Kakua ni Vakaukauwataka na Lomamu

E tekivu na Veivakalesui mai ni kosipeli i Jisu Karisito ena gauna e rairai mai vei Josefa Simici, na Kalou na Tamada kei na Luvena Lomani ka sauma na nona masu malumalumu. E tiki ni Veivakalesui mai, na nona a vakadewataka o Josefa Simici e dua na ivolatukutuku makawa ena isolisoli kei na kaukauwa ni Kalou. Na ivolatukutuku oqo e tiko kina “na itukutuku ni nona cakacaka na Kalou vei ira eso na itaukei makawa kei Amerika ka tu kina na taucoko ni kosipeli tawavakaiyalayala.”

Au wilika na iVola i Momani, niu se cauravou, ka dau vakananuma vakawasoma na vuna e rau sega ni vakabauta kina o Leimani kei Lemueli na dina a soli vei rau, ena gauna madaga na agilosi e rairai mai ka vosa vei rau. Na cava na vuna e rau sega ni rawa ni yalomalumalumu ka talairawarawa kina o Leimani kei Lemueli kina ivakavuvuli ni tamadrau, o Liai, kei na tacidrau gone o Nifai?

Au kunea e dua na isau ni taro qo ena 1 Nifai, ka tukuna nio Nifai a “rarawa ena vuku ni kaukauwa ni lomadrau.” E taroga o Nifai vei rau na tuakana, “Sa rawa vakacava me sa rui kaukauwa tiko na lomamudrau, ka rui mataboko ena nomudrau vakasama?”

Na cava na ibalebale ni kaukauwa ni lomamu?

Na ivakadewa ni “kaukauwa” ena iVola i Momani vaka Korea na 완악 (Wan-Aak: 頑惡). Na yatu vosa oqo e vakayagataka na matanivola vaka-Jaina, “Wan” (頑), na kena ibalebale na “yalo kaukauwa”, kei na “Aak” (惡), kena ibalebale “ca.” Nida vakaukauwataka na lomada, eda vakamatabokotaki, ka sega ni curu rawa mai na veika vinaka kina lomada kei na noda vakasama. Eda yalo kaukauwa ka tekivu meda vakanamata vakalevu cake kina gagadre ni vuravura, ka sogota na lomada kina veika vaKalou. Eda digitaka meda vakanamata kina noda vakanananu ka sega ni ciqoma na vakasama kei na veituberi ni eso tale. Eda digitaka meda kakua ni dolava na lomada kina veika vaKalou ia kina veivakayarayarataki ni veika vakavuravura kei na vunica. Ni sa kaukauwa na lomada, eda vorata na veivakayarayarataki ni Yalo Tabu. Eda “berabera ni nanuma na Turaga” ka lako na gauna eda sa “yalovatu” kina Nona vosa.

E vakavulica na tamata mai Amonaia o Alama ni eso “era sa sega ni vinakata na Yalo ni Kalou ena vuku ni nodra dau vakaukauwataka na lomadra.” E vakavulica talega okoya ni “ko ira sa vakaukauwataka na lomadra, sa soli vei ira e dua na iwase lailai ga ni vosa; me yacova ni ra sa sega ni kila e dua na ka me baleta na nona veika vuni.” Ni toso na gauna, ena vakasuka na Yalotabu, ka “na kauta tani mai vei ira na [Nona] vosa” na Turaga vei ira era vakaukauwataka na lomadra, me vakai Leimani kei Lemueli. Baleta ni rau vakaukauwataka tikoga na lomadrau o Leimani kei Lemueli, vorata na Yalo Tabu, ka digitaka me rau kakua ni ciqoma na vosa kei na ivakavuvuli ni tamadrau kei Nifai, e kena itinitini rau sega ni ciqoma na dina tawamudu mai vua na Kalou.

Kena veibasai mai vei Leimani kei Lemueli, e vakayalomalumalumutaki koya o Nifai, ka vakasaqara na veidusimaki ni Yalo ni Turaga. Me kena isau, e vakamalumalutaka na lomai Nifai na Turaga. E wasea o Nifai ni “sa tagi kina vua na Turaga; ka raica sa sikovi au mai ko koya, ka vakamalumalutaka na lomaqu, kau sa vakabauta kina na vosa kecega a vosataka ko tamaqu.” E vukei Nifai na Turaga me ciqoma, kila, ka vakabauta na veika vuni ni Kalou kei na Nona vosa. E qai rawata kina o Nifai na veitokani ni Yalo Tabu ena veigauna.

Na cava eda rawa ni cakava meda kakua ni vakaukauwataka na lomada?

iMatai, e rawa nida vakatovotovotaka na veivutuni ena veisiga.

E vakatavulica na iVakabula, “Ia, ko koya yadua sa veivutuni ka lako mai vei au me vaka e dua na gone lailai, au na vakabulai koya.” Sa vakatavulica na noda parofita lomani, o Peresitedi Russell M. Nelson:

Na Veivutuni e idola ki na toso ki liu. Na vakabauta savasava e tosoi keda tiko ga i liu ena salatu ni veiyalayalati.

“Yalovinaka kua ni rere se lokuyarataka na veivutuni. O Setani e marautaka mo rarawa. Tekivu nikua mo vakila na reki ni nomu biuta tani na tamata vakavuravura. Na iVakabula e lomani keda e veigauna taucoko ia vakauasivi sara ni da veivutuni.”

Nida vakila na reki ni vakamalumalutaki ni lomada kei na lako ki ni Turaga, eda sa vaka na “gone lailai, me talairawarawa, yalomalua, yalomalumalumu, dauvosota, sinai ena loloma, ka ciqoma na veika kece sa raica na Turaga ni dodonu me sotava, me vaka na gone sa talairawarawa vua na tamana.”

iKarua, sa rawa nida vakatovotovotaka na yalomalumalumu.

Na veivutuni veisiga ena kauta mai na yalomalumalu kina lomada. Eda na vinakata meda yalomalumalumu e mata ni Turaga, me vaka e dua na gone lailai e talairawarawa vei tamana. Ena tiko vata kei keda na Yalo Tabu e veigauna kece, ena vakamalumalutaki na lomada.

Na watiqu, o Sue, keirau a kila e dua na veiwatini totoka ena va na yabaki sa oti. Ena tekivu ni neitou sota, na watina tagane sa dua na lewe ni Lotu vou, ka dau sotavi rau tiko na daukaulotu na watina me vulica na kosipeili. Era sotavi koya e levu na daukaulotu me vukei koya me lako vei Karisito. Keirau vakila ni tiko vua e dua na ivakadinadina bula ni kosipeli ka kila ni dina na Lotu. E vakila okoya na Yalo ena gauna ni neitou veisiko ka vakaitavi vagumatua ena veisoqoni kece. E dau taleitaka me dau veimaliwai vata kei ira na lewe ni lotu totoka ni nona tabanalevu. Ia, e dredre vei koya me vakadeitaki koya me curu yani kina wai ni paitaiso. Dua na siga a wilika tiko na Moronai 7:43-44, ka kaya:

“Ka raica, au sa kaya tale vei kemudou, ni na sega ni rawa ni tu vua na vakabauta kei na inuinui kevaka sa sega vua na yalomalua kei na yalo lokumi.

Ia kevaka sa vakakina, sa tawayaga na [nomu] vakabauta kei na vakanuinui, ni sa sega sara e vakadonuya na Kalou o koya ga sa yalomalua ka yalo lokumi.”

Ni wilika oti na veitikina oqo, e vakila okoya na veika e gadreva me cakava. E nanuma okoya ni kila na ibalebale ni yalomalua kei na yalo lokumi. Ia, e sega ni taucoko na nona kila me rawata na vakabauta kei na inuinui me talairawarawa kina ivakaro ni Kalou. Sa gadreva o koya me kauta laivi na yalo kaukauwa kei na nona vuku. Sa tekivu me vakayalomalumalutaki okoya ni veivutuni ena yalodina. Sa tekivu me qai kila na yalomalumalumu ni rai e mata ni Kalou. E vakararavi okoya vua na Tamada Vakalomalagi ka masuta me vakamalumalumutaka na lomana. Ena vei masu vakaoqo, e vakadinadinataka vei koya na Yalotabu ni vinakata na Tamada Vakalomalagi me paitaiso.

Rau wasea na veiwatini ni gauna e levu cake kina na nodrau yalomalumalumu, e vakalevutaki na nodrau kila na vosa ni Kalou, ka sa vakamalumalumutaki na lomadrau me muria na ivakavuvuli ni noda Turaga, Jisu Karisito.

iKatolu, keda rawa ni nuitaka ka vakararavi vua na iVakabula.

E dua na ivakaraitaki cecere o Nifai ni vakatara na lomana me malumalumu ni nuitaka tiko na Turaga. E vakavulica okoya, “Au a sa dau vakararavi tiko vei kemuni, kau na dau vakararavi tiko ga vei kemuni me sega ni mudu. Au na sega ni vakararavi kina liga ni tamata.” Me vakakina, ena dua na ivakatakila vua na Parofita Josefa Simici, na Turaga ea kaya, “Mo vakararavi kina Yalo ka na veiliutaki kina caka dodonu—io, mo kitaka na veika vinaka, mo lako ena yalomalumalumu.” Na gauna eda nuitaka kina na Turaga ka vakararavi Vua, ena vakamalumalumutaka na lomada, ka da tokoni ena noda veivakatovolei, leqa, kei na veivakararawataki.

Kevaka eda veivutuni ena yalodina, vakayalomalumalumutaki keda, ka nuitaka ka vakararavi vua na Turaga, na vakamalumalutaki na lomada. E na qai sovaraka mai o Koya na Yalotabu ka vakaraitaka vei keda na veika vuni ni lomalagi. Eda na vakabauta na vosa kece e sa vakatavulica o Koya, ka na vakatitobutaki na noda kila.

Sa ivakaraitaki uasivi duadua ni yalomalua o Jisu Karisito na noda iVakabula. Ena 2 Nifai 31:7keda wilika, “Dou sa sega beka ni kila ni a savasava ko Koya? E dina ga sa savasava ko Koya, ia sa vakaraitaka vei ira na luve ni tamata ni sa vakayalomalumalumutaki koya vua na Tamada ena bula vakayago oqo, ka vakadinadinataka vua na Tamada ni na talairawarawa vua ka muria na nona ivakaro.” Dina ga ni savasava ka uasivi sara o Koya, e vakamalumalutaki Koya vua na Tamana ka talairawarawa Vua ena Nona papitaiso.

Ena icavacava ni Nona bula vakayago, a solia na Nona lewa o Jisu Karisito ki Vua na Tamana ni gunu mai na bilo wiwi. Na veivakararawataki oqo e yacovi Koya “me sautaninini ena vuku ni mosi, sa titiri kina na dra mai na qara kecega ni yagoqu, ka sa rarawa sara kina na yagoqu kei na yaloqu.” E kerea na iVakabula me o Koya “me kakua ni gunu mai na bilo wiwi ka vakasuka.” Ia, e tukuna o Koya, “me vakalagilagi ga ko Tamaqu, [oKoya] sa gunuva na bilo ka vakacavara na [Nona] vakavakarau vei ira na luve ni tamata.”

Kemuni na taciqu kei na ganequ, e soli vei keda na galala ni digidigi. E rawa nida digitaka meda vakaukauwataka na lomada, se eda rawa ni digitaka meda vakamalumalumutaka na lomada. Ena noda bula e veisiga, eda rawa ni digitaka meda cakava na veika e sureta na Yalo ni Turaga me lako ka tiko e lomada. Au kila ena vei digidigi oqo, e tiko kina na reki kei na sautu.

Meda muria na ivakaraitaki ni noda iVakabula, Jisu Karisito, ka a muria na lewa ni Tamana. Nida cakava vakakina, na Turaga e yalataka vei keda, “Ia, raica, au na vakasoqoni ira vata me vaka na toa yalewa sa vakasoqoni ira na luvena e ruku ni tabana, kevaka era sa sega ni vakaukauwataka na lomadra.” Ena yacai Jisu Karisito, emeni.