អំណាចនៃការផ្ដល់ការងារបម្រើដល់មនុស្សម្នាក់
នៅពេលដែលយើងធ្វើការងារបម្រើដល់មនុស្សម្នាក់ យើងអញ្ជើញមនុស្សម្នាក់ឲ្យមករកព្រះគ្រីស្ទ និងថ្វាយបង្គំនៅក្នុងដំណាក់នៃព្រះអម្ចាស់ ។
បងប្អូនប្រុសស្រី សូមអរគុណចំពោះភក្ដីភាពដ៏ស្មោះត្រង់របស់បងប្អូនក្នុងការមករកព្រះយេស៊ូវគ្រីស្ទក្នុងអំឡុងពេលដ៏លំបាកទាំងនេះ ។ បងប្អូនអស្ចារ្យខ្លាំងណាស់ បងប្អូនពិតជាស្រស់ស្អាតណាស់ បងប្អូនម្នាក់ៗគឺជាបុត្ររបស់ព្រះ ។ វាជាការអធិស្ឋានរបស់ខ្ញុំសូមឲ្យយើងនឹងស្គាល់ឥទ្ធិពលនៃព្រះវិញ្ញាណបរិសុទ្ធនៅពេលដែលយើងធ្វើជា ហើយជួយគ្នាទៅវិញទៅមកដើម្បីធ្វើជាសិស្សដ៏មានភក្ដីភាពពិតប្រាកដរបស់ព្រះយេស៊ូវគ្រីស្ទ និងទទួលអារម្មណ៍នៃអំណររបស់ទ្រង់នៅពេលដែលយើងថ្វាយបង្គំនៅក្នុងដំណាក់នៃព្រះអម្ចាស់ ។
ប្រធាន រ័សុល អិម ណិលសុន បានប្រកាស ៖ « ឥឡូវនេះគឺជាពេលវេលាសម្រាប់បងប្អូន និងខ្ញុំដើម្បីរៀបចំខ្លួនសម្រាប់ការយាងមកជាលើកទីពីររបស់ព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ឥឡូវនេះគឺជាពេលដែលយើងដាក់អាទិភាពខ្ពស់បំផុតទៅលើភាពជាសិស្សរបស់យើង ។ នៅក្នុងពិភពលោកដែលមានពេញទៅដោយការរំខានដ៏វក់វី តើយើងអាចធ្វើវាបានយ៉ាងដូចម្តេចទៅ ? »
លោកបានផ្តល់ចម្លើយ ៖ « ការថ្វាយបង្គំជាទៀងទាត់នៅក្នុងព្រះវិហារបរិសុទ្ធនឹងជួយយើង ។ នៅក្នុងដំណាក់នៃព្រះអម្ចាស់ យើងផ្តោតទៅលើព្រះយេស៊ូវគ្រីស្ទ ។ … យើងមកស្គាល់ទ្រង់ ។ … អ្នកដែលស្វែងរកព្រះយេស៊ូវគ្រីស្ទដោយស្មោះត្រង់គ្រប់រូបនឹងរកឃើញទ្រង់នៅក្នុងព្រះវិហារបរិសុទ្ធ » ។
ដូច្នេះ តើយើងក្លាយ ហើយជួយគ្នាឲ្យក្លាយជាសិស្សដ៏មានភក្ដីភាពរបស់ព្រះយេស៊ូវគ្រីស្ទដោយរបៀបណា ? យើងផ្ដល់ការងារបម្រើដល់មនុស្សម្នាក់ ។ ការផ្ដល់ការងារបម្រើតាមរបៀបរបស់ព្រះអង្គសង្គ្រោះទាក់ទងនឹង សេចក្តីមេត្តាករុណា សេចក្តីសប្បុរស ការអត់ធ្មត់ និងសេចក្ដីស្រឡាញ់ដោយគ្មានការវិនិច្ឆ័យ ។ នៅពេលដែលយើងធ្វើការងារបម្រើដល់មនុស្សម្នាក់ យើងអញ្ជើញ មនុស្សម្នាក់ឲ្យមករកព្រះគ្រីស្ទ និងថ្វាយបង្គំនៅក្នុងដំណាក់ព្រះអម្ចាស់ដើម្បីទទួលបានអំណាចប្រោសលោះរបស់ទ្រង់ ។ និយាយម្យ៉ាងទៀត យើងជួយមនុស្សម្នាក់ឲ្យធ្វើជាសិស្សដ៏មានភក្តីភាពនៅពេលយើងផ្ដល់ការងារបម្រើដល់មនុស្សម្នាក់តាមរបៀប ដែលដឹកនាំទៅរកដំណាក់នៃព្រះអម្ចាស់ ។
យើងរៀនពីព្រះយេស៊ូវគ្រីស្ទនូវអំណាចនៃការផ្ដល់ការងារបម្រើដល់មនុស្សម្នាក់ដោយក្តីស្រឡាញ់ ដោយគ្មានការវិនិច្ឆ័យ ។ បងប្អូនចាំពីស្ត្រីសាសន៍សាម៉ារីនៅឯអណ្តូង ។ ស្ត្រីរូបនេះប្រហែលជាមានអារម្មណ៍ថាគ្មានសារៈសំខាន់ ឯកោ បាក់ទឹកចិត្ត និងត្រូវគេមើលរំលង ។ នាងអាចមានអារម្មណ៍ថាមិនមែនជាចំណែករបស់ព្រះ ។ ពេញមួយជីវិតរបស់នាង នាងមានប្តីប្រាំនាក់ ហើយបុរសដែលនាងរស់នៅជាមួយមិនមែនជាប្តីរបស់នាងទេ ។ អ្នកផ្សេងទៀតប្រហែលជាធ្វើការវិនិច្ឆ័យមិនសុចរិតដោយមិនដឹងពីកាលៈទេសៈនៃជីវិតរបស់នាង ។ ការណ៍នេះអាចជាហេតុផលមួយដែលនាងបានមកអណ្តូងទឹកតែម្នាក់ឯងនៅពេលថ្ងៃកំពុងក្ដៅបំផុត ។ ប៉ុន្តែ នាងគឺជាមនុស្សដំបូងដែលព្រះយេស៊ូវបានប្រកាសថា ទ្រង់គឺជាព្រះមែស៊ី ។ ចំពោះទ្រង់ ស្រ្តីរូបនេះគឺជាបុត្រីរបស់ព្រះ ។
ព្រះយេស៊ូវគ្រីស្ទបានបង្រៀនថា ស្ត្រីរូបនោះតាមរយៈទ្រង់មនុស្សម្នាក់អាចទទួលបានជីវិតដ៏នៅអស់កល្បជានិច្ច ដោយការទទួលទានទឹករស់ ។ ទ្រង់បានប្រកាសថា « អស់អ្នកណាដែលផឹកទឹក … ខ្ញុំឲ្យ នោះនឹងមិនស្រេកទៀតឡើយ ទឹកដែលខ្ញុំឲ្យ … នឹងត្រឡប់ជារន្ធទឹក … ដែលផុសឡើងដល់ទៅបានជីវិតអស់កល្បជានិច្ច » ។
ស្ត្រីសាសន៍សាម៉ារីដឹងពីសេចក្តីស្រឡាញ់របស់ព្រះអង្គសង្គ្រោះ ហើយបានទទួលសាក្សីតាមរយៈព្រះវិញ្ញាណថា ទ្រង់គឺជាព្រះមែស៊ី ។ បន្ទាប់ពីសាក្សីនេះ នាងបានត្រឡប់ទៅកាន់ទីក្រុងវិញ ហើយបានអញ្ជើញអ្នកដទៃឲ្យមកមើល ហើយមនុស្សជាច្រើនបានជឿលើព្រះយេស៊ូវ « ទ្រង់ជាព្រះគ្រីស្ទ ជាព្រះដ៏ជួយសង្គ្រោះមនុស្សលោកពិតប្រាកដមែន » ។ ព្រះគ្រីស្ទបានផ្ដល់ការងារបម្រើដល់មនុស្សម្នាក់ដោយសេចក្តីស្រឡាញ់ ជាលទ្ធផល មនុស្សផ្សេងទៀតបានធ្វើជាសិស្សដ៏មានភក្ដីភាពរបស់ទ្រង់ ។
យើងរៀនពីអំណាចនៃការផ្ដល់ការងារបម្រើដល់មនុស្សម្នាក់ជាមួយនឹងសេចក្ដីអាណិតអាសូរមកពីសាវកប៉ុល និងយ៉ូហានរបស់ព្រះគ្រីស្ទ ។ បងប្អូនចាំពីបុរសម្នាក់ដែលខ្វិនពីកំណើត ដែលនៅទីនោះសុំទានរាល់ថ្ងៃនៅមាត់ទ្វារព្រះវិហារបរិសុទ្ធទេ ។ បុរសម្នាក់នេះប្រហែលជាមានអារម្មណ៍ថាគ្មានសារៈសំខាន់ ឯកោ បាក់ទឹកចិត្ត និងត្រូវគេមើលរំលង ។ គាត់អាចមានអារម្មណ៍ថាមិនមែនជាចំណែករបស់ព្រះ ។
« តែពេត្រុសនិយាយថា ឯប្រាក់ ហើយនិងមាស ខ្ញុំគ្មានទេ តែរបស់ដែលខ្ញុំមាន នោះ[ ខ្ញុំ ]នឹងឲ្យ[ ទៅ ]ដល់អ្នក គឺដោយសារព្រះនាមព្រះយេស៊ូវគ្រីស្ទ ពីស្រុកណាសារ៉ែត ចូរអ្នកក្រោកឡើងដើរទៅចុះ » ។
ពេត្រុសបានចាប់ដៃស្តាំលើកគាត់ឡើង ហើយក្រោយមកបុរសនោះបានជាសះស្បើយ ។ ភ្លាមៗនោះបន្ទាប់ពីអព្ភូហេតុនោះ បុរសរូបនោះបានចូលទៅក្នុងព្រះវិហារបរិសុទ្ធជាមួយ ពេត្រុស និងយ៉ូហាន « ទាំងដើរ ទាំងលោត ទាំងសរសើរព្រះផង » ។ ពេត្រុស និងយ៉ូហានបានបម្រើដល់មនុស្សម្នាក់តាមរបៀបមួយដែលនាំទៅដល់ដំណាក់នៃព្រះអម្ចាស់ ហើយបុរសរូបនោះបានក្លាយជាសិស្សដ៏មានភក្ដីភាពរបស់ព្រះគ្រីស្ទ ។
មិត្តសម្លាញ់របស់ខ្ញុំ នៅក្នុងជីវិតរបស់ខ្ញុំក៏មានគ្រាដែលខ្ញុំមានអារម្មណ៍ថាគ្មានសារៈសំខាន់ ឯកោ បាក់ទឹកចិត្ត និងត្រូវគេមើលរំលងផងដែរ ។ ខ្ញុំមានអារម្មណ៍ថាបើខ្ញុំមិនមែនជាចំណែករបស់ព្រះ ។ ខ្ញុំបានទទួលបុណ្យជ្រមុជទឹក និងបានទទួលពិធីបញ្ជាក់ជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នៅពេលខ្ញុំមានអាយុ១៩ឆ្នាំ ។ មួយឆ្នាំក្រោយមក ខ្ញុំបានទទួលការហៅដើម្បីបម្រើជាអ្នកផ្សព្វផ្សាយសាសនាពេញម៉ោង ប៉ុន្តែមានអ្វីជាច្រើនដែលខ្ញុំមិនទាន់បានរៀនអំពីប្រវត្តិរបស់សាសនាចក្រ ។
នៅពេលចាប់ផ្ដើមការបម្រើជាអ្នកផ្សព្វផ្សាយសាសនា ខ្ញុំបានរៀនថាមានរយៈពេលមួយដែលអ្នកមានដើមកំណើតជាអាហ្វ្រិកស្បែកខ្មៅមិនត្រូវបានអនុញ្ញាតឲ្យរីករាយនឹងពរជ័យទាំងអស់ នៃការថ្វាយបង្គំនៅក្នុងដំណាក់នៃព្រះអម្ចាស់ឡើយ ។ ការដឹងអំពីរឿងនេះជាលើកដំបូងបាននាំមកនូវអារម្មណ៍នៃកំហឹង ការច្របូលច្របល់ ការសង្ស័យ និងសេចក្តីភ័យខ្លាច ។ អារម្មណ៍ទាំងនេះខ្លាំងក្លាខ្លាំងណាស់ដែលធ្វើឲ្យសមត្ថភាពរបស់ខ្ញុំក្នុងការស្គាល់ព្រះវិញ្ញាណបរិសុទ្ធត្រូវបានបាត់បង់អស់មួយរយៈ ។
ជាសំណាងល្អ ខ្ញុំមានដៃគូផ្សព្វផ្សាយសាសនាដ៏អស្ចារ្យម្នាក់គឺ ខេវីន វីក ដែលបានផ្ដល់ការងារបម្រើដល់ខ្ញុំដោយក្ដីស្រឡាញ់ ការអត់ធ្មត់ និងសេចក្ដីសប្បុរស ។ ជារៀងរាល់យប់ នៅពេលគាត់បានឃើញពីអារម្មណ៍នៃការសង្ស័យ និងភាពមិនច្បាស់លាស់របស់ខ្ញុំ គាត់នឹងនិយាយយ៉ាងសាមញ្ញទៅអែលឌើរ ចនសុន « ខ្ញុំស្រឡាញ់អែលឌើរ » ។ ប្រហែលពីរសប្តាហ៍ក្រោយមក ខ្ញុំបានអនុញ្ញាតឲ្យខ្លួនខ្ញុំទទួលអារម្មណ៍ពីសេចក្តីស្រឡាញ់របស់ខេវីន ។ ខ្ញុំទទួលបានភាពក្លាហានដើម្បីអធិស្ឋានទៅកាន់ព្រះវរបិតាសួគ៌ក្នុងព្រះនាមនៃព្រះយេស៊ូវគ្រីស្ទ ។ នៅពេលខ្ញុំអធិស្ឋាន ខ្ញុំបានបើកទៅកណ្ឌទី ៦ នៃគោលលទ្ធិ និងសេចក្តីសញ្ញា ខទី ២១–២៣ ដែលចែង ៖
« មើលចុះ យើងគឺព្រះយេស៊ូវគ្រីស្ទ ជាព្រះរាជបុត្រានៃព្រះ ។… យើងជាពន្លឺដែលភ្លឺមកក្នុងសេចក្ដីងងឹត » ។…
« …ចូរដាក់គំនិតទៅលើយប់ដែលអ្នកបានអំពាវនាវដល់យើងក្នុងដួងចិត្តរបស់អ្នក ដើម្បីឲ្យអ្នកអាចដឹងនូវសេចក្ដីពិតអំពីការណ៍ទាំងឡាយនេះ ។
« តើយើងពុំបាននិយាយដោយភាពសុខសាន្តដល់គំនិតរបស់អ្នកអំពីការណ៍នោះទេឬអី ? តើអ្នកអាចមានសាក្សីឯណាដែលអស្ចារ្យជាងសាក្សីមកពីព្រះ ? »
នៅពេលខ្ញុំអាន ខ្ញុំបានចងចាំ ។ ខ្ញុំបានចងចាំថ្ងៃដែលខ្ញុំបានតមអាហារ ហើយអធិស្ឋានដើម្បីដឹងថា ព្រះគម្ពីរមរមន គឺជាព្រះបន្ទូលនៃព្រះ ហើយថា យ៉ូសែប ស្ម៊ីធ គឺជាព្យាការីនៃការស្ដារឡើងវិញ ។ ខ្ញុំនឹកចាំពីសេចក្ដីសញ្ញាដែលបានធ្វើនៅក្នុងដំណាក់នៃព្រះអម្ចាស់ ដែលភ្ជាប់ខ្ញុំទៅនឹងព្រះយេស៊ូវគ្រីស្ទតាមរបៀបផ្ទាល់ខ្លួន និងជិតស្និទ្ធមួយ ។ ខ្ញុំទទួលអារម្មណ៍ពីសេចក្តីស្រឡាញ់របស់ព្រះអង្គសង្គ្រោះ សេចក្តីមេត្តាករុណារបស់ទ្រង់ និងការធានារបស់ទ្រង់ថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជានគររបស់ទ្រង់នៅលើផែនដី ហើយចាំបាច់ដើម្បីរៀបចំយើងសម្រាប់ការយាងមកជាលើកទីពីររបស់ទ្រង់ ។ ដោយសារខ្ញុំបាននឹកចាំ នោះខ្ញុំអាចស្គាល់ព្រះវិញ្ញាណបរិសុទ្ធម្ដងទៀត ហើយយល់កាន់តែច្បាស់ថា ព្រះយេស៊ូវគឺជាព្រះគ្រីស្ទ ហើយខ្ញុំជាសិស្សរបស់ទ្រង់ ។
ពេលខ្លះយើងនឹងមានសំណួរដែលមិនមានចម្លើយ និងអារម្មណ៍ថាគ្មានសារៈសំខាន់ បាក់ទឹកចិត្ត ឯកោ និងត្រូវគេមើលរំលង ។ ទោះជាយ៉ាងណា មិត្តសម្លាញ់ខ្ញុំអើយ យើងត្រូវតែឆ្ពោះទៅមុខដោយសេចក្ដីជំនឿលើព្រះយេស៊ូវគ្រីស្ទ ហើយចងចាំពាក្យរបស់ទ្រង់ ៖
« កុំឲ្យចិត្តអ្នករាល់គ្នាថប់បារម្ភឡើយ » ។
« ដោយសារខ្ញុំនៅលោកីយ៍នេះ នោះអ្នករាល់គ្នាមានសេចក្តីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ » ។
ខ្ញុំជាសាក្សីចំពោះការពិតនេះ និងពីពរជ័យដែលបានសន្យារបស់ព្រះអង្គសង្គ្រោះ ។
ដូច្នេះ តើយើងអាចធ្វើអ្វីខ្លះដើម្បីធានាថាការផ្ដល់ការងារបម្រើរបស់យើងចំពោះមនុស្សម្នាក់តាមរបៀបរបស់ព្រះអង្គសង្រ្គោះមានប្រសិទ្ធភាពបំផុតនោះ ? ការរស់នៅ តាមគោលលទ្ធិនៃព្រះគ្រីស្ទនឹងជួយយើង ។ « ការរស់នៅតាមគោលលទ្ធិនៃព្រះគ្រីស្ទ » ដូចដែលប្រធាន ណិលសុន ពិពណ៌នាថា « អាចបង្កើតជាវដ្ដប្រកបដោយអានុភាព និងគុណធម៌ និងបង្កើតជាសន្ទុះខាងវិញ្ញាណនៅក្នុងជីវិតរបស់យើង ។
នៅពេលយើងខិតខំរស់នៅតាមច្បាប់ដែលខ្ពស់ជាងរបស់ព្រះយេស៊ូវគ្រីស្ទ … ព្រះអង្គសង្គ្រោះលើក យើងឡើងផុតពីឥទ្ធិពលនៃពិភពលោកដ៏ធ្លាក់នេះ ដោយប្រទានពរដល់យើងឲ្យមានសេចក្តីសប្បុរស ភាពរាបសា ចិត្តល្អ ចេះលត់ដំខ្លួន មានភាពសុខសាន្ត និង សេចក្តីសម្រាក » ។
« [ សន្ទុះខាងវិញ្ញាណនេះ ] កើតមានដោយសារការរស់នៅ តាមគោលលទ្ធិនៃព្រះគ្រីស្ទ » ។ ដូចដែលអែលឌើរ ឌែល ជី រិនឡាន់ ពន្យល់ថា « មិនត្រឹមតែមានអំណាចកែប្រែនិស្ស័យដ៏ទេវភាពរបស់យើងទៅជាជោគវាសនាដ៏អស់កល្បជានិច្ចប៉ុណ្ណោះទេ ប៉ុន្តែវាក៏ជំរុញយើងឲ្យជួយ[ ធ្វើការងារបម្រើ ]ដល់អ្នកដទៃតាមរបៀបត្រឹមត្រូវផងដែរ ។ អែលឌើរ ឌែល ជី រិនឡាន់ រំឭកយើងថា « កិច្ចការរបស់ព្រះអង្គសង្គ្រោះគឺដើម្បីព្យាបាល [ ដើម្បីធ្វើឲ្យយើងបានជាសះស្បើយ ] ។ កិច្ចការរបស់យើងគឺដើម្បីស្រឡាញ់—ស្រឡាញ់ និងផ្ដល់ការងារបម្រើតាមរបៀបមួយ ដែលនាំអ្នកដទៃចូលមកជិតព្រះយេស៊ូវគ្រីស្ទ » ។
សមត្ថភាពរបស់យើងដើម្បីរស់នៅ តាមគោលលទ្ធិរបស់ព្រះគ្រីស្ទនឹងត្រូវបានពង្រឹងដោយការសិក្សាព្រះគម្ពីរមរមនប្រចាំថ្ងៃ និងការទទួលទានសាក្រាម៉ង់ប្រចាំសប្តាហ៍ ។ ប្រធាន ណិលសុន បានប្រកាសថា ព្រះគម្ពីរមរមន « បង្រៀនគោលលទ្ធិរបស់ព្រះគ្រីស្ទ … [ និង ]ផ្តល់នូវការយល់ដឹងពេញលេញ និង[ ច្បាស់លាស់បំផុត ]អំពីដង្វាយធួននៃព្រះយេស៊ូវគ្រីស្ទដែលអាចរកបាននៅគ្រប់ទីកន្លែង » ។ ខ្ញុំស្រឡាញ់ព្រះគម្ពីរនេះណាស់ » ។ ហើយការទទួលទាននៃសាក្រាម៉ង់ប្រកបដោយការអធិស្ឋានជារៀងរាល់សប្តាហ៍នឹងបង្កើនការយល់ដឹងរបស់យើងអំពីដង្វាយធួននៃព្រះយេស៊ូវគ្រីស្ទ ហើយផ្តល់នូវការរំឭកខាងវិញ្ញាណ ការលួងលោម និងអំណាចនៃភាពជាព្រះមកក្នុងជីវិតរបស់យើង ។ សូមចាំថា « នៅក្នុងពិធីបរិសុទ្ធ[ នៃបព្វជិតភាព ] អំណាចនៃព្រះត្រូវបានសម្តែងឲ្យឃើញ » ហើយអំណាចនេះដែលមកពីព្រះយេស៊ូវគ្រីស្ទពង្រឹងបំណងប្រាថ្នា និងសមត្ថភាពរបស់យើងដើម្បីផ្ដល់ការងារបម្រើដល់មនុស្សម្នាក់ ។
ការសិក្សារបស់ខ្ញុំអំពីព្រះគម្ពីរមរមន និងការទទួលទានសាក្រាម៉ង់កាត់បន្ថយអារម្មណ៍បាក់ទឹកចិត្ត ពង្រឹងការប្តេជ្ញាចិត្តរបស់ខ្ញុំក្នុងការផ្ដល់ការងារបម្រើដល់មនុស្សម្នាក់តាមរបៀបរបស់ព្រះអង្គសង្រ្គោះ និងជួយធ្វើឲ្យភាពជាសិស្សគឺជាអាទិភាពខ្ពស់បំផុតរបស់ខ្ញុំ ។
មិត្តសម្លាញ់របស់ខ្ញុំ ខ្ញុំសូមសន្យាថា នៅពេលយើងរស់នៅ តាមគោលលទ្ធិរបស់ព្រះគ្រីស្ទ និងផ្ដល់ការងារបម្រើដល់មនុស្សម្នាក់តាមរបៀបដែលនាំទៅកាន់ដំណាក់នៃព្រះអម្ចាស់ នោះយើងនឹងឆ្ពោះទៅមុខដោយសេចក្តីជំនឿលើព្រះយេស៊ូវគ្រីស្ទ សូម្បីតែនៅពេលសំណួរដែលគ្មានចម្លើយ និងអារម្មណ៍នៃការគ្មានសារៈសំខាន់ ឯកោ បាក់ទឹកចិត្ត និងត្រូវគេមើលរំលងក៏ដោយ ។ យើងនឹងអញ្ជើញមនុស្សម្នាក់ឲ្យមករកព្រះយេស៊ូវគ្រីស្ទ និងថ្វាយបង្គំនៅក្នុងដំណាក់នៃព្រះអម្ចាស់ ដើម្បីទទួលបានអំណាចប្រោសលោះ និងសេចក្តីស្រឡាញ់របស់ទ្រង់ ។ នៅក្នុងដំណាក់នៃព្រះអម្ចាស់ យើងនឹង « ទទួលអារម្មណ៍នៃសេចក្តីមេត្តាករុណា [ របស់ព្រះអង្គសង្រ្គោះ ] ។ [ យើង ] នឹងរកឃើញចម្លើយចំពោះសំណួរដែលគួរឲ្យរំខានបំផុត [ របស់យើង ] ។ [ ហើយយើង ] នឹងយល់កាន់តែច្បាស់អំពីអំណរនៃដំណឹងល្អរបស់ទ្រង់ » ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕