ព្រះអម្ចាស់កំពុងពន្លឿនកិច្ចការរបស់ទ្រង់
នៅពេលព្រះអម្ចាស់ពន្លឿនកិច្ចការរបស់ទ្រង់ យើងគួរតែស្រឡាញ់ ចិញ្ចឹមបីបាច់ និងបម្រើអស់អ្នកដែលទទួលយកដំណឹងល្អរបស់ទ្រង់ ។
ឆាល ឌីកកិនស៍ បានចាប់ផ្ដើមប្រលោមលោកបែបបុរាណដ៏ល្បីល្បាញរបស់លោកដែលមានចំណងជើងថា The Tale of Two Cities ដោយមានការអះអាងថា « វាជាគ្រាដ៏ល្អបំផុត វាក៏ជាគ្រាដ៏អាក្រក់បំផុតដែរ » ។ ក្នុងទស្សនៈមួយ វាជាការពិតនៅសម័យរបស់យើង ។
យើងរស់នៅក្នុងគ្រាមួយដ៏ច្របូកច្របល់ នៅពេល « ផែនដីទាំងមូល[ ស្ថិត ]នៅក្នុងស្ថានភាពចលាចល » ។ ការដាស់តឿនរបស់ប្រធាន រ័សុល អិម ណិលសុនឲ្យធ្វើជាអ្នកផ្សះផ្សាគេក្នុងនាមជាអ្នកដើរតាមរបស់ព្រះយេស៊ូវគ្រីស្ទ ត្រូវបានបញ្ជាក់យ៉ាងល្អដោយអែលឌើរ ហ្គែរី អ៊ី ស្ទីវ៉ែនសុន បាននៅព្រឹកនេះ ។ វាគឺជាផ្នែកមួយដ៏ចាំបាច់នៃការជំរុញឲ្យមានសាមគ្គីភាព សេចក្តីសុខសាន្ត និងការព្យាបាលសម្រាប់ « គ្រាដ៏អាក្រក់បំផុត » ។
យើងក៏រស់នៅក្នុង « គ្រាដ៏ល្អបំផុត » ដែលខ្ញុំនឹងបញ្ជាក់ ។ ព្រះអម្ចាស់បានប្រកាសនៅក្នុងអារម្ភកថានៃ គោលលទ្ធិ និងសេចក្ដីសញ្ញា កណ្ឌទី១ថាភាពពេញលេញនៃដំណឹងល្អនឹងត្រូវបាន« ប្រកាសប្រាប់ … ដល់អស់ចុងផែនដី » ។ ព្រះអម្ចាស់ពិតជាកំពុងពន្លឿនកិច្ចការទ្រង់នៅក្នុងជំនាន់របស់យើង ។ យើងគួរតែមានអំណរគុណជាខ្លាំងចំពោះការពន្លឿននេះដែលបានកើតមាន និងកំពុងកើតមាន ទោះជាស្ថិតនៅគ្រាដ៏លំបាកទាំងនេះក្ដី ។ យើងរស់នៅក្នុងគ្រាមួយដែលពួកអ្នកដើរតាមព្រះអម្ចាស់មានអភ័យឯកសិទ្ធិស្ដាប់ឮព្រះសូរសៀងរបស់ទ្រង់ ហើយឆ្លើយតបដោយចិត្ត និងគំនិតដែលព្រមទទួលយក ។ សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលមានការតាំងចិត្តចំពោះព្រះអង្គសង្គ្រោះ និងបទបញ្ញត្តិរបស់ទ្រង់ កំពុងរកឃើញគោលបំណង និងសេចក្ដីសុខសាន្តផ្ទាល់ខ្លួនដ៏អស្ចារ្យ ។
នៅគ្រាជាច្រើនក្នុងប្រវត្តិសាស្ត្ររបស់សាសនាចក្រ មានការកើនឡើងមួយដ៏អស្ចារ្យនៅក្នុងចំណោមអ្នកដែលបានចូលមកក្នុងផ្លូវនៃសេចក្ដីសញ្ញា ។ គ្រាមួយបែបនោះបានកើតឡើងនៅចន្លោះឆ្នាំ១៨៣៧ និងឆ្នាំ១៨៥០ ។ ពួកសាវកពីបុរាណមួយចំនួននៅក្នុងសាសនាចក្រដែលបានស្ដារឡើងវិញរបស់ព្រះអម្ចាស់បានបម្រើបេសកកម្មនៅចក្រភពអង់គ្លេស ។ បេសកកម្មទាំងនេះបានធ្វើឲ្យមនុស្សរាប់ពាន់នាក់ចូលរួមក្នុងសាសនាចក្រ ហើយត្រឹមឆ្នាំ១៨៥០ សមាជិករស់នៅចក្រភពអង់គ្លេសមានចំនួនច្រើនជាងសមាជិកនៅសហរដ្ឋអាមេរិក ។ នៅគ្រានោះ ព្រះអម្ចាស់បានបង្គាប់ឲ្យពួកបរិសុទ្ធទាំងនេះប្រមូលគ្នាទៅកាន់រដ្ឋយូថាហ៍ ។ ការធ្វើចំណាកស្រុកដ៏ធំមួយបានកើតឡើង ការធ្វើចំណាកស្រុកមួយចំនួនត្រូវបានគាំទ្រដោយប្រាក់កម្ចីដែលផ្ដល់ឲ្យដោយមូលនិធិការធ្វើចំណាកស្រុកជាបន្តបន្ទាប់ ។
ខ្ញុំស្រឡាញ់ដំណើររឿងអំពីការមកដល់ជ្រលងភ្នំសលត៍ លេក របស់ពួកអ្នកប្រែចិត្តជឿមួយចំនួនធំដែលមកពីប្រទេសអង់គ្លេស និងប្រទេសវេលស៍ ក្នុងឆ្នាំ១៨៥២ ។ គណៈប្រធានទីមួយបានជួបនឹងក្រុមនេះនៅមាត់ច្រកទីក្រុងអ៊ីមីគ្រេសិន ខេនញៀន អបដោយក្រុមភ្លេងរបស់ខាធេន ភីត ។ សារព័ត៌មាន Deseret News បានពិពណ៌នាពួកគេថាជា « ក្រុមភ្លេងអ្នកធ្វើធម្មយាត្រា [ រួមមាន ] បងប្អូនស្រី និងកុមារ ដែលដើរដោយថ្មើរជើង ហើយមានរាងកាយ និងមុខរលាកដោយសារកម្តៅថ្ងៃ ប៉ុន្តែមិនអស់សង្ឃឹមឡើយ ។ បេះដូងរបស់ពួកគេមានពន្លឺ និងក្លៀវក្លា ដែលបង្ហាញឲ្យឃើញយ៉ាងច្បាស់តាមរយៈទឹកមុខរីករាយ និងពេញដោយអំណររបស់ពួកគេ » ។
នៅពេលពួកគេ« ដើរហួសតំបន់ព្រះវិហារបរិសុទ្ធ … បុរស ស្ត្រី និងកុមាររាប់ពាន់នាក់បានប្រមូលផ្តុំគ្នាពីផ្នែកផ្សេងៗនៃទីក្រុង ដើម្បីរួបរួមគ្នាក្នុងការស្វាគមន៍ដ៏រុងរឿង និងពេញដោយអំណរ » ។ ប្រធាន ព្រិកហាំ យ៉ង់ បានថ្លែងទៅកាន់ពួកគេ ៖ « សូមឲ្យព្រះអម្ចាស់ជាព្រះនៃអ៊ីស្រាអែលប្រទានពរដល់បងប្អូន ។ … យើងបានអធិស្ឋានឲ្យបងប្អូនជាបន្តបន្ទាប់ ។ ការអធិស្ឋានរាប់ពាន់ត្រូវបានធ្វើឡើងសម្រាប់បងប្អូនពីមួយថ្ងៃទៅមួយថ្ងៃទៅកាន់ទ្រង់ដែលបានបង្គាប់យើងឲ្យប្រមូលផ្ដុំអ៊ីស្រាអែល សង្គ្រោះកូនចៅមនុស្សដោយការប្រកាសដំណឹងល្អ និងរៀបចំពួកគេសម្រាប់ការយាងមករបស់ព្រះមែស៊ី » ។
នៅក្នុងស្មារតីនៃឱកាសពេញដោយអំណរនោះ ខ្ញុំសូមអះអាងជាថ្មីម្ដងទៀតដល់ពួកអ្នកប្រែចិត្តជឿថ្មីគ្រប់រូប និងអស់អ្នកដែលកំពុងត្រឡប់មកកាន់សាសនាចក្ររបស់ព្រះអម្ចាស់វិញ ៖ យើងស្រឡាញ់បងប្អូន យើងត្រូវការបងប្អូន ព្រះអម្ចាស់ត្រូវការបងប្អូន ។ ពួកយើងមិនបានស្វាមន៍បងប្អូនដោយក្រុមភ្លេងព្យុះហយាត្រានោះទេ ប៉ុន្តែយើងអធិស្ឋានថា ពរជ័យនៃស្ថានសួគ៌នឹងគាំទ្រដល់ការខិតខំរបស់បងប្អូនដើម្បីរីកចម្រើននៅលើផ្លូវនៃសេចក្ដីសញ្ញាដែលដឹកនាំទៅរកព្រះជាព្រះវរបិតា និងព្រះយេស៊ូវគ្រីស្ទនៅក្នុងនគរសេឡេស្ទាល ។
មានភស្ដុតាងដ៏ច្បាស់លាស់ថា សេចក្ដីជំនឿលើព្រះយេស៊ូវគ្រីស្ទគឺកំពុងកើនឡើងនៅក្នុងជំនាន់របស់យើង ។ នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មានការកើនឡើងដ៏អស្ចារ្យមួយនៅក្នុងការប្រែចិត្តជឿ និងការចូលរួមរបស់អ្នកប្រែចិត្តជឿ ។ ក្នុងរយៈពេល៣៦ខែចុងក្រោយនេះ មានពួកអ្នកប្រែចិត្តជឿជិត ៩០០,០០០ នាក់បានចូលរួមនឹងសាសនាចក្រ ។ ពួកអ្នកប្រែចិត្តជឿទាំងនេះមានប្រហែលជា ៥ ភាគរយនៃសមាជិកភាពសរុបក្នុងសាសនាចក្រ ។ យើងសូមស្វាគមន៍សមាជិកថ្មីដោយបើកចំហរ និងការដឹងគុណយ៉ាងជ្រាលជ្រៅចំពោះផ្លូវដែលបងប្អូនបានជ្រើសរើស ។
ពួកអ្នកប្រែចិត្តជឿចំនួន ៩០០,០០០ នាក់ក្នុងរយៈពេល ៣៦ ខែចុងក្រោយនេះលើសពីសមាជិកភាពសរុបក្នុងសាសនាចក្រនៅខួបលើកទី ១១០ របស់ខ្លួនក្នុងឆ្នាំ ១៩៤០ ដែលមានសមាជិកត្រឹមតែជាង ៨៦០,០០០ នាក់ប៉ុណ្ណោះ ។ នេះគឺជាឆ្នាំដែលអែលឌើរ ជេហ្វ្រី អ័រ ហូឡិន ឌៀថើរ អេហ្វ អុជដូហ្វ និងខ្ញុំបានកើត ។
ពួកអ្នកប្រែចិត្តជឿថ្មីដ៏អស្ចារ្យទាំងនេះមកពីគ្រប់ផ្នែកនៃពិភពលោក ។ នៅប្រាំមួយខែដំបូងនៃឆ្នាំនេះ ការប្រែចិត្តជឿបានកើនឡើងច្រើនជាង ២០ភាគរយលើសពីឆ្នាំមុននៅទ្វីបអឺរ៉ុប អាហ្វ្រិក អាស៊ី ប៉ាស៊ីហ្វិក និងអាមេរិកឡាទីន ។ នៅអាមេរិកខាងជើងយើងបានឃើញការកើនឡើង ១៧ភាគរយ ។ កិច្ចការរបស់ព្រះអម្ចាស់បន្តឆ្ពោះទៅមុខតាមរបៀបដែលពោរពេញដោយអានុភាព ។ ចំនួនកើនឡើងទាំងនេះគឺជាសាក្សីដ៏ច្បាស់មួយថា ដំណឹងល្អកំពុងប៉ះពាល់ដួងចិត្ត និងផ្លាស់ប្ដូរជីវិតមនុស្សគ្រប់ទិសទី ។
នៅជំនាន់របស់យើង ពួកអ្នកប្រែចិត្តជឿដ៏មានតម្លៃទាំងនេះមិនចាំបាច់ត្រូវប្រមូលផ្ដុំនៅទីតាំងកណ្ដាលមួយទៀតឡើយ ។ ដោយសារតែសេចក្ដីជំនឿ និងការលះបង់របស់សមាជិកនៃសាសនាចក្រនេះ នោះយើងមានធនធានដើម្បីគាំទ្រដល់ក្រុមជំនុំ—ដោយមានការសាងសង់រោងថ្វាយបង្គំ និងព្រះវិហារបរិសុទ្ធ—ជុំវិញពិភពលោកទាំងមូល ។ ដោយមានកូនសោបព្វជិតភាពដ៏ចាំបាច់ និងធនធានដែលបានផ្ដល់ឲ្យ ឥឡូវនេះពិធីបរិសុទ្ធនៃការសង្គ្រោះមាននៅផ្នែកជាច្រើននៃពិភពលោកនេះ ។
មិនថាយើងរស់នៅទីណានោះទេ សមាជិកបច្ចុប្បន្នត្រូវស្វាគមន៍សមាជិកថ្មីរាប់រយរាប់ពាន់នាក់ ដូចដែលយើងបានធ្វើចំពោះពួកបរិសុទ្ធអង់គ្លេស និងវេលស៍ ដែលខ្ញុំបានរៀបរាប់ចេញពីប្រវត្តិសាស្ត្រពីដើមរបស់យើង ។ ខ្ញុំចូលចិត្តសុន្ទរកថារបស់អែលឌើរ ហ្គើរីត ដបុលយូ ហ្គង នៅក្នុងសម័យប្រជុំនេះ ដែលលោកបានបង្រៀនយើងថា គ្មាននរណាម្នាក់គួរអង្គុយឯកោតែម្នាក់ឯងឡើយមិនថាទាំងខាងសតិអារម្មណ៍ ឬខាងវិញ្ញាណនោះទេ ។
កាតព្វកិច្ចដ៏ពិសិដ្ឋរបស់យើងគឺត្រូវទទួលយក ហើយស្វាគមន៍សមាជិកថ្មី និងសមាជិកកំពុងត្រឡប់មកវិញ ។ នៅពេលព្រះអម្ចាស់ពន្លឿនកិច្ចការរបស់ទ្រង់ យើងគួរតែស្រឡាញ់ ចិញ្ចឹមបីបាច់ និងបម្រើអស់អ្នកដែលទទួលយកដំណឹងល្អរបស់ទ្រង់ ។ យើងអាចជួយស្ថាបនាប្រជាជនស៊ីយ៉ូន ជាកន្លែងដែលយើងមាន « ចិត្តតែមួយ និងគំនិតតែមួយ ហើយ[ រស់នៅ ]ក្នុងសេចក្ដីសុចរិត » ។ ដើម្បីរួបរួមនឹងព្រះអម្ចាស់ យើងត្រូវតែរួបរួមគ្នានៅចំពោះព្រះអម្ចាស់ ។ ដោយមិនគិតពីកាលបរិច្ឆេទបុណ្យជ្រមុជទឹក សមាជិកទាំងអស់មានការទទួលខុសត្រូវក្នុងការស្វាគមន៍មនុស្សដទៃ ។
ឱវាទរបស់ខ្ញុំចំពោះសមាជិកនៃសាសនាចក្រនេះគឺត្រូវឱបក្រសោបមនុស្សជម្រើសដ៏មានតម្លៃទាំងនេះដែលបានទទួលយកដំណឹងល្អនៃព្រះយេស៊ូវគ្រីស្ទ ។
ប្រធាន ហ្គរដុន ប៊ី ហ៊ិងគ្លី បានបង្រៀនយើងថា ពួកអ្នកប្រែចិត្តជឿថ្មីត្រូវការ « មិត្តភក្ដិ ការទទួលខុសត្រូវ និងការចិញ្ចឹមបីបាច់ដោយ ‹ ព្រះបន្ទូលដ៏ល្អនៃព្រះ › ( មរ៉ូណៃ ៦:៤ ) » ។ យើងអាចជាម្នាក់ក្នុងចំណោមមិត្តភក្តិទាំងឡាយដែលធានាដល់ពួកអ្នកប្រែចិត្តជឿថ្មីទាំងនេះថាពួកគេជាសមាជិក ហើយមិនមែនគ្រាន់តែជាភ្ញៀវនោះទេ ។ យើងអាចជួយពួកគេឲ្យយល់ថា ពួកគេជាសិស្សរបស់ព្រះយេស៊ូវគ្រីស្ទ ដែលអាចបម្រើដល់អ្នកដទៃ និងទទួលយកការហៅបម្រើ ។ ពួកអ្នកប្រែចិត្តជឿវ័យក្មេងគួរតែពិចារណាបម្រើបេសកកម្មពេញម៉ោង ។ គ្រប់គ្នាគួរតាំងចិត្តព្យាយាមរស់នៅដូចព្រះគ្រីស្ទ ។
មនុស្សជាច្រើនចូលរួមក្នុងសាសនាចក្រដោយការលះបង់ផ្ទាល់ខ្លួនដ៏អស្ចារ្យ ហើយត្រូវការសេចក្ដីស្រឡាញ់ និងការគាំទ្រយ៉ាងខ្លាំងពីពួកបរិសុទ្ធដូចគ្នា ។
ចំពោះអ្នកដែលថ្មី ឬទើបត្រឡប់មកកាន់សេចក្ដីជំនឿវិញ មានបញ្ហាដែលបងប្អូនអាចប្រឈមមុខ ។ ចូរអត់ធ្មត់ជាមួយខ្លួនឯង ។ អ្នកផ្សព្វផ្សាយសាសនាបានបង្រៀនបងប្អូនអំពីគោលលទ្ធិសំខាន់ៗ ហើយបានពន្យល់អំពីសេចក្ដីសញ្ញា និងពិធីបរិសុទ្ធនៃនគរ ដែលមានចែងនៅក្នុងព្រះគម្ពីរ និងនៅក្នុង ប្រកាសដំណឹងល្អរបស់យើង ។
ការទទួលបានពិធីបរិសុទ្ធ និងសេចក្ដីសញ្ញា ព្រមទាំងការរស់នៅតាមបទបញ្ញត្តិគឺមានសារៈសំខាន់ណាស់ ។ សូមផ្ដោតលើសេចក្ដីសញ្ញាដែលចាំបាច់សម្រាប់ភាពតម្កើងឡើង ។ ដំណឹងល្អធ្វើឲ្យមានភាពតម្កើងឡើង ដែលតម្រូវឲ្យមានការចុះ និងការរក្សាសេចក្ដីសញ្ញាពិសិដ្ឋជាមួយព្រះ ។ សេចក្តីសញ្ញាដែលយើងធ្វើគឺត្រូវបានធ្វើឡើងនៅក្នុងព្រះវិហារបរិសុទ្ធ លើកលែងតែពិធីបុណ្យជ្រមុជទឹក ពិធីបញ្ជាក់ និងការប្រគល់បព្វជិតភាពម៉ិលគីស្សាដែកសម្រាប់បុរសប៉ុណ្ណោះ ។ ចំពោះមរណជន ពិធីបរិសុទ្ធនៃការសង្គ្រោះនីមួយៗត្រូវបានធ្វើឡើងតែក្នុងព្រះវិហារបរិសុទ្ធប៉ុណ្ណោះ ។ ដូច្នោះហើយ ការរៀបចំខ្លួនបងប្អូនសម្រាប់ព្រះវិហារបរិសុទ្ធ គួរតែជាគោលដៅភ្លាមៗមួយ ។
ពេលខ្លះ បងប្អូននឹងមានអារម្មណ៍ថា ការយល់ដឹងរបស់បងប្អូននៅខ្វះខាត ។ ចំណេះដឹងនៃដំណឹងល្អគឺជាពរជ័យដ៏អស្ចារ្យមួយដែលទទួលបានជាបន្តបន្ទាប់តាមពេលវេលា ប៉ុន្តែវាមិនមែនជាពិធីបរិសុទ្ធនៃការសង្គ្រោះនោះទេ ។ ដំណឹងល្អមិនមែនជាការសាកល្បងចំណេះដឹងនោះទេ ។ ទោះជាយ៉ាងណា ប្រធាន រ័សុល អិម ណិលសុន បានសន្យាថា « ពេលបងប្អូនសិក្សាព្រះគម្ពីរមរមន រាល់ថ្ងៃ ប្រកបដោយការអធិស្ឋាន នោះបងប្អូននឹងធ្វើការសម្រេចចិត្តដែលប្រសើរ—រៀងរាល់ថ្ងៃ ។ … ពេលបងប្អូនជញ្ជឹងគិតនូវអ្វីដែលបងប្អូនសិក្សា នោះបង្អួចស្ថានសួគ៌នឹងបើកឡើង បងប្អូននឹងទទួលចម្លើយចំពោះសំណួរផ្ទាល់ខ្លួន និងការដឹកនាំសម្រាប់ជីវិតបងប្អូនផ្ទាល់ » ។
លើសពីនេះ ជារៀងរាល់ឆ្នាំ ការឆ្លាស់វេនកម្មវិធីសិក្សារបស់សាសនាចក្រនៅក្នុងការប្រជុំថ្ងៃអាទិត្យនាំឲ្យមានការពិភាក្សាអំពីព្រះគម្ពីរសញ្ញាចាស់ ព្រះគម្ពីរសញ្ញាថ្មី ព្រះគម្ពីរមរមន និងគោលលទ្ធិ និងសេចក្តីសញ្ញា ។ យូរៗទៅ បងប្អូននឹងមានអារម្មណ៍ជឿជាក់កាន់តែខ្លាំង នៅពេលចំណេះដឹងរបស់បងប្អូនអំពីដំណឹងល្អរីកលូតលាស់ ។ ការសិក្សាព្រះគម្ពីរជាទៀងទាត់នឹងផ្ដល់ពរ ហើយធ្វើឲ្យជីវិតរបស់បងប្អូនមានខ្លឹមសារតាមរយៈការពង្រឹងការប្រែចិត្តជឿរបស់បងប្អូនទៅលើដំណឹងល្អរបស់ព្រះយេស៊ូវគ្រីស្ទ ។
ការរៀនសូត្រអំពីគោលលទ្ធិដ៏បរិសុទ្ធរបស់ព្រះយេស៊ូវគ្រីស្ទគឺជាការតាំងចិត្តពេញមួយជីវិត ទាំងការយល់ដឹងអំពីគោលលទ្ធិ និងការរស់នៅក្នុងជីវិតដូចជាព្រះគ្រីស្ទ ។ សេចក្ដីសញ្ញាដ៏ចាំបាច់ផ្ដល់នូវរចនាសម្ព័ន្ធមួយដែលយើងពិពណ៌នាថាជាផ្លូវនៃសេចក្ដីសញ្ញា ។ គោលការណ៍ទាំងនេះត្រូវបានបង្រៀនយ៉ាងមានអានុភាពដោយប្រធាន ណិលសុន ។ សមាជិកគ្រប់រូប ជាពិសេសសមាជិកថ្មី និងអ្នកដែលកំពុងត្រឡប់មកវិញ នឹងមានពរតាមរយៈការសិក្សា និងការសម្របខ្លួនតាមសារលិខិតរបស់ព្យាការីអំពីសេចក្ដីសញ្ញា និងផ្លូវនៃសេចក្ដីសញ្ញា ។
ប្រសិនបើបងប្អូនដាក់គោលដៅទទួលសេចក្ដីសញ្ញានីមួយៗដោយស័ក្ដិសមដែលចាំបាច់សម្រាប់ភាពតម្កើងឡើង នោះបងប្អូននឹងស្ថិតនៅលើផ្លូវដែលដឹកនាំទៅរកនគរសេឡេស្ទាល ។ ព្រះវិហារបរិសុទ្ធ និងពិធីបរិសុទ្ធទាំងឡាយនៃព្រះវិហារបរិសុទ្ធគួរតែជាការផ្ដោតយកចិត្តទុកដាក់របស់យើង ។ សេចក្ដីសញ្ញាភាគច្រើនមានសម្រាប់បុគ្គលម្នាក់ៗ ។ សេចក្ដីសញ្ញាមួយ ដែលជាអាពាហ៍ពិពាហ៍ដ៏នៅអស់កល្បជានិច្ច រួមមានការបង្រួបបង្រួមការខិតខំប្រឹងប្រែងរបស់បងប្អូនជាមួយដៃគូ ។ គោលដៅរបស់យើងគួរតែជាការស្វែងរកដៃគូដ៏នៅអស់កល្បជានិច្ច ។
ប៉ុន្តែ សូមកុំបាក់ទឹកចិត្ត ប្រសិនបើអាពាហ៍ពិពាហ៍ដ៏នៅអស់កល្បជានិច្ចមិនអាចកើតមាននៅពេលនេះ ។ ពួកព្យាការីបានបង្រៀនថា គ្មានពរជ័យណាមួយនឹងត្រូវដកចេញពីសមាជិកស្មោះត្រង់ដែលរក្សាបទបញ្ញត្តិឡើយ ។ ព្យាការីមួយរូបនៅក្នុងព្រះគម្ពីរមរមន ស្តេចបេនយ៉ាមីន បានមានបន្ទូលអំពីបញ្ហានេះយ៉ាងប្រពៃ ៖ « អស់អ្នកណាដែលកាន់តាមព្រះបញ្ញត្តិទាំងឡាយនៃព្រះ … បានពរគ្រប់យ៉ាង … ហើយបើសិនជាពួកគេ … [ មានចិត្ត ]ស្មោះត្រង់ដរាបដល់ចុងបំផុត … ពួកគេអាចរស់នៅជាមួយនឹងព្រះក្នុងស្ថានភាពសុភមង្គលដ៏មិនចេះចប់មិនចេះហើយ » ។
ប្រសិនបើបងប្អូនមិនទាន់ឃើញនៅឡើយ នោះបងប្អូននឹងរកឃើញថា សមាជិកមិនល្អឥតខ្ចោះនោះទេ ។ គោលលទ្ធិដែលបានបើកសម្ដែងបញ្ជាក់យ៉ាងច្បាស់ថា នៅក្នុងដំណើររបស់យើងនៅលើផែនដីនេះ យើងនឹងធ្វើខុស ។ យើងរស់នៅក្នុងពិភពលោកមួយដែលមិនល្អឥតខ្ចោះ ហើយធ្លាក់ មិនមែនជាពិភពសេឡេស្ទាលទេ ។ ជីវិតនេះគឺជាគ្រាមួយនៃការសាកល្បង ដោយសារមានឱកាសជានិច្ចដើម្បីប្រែចិត្ត ហើយបង្ហាញខ្លួនយើង ។
យើងគ្រប់រូបមានអារម្មណ៍ថាមិនគ្រប់គ្រាន់ នៅពេលយើងព្យាយាមប្រែក្លាយដូចជាព្រះយេស៊ូវគ្រីស្ទ ។ ដង្វាយធួនរបស់ទ្រង់អនុញ្ញាតឲ្យយើងប្រែចិត្តប្រចាំថ្ងៃ នៅពេលធ្វើខុស ។ ដូចជានីហ្វៃ ព្យាការីមួយរូបទៀតនៅក្នុងព្រះគម្ពីរមរមន បានមានប្រសាសន៍ ៖ « [ យើង ]ត្រូវតែឈានទៅមុខដោយខ្ជាប់ខ្ជួននៅក្នុងព្រះគ្រីស្ទ ដោយមានការភ្លឺថ្លានៃសេចក្ដីសង្ឃឹមដ៏ឥតខ្ចោះ ហើយដោយមានចិត្តស្រឡាញ់ព្រះ និងមនុស្សគ្រប់រូប ។ ហេតុដូច្នោះហើយ បើសិនជាអ្នករាល់គ្នាខិតខំជឿនទៅមុខ ដោយទទួលទាននូវព្រះបន្ទូលនៃព្រះគ្រីស្ទ ហើយកាន់ខ្ជាប់ដរាបដល់ចុងបំផុត មើលចុះ នោះព្រះវរបិតា ទ្រង់មានព្រះបន្ទូលដូច្នេះថា ៖ អ្នករាល់គ្នានឹងមានជីវិតដ៏នៅអស់កល្បជានិច្ច » ។
នៅពេលយើងជញ្ជឹងគិតពីបញ្ហាប្រឈមក្នុងជំនាន់របស់យើង នោះយើងត្រូវតែចងចាំថា ព្រះអង្គសង្គ្រោះ ក្នុងអំឡុងពេលនៃការងារបម្រើរបស់ទ្រង់នៅលើផែនដី ក៏បានរស់នៅក្នុងគ្រាដ៏ច្របូកច្របល់ និងហិង្សាផងដែរ ។ ការផ្ដោតរបស់ទ្រង់មិនមែនទៅលើការប្រឈមផ្នែកនយោបាយនៅជំនាន់នោះទេ ប៉ុន្តែបានផ្ដោតទៅលើភាពល្អឥតខ្ចោះរបស់ពួកបរិសុទ្ធ ។
ការធ្វើតាមព្រះអង្គសង្គ្រោះ ព្រមទាំងគោលលទ្ធិ និងការបង្រៀនរបស់ទ្រង់មិនដែលមានភាពងាយស្រួលឡើយនៅក្នុងពិភពលោកដែលមានភាពច្របូកច្របល់ជាបន្តបន្ទាប់មួយនេះ ។ វាមិនងាយស្រួលទេសម្រាប់ព្រះអង្គសង្គ្រោះដើម្បីគង់នៅក្នុងពិភពលោកមួយដែលឆាប់ប្រែប្រួលអំឡុងដំណើរនៃជីវិតរមែងស្លាប់របស់ទ្រង់ វាមិនងាយស្រួលសម្រាប់ថ្នាក់ដឹកនាំនិងសមាជិកដំបូងរបស់យើង ហើយវាក៏មិនងាយស្រួលសម្រាប់យើងដែរ ។ ប៉ុន្តែជាសំណាងល្អ ព្យាការីនានាផ្ដល់ការណែនាំដែលយើងត្រូវការជាពិសេសសម្រាប់ជំនាន់របស់យើង ។ ប្រធាន ដាល្លិន អេច អូក នឹងបន្តកេរ្តិ៍ដំណែលខាងវិញ្ញាណដ៏មានឥទ្ធិពល ។
ខ្ញុំសូមថ្លែងទីបន្ទាល់ថា គោលលទ្ធិរបស់សាសនាចក្រនៃព្រះយេស៊ូវគ្រីស្ទគឺអស់កល្បជានិច្ច ហើយពិត ។ ខ្ញុំសូមថ្លែងជាសាក្សីដ៏ពិត និងច្បាស់លាស់របស់ខ្ញុំថា ព្រះយេស៊ូវគ្រីស្ទមានព្រះជន្មរស់ ហើយដោយសារតែដង្វាយធួនរបស់ទ្រង់ យើងអាចរួមគ្នាតែមួយនឹងទ្រង់បាន ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕