្រះ » ។ ទន្ទឹមនឹងសេចក្ដីសប្បុរស យើងសង្វាត « បណ្ដុះ … ហើយពង្រីកវាឲ្យបានច្រើនជាងមុន » នូវអំណោយទានខាងវិញ្ញាណផ្សេងទៀតមកពីព្រះអង្គសង្គ្រោះ រួមមានសេចក្ដីទៀងត្រង់ ការអត់ធ្មត់ និងការឧស្សាហ៍ព្យាយាមជាដើម ។

ការត្រាប់តាមព្រះយេស៊ូវគ្រីស្ទនាំយើងទៅរកភាពស្របគ្នាទីបួន—ការតម្រឹមតាមព្រះរាជបំណងរបស់ទ្រង់ ។ យើងចូលរួមជាមួយទ្រង់នៅក្នុងកិច្ចការរបស់ទ្រង់ ។ ក្នុងនាមជាគ្រូពេទ្យវះកាត់ វេជ្ជបណ្ឌិត ណិលសុន ត្រូវបានគេស្គាល់ថាជាគ្រូបង្រៀន អ្នកព្យាបាល និងអ្នកស្រាវជ្រាវ ។ កន្លាស់ដែលប្រើនៅក្នុងផ្នែកវះកាត់របស់វេជ្ជបណ្ឌិត សេលមែន សង្កត់ធ្ងន់លើការខិតខំទាំងនេះ ដែលបង្ហាញពីពាក្យ បង្រៀន ព្យាបាល និង រុករក ។ សម្រាប់ពួកយើង ផ្នែកមួយនៃការលើកដាក់មកលើខ្លួនយើងនូវព្រះនាមរបស់ព្រះយេស៊ូវគ្រីស្ទ ពាក់ព័ន្ធនឹងការតម្រឹមគោលដៅរបស់យើងឲ្យត្រូវតាមគោលដៅរបស់ទ្រង់ ដោយមានឆន្ទៈ ចេតនា និងដោយក្លៀវក្លា ។ យើងចូលរួមជាមួយទ្រង់នៅក្នុងកិច្ចការរបស់ទ្រង់ នៅពេលយើង « ស្រឡាញ់ ចែកចាយ និងអញ្ជើញ » ។ យើងចូលរួមជាមួយទ្រង់នៅក្នុងកិច្ចការរបស់ទ្រង់ នៅពេលយើងផ្ដល់ការងារបម្រើដល់អ្នកដទៃ ជាពិសេសអ្នកងាយរងគ្រោះ និងអ្នកដែលមានរបួស ខ្ទេចខ្ទាំ ឬគ្រាំគ្រាដោយសារបទពិសោធន៍នៅលើផែនដីរបស់ពួកគេ ។

ដូច្នេះ យើងលើកដាក់មកលើខ្លួនយើងនូវព្រះនាមរបស់ព្រះយេស៊ូវគ្រីស្ទបានកាន់តែពេញលេញ តាមរយៈការកំណត់អត្តសញ្ញាណ ការចងចាំ ការធ្វើត្រាប់តាម និងការតម្រឹមតាម ។ ការធ្វើរឿងទាំងបួននេះនាំយើងទៅរកភាពស្របគ្នាទីប្រាំ—ការពង្រឹងអំណាច ។ យើងទទួលបានព្រះចេស្ដា និងពរជ័យរបស់ព្រះនៅក្នុងជីវិតរបស់យើង ។ ឋានៈសាស្រ្តាចារ្យណិលសុន ផ្តល់ឲ្យវេជ្ជបណ្ឌិត សេលមែន នូវការទទួលស្គាល់ និងមូលនិធិគាំទ្រដែលគាត់កំពុងប្រើប្រាស់ដើម្បីផ្លាស់ប្ដូរវប្បធម៌នៅក្នុងផ្នែកវះកាត់របស់គាត់ ។ គាត់អនុវត្ត « អំណោយទាននៃអំណាច » នេះដើម្បីជួយដល់អ្នកដទៃ ។ តាមរបៀបស្រដៀងគ្នានេះ នៅពេលយើងលើកដាក់មកលើខ្លួនយើងនូវព្រះនាមរបស់ព្រះអង្គសង្គ្រោះ នោះព្រះវរបិតាសួគ៌របស់យើងនឹងប្រទានពរឲ្យយើងមានព្រះចេស្ដារបស់ទ្រង់ ដើម្បីជួយយើងឲ្យបំពេញបេសកកម្មរបស់យើងនៅក្នុងជីវិតរមែងស្លាប់ ។

នៅពេលយើងចុះសេចក្ដីសញ្ញាបន្ថែមជាមួយព្រះ យើងលើកដាក់មកលើខ្លួនយើងនូវព្រះនាមរបស់ព្រះយេស៊ូវគ្រីស្ទកាន់តែពេញលេញជាងមុន ។ ជាលទ្ធផល ព្រះប្រទានពរឲ្យយើងមានព្រះចេស្ដារបស់ទ្រង់កាន់តែច្រើន ។ ដូចដែលប្រធាន ណិលសុន បានបង្រៀន ៖ « បុគ្គលម្នាក់ៗដែលចុះសេចក្តីសញ្ញានៅក្នុងអាងជ្រមុជទឹក និងនៅក្នុងព្រះវិហារបរិសុទ្ធ—ហើយរក្សាសេចក្តីសញ្ញាទាំងនោះ—គឺបានទទួលព្រះចេស្តារបស់ព្រះយេស៊ូវគ្រីស្ទ កាន់តែច្រើនឡើង ។ … រង្វាន់នៃការរក្សាសេចក្តីសញ្ញាជាមួយនឹងព្រះ គឺជាព្រះចេស្តាមកពីស្ថានសួគ៌ … ដែលពង្រឹងយើង កាន់តែខ្លាំង ឲ្យទប់ទល់នឹងការសាកល្បង ការល្បួង និងការឈឺចាប់ទាំងឡាយរបស់យើង » ។

យើង កាន់តែ ងាយទទួលអារម្មណ៍ខាងវិញ្ញាណ ។ យើង កាន់តែ មានភាពក្លាហានដើម្បីប្រឈមមុខនឹងកាលៈទេសៈ ដែលហាក់ដូចជាមិនអាចធ្វើបាន ។ យើង កាន់តែ រឹងប៉ឹងនៅក្នុងការប្តេជ្ញាចិត្តរបស់យើង ដើម្បីធ្វើតាមព្រះយេស៊ូវគ្រីស្ទ ។ យើង កាន់តែ ឆាប់ប្រែចិត្ត និងវិលមករកទ្រង់វិញ កាលណាយើងប្រព្រឹត្តរំលង ។ យើងចែកចាយដំណឹងល្អរបស់ទ្រង់បាន កាន់តែប្រសើរ ដោយព្រះចេស្ដា និងសិទ្ធិអំណាចរបស់ទ្រង់ ។ យើងជួយមនុស្សទ័លក្រ ខណៈដែលលែងសូវមានការវិនិច្ឆ័យ ទោះតិច ឬច្រើនក្តី ។ យើងបន្ដផ្ដាច់ពីអំពើបាបទាំងឡាយរបស់យើង ។ យើងមានសេចក្ដីសុខសាន្ដកាន់តែខ្លាំង ហើយយើងកាន់តែរីករាយឡើង ព្រោះយើងអាចរីករាយបានជានិច្ច ។ សិរីល្អរបស់ទ្រង់នឹងនៅជុំវិញយើង ហើយពួកទេវតារបស់ទ្រង់តាមថែរក្សាពួកយើង ។

ព្រះអង្គសង្គ្រោះអញ្ជើញយើងឲ្យ « ចូលមកឯព្រះវរបិតា ដោយនូវព្រះនាមរបស់យើង ហើយនៅវេលាកំណត់ ឲ្យបានទទួលនូវភាពពោរពេញរបស់ទ្រង់ » ។ ខ្ញុំចង់ឲ្យប្អូនធ្វើដូចនេះ ។ សូមចូលមកឯព្រះវរបិតាសួគ៌របស់យើង ។ សូមលើកដាក់មកលើខ្លួនបងប្អូននូវព្រះនាមនៃព្រះយេស៊ូវគ្រីស្ទ ។ សូមកំណត់អត្តសញ្ញាណតាមទ្រង់ ។ សូមចងចាំទ្រង់ជានិច្ច ។ សូមខិតខំក្លាយដូចជាទ្រង់ ។ សូមចូលរួមជាមួយទ្រង់នៅក្នុងកិច្ចការរបស់ទ្រង់ ។ សូមទទួលបានព្រះចេស្ដា និងពរជ័យរបស់ទ្រង់នៅក្នុងជីវិតរបស់បងប្អូន ។ សូមឆ្លាក់ព្រះនាមរបស់ទ្រង់នៅក្នុងដួងចិត្តរបស់បងប្អូន ដោយមានឆន្ទៈ និងចេតនា ។ ការណ៍នេះផ្ដល់ឲ្យបងប្អូនមាន « ជំហរដ៏ប្រសើរ » នៅចំពោះព្រះភក្រ្ដព្រះ ហើយធ្វើឲ្យបងប្អូនស័ក្ដិសមនឹងការគាំទ្ររបស់ព្រះអង្គសង្គ្រោះជំនួសបងប្អូន ។ បងប្អូននឹងក្លាយជាអ្នកគ្រងមរតកដ៏តម្កើងឡើងក្នុងនគររបស់ព្រះវរបិតាយើងនៅស្ថានសួគ៌ ជាអ្នកគ្រងមរតកជាមួយនឹងព្រះបុត្រច្បងរបស់ទ្រង់ គឺព្រះអង្គសង្គ្រោះ និងព្រះប្រោសលោះជាទីស្រឡាញ់របស់យើង ។

ទ្រង់មានព្រះជន្មរស់ ។ ខ្ញុំដឹងពីរឿងនេះយ៉ាងច្បាស់ ។ ទ្រង់ស្រឡាញ់បងប្អូន ។ ទ្រង់បានលះបង់ព្រះជន្មទ្រង់ដើម្បីបងប្អូន ។ ទ្រង់អង្វរបងប្អូនឲ្យចូលមកឯព្រះវរបិតាតាមរយៈទ្រង់ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕