“A Ka Oqo Era na Kila Kece Kina Ni Dou Sa Noqu Tisaipeli”

Kemuni na taciqu kei na ganequ, kemuni na itokani lomani, au taleitaka Na Lotu i Jisu Karisito ni Yalododonu Edaidai. Oqo na Lotu dina ka bula tiko ni iVakabula, ka vakavulica na taucoko ni kosipeli i Jisu Karisito sa vakalesui mai. E tiko eke na Nona kaukauwa kei na lewa ni matabete. O Jisu Karisito e liutaka Lotu oqo, vei ira na Nona italai erakacivi ka vakadonuya o Koya, keina dua na parofita bula, Peresitedi Russell M. Nelson. E solia o Koya vei ira na Yalododonu Edaidai e dua na ilesilesi bibi mera vakasoqoni ira vata na luve ni Kalou ka vakarautaka na vuravura me baleta na iKarua ni Lako Mai ni iVakabula. Au vakadinadinataka ni dina na veika kece oqo.

Ia e bibi meda nanuma tiko ni gauna era sotava kina e vuqa na tamata na Lotu i Jisu Karisito ena imatai ni gauna, era na sega ni vakasamataka tiko na lewa ni matabete se cakacaka vakalotu se na vakasoqoni vata i Isireli. Na ka era na rairai raica, mai na veika kece tale eso, sai koya na veika era vakila ni ra tiko vata kei keda kei na ivakarau ni noda veimaliwai vakai keda.

“Dou veilomani,” a kaya o Jisu. “A ka oqo era na kila kina na tamata kecega ni dou sa Noqu tisaipeli.” E vakavuqa, ni imatai ni nona ivakadinadina me baleti Jisu Karisito e dua na tamata e dau yaco mai ni vakila o koya na loloma ena kedra maliwa na tisaipeli i Jisu Karisito.

A vakaraitaka na iVakabula ni a vakalesuya mai o Koya na Nona Lotu baleta “na vakabauta … me na vakalevutaki e vuravura.” O koya gona, ni ra sikova mai na tamata na noda soqoni ni Lotu, e vinakata na iVakabula me ra biubiu ena vakabauti Koya e kaukauwa cake! Na loloma era mai vakila na noda itokani ena keda maliwa ena laveti ira cake vakavoleka yani vei Jisu Karisito! Oqori na noda takete rawarawa ena veigauna kece eda soqoni vata kina.

O koya ga e vakasaqara tiko e dua na vakabauta cecere cake vei Karisito se dua na isema voleka vua na Tamada Vakalomalagi e dodonu me vakila ni sa mai tiko donu e vale ena Lotu i Jisu Karisito ni Yalododonu Edaidai. Nodra sureti kina noda soqoni e rawa ni vaka ga na kena ivakarau e matau me vaka na noda sureti ira kina noda itikotiko.

Oqo, au qai kila ni’u vakamacalataka tiko na ka e vinaka sara. Ka ena bula oqo, e sega ni dau yaco me da sotava na ka e vinaka sara. Ka “me yacova na siga uasivi oya” ena dau tiko ga e dua na laqa ena kedrau maliwa na ka e vinaka sara kei na ka e dina. Ia, na cava me da cakava ni sega ni vaka na siga uasivi sara na Lotu? Se cava ga na vuna, ni sega ni susuga cake na noda tabanalevu na vakabauta se loloma e uasivi sara? Se ni da vakila ni da sega ni tiko donu kina?

Dua na ka meda kua ni cakava oya meda soro ena ka e vinaka sara!

Na draunipepa ni ulutaga ni iVola i Momani e oka kina na ivakaro bibi oqo: “kevaka era tu na cala,” e kaya, “era sa cala ga ni tamata; okoya, me kakua kina ni vakalewai na ka sa nona na Kalou.”

E rawa beka ni dua na ivola—se dua na lotu se dua na tamata—me tu vua na “cala” ka se cakacaka tikoga ni Kalou?

Na noqu isaunitaro oya e dua na io vakadomoilevu!

O koya gona, ni da taura matua na ivakatagedegede cecere ni Turaga, meda dau veivosoti talega vakai keda. Eda sa cakacaka yadua tiko, ka da vakararavi kece vua na iVakabula me baleta na toso eda cakava. E dina qori vei keda yadua, ka dina ena matanitu ni Kalou e vuravura.

E sureti keda na Turaga sega walega meda lewena na Nona matanitu ia meda vakaitavi talega ena kena tarai cake. E raitayaloyalotaka na Kalou e dua na matatamata era “sa yalovata ka duavata ena nodra vakasama.” Meda duavata vakayalo, e dodonu meda vakasqara me savasava na lomada, ka gadrevi kina na veisau levu ni lomada.

Ia oqori e sega ni kena ibalebale na veisautaki ni lomaqu me salavata kei na lomamu. E sega tale ga ni kena ibalebale na veisautaki ni lomamu mo salavata kei na lomaqu. E kena ibalebale meda veisautaka kece na lomada me salavata kei na iVakabula.

Kevaka eda se bera ni yacova rawa, nanuma tiko: ena veivuke ni Turaga, e sega ni dua na ka e dredre.

Kevaka o vakila ni sega ni veiganiti vei iko,, yalovinaka mo kila nio sega ni tiko duadua ga. Eda sega beka ni bau sotava kece na ituvaki ni bula ena gauna eda vakila kina ni vaka eda vulagi ena loma ni rumu? Au sa sotava oti oqo vakavica vata. Niu se qai yabaki 11, a vakasaurarataki na noqu matavuvale me biuta na neitou vale ka toki kina dua na vanua e sega ni matau. E duidui sara na veika kece mai na veika au matau kina. E matata mai na noqu ivosavosa vei ira na vo ni gone niu duidui mai na veika era a matau kina. Ena dua na gauna au a gadreva kina vakalevu na veitokani kei na veiciqomi, au a vakila ni’u galili ka vakatikitikitaki.

E vuravura oqo, e vuqa na duidui eda raica—na duidui eso era vakayagataka mera veivakaduiduitaki kina—e baleta na veika vakavuravura: irairai vakayago, vanua, ivosavosa, isulusulu, itovo vakavanua, kei na so tale. Ia “Na Kalou sa sega ni raica na veika me vaka sa raica ko ira na tamata. Ni sa raica na ka esau ko ira na tamata, ia sa raica na yalo na Turaga.”

Mai na Nona rai, e dua na iwasewase e dau liu mai vei ira kece na kena vo: luve ni Kalou. E rauti keda vaka vinaka na kena oqo.

E matau ga meda vinakata meda veimaliwai kei ira era dau rai, vosa, cakacaka, ka vakasama me vakataki keda. E tiko e dua na vanua me baleta oqori.

Ia ena Lotu ni iVakabula, eda sa vakasoqoni ira vata kece na luve ni Kalou era sa lomasoli mera vakasoqoni vata ka vakasaqara na dina. E sega ni keda irairai vakayago, noda rai vakapolitiki, noda itovo, se mata tamata e kauti keda vata mai. E sega ni noda ivakarau ni bula e vakaduavatataki keda. Ni dua ga na noda inaki, noda lomana na Kalou kei ira na wekada, na noda yalodina vei Jisu Karisito kei na Nona kosipeli vakalesuimai. Eda sa “dua bauga ena vuku i Karisito.”

Na duavata eda vakasaqara e sega ni kena meda tucake vata ena dua ga na vanua; ia sa ikoya meda qara yani ena sala vata ga—vei Jisu Karisito. Eda sa duabau sega ni baleta na vanua eda sa tiko kina ia na vanua eda sasagataka tiko meda lako kina, sega ni baleta na keda ituvaki ia ocei eda saga meda yacova.

Oqori na ka taucoko e baleta na Lotu dina i Karisito.

Kevaka o lomana na Kalou, kevaka o vinakata mo kilai Koya vakavinaka cake ena nomu muria na Luvena, ia o sa tiko donu eke. Kevaka o vakasaqara tiko vagumatua mo muria na ivakaro ni iVakabula—e dina ga nio se bera ni vinaka sara kina—ia o sa qai veirauti vinaka sara kina na Lotu i Jisu Karisito ni Yalododonu Edaidai.

Ka vakacava kevaka o duidui mai vei ira na tamata era tu wavoliti iko? Oqori e sega ni vakavuna mo tu cala—e vakavuna mo tiki ni yago i Karisito e gadrevi. Eda sa gadrevi kece ena yago i Karisito. Na daliga e kila na veika e sega vakadua ni rawata na mata. Na yava e cakava na veika ena sega ni rawata vinaka na liga.

E sega ni kena ibalebale oqori ni nomu cakacaka oya mo veisautaki ira na tamata kecega mera vakataki iko. Ia e kena ibalebale ni tiko vei iko e dua na ka bibi mo cau kina—ka tiko e dua na ka bibi mo vulica!

Ena soqoni yadua ni koniferedi raraba, eda sa dau vakalougatataki ena sereivakatagi veivakauqeti mai na matasere totoka. Nio vakarorogo tiko, ona raica beka nira sega ni lagata kece na daulagasere na ikabakaba vata ga. Ena so na gauna e dua na iwase e laveta mai na ilagalaga, so na gauna e dua tale. Ia era cau kece kina kena rogo vinaka, era sa duavata vakataucoko sara. E tautauvata ga na nodra inaki na lewe ni matasere yadua: mera vakacaucautaka na Kalou ka laveta cake na yaloda Vua. E dodonu me tudei tu na nodra vakasama kei na yalodra yadua ena inaki vakalou vata ga. Ka ni yaco oqori, era sa yaco dina me dua ga na domo.

Kevaka o se bera ni lewe ni Lotu i Jisu Karisito ni Yalododonu Edaidai, keimami sa sureti iko mo tomani keimami nida rekitaka na “sere ni veisereki loloma” ni iVakabula. Keimami gadrevi iko. Keimami lomani iko. Ena vinaka cake na Lotu ena nomu sasaga mo qarava na Turaga kei ira na Luvena.

Kevaka o sa vakaraitaka oti, ena papitaiso, ena nomu cakava na veiyalayalati kei na Kalou, na nomu gagadre mo “curu kina lomanibai ni Kalou, ka vakatokai me nona tamata,” vinaka vakalevu na nomu mai tiki ni cakacaka cecere ka vakalou oqo kei na nomu veivuke ena kena taraicake na Lotu i Jisu Karisito ki na ka e vinakata na iVakabula me vakataka.

Me vakaga au vulica mai vua na noqu itokani e Jamani, na noda lomana na Kalou kei ira na Luvena sa dua na ivakadinadina kaukauwa i vuravura ni oqo dina na Lotu ni iVakabula.

Me vakalougatataki keda na Kalou meda vakasaqara ena vosota ia ena gugumatua meda bulataka na veika vinaka sara sa biuta vei keda na noda iVakabula, Dauveivueti, ka iVakavuvuli—mera kila kece ni da sa Nona tisaipeli. Ena yaca tabu i Jisu Karisito, emeni.