Kune Marau ena Veiyalayalati vaka Tisaipeli

Dua na siga ena 2023, a cakacaka tiko o Uyanga Altansuk e Darkhan, dua na taoni ena vualiku kei Mongolia, basika yani ena nona vanua ni cakacaka na peresitedi ni kaulotu e Mongolia. Ena nona vosa:

“Noqu raici koya e kasa vei au na rarama e cilava na kena irairai. E talei na nona ivakarau ka dau vakamarautaki ira na tiko wavolita koya, au vakila na yalo vinaka. Ni bera nona biubiu, au taroga vei koya e vica na taro. Oti e vica na siga, a qai lesu mai ena noqu vanua ni cakacaka ka tarogi au kevaka au via laki lotu ena nona valenilotu. Au nanuma ena vukei au. Au dau leqataka na nodra veisiga ni mataka na luvequ, ni sa robota na noda vanua na butobuto kei na nuiqawaqawa ni bula. Au vinakati ratou na luvequ me ratou vaka na rarama ni kena irairai na tamata oqo, ena nona wasea voli na nona kune marau vei ira era tu wavolita.

Dua na siga erau vakavulici keitou na daukaulotu na lawa ni katini. Eratou tukuna ena marau na luvequ, ‘Me datou sauma na nodatou ikatini, Na.’ Au raica na nodratou vakabauta na luvequ ena gauna oya. Ni bera noqu lewena na Lotu, au dau sarava na koniferedi raraba ka rogoca ni vosa o Peresitedi Russell M. Nelson. E kacivaka na vanua me tara vou kina na valetabu e veiyasai vuravura ka cavuta ni na dua na valetabu vou ena tara e Ulaanbaatar, Mongolia. Dua na ka noqu marau, ka lako vata na wai ni mataqu, au sega ni kila na cava na vuna. Na marau oqo, e vakaraitaka tiko vei au ni sa tubu tiko na noqu vakabauta kei na ivakadinadina.”

O Uyanga, me vakataka e milioni tale eso, era tiki ni kena vakasoqoni vata ko Isireli ena vakavakarau kina iKarua ni Nona Lesu Mai o Jisu Karisito. E tekivuna o koya na nona mua tiko ena sala ni veiyalayalati ka dua na tisaipeli i Karisito. Na cava na ibalebale meda tisaipeli i Jisu Karisito? Au vakavinavinakataka na kena vaka Japani na tisaipeli—deshi—de kena ibalebale na tacina gone, ka shi kena ibalebale na luvena.

Tukuna o Jisu Karisito, “Au a tiko vata kei Tamaqu mai na ivakatekivu, ka ni sai au na Ulumatua.” Baleta ni ocei o Koya ka na veika e vakayacora o Koya eda Sokalou vei Koya, eda Rokovi Koya, eda Vakalagilagi Koya, ka da Muri Koya. E sa Vueti keda na Karisito, ka da vakavinavinaka tawamudu ena Nona veisorovaki tawamudu.

E tiko na Tamada Vakalomalagi ka lomani keda kece na Luvena. Na Nona lomani keda e taucoko. Nona inaki o Jisu Karisito e vakaraitaka na Loloma ni Kalou vei keda. Vola o Joni, “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”

Na noda gagadre meda kila na veika eda sega ni kila, eda na vakararavi ena so na gauna kina veika ni bula eda lakocuruma, se eso na ka eda sa kila tiko. Me kena ivakaraitaki, e rawa nida vulica eso na ka me baleta na Kalou na Tamada mai na noda itutu vaka itubutubu kei na noda sema vakavuvale. Ia, e dodonu meda dau qarauna na kena vakayagataki eso na veivakatauvatani vakaoqo ena noda sasaga meda kilai Tamada Vakalomalagi. Na Nona ituvaki na Kalou na Tamada e sivita taucoko lailai sobu ni keda ituvaki na bula druka. Na Kalou na Tamada e taucoko na Nona itutu Vakatama. E taucoko na Nona loloma, Nona vievakalomavinaka, Nona kilaka, ka taucoko na nona lagilagi. Eda rawa ni niutaki Koya vakataucoko. Na loloma i Karisito e vakaraitaka na loloma ni Kalou na Tamada.

O Jisu Karisito e ivakaraitaki kei na sala me vakayacori kina. Baleti Karisito, eda na kila vinaka kina na ituvaki taucoko nei Tamada kei na Nona ituvatuva. Baleti Karisito, e soli vei keda na kaukauwa me da sabaya kina na vakanananu vakatamata e dau yaco vei keda me rawa ni da vakataka na Tamada.

Me vaka na Tamada Vakalomalagi, o Jisu Karisito e taucoko na Nona loloma kei na dodonu. Na ituvaki vakalou ni dodonu kei na loloma era sega ni veisaqasaqa. Erau veitokoni. Na dodonu kei loloma e vakaraitaka na taucoko ni loloma ni Kalou vei keda na luvena. Eda rawa ni nuitaka na Kalou na Tamada kei Jisu Karisito baleta ni nodrau vakayaco ka vakatautauvata vei keda.

Na Kalou na Tamada kei na Luvena o Jisu Karisito erau duavata ena inaki kei na loloma. Baleta na Nodrau lomani keda na Kalou kei Jisu Karisito, e soli kina vei keda na madigi ni tisaipeli yalodina meda caka veiyalayalati vata kei Rau. Nida cakava na veika oqo, ena vakarabailevutaki na noda veiwekani kei Karisito, “Ia oqo, ena vuku ni veiyalayalati ko ni sa vakayacora ko ni sa vakatokai kina moni luve i Karisito, na luvena tagane kei na luvena yalewa; ni raica, ni sa vakasucumi kemuni vakayalo ko koya ena siga oqo; ni ko ni sa kaya sa veisau na yalomuni nio ni sa vakabauta na yacana; o koya, sa vakasucumi kemuni kina mo ni luvena tagane ka luvena yalewa.”

Nida tisaipeli, na noda cakava ka maroroya na noda veiyalayalati ena vakalougatataki keda ena kaukauwa vakalou. Eda sema vei Jisu Karisito kei na Kalou na Tamada ena dua na sema ni veiwekani bibi ka rawa kina meda vakila na Nodrau loloma kei na marau ena dua na ivakagedegede e vakarautaki ga vei ira era cakava ka maroroya na nodra veiyalayalati. Na noda cakacaka me rawa nida vakila na loloma rabailevu ni Kalou, se me da tomana tiko na Nona loloma, e vakatau tiko ena noda gagadre kei na ivakarau kilikili.

Ena vola i Joni, wase 15, tikina 9 eda wilika, “Me vaka sa lomani au ko Tamaqu, au sa lomani kemudou vaka talega kina.” E soli talega na veisureti vei keda, “tomana tiko ena noqu loloma.”

Ena tikina ka tarava, sa soli vei keda na ivakarau meda vayacora tikoga ena Nona loloma: “Kevaka dou sa talairawarawa ki na noqu vunau, dou na tiko ga e na noqu loloma; me vaka kau sa talairawarawa ki na vunau nei Tamaqu, ka tiko ga ena nona loloma.”

Eda raica na bibi ni kena maroroi na ivakaro ena tikina 11: “Au sa tukuna vei kemudou na veika oqo, me tiko ga vei kemudou na noqu marau, me taucoko kina na nomudou marau.”

Nida tisaipeli yalodina ni veiyalayalati, ena rawa nida kila vinaka cake na ituvaki ni Kalou kei na marau e vinakataka o Koya meda vakila na luvena. E rawa talega meda tekivu kila eso na ivakavuvuli koya e dau sega ni matata vei keda. Me ivakaraitaki, erawa vakacava vua na Kalou me vakila na reki levu ni yalo nira lakocuruma tiko na luve ni Kalou e vuqa na dredre? Na isau ni taro e tiko ena rai savasava na Kalou kei na Nona ituvatuva matau. E raici keda o koya mai na ivakatekivu kina noda veisiga lagilagi ni mataka. E vakarautaka o Koya na sala, ena vukui Luvena o Jisu Karisito, me baleti keda na Luvena, meda lako curma na mosi, rarawa, ivalavala tawadodonu, nuiqawaqawa, kei na galili ni bula. E vakarautaka vei keda na Kalou na sala kei na digidigi.

O ira era lako curuma na reki ni bula vakatisaipeli e rawa mera vukei keda meda kila na ivakavuvuli oqo. O na rogoca beka na ivosavosa oqo eda na marau ga e nodra sega ni marau na luveda. Au raica ni sega ni dodonu me vakaoqo. Na tinaqu yabaki 94 e sivia e 200 na nona kawa era bula tiko. Ena tiko ena loma ni dua na gauna me dua vei ira na 200 qo me sega ni marau tiko. Kevaka e dina na veika oqo, ena sega ni mudu rawa na nona sega ni marau na tinaqu, ia e sega ni dina. O ira era kilai koya era kila na nona marama yalo mamarau.

Au via wasea e dua tale na italanoa. Ena Janueri ni 2019, o au kei na watiqu o Debbie a sureti kina nona valenivolavola o Peresitedi Nelson. Tosoya vaka voleka vei keirau na nona idabedabe, ka dabe volekati keirau ka voleka me keitoui vakasota duru. Ni oti na nona vakatura na veikacivi, qai vuki o Peresitedi Nelson vei Debbie me vosa vua. E kauwaitaka, lomana, vakaturaga ka sinai ena reki na taucoko ni nona rai vakatama se tukada. E taura na ligai Debbie ka tavi koya, e vakadeitaka vei koya ena daumaka na veika kece kei na vakalougatataki na neitou matavuvale. Vei keirau ena siga oya, vaka me keirau bibi duadua vei koya me solia kina na nona gauna taucoko vei keirau. Keirau biuta mai na nona valenivolavola na yakavi ni siga Vakaraubuka oya ena yalo ni veivakadeitaki, lomani ka marau.

Ena siga Moniti, keirau raica ena itukutuku kacivaki. Ena loma ni siga keirau a tiko kei Peresitedi Nelson, e dua na luvena yalewa a takali ena vuku ni kenisa. Keirau kurabui. E vakasinaiti na yaloi keirau ena neirau lolositaki koya kei na nona matavuvale. E vakasinaiti talega na yaloi keirau ena nona raici keirau va Karisito ena loma ni nona lolositaka tiko na luvena yalewa koya e lakocuruma tiko na mosi.

Neirau mai vakananuma titobu tiko na veika oqo, keirau taroga, “E rawa vakacava me veikauwaitaki, lomana ka kune marau tiko ena loma ni dua na gauna dredre vei koya?” Na kena isau oya baleta ni kila o koya. E kila o koya ni sa qaqa na Karisito. E kila o koya ni rau na veitavaki tale kei luvena yalewa ka rau sema tawamudu. Na reki kei na rai tawamudu e dau yaco nida sema kei na iVakabula ena vakayacori ka taqomaki ni veiyalayalati kei na bula vakatisaipeli vakarisito.

Vakavulica o Peresitedi Nelson: “Me vaka ga ni solia na iVakabula na vakacegu e “uasivia na ka kecega e kilai rawa,”[Filipai 4:7], Sa solia talega vakakina ko Koya na reki ka sega ni vakasamataka rawa na tamata se na kilaka vakayago na kena vakaitamera, titobu, kei na kena rabailevu. Me kena ivakaraitaki, e vaka me sega ni rawa nida reki ni tauva tiko na luveda e dua na tauvimate sega ni valuti rawa, se ni sa sega nomu cakacaka, se ni sega ni dina vei iko na watimu. Ia oqori sara ga na reki e solia na iVakabula.”

Nida cakava ka maroroya na noda veiyalayalati, ena yaco meda veisau ka gagadreva meda vukea tale eso mera vakila na reki, loloma eda vakila ena loma ni veimaliwai ni veiyalayalati. E rawa meda tiki ni tavi bibi duadua e vuravura—na kena vakasokomuni vata o Isireli. Erawa meda vukea na nodra saumaki mai na luveni Kalou vei Karisito. Vakavulica na parofita o Jekope,“Ia sa kalougata ko iko; ni dou a cakacaka vagumatua vata kei au ena noqu were ni vaini, ka dou a muria tiko na noqu ivakaro, ka dou sa rawata tale mai vei au na vua dina, ka sa sega vakadua tale ni ca na noqu were ni vaini, ka sa biu tani na ka ca, raica dou na reki vata kei au ena vuku ni vua ni noqu were ni vaini.”

Nida lako vata mai meda vakaitavi vaka tisaipeli ni veiyalayalati, ena ivakatagedegede se itutu cava ga, ena vakalevutaki na noda veiwekani kei na Tamada kei na Luvena, ena vakalevutaki na noda reki, kei na rai vakatawamudu. O koya eda na vakaedaumeni kina ena kaukauwa ka vakila na reki ena dua na ivakatagedegede e vakarautaki vei ira na tisaipeli veiyalayalati yalodina ni Kalou. Ena yaca tabu i Jisu Karisito, emeni.