“Lesu mai vei Au Meu Vakabulai Iko”

Keitou dau tu ena vanua e vuqa kina na veivunikau totoka. Nida curu yani e tiko kina e dua na vuni willow totoka. Ena dua na bogi caca e liwa kina e dua na cava kaukauwa, ka bale sobu ira na vuni willow. E bale sobu ka sa cavuraki cake tu na wakana ka vakaloloma na kena irairai.

Au vakarau yavalata na ivaro ni kau meu musuka na vunikau me buka a cici mai na neitou itokani me tarovi au. E tukuna vei ena ka au vakarau cakava ena vunikau ka vakamasuti au meu kua ni musuka. A dusia e dua na wakana ka se toka dei ga ena qele ka kaya ni kevaka keitou laveta cake na vunikau, musuka laivi na tabana, ka vakabulabulataka, ena tubu tale na wakana.

Au lomalomarua ka vakatitiqataka ena rawa vakacava me dua na vunikau sa bale tu ka leqa tu me tubu tale se bula tale mai. Au nanuma ni kevaka mada ga me tekivu tubu tale, ena sega ni bula rawa ena cava e tarava. Ia ena nona vakabauta na neitou itokani ni se tiko na kena yaga, keitou muria na ituvatuva oya.

Na ka e qai yaco? Vakalailai ga, keitou a raica na ivakatakilakila ni bula ni sa tekivu me vakawakana na vunikau. Ia, ni oti e 12 na yabaki, sa bulabula vinaka ka bulabula vinaka ka kaukauwa na wakana, ka sa vakarairai vinaka taka tale na vanua.

Niu dau sotavi ira na Yalododonu e vuravura raraba, au nanuma lesu na vuni willow oqo ka ni tu na inuinui ena gauna e sega e sega ni rawa kina. Eso e kaukauwa tu na nodra ivakadinadina ni kosipeli me vaka na vuni willow. Ia, ena vuku ni inodra inaki yadua, a e yaco me malumalumu nodra ivakadinadina, ka me yaco mera sega ni vakabauta Eso era taura matua na wakana lailai ka taura matua na qele kosipeli.

Ia ena veigauna kece, au vakauqeti ena italanoa ni vuqa era digitaka mera vakavouia na nodra bula vakatisaipeli ka lesu tale mai kina nodra itikotiko ni Lotu. Era sega ni biuta laivi na nodra vakabauta me vaka na buka tawayaga, ia era rogoca na veivakauqeti vakayalo kei na veisureti ni loloma mera lesu mai.

Au tiko ena dua na koniferedi ni iteki mai Korea ka wasea kina e dua e lesu mai ena lewenilotu: “Au vakavinavinakataki iratou na veitacini ena nodratou lomasoli me ciqoma na lailai ni noqu vakabauta kei na noqu malumalumu, ena nodratou dolele yani vei au, kei ira na lewenilotu era dau lomani au tu ga. Era tu wavoliti au tu ga e vuqa na itokani era luluqa tu vakalotu. E lasa, ia era dau veitalanoataka mera lesu tale i Lotu me vakalesui tale mai kina na nodra vakabauta. Au nanuma ni rairai era gadreva kece tiko na vakabauta.”

Kivei kemuni kece oni gadreva na vakabauta, keimami sureti kemuni moni lesu tale mai. Au yalataka ni na vaqaqacotaki na nomuni vakabauta nio na mai sokalou vata tale kei ira na Yalododonu.

E dua na daukaulotu e liu mai Sauca Aferika a volavola vua e dua na iliuliu levu ni Lotu, e vakatutusa ka kere veivosoti ni sega ni taleitaka na veika e vakatavulica me baleta na itovo kei na ivakarau, e vakavuna na nona biuta na Lotu. A kaya ena yalomalumalumu: “E ka ni rarawa, ni veika au rarawataka ena 15 na yabaki sa oti e vakavuna me noqu na isaumu ni dawa. Au vakayalia e levu na ka—e levu cake sara mai na veika au vakasamataka rawa. Au maduataka vakalevu na leqa au vakavuna ena noqu ilakolako, ia mai na veika kece tale eso au marautaka niu lesu tale mai.”

Kivei kemuni kece oni kila na veika oni vakayalia, keimami sureti kemuni moni lesu tale mai me rawa nio ni tovolea tale na vuanikau ni marau ni kosipeli.

E dua na marama mai Amerika a yali tu mai na Lotu ena vuqa na yabaki. Na nona italanoa ni lesu tale mai e okati kina na lesoni kaukauwa vei ira na itubutubu kei na lewe ni matavuvale era lomaleqataki ira na nodra daulomani era gole tani. A vola okoya:

“Au rawa ni vola e vuqa na vuna au biuta kina na Lotu, na kosipeli, ka ena dua na sala, na noqu matavuvale. Ia e sega na betena. Au sega ni cakava e dua na vakatulewa levu meu biuta na Lotu—au a cakava beka e udolu na digidigi. Ia e dua na ka au dau kila tu ga ni rau cakava e dua na vakatulewa levu na noqu itubutubu, e rau tudei tu ga kina. Erau lewa me rau lomani au.

“Au sega ni kila rawa na levu ni wainimata sa turu, se vica na bogi ni sega ni moce, se na levu ni masu ni vakatakekere e cabori ena vukuqu. Erau sega ni kacivi au baleta na noqu ivalavala ca; ia, erau kacivi au meu lako tani mai na noqu ivalavala ca Erau sega ni vakavuna meu vakila niu sega ni ciqomi ena nodrau vale kei na veisoqoni vakamatavuvale; na veika e vakilai e vu mai na veika au cakava. Ia, erau a ciqomi au tu ga. Erau raica beka ena so na gauna sa ni sa buwawa mai na kequ iserau. Ia erau kila ni gauna oya e se bera sara ni taucoko na kequ ituvaki dina.

“Me vaka ga ni dredre na noqu lako tani mai na Lotu, a vakakina na noqu lesu tale mai. Ia e dua na ka e sega ni dredre me baleta na lesu tale mai oya na noqu vakila niu lesu tale mai ivale ena noqu itikotiko dina ga.”

Na noqu itukutuku nikua e baleti kemuni kece oni vakila na Yalotabu ena dua na gauna ia oni vakataroga se tiko e dua na sala lesu mai se dua na tikina me baleti kemuni ena Lotu vakalesui mai i Jisu Karisito. E baleti ira sara ga era sega ni tautauri vinaka tiko se temaki mera lako tani.

Na itukutuku qo e sega ni ibolebole, ka sega ni veibeitaki. E dua na veisureti, e soli yani ena loloma kei na gagadre dina me kidavaki iko lesu mai kina nomu itikotiko vakayalo.

Au masu moni vakila na ivakadinadina ni Yalo Tabu ni oni rogoca na veisureti ena loloma kei na yalayala vakasakiti oqo mai vua na noda iVakabula, o Jisu Karisito:

“Oni na segali ni lesu mai vei au, ka veivutunitaka na nomuni ivalavala ca, ka saumaki mai, meu vakabulai kemuni?”

Ena veimacawa e vuqa era ciqoma tiko na veisureti ni iVakabula ena nodra lesu tale mai kina bula vakatisaipeli kei na itaviqaravi ni Lotu, ka vakasaqara vakamalua ena yalo malumalumu na veivakabulai e yalataka o Jisu. Na veibasai kina italanoa eso e dau cawiri wavoki tu vagauna, e levu sara na iwiliwili ni noda itabagone era digitaka tiko mera kaukauwa tikoga ka vakatubura tiko na nodra vakabauti Jisu Karisito.

Nira raica eso na daumuri Jisu mai Kapenaumi ni sa dredre na Nona ivakavuvuli ka ra digitaka mera biubiu, a vuki vei iratou na Nona Apositolo ka taroga, “Dou sa via lako tani talega koi kemudou?”

Oqo na taro e dodonu meda dui sauma nida sotava na noda dui gauna yadua ni veivakatovolei. Na kena isau mai vei Pita vei Jisu e sega ni vagauna ka voqa levu: “Keitou na lako vei cei? sa tu ga vei kemuni na vosa ni bula tawamudu.”

Ia nio vakasamataka na veisureti ni iVakabula mo lesu Vua, na cava beka o vulica mai na italanoa ni vuni willow?

1. Na ilakolako lesu e dau sega ni rawarawa se logalogavinaka, ia e yaga vakalevu. Ni sa vakaduri cake tale na neitou vuni willow, a musu laivi kece na tabana. E sega ni totoka. Eda na rairai vakila tale ga nida malumalumu nida biuta laivi na ivakarau makawa ka kauta tani na dokadoka. Nio vakanamata tiko vei Jisu Karisito kei na Nona kosipeli—na tolona kei na wakana—ena solia vei iko na inuinui kei na yalodei mo taura na imatai ni ikalawa lesu.

2. E taura e vuqa na yabaki me qai rawata tale na neitou vuni willow na kena kaukauwa kei na kena totoka. Qo sa qai kaukauwa ka totoka cake sara mai na kena e liu. Mo dau vosota ni tubu talega na nomu vakabauta kei na ivakadinadina. Oqo e oka kina mo kua ni vakacudrui ena vosa vakaveitalia eso me vaka na “O a tu mai vei ena veiyabaki kece oqo?”

3. Na vuni willow oya ena sega ni rawa ni bula ke sega ni qaravi ka vakabulabulataki vakawasoma. Ona vakabulabulataka na nomu vakabauta kei na ivakadinadina nio kana magiti ena teveli ni sakaramede ena veimacawa ka sokalou ena vale ni Turaga.

4. Me vaka ga ni gadreva na vuni willow na rarama ni matanisiga me tubu tale kina na tabana kei na drauna, ena tubu vakakina na nomu ivakadinadina ena tubu nio tiko ga ena veika o vakila kei na ivakadinadina ni Yalotabu. Vuli mai vei Amuleki, ka vakamacalataka na nona gauna ni luluqa vakalotu ni a kaya, “niu sa kacivi oti vakavuqa au qai sega ni rogoca.”

5. E kila o noqu itokani na ituvaki ena rawa ni yacova tale na vuni willow. E vakakina na Turaga e kila na nomu icavacava vakalou kei na vanua e rawa ni yacova na nomu vakabauta kei na ivakadinadina. Ena sega vakadua ni biuti iko o koya. Mai na Veisorovaki i Jisu Karisito, sa rawa ni vakabulai na veika kece sa ramusu.

Au vakadinadinataka ni reki o lomalagi ena vukudra o ira era lesu tale mai. Ko sa gadrevi, ka o sa lomani. Au vakadinadinataka nio Jisu Karisito na noda iVakabula ka vakalougatataki ira kece o Koya era lesu Vua ena vakacegu kei na marau levu. E sega ni lobika na ligana ni loloma cecere ia e dola tu ka dolele tu yani vei iko. E sega ni bera mo lesu tale mai. Ena loloma kece ni vuniyaloi keimami, keimami kidavaki kemuni mai vale. Ena yacai Jisu Karisito, emeni.