Na Veisorovaki i Jisu Karisito e Vakarautaka na Veivakabulai Cecere

Na Veisorovaki i Jisu Karisito e vakarautaka na veivakabulai cecere mai na veivakatovolei eda sotava ni bula oqo. E lesi au o Peresitedi Russell M. Nelson meu vakatabuya na Valetabu e Casper Wyoming ena mua ni yabaki sa oti. E veilauti, vakavure vakasama, ka vakauqete na bula vakayalo. E matalia ni vakanamata kina na itavi ni valetabu ena nodra vueti na luve ni Kalou mai na Veisorovaki ni iVakabula.

Na iteki ena loma ni tikina ni Valetabu e Casper Wyoming e oka kina e dua na tiki ni sala era vakayagataka na painia ni Yalododonu Edaidai ena maliwa ni 1847 kei na 1868. Ena noqu vakavakarau kina vakatabui ni valetabu, au wilika tale eso na itukutuku makawa ni salatu ena Uciwai na Platte volekati Casper me yaco ki Salt Lake City. Na sala oya e nodra itatakoso rauta ni drau vakaudolu na biuvanua mai na ra. Au vakabibitaka na lewe 60,000 na painia ni Yalododonu Edaidai era lakova na sala oya.

E levu vei ira na noda painia era lako mai ena kareti, ia e rauta ni 3,000 era a takoso mai ena 10 na kabani ni qiqidreti. E walu vei ira na kabani ni qiqidreti oqo era vakacavara na ilakolako vakasakiti oya era rawata vakavinaka ka vica era mate. Vakavo ga na kabani ni qiqidreti nei Willie kei Martin ena 1856.

Au railesuva na kedrau itukutuku na kabani ni qiqidreti nei Willie kei Martin mai na gauna a tekivu kina na draki rerevaki oya. Au kila vakavinaka sara na bolebole era sotava ena nodra takosova na Sweetwater River, Martin’s Cove, Rocky Ridge, and Rock Creek Hollow.

Between Storms, mai vei Albin Veselka

Sebera mada niu curuma na loma ni Valetabu e Casper ni bera na kena vakatabui. Niu curu yani ena matanikatuba levu, a vagolei na noqu vakasama kina dua na droini ni qiqidreti taumada ka kena ulutaga na Ena Loma ni Cava. A sega ni kena inaki me vakatakarakarataka na droini oya na leqa a yaco. Niu raica tiko, au vakasamataka, “E dina na droini oqo; e levu sara na painia ni qiqidreti era sega ni sotava na leqa.” A sega ni vakamelei rawa na noqu vakila ni oqo e vaka na bula raraba. Ena so na gauna eda dau tu ena maliwa ni cava kei na so na gauna ena maliwa ni o kei na rarama ni matanisiga.

Heaven’s Portal, mai vei Jim Wilcox

Niu vuki yani kina droini taumada ena lalaga kadua, ka kena ulutaga na Matamata ki Lomalagi, au qai kila ni droini totoka ni vulaikatakata oqo me baleta na ka e vakatokai me “Matamata ni Tevoro,” ni drodrova yani na malumu kei na makare ni Uciwai na Sweetwater a vakaraitaka na totoka ni nona veibuli na Turaga, ka sega walega na bolebole era sotava na painia ena draki batabata rerevaki oya.

Au rai yani, ena daku ni desi ni ivolatara, ka raica e dua na droini totoka ni iVakabula. Vakasauri ga e solia edua na yalo ni vakavinavinaka. Ena dua na vuravura totoka, e tiko talega kina na bolebole lelevu. Nida gole vei Jisu Karisito, na iVakabula kei vuravura, ena vueti keda mai na cava ni bula ena Nona Veisorovaki me vaka na ituvatuva nei Tamada.

Vei au, na matanikatuba levu a dua na vakavakarau levu kina rumu ni cakacaka vakalotu ni valetabu ka rawa kina vei keda meda ciqoma na cakacaka vakalotu ni bula vakacerecerei, cakava na veiyalayalati tabu, ka ciqoma vakavinaka sara ka sotava na veivakalougatataki ni Veisorovaki ni iVakabula. Na ituvatuva ni bula marau nei Tamada e yavutaki ena nona veivueti veisorovaki na iVakabula.

Na veika era sotava na painia e vakarautaka vei ira na Yalododonu Edaidai e dua na ivakarau vakasakiti makawa ka dua na isoqoni kaukauwa ni ivotavota vakayalo. Vei ira eso, a vakayabaki na nodra vakavakarau me biuvanua ni oti na nodra vakasavi tani vakaukauwa mai Missouri kei Nauvoo. Vei ira tale eso a tekivu ni oti na nona kacivaka o Peresitedi Brigham Young na ituvatuva ni qiqidreti, ka nanumi me vakarawarawataka na curuvanua. A lailai sara na isau ni qiqidreti mai na kareti kei na bulumakau.

A kaya e dua na daukaulotu mai Igiladi, o Millen Atwood, ni gauna a kacivaki kina na ituvatuva ni qiqidreti, “A cici me vaka na bukawaqa ena veico mamaca, ka ladelade ena reki kei na marau na yalodra na Yalododonu dravudravua oya.” E vuqa era “masu ka lolo ena veisiga, kei na veibogi, me rawa nira lai duavata kei ira na tacidra kei na ganedra [ena] veiulunivanua.”

E vuqa vei ira na Yalododonu ena qiqidreti a sotava na dredre ia era a levea na veika lelevu ka rerevaki. Ia e rua na kabani ni qiqidreti, na kabani i Willie kei na kabani i Martin, era sotava na viakana, na batabata ni draki, kei na vuqa na mate.

E vuqa vei ira oqo era sokowasa mai Liverpool, Igiladi, ena Me ni 1856 ena rua na waqa. Era yaco yani kina vanua ni vakavakarau ni qiqidreti mai Iowa City ena Jiune kei na Jiulai. Dina ga ni rau vakasalataki, erau a biubiu ruarua na kabani kina Buca o Salt Lake ni sa rui bera sara na kena gauna.

A qai kila taumada o Peresitedi Brigham Young na ituvaki rerevaki ni kabani oqo ena ika 4 ni Okotova, 1856. Ena siga ka tarava a tucake o koya e matadra na Yalododonu e Salt Lake City ka kaya, “E vuqa vei ira na tacida kei na ganeda era tiko ena buca kei na qiqidreti, … ka dodonu mera na kau mai i ke; e dodonu meda vakauta na veivuke vei ira ni bera na draki batabata.”

A kerei ira na bisopi o koya mera vakarautaka e 60 na pair ni ose, 12 se sivia na kareti, kei na 12 na tani (10,886kg) na falawa ka kaya, “Lako ka kauti ira mai na tamata oqori ena veibuca.”

Na iwiliwili cokovata ni painia ena kabani ni qiqidreti nei Willie kei Martin a rauta ni 1,100. Rauta ni 200 na Yalododonu talei oqo era mate ena sala. Kevaka a sega na veivueti ena kena gauna donu, ke ra a mate e vuqa tale.

A tekivu na cava batabata ni voleka e rua na macawa ni oti na nodra biuti Salt Lake City mai na imatai ni dauveivueti. Na kedra itukutuku na lewe ni kabani nei Willie kei Martin e vakamacalataka na bolebole rerevaki ni oti na kena tekivu na cava. Na itukutuku oqo e vakaraitaka talega na reki levu nodra yaco yani na dauveivueti.

Ni vakamcalataki nodra yaco yani, a kaya o Mary Hurren, “A drodro vakayauyau na wainimatadra na tagane, era danisi na gone ena reki. Na gauna ga e tu donu tale kina na lomadra na tamata, era tekiduru kece ena uca cevata ka vakavinavinaka vua na Kalou.”

Ni oti e rua na siga, era lakova na kabani nei Willie na vanua dredre duadua, ka cabeta na Rocky Ridge, donua na cava batabata. Na iotioti duadua vei ira a qai yaco yani kina keba ena 5:00 na mataka ka tarava. Era mate e tinikatolu na tamata era bulu vata ena dua ga na ibulubulu.

Ena ika 7 ni Noveba, era volekata yani na Buca o Salt Lake na kabani nei Willie, ia ena mataka oya, e mate tale e tolu. Ni oti e rua na siga, a qai yaco yani i Salt Lake na kabani nei Willie, kina dua na veikidavaki vakasakiti era ciqomi sara kina nodra veivale na Yalododonu.

Ena siga vata oya, na kabani nei Martin era muri tu mai rauta ni 325 na maile (532km), ka sotava tiko ga na batabata kei na lailai ni kakana. Ena vica na siga i liu, era kosova na Uciwai na Sweetwater mera yacova yani na vanua sa vakatokai tu oqo me Martin’s Cove, era nuitaka mera taqomaki kina mai na draki. E kaya e dua vei ira na painia, “Oya na takosovi uciwai ca duadua ena ilakolako.” Eso vei ira na dauveivueti—me vakataki tukaqu vakarua, o David Patten Kimball, ka se qai yabaki 17 ga, vata kei iratou na nona itokani gone, o “George W. Grant, Allen Huntington, Stephen Taylor, kei Ira Nebeker—a toni tu me vica vata na auwa ena wai batabata,” ena yaloqaqa ena nodra vukei tiko na kabani mera takosova na wai na Sweetwater.

Nira kauwai vakalevu ena veika oqo, au vulica e levu cake na ka me baleti ira na dauveivueti, au qai kila nira muria kece tiko na parofita ka vakaitavi vakabibi ena nodra vakabulai na Yalododonu era tao tu. Era yaloqaqa kece na dauveivueti, vakakina o ira na biuvanua.

Niu vulica na nodra italanoa, au vakavinavinakataka na veimaliwai talei kei na raivotu tawamudu balavu ena kedra maliwa na biuvanua. Eratou lewe ni kabani nei Willie o John kei Maria Linford kei iratou na tolu na luvedrau tagane. A mate o John ena vica na auwa ni bera ni yaco mai na imatai ni dauveivueti. A tukuna o koya vei Maria ni marautaka ni ratou a lako mai ena ilakolako. “Au na sega ni bula meu yaco i Salt Lake,” a kaya o koya, “ia ena rawa vei iko kei iratou na cauravou, au sega ni veivutunitaka na ka kece edatou lako curuma mai kevaka me ratou na tubucake na cauravou ka tara cake na nodratou matavuvale e Saioni.”

E wasea na ivakaleka ni itukutuku oqo o Peresitedi James E. Faust: “Ena nodra sasaga qaqa ni paini lakova na ilakolako balavu, eda vulica kina e dua na dina levu. Meda lako curuma kece na bukawaqa ni dausava koula, ka na rawa ni waicala kina me vaka na duka na veika tawayaga ka sega ni bibi ena noda bula ka cakava me ramase, tudei, ka kaukauwa na noda vakabauta. E vaka me taucoko na yaluma, rarawa, kei na mosi ni yalo vei keda kece, oka kina o ira era segata vagumatua me ra caka dodonu ka yalodina. Ia oqo e sa tiki ni noda vakasavasavataki meda veikilai kei na Kalou.”

Ena Nona Veisorovaki kei na Tucaketale ni bula tawamudu, a voroka kina na iVakabula “na ivau ni mate … , ni sa qaqa ko Koya vei mate” ena vukudra na tamata kecega. Vei ira era sa veivutunitaka na ivalavala ca, sa “colata vakai Koya na nodra caka cala kei na nodra talaidredre, ni a sa sereki ira oti, ka sa vakaceguya na gagadre ni lewa dodonu.”

Kevaka e sega na Veisorovaki, eda sega ni rawa ni da vakabulai keda vakai keda mai na ivalavala ca kei na mate. E dina ni rawa ni tiki bibi ni noda veivakatovolei na ivalavala ca, na dredre ni bula e dau vakalevutaki mai na cala, vakatulewa ca, na caka cala mai vei ira tale eso, kei na vuqa na ka ena taudaku ni noda lewa.

Na Vunautaka na Noqu Kosipeli e vakavulica: “Ni da vakararavi vei Jisu Karisito kei na Nona Veisorovaki, ena rawa ni vukei keda o Koya me da vosota na noda vakatovolei, tauvimate, kei na mosi. E rawa ni da vakasinaiti ena reki, sautu, kei na vakacegu. Na veika taucoko sara e cala me baleta na bula e rawa ni vakadodonutaki mai na Veisorovaki i Jisu Karisito.”

Ena gauna ni Siganimate oqo, eda sa vakanamata tiko kivua na iVakabula kei na Nona isoro ni veisorovaki. Na Veisorovaki e vakarautaka na inuinui kei na rarama ena dua na gauna ka vaka me butobuto ka liwalala tu vei ira e vuqa. A vakaraitaka o Peresitedi Gordon B. Hinckley, “Ni sa vakadikevi na itukutuku makawa taucoko, … e sega ni dua na ka e rui totoka, rui vakaturaga, rui vakaitamera me vaka na ivalavala ni loloma soliwale oqo.”

Au wasea e tolu na vakatutu au nanuma ni yaga vakalevu me baleta na noda gauna oqo.

iMatai, kakua ni vakawalena na bibi ni noda cakava na veika eda rawata meda vueti ira kina na tani mai na bolebole vakayago ka vakabibi vakayalo.

iKarua, ciqoma ena vakavinavinaka na Veisorovaki ni iVakabula. E dodonu meda saga kece meda dau vakaraitaka na reki kei na marau ni da sotava sara mada ga na bolebole eso ni bula. Na noda takete e dodonu meda bula ena yalodei ena yasa ni gaunisala cilavi siga. Au sa raica na noqu itokani talei, o Mary, me cakava oqo ena nona bula taucoko. Au dau vakavinavinakataka na nona rai serau, veilaveti ena gauna mada ga keirau sotava kina na leqa ena veiyabaki sa oti.

Na ikatolu ni noqu ivakasala o ya meda biuta vakatikitiki na gauna tudei meda vakasamataka kina ena yalodina na Veisorovaki ni iVakabula. E vuqa tu na sala meda cakava kina oqo ena noda rokova vakatamata yadua na noda lotu. Ia, na tiko ena soqoni ni sakaramede kei na vakaivotavota ena sakaramede e sa ka bibi sara.

E bibi vakakina na lako wasoma kina valetabu ena vanua e rawa kina. Na valetabu e vakarautaka e dua na vakananumi tudei ni Veisorovaki ni iVakabula kei na veika e vakamalumalumutaka. Ka bibi cake sara, na lako ki valetabu e rawa kina vei keda me da veivueti vakayalo vei ira na noda daulomani era sa mate kei ira na tubuda era tu yawa sara.

Ena noda koniferedi sa oti, a vakabibitaka kina o Peresitedi Russell M. Nelson na ivakavuvuli oqo ka vakuria, “Na veivakalougatataki ni [Valetabu] ena vukea na vakarautaki ni tamata me veivuke ena vakarautaki ni vuravura me baleta na iKarua ni nona Lesu mai na Turaga!”

Meda kakua sara ni guilecava na nodra solibula kei na ivakaraitaki na itabatamata sa oti, ia na noda veivakacaucautaki, vakavinavinaka, kei na sokalou e dodonu me vakanamata vua na iVakabula kei vuravura kei na Nona isoro ni veisorovaki. Au vakadinadinataka ni sa idola ni ituvatuva ni bula marau nei Tamada sa ikoya na Veisorovaki a vakayacora na noda iVakabula, o Jisu Karisito. E bula o Koya ka dusimaka tiko na Nona Lotu. Na Veisorovaki i Jisu Karisito e vakarautaka na veivueti cecere duadua mai na veivakatovolei eda sotava ena bula oqo. Ena yacai Jisu Karisito, emeni.