Nuidei ena Mata ni Kalou

Kemuni na taciqu kei na ganequ lomani, au vakavinavinakataka niu rawa ni vosa vei kemuni nikua, ena koniferedi raraba bibi oqo. Sa qase tiko ga mai na mataqu. Vinaka vakalevu ena nomuni veinanui niu mai wasea na noqu itukutuku.

Eda bula tiko ena veisiga cecere ni gugumatua ni Lotu i Jisu Karisito ni Yalododonu Edaidai. Au marau vakalevu niu raica na tubu ena vuqa ena vuqa na yasana.

Au vakauqeti vakatabakidua mai vei ira na noda itabagone. Era veiqaravi vakalewelevu. Era vakasaqarai ira na wekadra ka cakava tiko na cakacaka vakalotu ena valetabu. Era lewelevu na noda cauravou kei na goneyalewa era volakerekere mera laki kaulotu. Na itabatamata ni mataka e tubu tiko mera yalodina na muri Jisu Karisito.

Au se qai sotava ga qo e dua na goneyalewa me makubuqu vakarua. Niu vakasamataka na ibolebole ena sotava ena nona bula, au gadreva vakalevu meu vukea me tara cake nona vakabauti Jisu Karisito. Na nona bulataka na kosipeli Jisu Karisito e bibi me baleta na nona bula reki ena veisiga ni mataka.

O koya, me vakataki keda yadua, ena sotava na ibolebole. Eda na sotava taucoko na tauvimate, rarawa, veitemaki, kei na mate. Na vei bolebole oqo e rawa ni ravuta na noda dui-nuidei. Ia, o ira na tisaipeli i Jisu Karisito era rawata e dua na mataqali nuidei.

Nida cakava ka maroroya na veiyalayalati kei na Kalou, eda na rawata na nuidei e sucu mai na Yalotabu. A kaya na Turaga vei Parofita Josefa Simici ni noda nuidei e rawa ni “vakaukauwataki kina na nomu vakabauta ena matani Kalou.” Raitayalotaka na vakacegu nida nuidei ena mata ni Kalou!

Niu tukuna tiko meda nuidei ena mata ni Kalou, au cavuta tiko na nuidei nida toro vua na Kalou ena gauna oqo! “Au vakaibalebaletaka tiko na masu ena yalodei ni dau rogoci keda na Tamada Vakalomalagi, ka kila vakavinaka cake o Koya na noda gagadre mai vei keda. Au tukuna tiko na yalodei ni lomani keda vakalevu cake mai na veika eda rawa ni vakasamataka rawa, ni talai ira mai na agilosi me ra tiko vata kei keda kei ira eda lomana. Au tukuna tiko meda nuidei ni sa lomana me vukei keda vakayadua meda yacova na veika cecere.

Ia, meda rawata vakacava na nuidei vakaoqo? E sauma na Turaga na taro oqo ena vosa oqo: “Me vakasinaiti na lomamuni ena loloma uasivi vei ira na tamata kecega, me vakaiukuukutaki tikoga na nomudou vakanananu ena ivalavala savasava; ia ena vakaukauwataki kina na nomu vakabauta ena mata ni Kalou.”

Oya na idola! Ena nona vosa na Turaga, na loloma kei na bula savasava e dolava na sala meda nuidei ena mata ni Kalou! Taciqu kei na ganequ, eda rawa ni cakava! Na noda nuidei e rawa dina ni vakaukauwataki ena mata ni Kalou, walega oqo!

Meda raica ruarua na loloma kei na bula savasava.

iMatai, na loloma. Rua na yabaki sa oti, au kerei keda, na daumuria na veiyalayalati kei Jisu Karisito, meda dautataro. Meu tokaruataka noqu vosa e liu: “Na cudru e sega ni veivakauqeti. Na veisaqasaqa e sega ni tara cake e dua. Na veileti e sega sara ni mua kina iwali e veivakauqeti.”

Na loloma dina vei ira na tamata kece sa kedra ivakatakilakila na daunidautataro! Sa ka bibi me tiko vei keda na loloma ena noda veituberi, ena bula raraba kei noda dui bula Au vakavinavinakataki kemuni oni ciqoma e lomamuni na noqu ivakasala taumada. Ia eda rawa ni vinaka cake.

Na veisaqasaqa ena veivosaki raraba kei na itukutuku raraba e vakarerevaki. Na vosa ni veivakacacani e rawa ni veivakamatei. Na veileti e tarova na Yalo Tabu me mai noda itokani vakawasoma.

Oi keda na daumuri Jisu Karisito, e dodonu meda liutaka na sala nida sa dua na dautataro. Ni loloma sa tiki ni noda ivakarau ni bula, ena sega vei keda na yalo meda beci ira na tamata. Eda na sega ni vakalewai ira na tamata. Meda lomani ira na tamata kecega. Na loloma vei ira na tamata kecega e bibi kina noda torocake. Na loloma sa yavu ni noda itovo vakalou.

Me da ia na vakatakekere vua na Tamada Vakalomalagi me vakasinaita na yaloda ena loloma cecere —vakabibi vei ira sa dredre mera lomani—na yalo loloma sa isolisoli mai vei Tamada Vakalomalagi me baleti ira na yalodina ena nodra muri Jisu Karitsito. Na iVakabula sa Tui ni Sautu. Meda Nona tamata ni veisaututaki.

Ia, meda veitalanoataka na bula savasava. E kaya na Turaga vei keda meda ukutaka tikoga na noda vakasama ena bula savasava. Raitayalotaka na veivakauqeti ona ciqoma ni veivakasama vinaka kevaka o vakalevutaka na nomu savasava. Na bula savasava e cakava na ka kecega me vinaka ka marautaki vakalevu! Dua tale na sala, raitayalotaka na cava ena yaco nio kuria na bula savasava ena dua na vakasama ca, vakasama lolovira, se vakasama sega ni veivueti. Na vakasama oqori ena kauta laivi na bula savasava. Na bula savasava ena sereki iko mai na nuiqawaqawa, kei na vakasama e veivakaleqai.

Taciqu kei na ganequ, ni tubu levu tiko ga na ca ena vuravura oqo, ena gadrevi me tubucake noda savasava. Na noda vakasama, vosa, kei na ivalavala e gadrevi, me kakua ni luluqa kina na savasava, ka sinai ga ena loloma savasava i Karisito kina tamata kecega. Na madigi cecere e tu oqo oya meda vakataka na tamata e vinakata na Kalou.

Na sokalou vakawasoma ena vale ni Turaga ena vakalevutaka na noda rawata ruarua na ivalavala dodonu kei na loloma cecere. Ia, na gauna ena valetabu ena vakalevutaka noda nuidei tiko e mata ni Turaga. Na vakalevutaki ni noda gauna ena valetabu ena vukea meda vakavakarau kina iKarua ni Lako Mai ni noda iVakabula, o Jisu Karisito. Eda sega ni kila na siga se auwa ni Nona lako mai. Ia au kila ni Turaga sa vakauqeti au tiko meu vakamasuti keda meda vakavakarau kina “siga e levu ka rerevaki oqo.”

Nida vakasaqara vagumatua me sinai na loloma kei na dodonu kina noda bula, na noda nuidei meda toso vua na Kalou ena vakalevutaki. Au sureti kemuni moni tauri kalawa vakainaki me tubu na nomuni nuidei e mata ni Turaga. Oti, nida gole vua na Tamada Vakalomalagi ena vakalevutaki na nuidei, eda na vakasinaiti ena reki levu, ka tubu na noda vakabauti Jisu Karisito. Eda na tekivu sotava na kaukauwa vakayalo e uasivita na noda inuinui levu.

Eda vakavinavinaka vua na Turaga baleta na vakusakusataki ni tara ni valetabu ena veiyabaki oqo. Ena Nona veidusimaki, nikua keitou kacivaka na ituvatuva ni kena tara na valetabu ena vei vanua oqo:

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Potukali

• Uyo, Nigeria

• San Jose del Monte, Filipaini

• Noumea, New Caledonia

• Liverpool, Ositerelia

• Caldwell, Idaho

• Flagstaff, Arizona

• Rapid City, South Dakoda

• Greenville, South Dakoda

• Norfolk, Virginia

• Spanish Fork., Utah

Au vakadinadinataka nio Jisu Karisito, na Dauveivueti kei Isireli, sa liutaka tiko, na Nona Lotu. Sa vakavakarau tiko me lesu tale mai. Meda sa qai vakarau vakakina meda tavaki Koya. Sa noqu masu kina oqo ena yaca i Jisu Karisito, emeni.