የራሳችሁን ምሕረት አትተው

አንድ የትምህርት ቤት አስተማሪ በአንድ ወቅት አንድ ዓሣ ነባሪ ምንም እንኳን ትልቅ ቢሆንም አንድን ሰው መዋጥ እንደማይችል አስተምሯል ምክንያቱም ዓሣ ነባሪዎች ትንሽ ጉሮሮ ስላላቸው። አንዲት ልጅ “ዮናስ ግን በአሳ ነባሪ ተውጦ ነበር” ብላ ተቃወመች። አስተማሪው “ይህን ማድረግ አይቻልም” ብሎ መለሰላት። ልጅቷ አሁንም በመልሱ ስላልረካች “ወደ ሰማይ ስሄድ እጠይቀዋለሁ” አለችው። አስተማሪው “ዮናስ ኃጢአተኛ የነበረና ወደ ሰማይ ያልሄደ ቢሆንስ?” በማለት አሾፈ። ልጅቷም “ከዚያ እሱን አንተ ጠይቀው” ብላ መለስች።

እንስቅበታለን፣ ነገር ግን የዮናስ ታሪክ ለእያንዳንዱ “ትሑት የደስታ ፈላጊ“ በተለይም በመከራ ውስጥ ለሚታገሉት የሚያቀርበውን ኃይል ማጣት የለብንም።

እግዚአብሔር ዮናስን ወደ ነነዌ ሄዶ ንስሐ እንዲገቡ እንዲያውጅ አዘዘው። ይሁን እንጂ ነነዌ የጥንቷ እስራኤል ጨካኝ ጠላት ስለነበረች ዮናስ ወዲያውኑ በተቃራኒ አቅጣጫ በጀልባ ወደ ተርሴስ ተጓዘ። ተልዕኮውን ትቶ እየተጓዘ በነበረበት ወቅት ከባድ መርከብን የሚያሰምጥ ማዕበል ተከሰተ። ዮናስ በፈቃደኝነት ወደ ባሕሩ መጣል የፈለገበት ምክንያት አለመታዘዙ እንደሆነ የታወቀ ነው። ይህ ማዕበሉን የሚያረጋጋ ሲሆን በመርከብ ውስጥ ያሉትን ያድናል።

ተዓምራዊ በሆነ መንገድ ዮናስ ከሞት ሲተርፍ ጌታ ያዘጋጀው “ታላቅ ዓሣ“ ዋጠው። ነገር ግን በመጨረሻ በደረቅ መሬት ላይ እስኪተፋው ድረስ በዚያ በማይታመን ሁኔታ ጨለማ እና በቆሸሸ ቦታ ውስጥ ለሦስት ቀናት ቆይቷል። ከዚያም ወደ ነነዌ የመሄድ ጥሪውን ተቀብሏል። ይሁን እንጂ ከተማዋ ንስሐ በመግባት ከጥፋት ስትድን፣ እግዚአብሔር ለጠላቶቹ ምሕረት በማሳየቱ ዮናስ ተቈጥቶ ነበር። እግዚአብሔር ዮናስን እንደሚወደው እና ልጆቹን ሁሉ ለማዳን እንደሚፈልግ በትዕግሥት አስተማረው።

ዮናስ ኃላፊነቱን በተደጋጋሚ በመወጣት በሟች ህይወት “ሁሉም ወድቀዋል“ የሚል ግልጽ ማስረጃ አቅርቧል። ብዙ ጊዜ ስለ ውድቀት ምስክርነት አንናገርም። ነገር ግን እያንዳንዳችን በሥነ ምግባር፣ በአካላዊና በሁኔታዊ ፈታኝ ሁኔታዎች ለምን እንደምንታገል የሚገልጽ ትምህርታዊ ግንዛቤና መንፈሳዊ ምስክርነት ማግኘታችን ትልቅ በረከት ነው። እዚህ ምድር ላይ፣ አስቀያሚ እንክርዳድ ያድጋል፣ ጠንካራ አጥንቶች እንኳን ይሰበራሉ፣ እናም ሁሉም “የእግዚአብሔርን ክብር ጎድሎአቸዋል”። ይሁን እንጂ አዳምና ሔዋን ባደረጉት ምርጫ ምክንያት የመጣው ይህ ሟችነት ለህልውናችን ዋነኛ ምክንያት ነው፤ ይኸውም “ደስታ እንዲኖረን” ነው። የመጀመሪያዎቹ ወላጆቻችን እንደተማሩት የወደቀውን ዓለም መራራነት በመቅመስና ስቃዩን በመሰማት ብቻ እውነተኛ ደስታን ማግኘት እንችላለን።

የምስክርነት መውደቅ ኃጢአትን ወይም በሕይወት ግዴታዎች ላይ ቸልተኛ አቀራረብን አያጸድቅም፣ ይህም ሁል ጊዜ ትጋት፣ በጎነት እና ተጠያቂነት ይጠይቃል። ይሁን እንጂ ነገሮች በተሳሳተ መንገድ ሲሄዱ ወይም አንድ የቤተሰብ አባል፣ ጓደኛ ወይም መሪ የሥነ ምግባር ጒድለት ሲያጋጥመው የሚሰማንን ብስጭት ማስታገስ ይኖርብናል። ብዙውን ጊዜ እንዲህ ያሉ ነገሮች እምነታችንን በሚሰርቁ አወዛጋቢ ትችቶች ወይም ቂሞች እንድንዋጥ ያደርጉናል። ነገር ግን ስለ ውድቀት ጠንካራ ምስክርነት በዮናስ እንደተገለጸው እንደ እግዚአብሔር የበለጠ እንድንሆን ሊረዳን ይችላል፣ ማለትም “ምሕረት ያለው፣ ለቍጣ የዘገየ፣ እና ለሁሉም ታላቅ ቸርነት ያለው”

የዮናስ ታሪክ የኃጢአትን ውጤቶች ከማሳየት አልፎ ከእነዚህ ውጤቶች ሊያድነን ወደሚችለው ይመራናል። ዮናስ በመርከብ ውስጥ የነበሩትን ለማዳን የከፈለው መስዋዕትነት በእርግጥም የክርስቶስ ምሳሌ ነው። ኢየሱስ ሶስት ጊዜ ስለ መለኮታዊ ተዓምራቱ ምልክት ሲጠየቅ በቁጣ “ከነቢዩም ከዮናስ ምልክት በቀር ምልክት አይሰጠውም“ አለ፣ እናም በማወጅም ዮናስ “በዓሣ አንባሪ ሆድ ሦስት ቀንና ሦስት ሌሊት እንደ ነበረ፥ እንዲሁ የሰው ልጅ በምድር ልብ ሦስት ቀንና ሦስት ሌሊት ይኖራል“ ብሏል። የአዳኙ የመስዋዕትነት ሞትና የክብር ትንሣኤ ተምሳሌት እንደመሆኑ መጠን ዮናስ እንከን ያለበት ሊሆን ይችላል። ነገር ግን ለኢየሱስ ክርስቶስ ያቀረበው የግል ምስክርነት እና ቁርጠኝነት በአሳ ነባሪ ሆድ ውስጥ በጣም አሳሳቢ እና አነሳሽ ያደርገዋል።

የዮናስ ጩኸት በችግር ውስጥ ያለ ጥሩ ሰው ጩኸት ነው፤ ጩኸቱ በአብዛኛው እሱ ራሱ የፈጠረው ነው። ለቅዱሳን አንድ መጥፎ ልማድ፣ አስተያየት ወይም ውሳኔ አደጋ ሲያስከትል ሌሎች ብዙ መልካም ዓላማዎች እና የጽድቅ ጥረቶች ቢኖሩም በተለይ አስጨናቂ እና የተተወ ስሜት ሊፈጥር ይችላል። ይሁን እንጂ የችግሩ መንስኤ ወይም ደረጃ ምንም ይሁን ምን ሁልጊዜም ቢሆን ተስፋ፣ ፈውስና ደስታ የሚገኝበት ደረቅ መሬት አለ። ዮናስን ስሙ፦

“በመከራዬ ሳለሁ ወደ አምላኬ ወደ እግዚአብሔር ጮኽሁ … በሲኦልም ሆድ ውስጥ ሆኜ ጮኽሁ …

“ወደ ጥልቁ ወደ ባሕሩ ውስጥ ጣልኸኝ፥ …

“[እንዲሁም] እኔም ከዓይንህ ፊት ተጣልሁ፤ ነገር ግን ወደ ቅዱስ መቅደስህ ደግሞ እመለከታለሁ አልሁ።

“ውኆችም እስከ ነፍሴ ድረስ ከበቡኝ፤ ጥልቁ ባሕር በዙሪያዬ ነበረ፤ የባሕሩ ሣር በራሴ ተጠምጥሞ ነበር።

“ወደ ተራሮች መሠረት ወረድሁ … አንተ ግን፥ … ሕይወቴን ከጕድጓዱ አወጣህ።

“ነፍሴ በዛለችብኝ ጊዜ እግዚአብሔርን አሰብሁት፤ ጸሎቴም ወደ አንተ ወደ ቅዱስ መቅደስህ ገባች።

“ከንቱነትንና ሐሰትን የሚጠብቁ ምሕረታቸውን ትተዋል።

“እኔ ግን በምስጋና ቃል እሠዋልሃለሁ፤ የተሳልሁትንም እከፍላለሁ። ደኅንነት ከእግዚአብሔር ዘንድ ነው።”

ምንም እንኳን ከብዙ ዓመታት በፊት የነበረ ቢሆንም እኔ የት እንደነበርኩ እና ምን እንደተሰማኝ በትክክል ልነግራችሁ በማልችልበት፣ በግል ገሃነም ሆድ ውስጥ በጥልቅ ውስጥ ሳለሁ ይህንን ጥቅስ አገኘሁ። እኔ በዚያ ጊዜ እየበረኝ አይነት ስሜት ዛሬ ለሚኖራቸው—በጥልቅ ውኃ ውስጥ ተጥለቅልቃችሁ እንደተጣላችሁ፣ በጭንቅላታችሁ ዙሪያ የባሕር አረም እንደተጠቀለለ እና በዙሪያችሁ የውቅያኖስ ተራሮች እንደተሰበሩ አይነት የተሰማችሁ—በዮናስ አነሳሽነት ያቀረብኩት ልመና ይህ ነው፦ የራሳችሁን ምሕረት አትተው። ምንም እንኳን ሰብአዊ ጕድለቶች ቢኖሩም ወዲያውኑ መለኰታዊ እርዳታ እና ፈውስ ማግኘት ትችላላችሁ። ይህ አስገራሚ ምሕረት የሚመጣው በኢየሱስ ክርስቶስ በኩል ነው። እሱ ስለሚያውቃችሁ እና በፍጹም ስለሚወዳችሁ እንደ “የራሱ“ አድርጎ ያቀርባቹሃል፣ ይህም ማለት ለእናንተ ፍጹም ተስማሚ ነው፣ የግል ህመሞችሁን ለማስታገስ እና ልዩ የግል ህመማችሁን ለመፈወስ የተነደፈ ነው። ስለዚህ ለአምላክና ለራሳችሁ ስትሉ ለዚያ ነገር ጀርባችሁን አትመልሱ። ተቀበሉት። ከመንፈሳዊ ኃላፊነታችህ በመራቅ እፎይታ ማግኘት እንደምትችሉ እንድታስብ ሊያደርግ የሚሞክረውን የጠላት “ከንቱ ውሸት” ላለመስማት ቍርጥ ውሳኔ አድርጉ። ከዚህ ይልቅ ንስሐ የገባውን ዮናስን ምሳሌ ተከተሉ። ወደ እግዚአብሔር ጩሁ፤ ወደ ቤተመቅደስ ተመለሱ። ቃል ኪዳናችሁን ጠብቁ። ጌታን፣ ቤተክርስቲያኑን እንዲሁም ሌሎችን በመሥዋዕትና በምስጋና አገልግሉ።

እነዚህን ነገሮች ማድረግ የዕብራይስጥ መጽሐፍ ቅዱስ ሄሴድ ብሎ የሚጠራውን እግዚአብሔር ለአንተ ያለውን ልዩ የቃል ኪዳን ፍቅር ያሳይሃል። የእግዚአብሔር ታማኝ፣ የማይደክም፣ የማያልቅና “ቸር የሆነ ምሕረት” ኃይልን ታያላችሁ እንዲሁም ትሰማላችሁ፤ ይህም ከማንኛውም ኃጢአት ወይም ከማንኛውም ውድቀት እንድትላቀቁ ኃያልን ያደርግላችሃል። ቀደምት እና ከባድ ጭንቀት መጀመሪያ ላይ ያንን ራእይ ሊያደበዝዝ ይችላል። ነገር ግን በስለት የገባችሁትን መፈጸም ከቀጠላችሁ እንዲህ ዓይነቱ ራእይ በነፍሳችሁ ውስጥ ይበልጥ ብሩህ ሆኖ ያበራል። እናም በዚህ ራእይ ተስፋና ፈውስ ማግኘት ብቻ ሳይሆን በሚያስደንቅ ሁኔታ ደስታንም ታገኛላችሁ። ፕሬዚዳንት ራስል ኤም. ኔልሰን በደንብ እንዳስተማሩን፣ “የህይወታችን ትኩረት በእግዚአብሔር የደህንነት እቅድ … እና በኢየሱስ ክርስቶስና በወንጌሉ ላይ ሲሆን፣ በህይወታችን ከተከሰተውም ወይም ካልተከሰተውም ሁኔታ ባሻገር ደስታ ሊሰማን ይችላል።” ደስታ ከእርሱና በእርሱ ምክንያት ይመጣል።”

ጥልቅ የሆነ የዮናስ ዓይነት አደጋ ቢያጋጥመንም ሆነ ፍጽምና የጐደለው ዓለማችን በየዕለቱ የሚያጋጥመን ፈተና ቢያጋጥመንም፣ ግብዣው ተመሳሳይ ነው፦ የራሳችሁን ምሕረት አትተው። የዮናስን ምልክት ተመልከቱ፣ ሕያው የሆነው ክርስቶስ፣ ከሦስት ቀን መቃብሩ ተነሥቶ ሁሉንም ድል አድርጓል። ፊታችሁን ወደ እርሱ መልሱ። በእርሱ እመኑ። አገልግሉት። ፈገግ በሉ። ሁላችንም በጣም የሚያስፈልገን እና በትሕትና የምንፈልገው ከኃጢአት መውደቅ ሙሉ በሙሉ እንዲሁም በደስታ መፈወስ የሚቻለው በእሱ፣ እና በእሱ ብቻ፣ ነው። ይህ እውነት መሆኑን እመሰክራለሁ። በኢየሱስ ክርስቶስ ቅዱስ ስም፣ አሜን።