Vakamareqeta na Bula

A tomana o koya: “Au ciqoma e levu na loloma kei na veitokoni mai na neitou vuvale ni tabanalevu. E taleitaki dina. O [noqu] bisopi kei peresitedi ni Goneyalewa erau cakava e levu na ka sega ni namaki me vakaraitaka na nodrau loloma kei na veitokoni. Au raica na liga ni Turaga ni dusimaki au kei na noqu matavuvale. Na noqu tabanalevu e dua ma matavuvale era gadreva kece na tamata, vakabibi vua edua na goneyalewa vaka taki au.”

O koya kei na nona vuvale, kei na matavuvale nona tabanalevu, era kidavaka ena yalololoma na luvena gonetagane ena Feperueri sa oti.

O Peresitedi Russell M. Nelson a kaya, “Dua na ivakaraitaki ni lotu dina ka bula ni Turaga oya na kena tuvalaki vakamatau na nodra qaravi yadudua na luve ni Kalou [veiqaravi ena yaloloma levu sara] vua na dua, me vaka a cakava o Koya.”

Ena gauna e kila kina na goneyalewa ni sa buketetaka tiko edua na gone sega ni namaki, na kauwai ni tiko bulabula, veilecayaki vakayalo, na madua, lomaleqa vakailavo, taro baleta na veika vakavuli, tawamacala ni vakamau, kei na rarawa ni kavoro ni tatadra ena rawa ena dua na gauna ni mosi kei na veilecayaki, me muataka edua na goneyalewa e vinaka tu nona vakasama me cakava eso na ka ena kauta mai na mosi kei na veivutuni.

Vei ira era vakarorogo tiko ka sa sotava oti na titobu ni mosi kei na veivutuni ena nona a vakayacora se vakaitavi ena dua na vakalutu, yalovinaka nanuma: E dina nida na sega ni veisautaka rawa na veika sa oti, na Kalou e rawa ni veivakabulai mai na ka sa oti. Na veivosoti e rawa ni yaco ena mana ni Nona loloma soliwale ni veisorovaki nio gole Vua ena yalo malumalumu ka veivutuni.

E rua na vosa e rau dau sema vakawasoma tiko kina vakalou ni sucu vakayago: na bula kei na digidigi. Na bula e tiki talei ni ituvatuva uasivi nei Tamada, ena Nona ivakaro eda vakamareqeta ka karona kina na bula; ka da digataka me tomani na bula ni sa kunekunetaki oti. Eda vakamareqeta tale ga na isolisoli ni vakatulewa vakaikoya, na galagala ni digidigi—ka veivuke me vaqaqacotaki na veidigidigi dodonu e vakadonuya na Kalou ka kauta mai na marau tawamudu.

Nsota va tiko edua na yalewa kei na tagane na gauna dredre va oya, na sotavi nidua na vakatulewa bibi, na noda vosa, na ligada, na lomada—vakayalo, vakaloma, ka vakailavo—e rawa ni vakalougatataki rau me vakila na loloma ni iVakabula ka, me vaka a tukuna o Peresitedi Henry B. Eyring, moica na nodrau rai vakayalo me matata mai “na ka era nanuma nira raica” kina “ka era se bera tiko ni raica.”

E kaya o Peresitedi Dallin H. Oaks: “Na noda ivakarau ni vakasama baleta na vakalutu e sega ni yavutaki ena kila e vakatakilai mai se gauna cava e tekivu kina na bula vakayago. E dei tu na noda kila nio ira kece na luvena vakayalo na Kalou e dodonu mera lako mai ivuravura oqo ena dua na inaki lagilagi, kei na keda ivakatakilakila yadua a tekivu ni bera nida kunekunetaki ka na tomani kina tawamudu.”

Na vosa ni Turaga me baleti ira na se bera ni sucu, ka ratou vakaraitaka na Mataveiliutaki taumada kei na Kuoramu ni iApositolo Le Tinikarua, e sega ni veisau ka duavata kei ira na parofita ena veigauna makawa, ka solia edua na rai matata vakalou kina ka e kerea vei keda na Turaga.

“E vakabauta Na Lotu i Jisu Karisito ni Yalododonu Edaidai na vakalou ni bula ni tamata. Oya na vuna, e saqata kina na Lotu na vakalutu ena nona vinakata ga edua me cakava se ena vuku ni nona bula ni veimaliwai, ka vakasalataki ira kina na lewenilotu mera kakua ni soli ira mera, cakava, vakauqeta, sauma, se veivosakitaka na vakayacori ni vakalutu.

“Na [Turaga] e vakatara me caka eso ena vuku ni:

• “A vu na bukete mai na kucu se veiyacovi vakaveiwekani voleka, se

• Sa navuca edua na vuniwai matua ni sa koto ena ituvaki bibi na bula se ivakarau ni bula ni tina ni gone, se

• E navuca kina edua na vuniwai matua ni sa mavoa vakaca na gone ka na sega ni bula rawa na gone dramidrami ni sa sucu oti.”

Eratou tomana na Mataveiliutaki Taumada: “Na vakalutu e ka bibi sara. [Ena veituvaki vakavudua vaqo] e dodonu me qai vakayacori ga nira sa ciqoma na veivakadeitaki ena masu o ira na vakaitavi kina” ka veivakasalataki kei ira tale eso.

Ena tolusagavulu na yabaki sa oti, era vakaraitaka na parofita ni Turaga edua na ivakaro ivuravura. Era okati kina na veivosa oqo:

“Keitou vunautaka talega kina ni vakarota na Kalou, merau qai vakayagataka walega na isolisoli vakalou oqori merau vakatubukawa, o tagane kei yalewa nirau sa vakamautaki vakalawa vakaveiwatini.

“Keitou vakaraitaka eke ni sa lewa vakalou na ivakarau ni vakatubukawa. Keitou vakadeitaka na vakalou ni bula kei na kena bibi ena yavu tawamudu ni Kalou.”

Na susugi kei na taqomaki ni bula ka se bera ni sucu e sega ni ile vakapolitiki. E lawa savasava ka vakadeitaka na Turaga vei ira na Nona parofita.

E dua na itukutuku nei Peresitedi J. Reuben Clark Jr., ka veiqaravi ena Mataveiliutaki Taumada, a vakamacalataki ira vakatotoka na noda itabagone edaidai: “O ira na itabagone ena Lotu era viakania tu na veika vakaYalo; era vinakata mera vulica na kosipeli, era vinakata na kena e dodonu, sega ni vakacacani. Era vinakata mera kila na veika eda vakabauta; era via rawata na ivakadinadina ni [ka] dina. Era dau vakatataro, ka dauvakasaqara na dina.” Meda veivosaki vakawasoma ena vakabauta kei na yalololoma kei ira noda itabagone ena noda itikotiko, ka vakaikeda ena noda soqoni ni iSoqosoqo ni Veivukei kei na kuoramu ni talatala qase me baleta na lawa ni tiko savasava ni Turaga, na vakalou ni bula, kei na nodra karoni na se bera ni sucu vata kei tinadra.

Edua na marama lomani a volavola mai vei au me baleta na ka a sotava ena tini vakacaca na yabaki sa oti: “Vaka e dua na [yabaki 17], au kila niu sa bukete ka lailai se sega sara na veitokoni mai vei noqu itau gonetagane. Au madua kei na galili [ia au] a sega ni vinakata [na vakalutu]. E tiko na noqu vuvale lomani kei na noqu bisopi, keitou dau sota vakawasoma ka veivakasalataki. Au gole vua na Kalou. Au vulica na ivolanikalou ka masu [ka] kunea na kaukaua mai vua na iVakabula kei na cakacakataki ni veivutuni. Au a ciqoma edua na isau [ni noqu masu]. kau a sega ni rawa ni cakitaka. A vakamosi yalo dina, ia au a kila niu na solia na luvequ yalewa me dua tale e lai susugi koya. Au masuta meu yaloqaqa [ka] vakila vakamatata sara na loloma ni iVakabula niu veivutuni, au kila ni Kalou e sauma na masu ka dau vaqaqacotaki keda.”

Edua na veiwatini dauloloma erau a susuga na goneyalewa lailai talei oya ka vakavulici koya ena kosipeli. Sa vakawati kei na nona matavuvale vakaikoya.

Ena so na gauna, na veika dredre kei na nuiqawaqawa ni veika tawakilai e rawa ni salavata kei na taqomaki ni bula.

Wale ga qo edua na veiwatini gone ka keirau dau lomana kei Kathy a volavola mai vei au me baleta na luvedrau rau namaka tiko.

A vola o tamana: “Ena ika 10 ni macawa ni [bukete nei watiqu] keirau a kila kina ni luvei keirau e tauvimate tiko, ka kilai me Down syndrome. Keirau vakila na idre mai na tabana vakavuniwai me vakalutumi. Ena vica na macawa tarava keirau a kila kina ni luvei keirau se bera ni sucu oqo ena gadreva e vica na veisele ni uto ena imatai ni vica na yabaki ni nona bula. Ni yaco tiko na veika oqo ka keirau masuta tiko vakaukaua na veivuke vakalou, keirau vakila na veivakacegui ni Yalo Tabu. Keirau ciqoma na ivakatakila ka kila ni luvei keirau yalewa edua na luvena vakasakiti na Tamada Vakalomalagi ka tiko vua edua na gagadre levu me mai lewe ni neitou matavuvale ka me lako mai ki vuravura.”

Na tinana na gone qo a vola: “[Keirau] a kurabui, veilecayaki, ka rarawa vakaidina ena itukutuku oya. Ni sa 14 na macawa na noqu bukete, keirau qai kila ni neirau gone a tauvi koya tu eso na mate vereverea ni uto, ena rawa ni vakavu leqa. Keirau raica e levu na vuniwai kei na kenadau mai na 10—18 na macawa ni noqu bukete. Ena neirau veisiko yadua keirau a tarogi se keirau via maroroya na gone se vakalutumi koya. Na iVakabula a vakabula na lomaqu ka solia vei au edua na vakacegu kei na marau me baleta na luvei keirau yalewa. Na [Tamada Vakalomalagi] e dau vakaraitaka vakawasoma vei au ni tiko na Nona ituvatuva uasivi vei au [kau] vakadinati Koya.”

Loma ni dua na macawa sa oti erau kidavaka kina na luvedrau yalewa. E nodratou o koya ka ratou nona me tawamudu.

Na vakabauta e sega ni guce kei na yaloqaqa vakasakiti era ivakatakilakila ni tisaipeli i Jisu Karisito.

Ena veiyabaki, au dau marau meu sota kei ira na turaga kei na marama era vakasaqara ena yalomalumalumu mera lesu kina salatu ni veiyalayalati kei na nodra veivakalougatataki ni matabete kei na valetabu ni oti e vuqa na yabaki nira sa sega ni lewenilotu.

Ena dua na gauna, a lesi meu vakataroga edua na tagane ena vukudratou na Mataveiliutaki Taumada me baleta na vakalesui mai ni nona matabete kei na veivakalougatataki ni valetabu.

Ni oti na nona vakamau ena valetabu savasava, e sucu e tolu na luvena totoka, ia e sega ni dinata na watina kei na nona veiyalayalati tabu. E bukete na yalewa sega ni vakawati ka vinakata me vakalutu.

O watina yalodina na tagane oqo e vakamamasu vua na yalewa me maroroya na gone ka yalataka ni na susuga na gone, ni sucu oti, vata kei iratou na luvena.

A duavata na yalewa sega ni vakawati me kua ni vakalutu.

Sa oti oqo e 10 na yabaki. Na marama yalomalumalumu ka dabe tiko e mataqu e lomana na gonetagane oya me vaka e luvena dina ka tukuna vei au na sasaga nei watina me tokona ka lomana ka karoni koya kei na nona matavuvale. A tagi o tamana ni vosa o watina.

E rawa vakacava vua na yalewa dauloloma oqo ni Turaga me okata edua na gone me luvena dina ka na rawa ni vakananumi tu e veisiga ena nona dauyalewa na watina? E rawa vakacava? Baleta nia kunea na kaukauwa i Jisu Karisito ka a vakabauta na vakalou ni bula, na vakatabui ni bula. A kila o koya ni gone a buketetaki tiko oya e luve ni Kalou, tawacala ka savasava.

Taciqu kei na ganequ lomani, e torosobu tiko ga na nodra dau lomani na gone se bera ni sucu e vuravura raraba edua na ka meda kauwai kina vakalevu. Na Kalou e vakamareqeta na bula. E Nona cakacaka kei na Nona lagilagi me vakavuna nodra tawa mate rawa kei na nodra bula tawamudu na Luvena. Nida tisaipeli i Jisu Karisito, eda vakamareqeta na bula. “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” Meda qai wasea na noda loloma ka vakalevu sara vei ira era gadrevi keda sara vakalevu. Au vakaraitaka na noqu lomani kemuni kei na loloma ni Tamada Vakalomalagi vei ira na Luvena era sucu tiko mai i vuravura. Ena yacai Jisu Karisito, emeni.