E Veivakarautaki na Veivakalougatataki

Na noqu veiqaravi ena Mataveiliutaki ni Matabisopi Vakatulewa, e solia e dua na madigi meu sotavi ira kina na Yalododonu edaidai e veiyasai vuravura kei nodra ivakarau. Sa dua na ka na noqu vakauqeti ena nodra vakabauta kei na nodra yalodina vua na Turaga o Jisu Karisito. E vakauqeti au talega na duidui kei na ituvaki ni veibolebole eso era sotava e lewe vuqa vei kemuni—me vaka na tauvimate, lokiloki, lailai ni vurevure ni yau, luluqa na madigi ni vakamau se vuli, veivakatotogani mai vei ira eso, kei eso tale na veivakatovolei e dau vakatubuleqa. Eso na gauna, na veibolei oqo e rawa me tarova na nomu toso kei na sasaga yalodina mo bulataka na taucoko na kosipeli, qai dau yaco me vakadredretaka na veiqaravi, sokalou, kei na kena qaravi na noda itavi vakatabui.

Kemuni na noqu itokani, kevaka e yaco moni vakila na yalolailai se veivakatovolei ni tuvaki ni nomu bula, au vinakata moni kila oqo, na Turaga e lomani kemuni vakayadua. E kila na kemu ituvaki o Koya, kei na katuba kina Nona veivakalougatataki e tadola tu vei iko se mani vakacava na ibolebole o sotava tiko.

Au vulica na dina oqo ena veika au sotava, dina ni rairai e sega sara ni vakaibalebale, e bibi na kena veivakayarayarataki vei au. Niu se yabaki 22, au veiqaravi ena French Air Force e Parisi, au marautaka niu rogoca ni na tiko o Elder Neal A. Maxwell, na Apositolo ni Turaga, ka na vosa tiko ena koniferedi e vakayacori ena Champs-Élysées. Ia, ni bera ni tekivu na soqoni oqo, a lako mai e dua na ivakaro meu draivataka e dua na iliuliu ni mataivalu kina rara ni waqavuka ena gauna vata me tekivu kina na koniferedi.

Au rarawa sara ga. Au gadreva meu tiko kina, au vakasoburi iliuliu ni mataivalu ka vakatotolo sara kina koniferedi. Niu vakelea ga na motoka, au cici vakatotolo sara kina soqoni ena Champs-Elysées. Au yaco yani ena cegulevu ni sa vo ga e lima na miniti ni bera ni cava na soqoni. Noqu curu yani, au sa rogoca sara ni tukuna o Elder Maxwell, “Au na solia vei kemuni ena gauna oqo na veivakalougatataki vaka apositolo.” Ena gauna oya, e totoka, ka guiguilecavi dredre na veika vakayalo au sotava Au vakasinaiti ena Yalotabu, kei na vosa ni veivakalougatataki e curuma na veitiki ni sema ni yaloqu me vakaga e vosa vakatabakidua vei au.

Na veika au sotava ena siga oya e ka lailai ia na kaukauwa na kena vakatakilai na Nona ituvatuva na Kalou vei ira na Luvena: Ni dau yaco eso na ituvaki dredre me vakataotaka na noda veiqaravi ena yalodina, na Turaga ena vakarautaka na sala me rawa ni da ciqoma na Nona iyalayala ni veivakalougatataki.

Na veivakadeitaki ni dina oqo e yavutaki ena tolu na ivakavuvuli e kune ena kosipeli vakalesuimai i Jisu Karisito.

1. E lomani keda vakataucoko na Kalou. “Sa sureti ira kecega mera lako mai vua ka vakaivotavota ena nona vinaka.” Na Nona yavu ni veivueti e vakadeitaka ni na soli na madigi vei keda kece meda ciqoma na veivakalougatataki ni veivakabulai kei na bula vakacerecerei.

2. Baleta ni yalododonu ka yalololoma na Kalou, ka taucoko na Nona yavu ena sega ni beitaki keda o Koya ena veika e lako sivita na noda igu vakatamata. Vakamacalataka o Elder Neal A. Maxwell, na Kalou e vakatulewataka ena yalo loloma na noda gagadre kei na noda cakacaka, vakakina na duidui ni vakatagedegede ni dredre ni veituvaki e lavaki vei keda.”

3. Ena vukui Jisu Karisito kei na Nona Veisorovaki, eda rawa ni kunea na kaukauwa meda tudei ka uabaleta na ibolebole kece ni bula. Vaka e vakatavulica o Alama, na iVakabula e colata duadua na ivalavalaca nei koya e veivutuni ka vakatalega kina “na mosi kei na nodra tauvimate na nona tamata” kei na “nodra malumalumu.” E yaco kina, me vueti keda mai na noda caka cala, na nona dodonu kei na loloma cecere e tokoni keda ena loma ni veivakaduiduitaki, lecaika, kei na veivakatatao eda bikai kina ena bula oqo.

Na ciqomi ni veivakalougatataki dau veivakarautaki oqo e dau yaco ena dela ni vica na ivakatutu. E kerei keda na Turaga meda vakayacora “ena noda igu” ka “cabora [na] yaloda taucoko me isoro kivua.” Qo ena gadreva edua na gagadre titobu, vakabauta ena yalodina, kei na noda igu taucoko me maroroi na Nona ivakaro kei na noda vakaduavatataki keda vei Koya.

Ni dau yaco na leqa ena loma ni noda sasaga kaukauwa baleta eso na veituvaki dau yaco eda sega ni lewa, na Turaga ena vakadeitaka na gagadre dina ni yalomu kei na nomu isoro. Vakatavulica o Peresitedi Dallin H. Oaks, “Eda na vakalougatataki baleta na noda gagadre kilikili dina ga ni dau yaco eso na ituvaki ni bula koya dau tarova na noda gagadre vinaka me vakavotukana.”

Gauna e nuiqawaqawa kina na Parofita o Josefa Simici baleti tuakana o Alvin, a mate ni bera ni ciqoma na nona cakacaka vakalotu, a ciqoma o koya na ivakatakila oqo: “Ko ira kece era na mate ka lako yani ka ra sega ni bau rogoca, o ira a rawa mera vakabauta ena yalodra taucoko, era na vakaivotavota ena [matanitu vaka silesitieli ni Kalou].” Qai tomana na Turaga “Ni koi Au na Turaga, au na lewai ira na tamata kecega me vaka na nodra cakacaka, me vaka na gagadre ni lomadra.”

E sega ni bibi vua na Turaga nida rawata e bibi vakalevu cake na noda gadreva me solia na noda igu meda muri Koya ni noda iVakabula.

Dua noqu itokani a vakalomavinakataki dua na daukaulotu gone ni lomabibi voli ena navunavu me lesu tale ki vale ena vuku ni tauvimate, dina ga ni vuqa na nona masu ena yalo dina me veiqaravi tikoga. E wasea na noqu itokani na ivolanikalou e vunauca kina na Turaga nira lako o ira na Luvena “ena yalodra taucoko” ka “sega ni guce kina” mera vakayacora kina na Nona ivakaro, “ia era qai lako mai na nodra meca me tarovi ira mai na nodra cakava na cakacaka oya, raica, au sa na lewa meu kakua tale ni taroga na cakacaka oya ena ligadra na luve ni tamata oqori, ia meu ciqoma ga na veika era sa rawata.”

Vakadinadinataka na noqu itokani vei cauravou ni kila na Kalou na nona solia na nona igu tacucoko me rogoca na kaci me laki veiqaravi. E vakadeitaki vei koya ni sa ciqoma na Turaga na nona isoro kei na iyalayala ni veivakalougatatki vei ira na kaulotu yalodina ena sega ni kautani mai vei ira.

Na Turaga e dau vakarautaka na veivakalougatataki mai vei ira na dau veiqaravi ena yalodina mera vukea na noda vakacavara na itavi eda sega ni rawa ni cakava duadua. Au vakasamataka e dua na gauna, na luvequ yalewa a vakaitikotiko ka yawa e Varanise, sega ni rawa me keirau vukei koya ni oti e dua na nona vakasucu dredre. Na macawa vata oya, na neirau tabanalevu e Utah a gadreva e dua na veivuke vua e dua na tina e seqai vakasucu. Rau drua na luvena. Na watiqu, o Valérie, se bolea me kauta na kena kakana, e qai masu ena vu ni yalona me baleta na tina ni gone vou kei na luvei keirau ena veika e rau gadreva. Oti ga vakalailai, keirau rogoca sara nira laki veisiko na marama ena nona tabanalevu na luvei keirau e Varanise ka vakarautaka na kakana vei nona vuvale. Vei au, a sauma na neirau masu na Kalou, ena nona vakauti ira na Nona agilosi mera solia na vakacegu keirau sega ni rawa ni solia.

Nida lako curuma tiko na veivakatovolei, meda raica na noda veivakalougatataki—noda solisoli, ivurevure ni ka, gauna— ka vakayagataka mera qaravi o ira era gadreva na veivuke. Nida vakayacora na veika oqo, eda sega walega ni vakalougatataki ira eso, eda sureta talega na nona veivakabulai kei na veivakarautaki kina noda bula.

E dua na sala kaukauwa eda rawa ni cau kina nona veivakarautaki na Kalou oya na noda cakacaka e vukudra na noda kawa ena vale ni Turaga. Nida vakaitavi ena cakacaka ni Kalou ena vukudra, eda sa vakaitavi tiko ena cakacaka vakaitamera ni veivakabulai ni Turaga, kena vakayagataki na noda solisoli kei na rawaka me vakalougatataki ira koya era sega ni sotava na madigi me ra ciqoma ena nodra bula voli.

Na veiqaravi ni loloma eda vakayacora ena valetabu e vakananuma vei keda nida na vakila tiko na loloma cecere ni Vakabula ni oti na bula oqo. Ena bula sebera mai, ena soli vei keda eso na madigi vovou meda vakayacora kina na veika eda a sega ni rawa ni cakava rawa ena bula oqo. Nona vosa vei ira na marama sebera ni vakawati, e kaya kina o Peresitedi Lorenzo Snow: “E sega ni dua na Yalododonu Edaidai me mate ni oti na nona bulataka tu e dua na bula yalodina mena yali vua e dua na ka ni a sega ni cakava eso na ka baleta ni a sega ni yaco mai na kena madigi. Era na taura na veivakalougatataki, bula vakacerecerei, kei na lagilagi e soli vua dua na turaga se marama a sotava na madigi oqo.”

Na itukutuku ni nuinui kei na vakacegu e vakatabakidua vei keda kece, na luveni Kalou. E sega ni dua vei keda e galala mai na veivakatovolei kei na dredre ni bula oqo. O keda kece eda sucu mai e sega vei keda na kaukauwa meda vakabulai keda. Ia e tiko na noda iVakabula loloma, ka “eda sa kila nida sa vakabulai ena loloma soli wale, ni sa oti sara na veika kece eda rawa ni cakava.”

Au vakadinadinataka ni dina e vuqa na noda veivakatovolei ni bula eda na sega ni tarova rawa, e sega ni dua vei keda e galala mai na nona veivakalougatataki tawamudu na Turaga. Mai na Nona isoro ni veivakaduavatataki, sa tuvakarau na iVakabula me vakaduavatataka na vei duidui eda sotava kevaka eda cabora Vua na yaloda taucoko. Ena yacai Jisu Karisito, emeni.