Sai Kemuni na Karisito

(Maciu 16:16)

Mai vei Sister Amy A. Wright

iMatai ni Daunivakasala ena Mataveiliutaki Raraba ni Lalai

Eda vinakati ira na luveda mera vakabauti Jisu Karisito, nei Jisu Karisito kei na Nona Lotu ena veiyalayalati, ka tovolea mera vakataki Jisu Karisito.

Ni se qai kalasi va na o Eli na luvei keirau tagane, era digitaki koya na nona itokani me turaganilewa ni dua na matanitu. Dua na siga a veisiko mai e dua na turaganilewa mai nai iKarua ni Tikina e Utah, e vakaisulutaki Eli ena nona isulu, ka qai vosabubuluitaka na nona kalasi. E vakavurea na yaloi Eli, na gagadre me vuli lawa kei na Daunilewa Vakaikoya, o Jisu Karisito.

Ni oti e vica na yabaki nona sasaga, a ciqoma o Eli e dua na veisureti ni veivakatarogi ena dua na koronivulu ni lawa cecere. Kaya o koya, “Na, Au a vakatarogi ena 10 na taro. Na iotioti ni taro na, ‘O rawata mai vei na nomu kabasi ni bula kilikili?’ Au tukuna ena tabagauna ni bula ni tamata e rawati na bula savasava ena kena bucuni na bula kina kena ivakarau. Na ivakaraitaki taumada ni vakarau ni bula au sasagataka me ucuya na noqu bula oya o Jisu Karisito. Au kaya kevaka e umana taucoko tu na kawatamata na ivakavuvuli i Jisu Karisito ena iVunau ena Ulunivanua, ena vinaka ka sautu sara na vuravura.” Sa cava na veivakatarogi, ka nanuma o koya, “Oya na veika au tadra niu se gone. E sega ni dua ena buturara ni vuli e via rogoci Jisu Karisito.”

Rua na macawa tarava, a vakacurumi o Ilai ena dua na sikolasivi. Ni bera oya, keitou lai raica na koronivuli. A vaka na irairai ni vale ni tui na koronivuli ni vuli lawa ka toka ena dua na vanua cecere raica sobu e dua na drano totoka. Ka talei, ni keitou lako curuma tu na valenivola vakasakiti kei na buturara totoka, keitou raica na itoko eso ka ceuti tu ena vatu na ivakavuvuli ni iVunau ena Ulunivanua.

Na iVunau ena Ulunivanua sa bau dua na ka talei dina, na yavu ni kena ivakavuvuli. E sega tale ni dua na ivunau e rawa ni vukei keda vakavinaka na ivakarau i Jisu Karisito, Nona ivakarau tabu, kei na noda inaki meda vakataki Koya.

Na bula vakatisaipeli i Jisu Karisito e tekivu ena noda lomanivale—ira na Lalai nira se qai vula 18. Eda vinakati ira na luveda mera vakabauti Jisu Karisito, nei Jisu Karisito kei na Nona Lotu ena veiyalayalati, ka tovolea mera vakataki Jisu Karisito.

Vakabauti Jisu Karisito.

Matai, vakabauti Jisu Karisito.

Ni oti na vunau baleta na madrai ni bula, e “vuqa na tisaipeli [ni Turaga]” a sega ni ciqoma vakarawarawa na Nona ivakavuvuli kei na ivunau, ka “vakasuka, ka ra sa sega tale ni lako vata kaya. A qai vuki o Jisu kina le Tinikarua ka taroga e dua na taro bibi: “Dou sa via lako tani talega koi kemudou?”

A sauma o Pita:

“Kemuni na Turaga, keitou na lako vei cei? sa tu ga vei kemuni na vosa ni bula tawamudu.

“Keitou sa vakabauta ka kila ni sai kemuni na Karisito, na Luve ni Kalou bula.”

Me vaka a vakaraitaka o Pita, vakabauta oya “na vakabauti ni dua na tamata se vakadonuya e dua na ka me ka dina.” Na noda vakabauta me mutaki keda kina bula, sa dodonu me kena usutu na Turaga o Jisu Karisito. Eda cakacakataka na vakabauti [Jisu] Karisito nida vakadeitaka ni bula tu o Koya, [na kilai matua] ni Nona ivalavala [kei na ituvaki dina], kei na kilaka ni da sa segata tiko ni bulataka na Lomana.

Noda parofita daulomani, o Peresitedi Russell M. Nelson, a kaya, “Sa yavu ni vakabauta taucoko na vakabauti Jisu Karisito ka sa ivurevure ni kaukauwa tabu.”

E rawa vakacava nida vukei ira na gone me vaqaqacotaki na nodra vakabauti Jisu Karisito ka rawata na Nona kaukauwa tabu? Sa dodonu meda rai vei Koya na noda iVakabula.

“A vosa [na Turaga] vei ira na tamata, ka kaya:

“Raica, koi Au ko Jisu Karisito.

“Ni tucake ka lako mai vei au.

“A ra sa lako yani na lewe vuqa, ka daramaka na ligadra kina sarisarina, ka tara na we ni vako ena ligana kei na yavana; a ra sa lako yadua yani ka kitaka vakakina ko ira kecega era sa raica e matadra ka tara ena ligadra, ka ra sa kila vakaidina ka vakadinadinataka, ni sai koya dina oqo.”

Au sureti kemuni monivaksamataka ena vakcava na kena irairai ena nodra bula na gone lalai. Era rogoca li na ivakadinadina i Jisu Karisito kei na Nona kosipeli? Era sa raica li na veidokai, ivakatakilakila bibi ni Nona ilesilesi kei na itutu vaKalou? Era sa vakila ka kila li ni sa vakadinadinataki Koya kei na Nona itutu tabu na Yalo Tabu? Era sa kila li na Nona itukutuku kei na ilesilesi?

Mo nei Jisu Karisito kei na Nona Lotu

Karua, Mo nei Jisu Karisito kei na Nona Lotu.

A sotava na tamata i Penijamini na tui e dua na veisau levu ni lomadra ena veiyalyalatati era solia na nodra bula mera cakava na loma ni Kalou. Ena vuku ni veiyalayalati era cakava kei na Kalou kei Jisu Karisito, era “vakatokai na luvei Karisito, na luvena tagane, kei na luvena yalewa.” Vaka lewe ni Lotu i Jisu Karisito ni Yalododonu Edaidai, sa tiko na noda itavi vakaveiyalayalati ni tara na Nona matanitu ka vakarautaka na Nona lesumai.

Veika me vakarautaki me baleti ira na gone mera bula ena salatu ni veiyalayalati kei na Kalou.

E rawa vakacava nida vukei ira na gone mera cakava ka maroroya na veiyalayalati tabu? Ena Lako Mai, Mo Muri Au ena ulutaga A kei na B, eda kuena kina na veitalanoa kei na lesoni ena vaqaqacotaka na matavuvale ka tokoni ira na qasenivuli kei na iliuilu ena nodra ilesilesi tabu ni nodra vakarautaki na gone mera tikoga ena salatu ni veiyalayalati ni Kalou ena nodra bula taucoko.

Yaco mo Vakataki Jisu Karisito.

Katolu, Yaco mo vakataki Jisu Karisito.

Ena iVola i Momani, e vosa vei ira na Nona tisaipeli vou na iVakabula mera vakatatamuri Koya vakavoleka sara: “Ia a cava na ivalavala sa kilikili kei kemudou? Au sa kaya vakaidina vei kemudou, mo dou vakataki au.”

E rawa vakacava meda vukei ira na gone mera papitaiso ka vakadeitaki mera maroroya na nodra veiyalayalati mera soqoni vata kei ira na tani vei Jisu Karisito? Na bula taucoko vakatisaipeli e gadrevi meda “muria na vosa, ka kakua ni rogoca walega.”

Ni sureti ira tu na nona tisaipeli gone na Turaga, yalovinaka raica vakavinaka mo liutaki ira, tuberi ira, lako tikivi ira, ka vukei ira mera raica na Sala. Vakasalataki ira na gone talei oqo nira vakarau veivakatavulici, vakadinadinataka, masu, se veiqaravi mera na yalodei tu ka marautaka na vakayacori ni nodra itavi. Vaqara na sala veivakauqeti eso mo vukei ira mera kila ni oqo na nodra Lotu ka sa tiko na nodra itavi bibi ena vakarautaki ni lesu mai ni iVakabula.

Me yaco me usutu ni noda bula o Jisu Karisito, na ka eda gadreva, kei eda gadreva vakacava, ena veisau vakadua Na saumaki e veisautaka na ka kece! E veisautaki keda “ka sega tale ni tiko vei [keda] e dua na gagadre ni cakava na ka ca, ia [meda] caka vinaka tikoga.” E veisautaka na iwalewale ni noda vakayagataki gauna, noda iyau; na ka eda wilika, sarava, rogoca, ka wasea. E veisautaka madaga na walewale noda sauma na taro, ni vuli, kei na taro ni veivakatarogi ni cakacaka.

E gadrevi meda waqaca na Rarama i Jisu Karisito ena tiki kece ni noda bula. Kevaka eda sega ni vakadinadinataka tiko na dina ni Nona bula taumada vakalou, Nona ilesilesi tabu, kei na Nona basuraki-valeniveivesu Tucaketale ena noda itikotiko kei na vei soqoni yadua ni Lotu oqo, ena tawayaga na noda itukutuku ni loloma, veiqaravi, yalodina, yalomalua, vakavinavinaka, ena tawayaga na noda loloma ena ka yaco me kani gusu se vakasama ga. Ke sega o Jisu Karisito e sega na kaukauwa ni veisau, sega na inaki ni sasaga, ke sega na veivakaduavatataki ena veituvaki ni bula. Eda vakaweleweletaka na noda bula vakatisaipeli i Jisu Karisito, ena rawa ni vaka vu leqa vei ira na luveda.

Nida tukuna vei ira na luveda nida lomani ira, eda sa tukuna tale tikoga vei ira ni sa lomani ira na Tamadra mai Lomalagi kei na iVakabula o Jisu Karisito? Ena rawa ni lomavinaka ka veivakauqeti na noda loloma, ia na Nodrau loloma e rawa ni veivakasavasavataki, veivakacerecerei, ka veivakabulai

Na Jisu oqo e sega ni dodonu me Jisu lasulasu, se Jisu mamada ga, se Jisu tawavakayago, se Jisu kawalega, se Jisu tawakilai, e lagilagi, cecere, tucaketale, vakacerecerei, sokaloutaki, kaukauwa Na Luve ni Kalou Duabauga, ka kaukauwa me veivakabulai. E dua na gone lailai mai Philippines e vakadinadinataka vei au, “Sa yaga na neimami vakabulai!” Ena yaca tabu ka cecere o Koya “sa vakarautaka na Kalou me isoro [levu],” o Jisu Karisito, emeni.