Na Nomu Veivutuni E Sega Ni Vakacolacolataki Jisu Karisito; E Reki Vakalevu Kina O Koya

Vica na yabaki sa oti, ena dua na ilakolako i Florida, au a dabe tiko e tautuba ka wilika tiko edua na ivola. Na kena iulutaga e tukuna ni na rawa ni da yaco i lomalagi, e dina ga ni da sega ni se uasivi. Edua na marama a tavali e yasaqu a taroga, “O nanuma ni na rawa?”

Au rai cake, ena veilecayaki, ka qai kila nia vosa tiko me baleta na ivola au wilika tiko. Au cavuta edua na ka lialia me vaka na, “Au se bera ni yaco sara iloma, ia au na qai tukuna vei iko na kena icavacava.”

Isa, au diva meu lesuva tale na gauna! Au na tukuna vua , “Io, e rawa! Baleta o lomalagi e sega ni nodra o ira era sa uasivi sara, ia e nodra o ira era sa vosoti oti, o ira era digitaki Karisito tiko ga.”

Edaidai au gadreva meu vosa vei ira edau vakila ena so na gauna ni “Veivutuni kei na veivosoti e vaka me mana vei ira na tamata kece ka sega vei au.” Vei ira era dau vakataroga lo, “Me vaka niu dau cakava na veicala vata ga, e rairai au sa na vatu beka ga oqo.” Vei ira, era vakataki au, ka tiko na siga e vaka me dau dredre na lako ena salatu ni veiyalayalati, ka vaka na cabeta e delana.

Edua na daukaulotu totoka mai Ositerelia, o Elder Qaqa mai Viti, a wasea ena nona ivakadinadina ni bera ni gole: “Au kila ni Kalou e lomani au, ia ena so na siga au dau vakataroga, e kila beka na Kalou niu lomani Koya? Baleta niu se bera ni uasivi sara, au se caka cala tiko ga.”

Ena taro au dau lomaleqataka oya, e vakamaclataka vakalekaleka o Elder Qaqa na ka sara ga au dau nuiqawaqawataka tiko. E rairai beka o vakataroga tale tiko ga, ka nanuma, “Au sasaga tiko vakaukaua, ia e kila beka na Kalou niu sasaga vakaidina tiko? Niu dau lutu, e kila beka na Kalou niu se lomani Koya tiko?”

Au rarawataka meu tukuna na ka oqo, ia au a dau vakarautaka na noqu veiwekani kei na iVakabula ena itagede ni bula uasivi sara au bulataka tiko. Au nanuma ni bula ni talairawarawa e kena ibalebale niu na sega ni gadreva meu veivutuni. Kei na gauna au caka cala kina, oya ena veisiga yadua, au vakayawaki au vua na Kalou, ka nanuma, “O koya e sega beka ni taleitaki au.”

E sega sara ga ni dina qori.

Au vulica nio waraka mo savasava cake se uasivi sara mo lako vua na iVakabula, o sa calata tiko na inaki levu duadua.

Vakacava keda vakananumi ira na ivakaro kei na talairawarawa ena dua tale na sala?

Au vakadinadinataka ni dina ni kauwaitaka na Kalou na noda cala, ia e kauwaitaka sara vakalevu o Koya na ka e yaco ni oti noda cakava edua na cala. Eda na gole tiko beka ga Vua e veigauna? Eda na tiko beka ga ena veiwekani ni veiyalayalati oqo?

Ona rogoca beka na vosa ni Turaga “Kevaka [ko] sa lomani au, muria na noqu ivunau” ka o vakila na yalolailai baleta nio sega ni muria kece na ivunau. Au via vakananuma vei kemuni ni veivutuni edua na ivakaro! Ia na ka dina qo, oqo na ivakaro ka dau cavuti wakawasoma duadua beka ena ivolanikalou.

Ena vosa nei Alama, “Isa meu agilosi mada ga, ka rawa me yaco na gagadre [ni] lomaqu ka kailavaka na veivutuni,” a sega ni via vakamaduataki keda ena nona dusimaka na noda cala. A vinakata me kacivaka o koya na veivutuni me rawa kina vei iko kei au me daru kua ni rarawa ena vuravura oqo. Edua na vuna edau cata kina na ivalavala ca o Alama e baleta nidau kauta mai na mosi

So na gauna e dodonu meu nanuma, me vaka edua na ivakananumi e yadrequ, ni ivakaro e kauti keda tani mai na mosi. E vakatalega kina na veivutuni. Na noda parofita e tukuna,“Na iVakabula e lomani keda e veigauna taucoko ia vakauasivi sara nida veivutuni.”

O koya gona ni cavuta na Turaga, “Ni Veivutuni, ni Veivutuni,” vakaevei mo raitayaloyalotaka ni kaya tiko, “Au lomani iko. Au lomani iko.” Raici Koya, ia e vakamasuti iko tiko, mo biuta tani na itovo ka vakavu mosi vei iko, ka sureti iko tiko mo lako tani mai na butobuto ka goleva na Nona rarama.

Ena nona tabanalevu na luvequ yalewa o Carly, a tekiduru edua na bete me masulaka na sakaramede, ka sega ni cavuta na, “Mera kitaka ka vakananuma kina na dra ni Luvemuni,” ia a tukuna “Mera kitaka ka vakananuma kina na nona loloma na Luvemuni.” A tonawanawa na wainimata i Carly ni vakila e lomana na dina ni veivosa oya.

Na noda iVakabula a lomasoli me vosota na mosi ni Nona Veisorovaki baleta ni lomani iko. Oqo na ka dina, o iko “na vuku ni marau sa viritu e matana” ena gauna a rarawa tu kina o Koya.

Na veisureti meda veivutuni e ivakaraitaki ni loloma ni Kalou.

Na vaka io kina veisureti oya e ivakaraitaki ni noda loloma Vua.

Raitayaloyalotaka mada na nomu iyaloyalo talei kei Karisito. Qai raici Koya ni matadredre tu ena reki ena gauna yadua o vakayagataka kina na Nona iloloma, baleta ni o Koya “na taucoko ni vakanuinui.”

Io, na veivutuni e sega ni vakaicolacolataki Jisu Karisito; ia e reki vakalevu kina o Koya.

Meda vakatavuvulitaka oya!

Baleta ni veivutuni e noda itukutuku vinaka duadua!

Eda sega ni tiko ena salatu ni veiyalayalati meda kua ni cakava edua na cala. Eda tiko ena sala meda veivutuni e veisiga.

Kei na gauna eda veivutuni kina, na Kalou e veivosoti ka sega ni vakamaduataki keda, vakatautauvatataki keda kei na dua tale, se cudruvi keda baleta ni oqo na ka vata ga eda a veivutunitaka ena macawa sa oti.

E marau o Koya ena veigauna kece ni raica nida masu kina. O Koya e taleitaka me vosoti keda baleta eda sa ka talei Vua!

E sega beka nio vakila ni dina sara oya?

Qai cava e rui dredre kina vei keda meda vakabauta?!

O Setani na dauniveibeitaki levu ka dauniveivakacalai, e vakayagataka na madua meda yawa kina Vua na Kalou. Na madua edua na butobuto bibi ka ke o kauta tani mai yagomu, ena tiko na kena ivakarau bibi se kena vatuka.

Na madua e domo ena butuki iko sobu, ka kaya, “Na cava oa vakasamataka tiko?” “O sa bau cakava donu beka edua na ka?”

Na madua ena sega ni tukuna vei keda nida a caka cala; ena tukuna ni eda na kilai ena cala eda cakava. Ona rawa sara ga ni rogoca na “Vuni.” Na meca ena saga ena nona kaukaua kece me maroroya tiko ga e lomamu na lomabibi, ka tukuna vei keda ni sa rui sau levu, ka na rawarawa ke tiko ga ena butobuto na ka oqo, ka kauta tani na inuinui kece.

O Setani edau butakoca na inuinui.

Ena gadrevi mo rogoca tale ga qo, kau na cavuta kina e cake na veivosa oqo: E sega ni vu vei iko na domo o rogoca tiko se na veicala o sa cakava oti. Ena gadrevi beka mona tukuna tale ga e cake oya. Tukuna vei Setani, “Sega, nikua.” Biuti koya i dakumu.

Vakila na idre oya, na rarawa vakalou ka na vagolei iko vua na iVakabula, ka sarava na Nona loloma soliwale ni curuma na nomu bula kei na nodra bula o daulomana. Au yalataka ni miniti ga eda kauta mai kina ena doudou na yalo e raramusumusu vei Koya, ena tiko sara ga e kea o Koya.

Ke o raica edua ni luvu tiko, ona sega beka ni dodoliga yani ka vueti ira? Ena rawa li ni mo vakasamataka me biliga tani na iVakabula na ligamu e dodo yani tu Vua? Ia, au raici Koya ni na rika ki wai, ka lako sobu ki ra sara me laveti keda cake meda rawa ni ceguva tale na cagi bulabula! E sega ni rawa nidua e lutudromu sivita na vanua e cila kina na rarama i Karisito.

Na iVakabula ena rarama cake tu ga mai na butobuto ni madua. Ena sega ni valuta o Koya na kemu yaga. Vakasarava sara matua.

• Vakasamataka na liga oqo o iko.

• Na liga oqo me matataka na talairawarawa. E rawa beka nio yadra ena mataka edaidai, cavuta edua na masu vakaibalebale, ka vaqaqara ena ivolanikalou mo rogoca na domo ni Kalou. O a cakava eso na digidigi vinaka ka o veimaliwai kei ira na tiko volekati iko ena ivakarau Vakarisito. O vakarorogo tiko kina koniferedi raraba! Oqo na nomu talairawarawa!

• Se e sega ni lako vakavinaka tiko beka na veika kece. E dredre mo cakava wale tiko ga oqo na veika lalai oya, na veika rawarawa mo semati kina ki lomalagi. Oa cakava eso na digidigi oa sega ni marautaka.

• O yaga tiko beka? A toso beka na liga oqo?

Na kemu yaga e sega ni vakatau tiko kina nomu talairawarawa. Na kemu yaga e tudei; e sega ni veisau. A solia vei iko na Kalou, ka na sega nidua na ka o cakava se dua tale mena veisautaka. Na talairawarawa e kauta mai na veivakalougatataki; e dina oya. Ia na kemu yaga e sega ni dua vei ira. Na kemu yaga e “talei ena mata ni Kalou,” se mani vacava na vanua e kauti iko kina na nomu digidigi.

Niu caka cala, au na vinakata meu tiko ga ena veiwekani ni veiyalayalati kei Karisito, ka oqo na vuna.

Au a vulica na nunu niu tubu cake mai ka vulica nira solia na maka na qasenivuli, ena nodra raica na ka eda cakava. A donu beka na sobu iwai, ka dodonu na iqaqalo ni yava ka lailai na vusou ni wai? Era qai cakava edua na ka matalia. Era qai okata vata kei na dredre ni kena vakayacori.

Na tamata yadua ena nunu vata tiko kei na itagede yadua ni nona dredre. Na iVakabula duadua ga e kila vakaidina ni dredre o nunu vata kaya tiko. Au vinakata na veiwekani kei na dua na tamata e kilai au vinaka, e kila na lomaqu kei na noqu sasaga tiko vakaukaua!

E kila o Koya na kabu butobuto ka torovi keda tiko ena noda ilakolako, ni noda sala e koto ravita na uciwai dukadukali—o koya gona nida tautauri tiko kina ititoko kaukamea, eda na ravuti mai na veika ca.

Na lako mai vei Karisito e tukuna, “E rawa nio vukei au?” ena inuinui, edua na ivakatakila ni veivakadeitaki ni dodo tu na Ligana vei iko e veigauna. Au vakabauta ni rai vou oqo baleta na veivutuni e kena ibalebale ni dina ga ni se sega ni taucoko na noda talairawarawa edaidai, eda tovolea na talairawarawa ena gauna oqo ena loloma ia, eda digitaka meda tiko ga, baleta nida lomani Koya.

Nanumi ira na tamata nei Tui Penijamini ni sa sega tale ni tiko vei ira edua na gagadre ni kitaka na ka ca, ia mera caka vinaka tikoga? O nanuma beka nira a taura na nodra valelaca, gole i vale, ka sega ni cakava edua tale na cala? E sega sara! Na kena duidui nira sega tale ni vinakata me kitaka na ivalavala ca. A tiko vei ira na talairawarawa ni loloma! Na lomadra e vakanamata ka vakararavi vua na Kalou ena gauna era sotava tiko kina na dredre!

Dua na gauna e matasawa, au raica edua na manumanu vuka ni vuka saqata tiko na cagi, yavalata vakaukaua na tabana, ena nona igu, ia a sega ni toso i liu. Au raica edua tale na manumanu vuka, vakalailai e cake. A tauri koya edua na bati ni cagi ka nawa kina, ka sega ni vakaleqai kina mai na cagi. Oya na duidui ni noda cakacaka taudua kei na noda gole vua na iVakabula, me laveti keda o Koya, ena “veivakabulai e kauta lako e tabana.”

Vaka iliuliu ni kaulotu mai Ositerelia, ena iotioti ni neimami veitalanoa kei ira na kaulotu yadua, keimami a veitalanoataka na 3 Nifai 17, na nodra a voleka vua na iVakabula na tamata ka rawa mera rogoci Koya ni masulaki ira tiko. Keirau a taroga,“Ke o rawa ni rogoca na iVakabula ni masulaki iko tiko, na cava o nanuma ni na tukuna?”

Na rogoci ni isau ni nodra taro a dua dina na veika sotavi vakayalo cecere ena noqu bula. Era na cegu vakalailai na daukaulotu yadua, ka na tonawanawa na wainimatadra ni keirau vakananuma vei ira, “Na nomu iVakabula e kila vinaka na itagede ni dredre o sotava tiko. Sa vakila oti o Koya!”

Oqo na ka era a wasea vakamalua ena domo malumu na daukaulotu oya: “O Jisu ena tukuna vei Tamana, sa cakava tiko o koya na nona vinaka taucoko.” Au kila ni sa tovolea sara tiko vagumatua. Edua a kaya, “Ena levu ni ka e yaco ena nona bula, Au cibitaki koya vakalevu.”

Meda tovolea mada qo. Ena bogi edaidai, ni bera nio masu, raitayaloyalotaka ni voleka e yasamu o Jisu Karisito. Sai Koya na nomu Dautataro vei Tamada. Tarogi iko, “Na cava ena tukuna na noqu iVakabula vua na Tamada me baleti au?”

Ka qai vakanomodi.

Vakarorogo kina domo oya ena tukuna na veika vinaka me baleti iko—na domo ni iVakabula, nomu itokani vinaka duadua, kei na Tamamu mai Lomalagi, ka tiko dina e keri. Nanuma, Na Nodrau loloma kei na kemu yaga erau sa cecere tu ga, se cava e yaco.

Au tucake eke meu vakadinadinataka nio Jisu Karisito e solia na rarama vei ira era tiko ena butobuto. O koya gona, ena veisiga o vakila kina na domo oya ni tukuna vei iko mo vuni, ni dodonu mo vuni ena dua rumu butobuto vakai iko, au sureti iko mo yaloqaqa ka vakabauti Karisito! Kalawa yani ka waqaca na Rarama—na Taucoko ni Rarama ni noda iNuinui.

Nio cilavi ena Nona rarama, ona raici ira tale ga era galili tu wavoliti iko, ia edaidai, ni cila tiko na rarama, oni na kurabuitaka se, “Na cava keimami a rui dau rere kina ena butobuto? Ka cava keimami a tiko kina vakadede e kea.?”

“Me qai ologi kemuni na Turaga ni Rarama ena Ligana ka vakacegui kemuni ka lomani kemuni tikotiko ga.” Meda qai lomani Koya ka digitaki Koya tikotiko ga. Ena yacai Jisu Karisito, emeni.