Vakataucokotaki Vakayalo mai Vua

E tini na vukavuka eratou a kailavaka vua na iVakabula “Ni lomani keitou mai.” Ka cakava vakakina o Jisu Karisito. A tukuna vei iratou meratou vakaraitaki iratou vua na bete, ia niratou a lako tiko, eratou a vakasavasavataki mai na mate.

Dua vei iratou, e raica ni sa vakabulai, a vakavinavinaka vua na Kalou ena domo levu. A lesu vua na iVakabula, ka cuva sobu e yavana ka vakaraitaka na nona vakavinavinaka.

A qai kaya na iVakabula vua ka a mai vakavinavinaka, “Sa vakabulai iko na nomu vakabauta.”

O Jisu Karisito a vakabulai iratou e tini na vukavuka. Ia edua, a lesu mai vua na iVakabula, ka ciqoma edua tale na ka. A sa vakabulai vakataucoko.

E ciwa na vukavuka eratou a vakabulai vakayago.

Edua a vakabulai vakayago ka vakataucokotaki vakayalo.

Niu vakananuma na italanoa oqo, au dau vakataroga se dina beka na kena veibasai. Ke sega ni tautauvata na veivakabulai kei na vakataucokotaki, e rawa beka nidua e vakataucokotaki vakayalo mai Vua ia e se bera ni vakabulai na yagona ka vakakina na lomana?

Na Vuniwai Levu ena vakabula na noda rarawa kece—vakayago ka vakayalo—ena Nona gauna ga. Ia ni waraki tiko na veivakabulai, ena rawa beka nidua e vakataucokotaki?

Na cava beka e rawa ni ibalebale ni vakataucokotaki?

Eda vakataucokotaki vei Jisu Karisito nida vakayagataka na noda galala ni digidigi meda muri Koya ena vakabauta, cabora na lomada Vua me rawa ni veisautaka, muria na Nona ivakaro, ka sema ena dua na veiwekani ni veiyalayalati kei Koya, vosota ena yalomalua ka vuli mai na veibolebole ni bula vakayago me yacova nida lesu tale kina Nona iserau nida sa vakabulai vakataucoko. Au rawa ni vakataucokotaki, niu waraka tiko na veivakabulai keu dinata na noqu veiwekani kei Koya.

Na vakabauti Jisu Karisito e kauta mai na inuinui. Au kunea na inuinui niu saga meu vakataucokotaki—ka yaco mai ena vakabauti Jisu Karisito. Na vakabauti Koya e vakalevutaka na noqu inuinui meu vakabulai, kei na inuinui oya e vaqaqacotaka na noqu vakabauti Jisu Karisito. E dua dina na cowiri kaukaua.

Na Turaga a tukuna vei Inosi ni nona vakabauta sa “vakabulai” kina. A vakataucokotaki o Inosi ni nanuma na vosa i tamana o Jekope na parofita, ena nona gadreva me kila na madigi ni bulatawamudu, ena nona tagi vakaukaua vua na Kalou ena masu. Ena itutu oya ni gagadre kei na yalomalumalumu, a yaco mai kina vua na vosa ni Turaga, ka tukuna vua ni sa vosoti na nona ivalavala ca. Ka qai taroga na Turaga o Inosi ka kaya, “Sa caka rawa vakacava?” A sauma na Turaga, “Ena vuku ni nomu vakabauti Karisito, sa vakabulai iko na nomu vakabauta.”

Ena vuku ni noda vakabauti Jisu Karisito, eda rawa ni vakasaqara meda vakataucokotaki vakayalo nida waraka ka nuitaka tiko na vakabulai ni yagoda ka vakakina na lomada.

Ena mana ni Nona isoro ni veivakaduavatataki, eda veivutuni ena yalodina, na iVakabula ena vakabulai keda mai na ivalavala ca, me vaka a cakava vei Inosi. Na Nona Veisorovaki tawayalani tale ga e yacova yani na noda mosi kei na rarawa.

Ia ena sega beka ni vakarautaka o Koya na veivakabulai mai na tauvimate kei na mate veitauvi—mosi balavu, mate eso me vaka na mate ni mona, kenisa, nuiqawaqawa, lomabibi, kei na veika vakakina. Na veivakabulai vaka oya e yaco ena gauna ga ni Turaga. Kei na gauna mada ga oqo, eda rawa ni digitaka meda vakataucokotaki nida cakacakataka na noda vakabauti Koya!

Meda vakataucokotaki e kena ibalebale meda taucoko ka vakasinaiti. Ena via vakataki iratou na lima na goneyalewa vuku ka a sinai tu na nodratou cina ena waiwai ni yaco mai na tagane sa qai vakawati, eda na rawa tale ga ni vakataucokotaki mai vei Jisu Karisito nida vakatawana na noda cina ena waiwai bulabula ni saumaki vei Koya. Ena sala vata oya, eda sa vakarau tu kina ki na ivakatakarakara ni kanavata ni vakawati, oya na iKarua ni Nona Lesumai.

Ena vosavakatautauvata, o ratou kece na tini na goneyalewa eratou a tiko ena vanua donu, me waraka na tagane sa qai vakawati. O iratou kece eratou a kauta mai edua na cina.

Ia ni lako mai o Koya, ena gauna tawanamaki ena lomalomanibogi, a sa lailai tu na waiwai ni nodratou cina na lima na lialia. Eratou sega ni vakatokai me tamata ca ia meratou lialia. O iratou na lialia eratou a sega ni vakarautaka me caudre tiko na nodratou cina ena waiwai ni saumaki mai.

O koya gona, me isau ni nodratou vakamamasu me curu kina soqo ni kanavata ni vakamau, a kaya kina na tagane sa qai vakawati “Au sa sega ni kilai kemudou.”

Ka kilai kina, nio iratou na lima na goneyalewa vuku eratou a kilai Koya. Eratou a vakataucokotaki mai Vua.

E sinai na nodratou cina ena waiwai talei ni saumaki mai, ka rawa kina meratou curu na goneyalewa vuku kina kanavata ni vakamau ena ligaimatau i koya na tagane sa qai vakawati.

Me vaka e tukuna na iVakabula, “Drau yalodina, ka dau masu tikoga, me vakarau tu na nomudrau cina ka me waqa tikoga, ka me tu ga vei kemudrau na kena waiwai, mo drau vakarau tu ena gauna sa yaco mai kina na Tagane sa qai Vakawati.”

Lima na Yalewa Vuku, mai vei Ben Hammond

Edua na ceuceu totoka ka ratou vakaraitaki tiko kina na lima na goneyalewa vuku a qai biu wale ga qo ena Rara ni Valetabu, e taudaku ni katuba ni Vale ni iSoqosoqo ni Veivukei voleka kina Valetabu e Salt Lake.

Edua na vanua ka veiganiti me vakaraitaki kina na lesoni ni vosavakatautauvata. Baleta nida caka ka maroroi veiyalayalati, vakabibi ena vale ni Turaga, eda na vakatawana kina na noda cina ena waiwai ni saumaki mai.

E dina ni ratou sega ni wasea na lima na goneyalewa vuku na waiwai ni saumaki mai, ia eratou wasea tiko na nodratou rarama niratou laveta tiko na nodratou cina, ka sinai tu ena waiwai ka ramase tiko na kena waqa. Vakabibi eratou vakaraitaki ni ratou veitokoni tiko vakai iratou—taba kina taba, dua na liga ni mokota tale tiko edua, ka veisotari tiko na mata ena veisureti mera lako mai ki na rarama.

Sa dina sara ni,“[O keda] na rarama kei vuravura.” Na iVakabula a tukuna:

“Au sa solia vei kemudou mo dou rarama vei ira na tamata oqo. Na koro sa tara toka ena dua na delana, sa sega ni tabonaki rawa.

“[Eda] na tutuvaka li na cina ka qai biuta toka ena ruku ni vakarau ni sila? E segai, ena biu ga ena kena itutu me cinavi ira kece [sa] tiko e vale;

“O koya me caudre vakakina na nomudou rarama e matadra na tamata oqo, mera raica na nomudou ivalavala vinaka ka vakalagilagia na Tamamudou [sa] tiko mai lomalagi.”

Eda sa vakaroti meda wasea na Nona rarama. Mo raica me sinai tiko na nomu cina ena waiwai ni saumaki vei Jisu Karisito ka vakarautaka vinaka tu na nomu cina me ramase na kena waqa. Qai laiva na rarama oya me cila yani. Nida wasea na noda rarama, eda kauta mai na veivakacegui i Jisu Karisito vei ira na tani, vakatitobutaki na noda saumaki Vua, ka da rawa ni vakataucokotaki ena gauna mada ga eda waraka tiko kina na veivakabulai. Ke da laiva na noda rarama me cila ramase, eda na reki tiko ena gauna ni noda wawa.

Edua na ivakaraitaki mai na ivolanikalou e yaga mena vakadeitaka na ivakavuvuli ni rawa nida vakataucokotaki nida saumaki vei Jisu Karisito ka rawata na kaukaua mai Vua, nida waraka tiko na veivakabulai.

A tiko vua na iApositolo o Paula edua na mataqali mate mosi—ka a vakatoka me “voto ni kau sa vakalauti kina na lewequ,” ka a kerea vakatolu vua na Turaga me kauta tani. A qai kaya na Turaga vei Paula, “Sa rauti iko na noqu loloma: ni sa vakalevui na noqu kaukauwa, ni sa malumalumu edua.” A qai sauma kina o Paula:

“O koya oqo sa yaloqu sara kina meu rekitaka na noqu malumalumu, me tiko kina vei au na kaukauwa i Karisito.

“O koya oqo kau sa vinakata kina na malumalumu, na veivakararawataki, ena vukui Karisito: ia niu sa malumalumu, au sa qai kaukaua.”

Na ka a yaco vei Paula e vakaraitaka nida malumalumu, na noda kaukaua e rawa ni uasivi cake ena vuku i Jisu Karisito—oya, meda matua ka taucoko. O ira era sotava na dredre vakayago ka gole vua na Kalou ena vakabauta me vakai Paula era rawa ni ciqoma na veivakalougatataki mera veikilai kei na Kalou.

A sega ni vakabulai o Paula mai na nona rarawa, ia a vakataucokotaki vakayalo vei Jisu Karisito. Ena gauna mada ga ni nona rarawa, na rarama ni nona saumaki vei Jisu Karisito kei na kaukaua a rawata mai Vua ea cila tiko, ka a marautaka o Koya. Ena nona ivola vei ira na kai Filipai, a kaya kina, “Dou reki tiko [ga] vua na Turaga: au sa kaya tale, dou Reki.”

Taciqu kei na ganequ, io, eda rawa ni vakataucokotaki vakayalo, ena gauna eda waraka tiko kina na vakabulai ni yagoda kei na lomada. Na vakataucokotaki e sega ni kena ibalebale ga me vakabulabulataki na yagoda se lomada ena bula oqo. Na vakataucokotaki e vu mai na vakabauta kei na saumaki vei Jisu Karisito kei na kena vakacilavi na rarama ni saumaki oya.

“Ni lewevuqa era sa kacivi, ka lewe lailai era sa [digitaki mera] digitaki.”

Na tamata kece ena vakabulai na yagona kei na lomana ena gauna ni Tucaketale. Ia ona digitaka beka edaidai mo vakataucokotaki vei Koya?

Au vakaraitaka ena reki niu sa saumaki vua na Turaga o Jisu Karisito. Au sasaga tiko meu vakataucokotaki mai Vua. Au kila vakaidina ni veika kece era na vakalesui ki na kedra ituvaki dina ka na yaco mai na veivakabulai, ena Nona gauna ga, baleta ni bula o Koya.

O Meri Makitala edua na yalewa a vakabula o Jisu Karisito. O koya edua na yalewa a vakataucokotaka o Jisu Karisito. Vaka nona tisaipeli a muria na iVakabula e lomai Kalili taucoko ka veiqaravi Vua.

A duri volekata tu na kauveilatai, ka ivakadinadina ni Nona vakamatei.

A lako kina Nona ibulubulu me vakaotia na cakacaka ni veibulu ka kunea ni sa kau tani na vatu mai na ibulublu, ka sa yali na yago ni Turaga. A tagi tiko ena ibulubulu o Meri ni tarogi, taumada vei iratou na agilosi ka mai vua sara ga na iVakabula, “Yalewa, ko sa tagi ena vuku ni cava? o cei ko sa vakasaqara?”

A tagicaka yani o Meri, “Era sa kauta tani na noqu Turaga, ia kau sa sega ni kila na tikina era sa vakotori koya kina.”

A kaciva na yacana ena domo malumu, “I Meri” A sa qai kilai Koya ka cavuta ena vakarokoroko, “Raponai; iVakavuvuli.”

Ena nona parofisaitaka na iVakabula, a cavuta kina o Aisea, “Ena vakaotia sara na mate ko koya; ia na Turaga ko Jiova ena tavoya na wainimata mai na matadra na tamata kecega.”

Na Nona Tucaketale a rawa me tavoi kina na wainimata i Meri. Ena tavoya vakaidina tale ga o Koya na wainimatamu.

O Meri a imatai ni ivakadinadina ni iVakabula sa vakaturicake tale. Ka sa ikoya na imatai me vakadinadinataka vei iratou na kena vo na ka a raica.

Au vakuria ena yalomalumalumu na noqu ivakadinadina ki na nei Meri. Sa tucake tale o Koya. O Jisu Karisito e bula. Me kena ilutua, ena vakabulai na tamata kecega, na yagona kei na lomana, mai Vua. Ena noda waraka tiko na veivakabulai oya, ka vakabauta na Vuniwai Levu ena yaco meda vakataucokotaki kina vakayalo. Ena yacai Jisu Karisito, emeni.