Veivuke Vakalou Baleta na Bula Oqo

Mai vua na Parofita o Josefa Simici, a vakatakila mai na Turaga e vica na ka me baleta na bula ni se bera na bula e vuravura. Mai kea, eda a tiko me vaka nida luvena vakayalo na Kalou. Baleta ni gadreva na Kalou me vukei ira na Luvena mera toso, a lewa me bulia e dua na vuravura meda mai ciqoma kina e dua na yago, vuli mai na veika eda sotava, tara cake na ivakarau ni bula vakalou, ka meda vakadinadinataki kevaka eda na muria na ivakaro ni Kalou. O ira era vakadonui “ena tomani tiko ki buradeladra na lagilagi me tawamudu ka tawamudu” (Eparaama 3:26).

Me tauyavu na ivakarau ni ituvatuva vakalou oqo, sa digitaka na Kalou na Luvena e Duabau Ga me noda iVakabula. O Lusefa, o koya ena vakarusa na galala ni tamata me digidigi na ile e vakatura, sa yaco me o Setani ka “vakasevi sobu mai”. Vakatalai tani mai ki vuravura, ka vakuwai ena isolisoli dokai me mai bula eke, A vakatarai vei Setani me tovolea me “temaka ka vakamatabokotaka na tamata, ka me kauti ira vakabobula me vaka na lomana, o ira kece era sega ni via rogoca na domo ni Kalou” (Mosese 4:4).

E yaga talega kina nona ituvatuva cecere na Kalou me baleta nodra tubu na Luvena ena bula oqo sai koya me ra sotava na “veisaqasaqa ena ka kecega” (2 Nifai 2:11). Me vaka ga ni na sega ni kaukauwa cake na noda masela se maroroi kevaka e sega ni veisaqasaqa kei na lawa ni idre ni vuravura, a tubu ena bula oqo sa gadrevi kina vei keda me saqata na veitemaki nei Setani kei na veika veika dau veisaqasaqa tale eso ena bula oqo. E bibi cake ena tubu vakayalo sai koya na gagadre meda digidigi mai na vinaka se na ca. O ira era digitaka na vinaka era na toso yani kina nodra icavacava tawamudu. O ira era digitaka na ca—me vaka na tamata kecega ena vuku ni veimataqali veitemaki ni bula oqo—era na gadreva na veivuke veivakabulai, a lewa na Kalou dau loloma me vakarautaka.

Me yacova mai qo, na veivuke kaukauwa duadua ni bula oqo e solia na Kalou na Nona vakarautaka e dua na iVakabula, o Jisu Karisito, o koya ena mai vakararawataki me sauma ka vosota na ivalavala ca sa veivutunitaki. Na Veisorovaki ni loloma ka lagilagi oya e vakamacalataka na vuna e imatai kina ni ivakavuvuli ni kosipeli na vakabauti Jisu Karisito. Na Nona veisorovaki sa “yaco kina na tucake tale mai na mate” (Alama 42:23), ka “sorovaka na ivalavala ca ni vuravura” (Alama 34:8), bokoca taucoko na noda ivalavala ca sa veivutunitaki ka solia vua na noda iVakabula na kaukauwa me vueti keda mai na noda malumalumu vakatamata.

E levu cake mai na lagilagi ni ivalavala ca vakayacori ka vosoti, na nodrau ituvatuva na Tamada Vakalomalagi dauloloma kei na Luvena sa vakarautaka e vuqa tale na isolisoli me da taqomaki kina, okati kina na noda taqomaki meda kua ga ni ivalavala ca ena imatai ni gauna. Na noda bula vakayago oqo e dau tekivu mai vei rau e dua na tata kei na nana. E totoka, ni rau tiko ruarua ka dui kauta mai na isolisoli duidui me tuberi kina na noda tubu cake. Kevaka erau sega, sai koya oqori e dua na veisaqasaqa meda na lako sivita.

Na ituvatuva nei Tamada Vakalomalagi e vakarautaka na veivuke tale eso me dusimaki keda ena noda ilakolako ni bula oqo. Au na vosa me baleta e va vei ira oqo. Yalovinaka kua ni taura na naba va, baleta e vukea mera veitaqavi. Vakakina, e tu tale eso na veitaqomaki ni loloma me ikuri kei koya qo.

iMatai, au tukuna na Rarama se na Yalo i Karisito. Ena nona ivakavuvuli cecere ena ivola i Moronai, a cavuta kina o Moronai na ivakavuvuli nei tamana ni “sa soli vei ira na tamata kecega na Yalo i Karisito mera kila kina na vinaka mai na ca” (Moronai 7:16). Eda wilika na ivakavuvuli vata oqo ena ivakatakila ni gauna oqo,

Ia na Yalo sa vakararamataki ira na tamata kecega era sa lako mai ki vuravura; ka vakakina ni Yalo sa vakararamataki ira na tamata kecega e vuravura, era vakatudaliga ki na domo ni Yalo” (Vunau kei na Veiyalayalati 84:46).

Vakadua tale: “Ni sa talai yani i vuravura na Yaloqu me vakararamataki ira na yalomalumalumu ka yaloraramusumusu, ka mera cudruvi na veika e sega ni vakalou” (Vunau kei na Veiyalayalati 136:33

E vakamacalataka vakaoqo na ivolanikalou eso oqo o Peresitedi Joseph Fielding Smith: “Na Turaga e sega ni laiva na tamata (ena nona sucu mai vuravura oqo) me vakaloloma tu, vakayayamo me kunea na rarama kei na dina, ia na tamata kece … e sucu vata mai kei na nona dodonu me ciqoma na veituberi, na veidusimaki, na ivakasala ni Yalo i Karisito, se na Rarama ni Dina.”

Na ikarua ni veivuke cecere e vakarautaka na Turaga me vukea noda digitaka na idusidusi vakalou ena ivolanikalou era tiki ni ituvatuva ni veivakabulai (ituvatuva ni marau). Na idusidusi oqo era ivakaro, cakacaka vakalotu, ka veiyalayalati.

Na ivakaro e tukuna na sala sa vakatakilakilataka na Tamada Vakalomalagi vei keda meda toso yani kina ki na bula tawamudu. Na tamata e raica na ivakaro me sala e vakatulewataka kina na Kalou o koya me totogitaka era sega ni kila na inaki ni nona ituvatuva loloma ni marau na Kalou. E sala oya, eda rawa ni rawata na isema ni veiwekani kei na noda iVakabula eda gadreva ka vakadonui vei keda na Nona kaukauwa vakalevutaki me vukei na noda ilakolako ki na vanua e vinakata vei keda kece o Koya. Na Tamada Vakalomalagi e gadrevi ira kece na Luvena mera lesu yani kina matanitu selesitieli, na vanua erau tiko kina na Kalou kei na noda iVakabula, meda bula ena bula vata era bula tu kina o ira era tiko ena matanitu selesitieli oya.

Na cakacaka vakalotu kei na veiyalayalati era tiki ni lawa e tukuna na salatu kina bula tawamudu. Na cakacaka vakalotu, kei na veiyalayalati tabu eda cakava vata kei na Kalou mai vei ira, sa ikalawa e gadrevi ka idusidusi yaga ena sala oya. Au taleitaka meu raica vaqo na itavi ni veiyalayalati: e vakaraitaka, ni, ena ituvatuva ni Kalou, na Nona veivakalougatataki cecere duadua e soli vei ira era yalataka taumada me ra talairawarawa ena so na ivunau ka ra qai rokova tu na yalayala oya.

Na veivuke tale eso e solia na Kalou me baleta na caka dodonu era vakatakilai mai na Yalo Tabu. Na Yalo Tabu e ikatolu ni Lewetolu Vakalou. Nona itavi, e tukuni ena ivolanikalou, me vakadinadinataka na Tamada kei na Luvena, me vakavulici keda, me vakananumi keda ena ka kecega, ka tuberi keda kina dina kecega. E okati ena ivolanikalou e vuqa na ivakamacala ena veivakatakilai ni Yalo Tabu, me vaka na ivakadinadina vakayalo ka saumi kina na taro baleta na dina ni iVola i Momani. Me kua ni tauri cala na veivakatakilai kei na isolisoli ni Yalo Tabu, ka dau soli ni oti na papitaiso.

E dua vei ira na veivuke ni Kalou bibi vei ira na Luvena yalodina oya na isolisoli ni Yalo Tabu. Na ivakadinadina ni kena bibi na isolisoli oqo na kena dau soli ni sa oti na veivutuni kei na papitaiso ena wai, “oti [e vakamacalataka na ivolanikalou] sa qai yaco mai na vakabokoci ni nomu ivalavala ca ena bukawaqa kei na Yalo Tabu” (2 Nifai 31:17). O ira na tamata sa bokoci qo na nodra ivalavala ca—ka vakavouya e veigauna na nodra sa savai ena veivutuni e veisiga ka bula me vaka na veiyalayalati era cakava ena cakacaka vakalotu ni sakaramede—era sa vakadonui kina yalayala, ni Yalo Tabu, na Yalo ni Turaga, “ena dau tiko ga vata kei ira” (Vunau kei na Veiyalayalati 20:77).

O koya, sa vakamacalataka kina na Parofita o Joseph F. Smith ni Yalo Tabu ena “vakararamataka na vakasama ni tamata me baleta na veika ni Kalou, me vakadeitaka vei ira ena gauna era saumaki mai kina nira sa cakava na lomai Tamada, me tu kina vei ira e dua na ivakadinadina tudei me nodra itokani tu ena bula, me nodra idusidusi dei ka taqomaki kina dina kecega ka vakasinaiti ira e veisiga ena reki kei na marau, ka gadreva mera caka vinaka tiko ga vei ira na tamata kecega, mera rarawataka na cala ka sega ni cakava na cala, me ra yalovinaka ka dau loloma, vosota vakadede ka loloma cecere. O ira kece e tu vei ira na isolisoli tawawili rawa oqo, na mataniciva talei oqo, era na viagunuva tikoga na ivalavala dodonu. Kevaka e sega na veivuke ni Yalo Tabu,” e tinia na ivakamacala o Peresitedi Simici ka kaya, “e sega ni rawa ni dua na tamata e rawa ni lakova rawa na sala qiqo ka rabailailai.”

Na levu ni veivuke me tuberi keda ena noda ilakolako ena bula oqo, e ka ni rarawa ni lewevuqa era sega tu ga ni vakarautaki ira rawa baleta na iloku ni nodra sota kei na noda iVakabula ka Dauveivueti o Jisu Karisito. Ena nona italanoa vakaibalebale ni tini na goneyalewa, ka wasei vakawasoma ena koniferedi oqo, e tukuni tiko kina ni o ira kece na sureti mera tavaki Koya, ena veimama ga na iwiliwili era na vakarau tu mera veitata kei Koya.

Eda kila kece na ivakaraitaki eke: o ira na lesu mai na kaulotu mai tao tu nodra tubu vakayalo ena luluqa ni bula, na itabagone era vakaleqa nodra tubu vakayalo ena nodra vakayawaki ira mai na ivakavuvuli ni Lotu kei na itaviqaravi, o ira na turaga era vakadaroya tu nodra tabaki kina Matabete i Melekisateki, turaga kei na marama—so na gauna era nodra kawa na ivuvu dokai se itubutubu bula kilikili—era sa lako tani mai na salatu ni veiyalayalati ka ra sega tu ni se cakava se maroroya na veiyalayalati ni valetabu.

E vuqa na vakaduiduile e yaco nira sega ni muria na lewenilotu na ituvatuva vinaka ni bula vakayalo ni masumasu yadua, vuli ivolanikalou e veigauna, ka veivutuni ena veigauna eso. Kena veibasai, eso era vakaweleweletaka na vakavoui e veimacawa ni veiyalayalati ena kena vakayagataki na sakaramede. Eso era kaya ni sega ni sotavi tiko ena Lotu na nodra leqa, era vakaliuca na veika era nanuma nira gadreva baleta na veisiga ni mataka mai na veika sa vakarautaka na Turaga ena nona veivakavuvuli e vuqa kei na madigi ni veiqaravi e yaga vei ira na tani.

Na yalomalumalumu kei na vakabauta na Turaga era iwali ni vukitani vaqori. Me vaka e vakavuvulitaka na iVola i Momani, na Turaga ena “vakalougatataki ira ka vakasaututaki ira era vakabauti Koya” (Ilamani 12:1). Na vakabauta na Turaga era na gadreva o ira e cala na nodra veidutaitaka na ivakaro ni Kalou kei na nodra ivakavuvuli na Nona parofita kina veika vovou e raica na tamata ena gauna oqo kei na vuku vakatamata.

Au sa tukuna oti e vuqa na sala nona veivuke na Tamada Vakalomalagi dauloloma vei ira na Luvena meda lesu mai Vua. Na noda itavi ena ituvatuva vakalou oqo meda nuitaka na Kalou, vaqara ka vakayagataka na veivuke vakalou eso oqo, na kena e kilai levu duadua na Veisorovaki ni Luvena Daulomani, noda iVakabula ka Dauveivueti, o Jisu Karisito. Au masuta me da na vakavuvulitaka ka bulataka na ivakavuvuli eso oqo. Ena yaca i Jisu Karisito, emeni.