Na Vakavakarau ni Tamata Yadua me Sotava na iVakabula

Kemuni na taciqu kei na ganequ lomani, ena Okotova sa oti, a vakavulica o Peresitedi Russell M. Nelson, “Oqo na gauna me daru vakarau kina o iko kei au me baleta na iKarua ni Nona Lako mai na Turaga na noda iVakabula, o Jisu na Karisito. Ni dau vosa o Peresitedi Nelson me baleta na iKarua ni Lako mai, e dau vakayacora ena yalo nanamaki kei na reki. Ia, e dua na goneyalewa ena Lalai a tukuna vei au ena dua na gauna walega oqo ni dau lomaleqa ni tukuni na iKarua ni Lako mai. E kaya vaqo, “Au rere baleta ni na yaco na ka ca ni bera ni lesu tale mai ko Jisu.”

E sega nio ira walega na gone ena vaqo na nodra nanuma. Na ivakasala vinaka duadua vua, vei iko, kei au meda muria na ivakavuvuli ni iVakabula. Na Nona ivakaro e sega ni buwawa se dredre. Nida muria, e sega ni gadrevi meda taqaya se lomaleqa.

Ena mua ni Nona veiqaravi vakalotu ena bula oqo, a tarogi o Jisu Karisito se gauna cava ena lesu tale mai kina. Ni sauma, a vakavuvulitaka e tolu na italanoa vakaibalebale, e volai ena Maciu 25, baleta na sala eda vakavakarau kina me da sotavi Koya—se ena iKarua ni Nona Lako mai se ena gauna cava ga eda biuta kina na vuravura oqo. Era rui bibi sara na ivakavuvuli oqo baleta, na vakavakarau vakatamata yadua me sota kei na Kalou sai koya na itakele ni inaki ni bula.

A tukuna taumada na iVakabula na italanoa ni tini na gone yalewa. Ena italanoa oqo, era lako kina kana ni vakamau e tini na goneyalewa. E lima na vei ratou na vuku era kauta voli na waiwai me tawa ena nodra cina, e lima na lialia a sega. Ni tukuni yani ni sa yaco mai na tagane sa qai vakawati, era sa qai lako na goneyalewa lialia mera volia na nodra waiwai. Nira lesu mai era sa bera, sa sogo na katuba kina soqo ni kana magiti.

E wasea o Jisu e tolu na vakasama mai na italanoa vakaibalebale me vukei keda. A vakamacalataka o Koya:

“Ia ena siga ko ya, niu sa lako mai ena noqu lagilagi, sa na qai vakayacori na vosa vakatautauvata kau a tukuna me baleti iratou na goneyalewa savasava e le tini.

“Ia ko ira sa yalomatua ka vakabauta na dina, ka ra sa taura na Yalo Tabu me nodra idusidusi, ka ra qai sega ni rawai—au sa kaya vakaidina vei kemudou, era na tu ena siga ko ya .”

Ena dua tale na kena itukutukuni, e sega ni yaga mera rere se lomaleqa baleta nira na lako curuma ka kune sautu. Era na tudei tu

Kevaka eda yalomatua, eda na rawata na dina ena noda ciqoma na kosipeli i Jisu Karisito mai na veicakacaka vakalotu ni matabete kei na veiyalayalati. Tarava, eda na saga meda bula kilikili me rawa ni tiko ga kina kei keda na Yalo Tabu. Ena rawati na kaukauwa oqo ena sasaga vakatamata yadua, vakalalai e veigauna. Caka vakawasoma, vaka yadua, ivakarau ni sokalou me kua ni kilai e sureta na Yalo Tabu me dusimaki keda.

Na ikatolu ni vakasama e vakabibitaka o Jisu sai koya noda levea na ivadi ca. E vakasala kina na iVakabula:

“Rogoca ka kitaka me kakua kina ni rawai iko e dua na tamata.

“Ni na lewe vuqa era na lako mai ka kaya ni ra sa lako mai ena yacaqu, ka kaya—Koi au na Karisito—Ia e lewe vuqa era na vakacalai.”.

E kila na iVakabula ni levu na dau vakalecaleca era na tovolea me rawai ira na tamata digitaki ka vuqa na tisaipeli era na vakacalai. Meda kakua talega ni vakabauti ira era lasutaka voli nira lesi vakalou se da goleva yani na veigauna dredre se vanua ca mera vakavulici ena veika e sega ni dina.

Na iVola i Momani e vakatavulici keda ena ivakarau mera kilai tani kina na dauveivakacalai mai vei ira na tisaipeli. Na tisaipeli ena dau tutaka na vakabauta na Kalou, qaravi Koya, ka dau caka vinaka. Eda na sega ni vakacalai nida vaqara ka ciqoma na ivakasala mai vei ira na tamata nuitaki era tisaipeli yalodina ni iVakabula.

Eda rawa talega ni drotaka na veivakacalai ena noda dau sokalou wasoma ena valetabu. Oqo ena vukei keda meda taura matua e dua na ivakarau ni rai tawamudu ka taqomaki keda mai na veivakayarayarataki e rawa ni muataki keda se vagolei keda tani mai na salatu ni veiyalayalati.

Na lesoni bibi mai na na italanoa vakaibalebale ni to na yalewaoya meda yalomatua nida ciqoma na kosipeli, sega me tu vata kei keda na Yalo Tabu, ka dro tani mai na veivakacalai. O iratou na goneyalewa vuku e sega ni rawa ni ratou vukei iratou a sega na nodratou waiwai, e sega ni dua e rawa ni ciqoma na kosipeli, taura na Yalo Tabu me veidusimaki, ka drotaka na veivakacalai ena vukuda. Dodonu meda cakava me baleti keda.

E talanoataka na iVakabula na italanoa vakaibalebale ni taledi. Ena italanoa oqo, a solia e dua na tamata na iwase ni ilavo duidui, ka vakatokai me taledi, vei iratou e tolu na tamata. Vua e dua a solia e lima na taledi, vua tale e dua a solia e rua, vua na kena ikatolu a solia e dua. Ni toso na gauna, rau a vakaruataka na imatai ni rua na tamata na veika a soli vei rau. Ia na ikatolu ni tamata a lako ga ka buluta na nona taledi e duabau. Vei rau na tamata erau vakaruataka na nodrau taledi, a kaya vei rau, “E vinaka, a tamata vinaka ka dina: ko sa dina ena ka e vica ga, au na lesi iko mo lewa na ka e vuqa: curu ki na marau ni nomu turaga.”

A qai vosataka na tamata a buluta na nona taledi ni tamata “ca ka vucesa.” A kau tani na nona taledi na tamata oqo, ka vakatalai. Ia, kevaka me vakaruataka talega na nona taledi, ke cavuti talega vua na veivakacaucautaki kei na icocovi vata ga a cavuti vei rau na rua.

E dua na itukutuku mai na italanoa vakaibalebale oqo oya ni namaka vei keda na Kalou meda vakalevulevuya na veika sa soli vei keda, ia e sega ni vinakata o Koya meda vakatautauvatataka na veika e tu vei keda vei ira na kena vo. Vakananuma mada na vakasama oqo a solia na vuku ni Hasid ena ika 18 ni senijiuri o Zusya mai Anipol. O Zusya e dua na qasenivuli vakairogorogo sa tekivu rere ni sa voleka ni mate. Era taroga na nona tisaipeli, “iVakavuvuli na cava o sa sautaninini kina? O sa bulataka e dua na bula vinaka, na Kalou ena vakaicovitaki iko vakavinaka.”

Qai kaya o Zusya: “Kevaka ena kaya vaqo vei au na Kalou, ‘Zusya, na cava na vuna o a sega kina ni dua tale na Mosese?’ Au na kaya, ‘Baleta o kemuni oni a sega ni solia vei au na yalo cecere oni solia vei Mosese.’ Kevaka au na tu ena mata ni Kalou qai kaya vaqo o Koya, ‘Zusya, na cava o sega kina ni vakai Solomoni?’ Au na kaya, ‘Baleta nio sega ni solia vei au na vuku vakataki Solomoni.’ Ia kevaka au na tu e matai Koya a buli au qai kaya o Koya, ‘Zusya, na cava o sega ni Zusya kina? Na cava o sega ni yaco mo vaka na tamata au vinakata?’ Io, oya na vuna au sautaninini kina.”

E dina, ena sega ni taleitaka na Kalou kevaka eda sega ni vakararavi ena isolisoli, loloma cecere, kei na loloma soliwale ni iVakabula me vakalevulevui kina na kaukauwa e solia na Kalou vei keda. Ena Nona veivuke vinaka, e namaka o Koya meda yacova na keda ituvaki uasivi duadua. Meda tekivu ena duidui ni veika e dui tu vei keda e sega ni vakataki Koya. Ka dodonu me vakakina vei keda.

Kena itinitini, a tukuna na iVakabula na italanoa vakaibalebale ni sipi kei na me. Ni sa lesu mai ko Koya ena Nona lagilagi, “ena soqoni vata e matana na veimatanitu kecega: ena qai wasewasei ira ko koya, me vaka sa wasewasea e dua na ivakatawa na nona sipi mai vei ira na me: ena qai biuta o koya na sipi ena yasana imatau, ia na me ena imawi.”

O ira ena Nona imatau ena nodra ivotavota na Nona matanitu, ia ko ira ena Nona imawi sa sega na nodra ivotavota. Na kedra duidui oya, era a dau vakani Koya beka ni a viakana, vagunuvi Koya ni a viagunu, kauti koya ki vale ni a vulagi voli, vakasulumi Koya ni a luvaiwale, sikovi koya ni a tauvimate se tiko e valeniveivesu.

Era veilecayaki na tamata kecega, o ira ena imatau kei ira ena imawi. Era taroga se gauna era a cakava se sega ni cakava kina, solia vua na kakana, wai, kei na isulu se vukei Koya ena gauna a leqa kina. A qai sauma mai ka kaya na iVakabula, “Au sa kaya vakaidina vei kemuni, Ni kemuni a cakava vua e dua sa lailai vei ira na wekaqu oqo, ni a cakava vei au.”

E matata na itukutuku ni italanoa vakaibalebale: ni da veiqaravi vei ira na tani, eda sa veiqaravi vua na Kalou, kevaka e sega, eda na vakacudruya. E namaka o Koya meda vakayagataka na noda isolisoli, taledi, kei na kaukauwa meda vakalougatataka na nodra bula na luvena na Tamada Vakalomalagi. Na gagadre dina ni veiqaravi me vaka e vakamacalataka ena italanoa vakaibalebalebale ka volai ena ika 19 ni senijuri mai vua na dauvolavola mai Finiladi o Johan Ludvig Runeberg. Keitou dau rogoca wasoma vakaveitacini ni keiotu se lalai na italanoa “Farmer Paavo”. Na italanoa, nei Paavo e dua na dauteitei dravudravua ka vakaitikotiko kei na watina kei na 10 na luvedrau ena yasa ni drano e lomai Finiladi. Ena vicana yabaki , a vakacacani na nona itei, ni sa waicala mai na ucacevata ena vulaitubutubu, na cava ni vulaikatakata, se ni totolo mai na vulaimago. Ena veigauna kece ni takiveiyaga na tatamusuki, e tagicaki na watina na dauteitei, “Isa Paavo, Paavo, o iko na qase vakaloloma, sa vakanadakui kedatou na Kalou.” Sauma yani o Paavo, ka vaka, “Wakia vata na valawa kei na bark mera kua ni waloloi na gone. Au na cakacaka vakaukauwa me drodro na wai ena vanua dabibi. Vakatovolei kedatou tiko na Kalou, ia ena sotavi kedatou o Koya.”

Ena veigauna e vakacacani kina na itei, e vakarota na watina o Paavo me vakalevutaka na levu ni bark e wakia vata kei na valawa me kua kina na viakana. Sa dau cakacaka talega vakaukauwa, ena nona kelia na ikeli me vakadrodroi kina na wai mai loma ni qele ka wali na leqa e kauta mai na wai ni ucacevata ni vulaitubutubu kei na totolo mai ni vulaimago.

Ni oti na veiyabaki dredre, sa qai tamusuka o Paavo na vuaniqele vinaka. A vakacerecerei koya toka o watina, “Paavo, Paavo, sa gauna mai ni marau! Sa gauna me viritaki laivi na bark, ka vavi ga na madrai ena ryae.” E tara ga na ligai watina o Paavo ka vosa malua, “Wakia vata e veimama na valawa kei na bark, sa cevata sara tu ga na nodratou iteitei na wekadatou.” A solibula o Paavo mai na sautu ni nona matavuvale me vukea na wekana sa vakaleqai tu vakaca.

Na lesoni mai na nona italanoa vakaibalebale na iVakabula ni sipi kei na me sai koya me da vakayagataka na isolisoli e soli vei keda—gauna, taledi, kei na veivakalougatataki—me ra qaravi na luvena na Tamada Vakalomalagi, vakauasivi o ira era vakaleqai tu vakaca.

Na noqu veisureti vua na gone ena Lalai yalo taqaya au a cavuta taumada, vakakina vei keda yadua, meda muri Jisu Karisito ka vakabauta na Yalo Tabu me vaka e dua na itokani mareqeti. Vakararavi vei ira era lomani iko ka lomana na iVakabula. Vaqara na veituberi ni Kalou mo toroya cake nomu kaukauwa, ka vukei ira na tani, kevaka sara mada ga e sega ni rawarawa. O sa na vakarau mo sotava na iVakabula, ka rawa nio duavata kei Peresitedi Nelson, nanamaki ena yalomarau. Nio vakayacora , o sa veivuke ena kena vakarautaki na vuravura baleta na iKarua ni Nona Lako mai o Jisu Karisito, o na vakalougatataki ena inuinui mo curu ena ivakavakacegu ni Turaga, oqo kei na veisiga ni mataka.

Me vaka eda lagata ena dua na noda sere ni lotu vou:

Ena yacai Jisu Karisito, emeni.