Vakaitavi ena Vakavakarau ni Lesumai i Karisito
Na veikacivi kei na sala tale eso eda tutaka kina na cakacaka ni Kalou sa vakarautaki keda vinaka ni veisotari kei na iVakabula.
Ena vica na vula sa oti, au a duri tu ena dua na olo ni gole mai o Elder Neil L. Andersen. Au se qai kacivi ga me dua na Vakaitutu Raraba vou. E rairai kila na noqu veilecayaki, a matadredredre ka kaya, “Raica, oqo e dua tamata ka sega ni kila tu na ka e kitaka tiko.”
Au vakasamataka, “Oqo e dua na parofita ka daurairai dina.”
E qai vakasolokakana yani o Elder Andersen, “Kua ni leqa, Elder Shumway. Ena vinaka mai—ena lima kina ono na yabaki.”
O bau vakananuma li na vuna eda kerei kina meda cakava na ka ena matanitu ni Kalou e rairai sega ni ganiti keda? Na veika e gadreva na bula, o sa taroga mada na cava e gadrevi kina na veikacivi ena Lotu? Io, au sa solia na noqu gauna.
A saumi vei au ena koniferedi raraba sa oti ena nona kaya o Peresitedi Russell M. Nelson, “Oqo na gauna me daru vakavakarau kina iKarua ni Lesu Mai ni noda Turaga ka iVakabula, o Jisu na Karisito.” Ena gauna e kaya kina na veika oqo o Peresitedi Nelson, a vakavulici au na Yalotabu ena gauna eda qarava kina na cakacaka ni Kalou, eda sa vakarautaka tiko na lesumai i Karisito. Na yalayala ni Turaga e talei ena veikacivi, ni veiqaravi, sokalou ena valetabu, na veivakauqeti kei na sala tale eso eda qarava kina na cakacaka ni iVakabula.
E Yalovakacegu na Kalou Nida Qarava na Nona Cakacaka
Ena “matalia ni gauna oqo,” ni tubu tiko na matanitu ni Kalou ka ra tiko na valetabu e vuravura, sa koto na gagadre ni yalo yadua mera tutaka na cakacaka ni Kalou. Na veiqaravi tawananumi koya sai koya na tikina bibi ni bula vakatisaipeli i Karisito. Ia na veiqaravi e sega ni veiganiti. Oqo na vuna au qoroi kemuni na tisaipeli-yalodina ni veiyalayalati, ka biuta vakatikitiki na nomuni gagadre kei na bolebole moni qarava vakatabakidua na Kalou ena nodra qaravi na Luvena. Na Kalou e“qoroi ira ka qaravi [Koya] ena yalododonu.” E yalataka,“Ia ena levu sara na kedra isau; io ena tawamudu na nodra lagilagi.” Nida vakaio kina veiqaravi, eda sa vakaio tiko vei Jisu Karisito. Ena gauna eda vakaio kina vei Karisito, eda sa vakaio tiko kina bula levu duadua ena rawati.
Au vulica qo niu cakacaka ka vuli idjinia ni wainimate tu ena koronivuli torocake. Au kacivi meu dau tuvana na itaviqaravi ena tabanalevu ni sega ni vakawati. Na veikacivi oqo e vakaogai au. Ia, au a vakadonuya, ka taumada e veivakaogai. Ia ena dua na itaviqaravi a rawai e dua na goneyalewa totoka ena ivakarau ni soli asikirimu. A lesu mai vakatolu o koya ena vakanuinui niu na kauwaitaki koya. Keirau a veidomoni, ka vosaki au o koya ni oti e rua na macawa. Ia, rairai e sega ni totolo sara, au kerei koya, ia na ka dina, au sautaninini niu vakasamataka niu na calati Heidi kevaka au vaka sega ena veivakacivi.
Noda Vakaitavi e Vakarautaka na Lesumai na Karisito
Eda qarava na cakacaka ni Kalou sega ena vuku ni gadrevi keda na Kalou ia ena vuku ni noda gadreva na Kalou kei na Nona veivakalougatataki. Sa yalataka o Koya, “Raica, au na vakalougatataki ira sa cakacaka ena noqu were ni vaini ena dua na veivakalougatataki qaqa.” Meu wasea e tolu na ivakavuvuli e rawa vakacava na noda vakaitavi ena cakacaka ni Kalou me vakalougatataki ka vukei keda me sotava na iVakabula
Matai, nida vakaitavi, eda torova “na inaki [eda] a buli kina”
Eda vulica na ituvatuva oqo ena itukutuku ni Veibuli. Ni oti edu ana siga ni cakacaka, sa vakatakila na Kalou na rawaka sa yaco ni kaya “esa vinaka.” E sega ni kaya ni sa cava na cakacaka se vinaka sara. Ia sa yaco tiko na tubu ena siga yadua, ka sa vinaka oya ena mata ni Kalou!
Veikacivi me kua ni navuca se vakadeitaka na bula kilikili ni dua na tamata. Ia, nida cakacaka vata kei na Kalou ena sala cavaga e vinakata, eda sa tubu kina inaki eda a buli kina.
Sa marautaka na Kalou na noda rawaka, ka dodonu vaka kina o keda talega dina ni se vo tu madaga na cakacaka me caka. So na gauna, ena rairai lailai na igu se sasaga ni qarava e dua na veikacivi. ia, eda rawa ni sema kina cakacaka ka taqomaka na noda ivakadinadina ena sala me vaka na masu kei na vulici ni ivolanikalou. E sega ni vakacalai keda na Tamada Vakalomalagi lomani nida lomasoli tu ia nida tawarawa ni veiqaravi.
Karua, e laveta na noda itikotiko kei na lotu na veiqaravi kina vanua tabu eso eda rawa ni bulataka kina na veiyalayalati.
Me ivakaraitaki, sa ka ni tamata yadua na veiyalayalati ni nanumi Karisito tu ga, ia sa bulataki na veiyalayalati oqo nida veiqaravi vei ira na tani. Na veikacivi e solia veikeda na madigi meda colata na icolacola vakayadua, ka vakayacora tu na lawa i Karisito. Nida veiqaravi nida lomana na Kalou ka via bulataka na noda veiyalayalati, na veiqaravi ea veivaogai taumada esa vu ni marau ka veisaututaki.
Era sega ni vakabulai keda na cakacaka vakalotu baleta ni tiki ni ituvatuva mai vakalomalgi. Ia, nida bulataka na veiyalayalati e semati kina cakacaka vakalotu oqo, eda vakataka na tamata ka vinakata me tiko vata kei na Kalou. Na kila matau qo sa ulubaleta na vakatatao ni veiqaravi se navunavuci me kua na veiqaravi. Na noda vakavakarau ni sotavi Jisu Karisito e vakatotolotalo nida muduka na noda taroga na cava ena vakatara na Kalou ka tekivu taroga na cava ena vinakata na Kalou.
Katolu, na vakaitavi ena cakacaka ni Kalou e vukei keda meda rawata na isolisoli ni loloma soliwale ni Kalou.
Eda sega ni ciqoma na isau vakailavo ni veiqaravi. Ia, e vakatavulica na ivolanikalou ena vuku ni noda “cakacaka [meda sa] ciqoma na loloma soliwale ni Kalou, ka [meda] vakaukauwataki ena Yalotabu, [meda] kila na Kalou, [ka]… veivakavulici ena kaukauwa kei na lewa sa mai vua na Kalou.” Oya na veivoli vinaka duadua!
Ena vuku ni loloma soliwale ni Kalou, na noda rawata se sega ni rawata esega ni yavu dei ni kena vagolei se vakadonui tu na veikacivi. E sega ni namaka na Kalou na qaravi tavi uasivi se taledi vakasakiti mo vakaitavi ena Nona cakacaka. Ke vakakina, ena sega ni vakabula na nona matanitu o Eseta na Ranadi, ena sega ni liutaki ira na isevu ni Lotu o Pita, ka na sega ni parofita ni Veivakalesuimai o Josefa Simici.
Nida cakacaka ena vakabauta ni kitaka e dua na ka e tawamacala tu vei keda, ena vakatakilai na noda malumalumu. Oqo e sega ni veivakacegui, ia e veiganiti me “kilai kina ena vuku ga ni loloma soliwale ni [Kalou] sa tiko kina vei [keda] na kaukauwa ni vakayacora na veika oqo.”
Eda na lutu ena vuqa na gauna nida qarava na cakacaka ni Kalou. Ia, ena noda sasaga, ena dau tiko kei keda o Jisu Karisito. Ena laveti keda o Koya meda lako curuma na veivakabulai ena gauna ni druka kei na rere kei na noda vakila nida na sega ni rawa ni taucoko. Nida vakatabuya na noda sasaga lailai ka vinaka, ena vakalevutaka na Kalou. Nida solibula ena vukui Karisito, sa vakatabui keda o Koya. Oqo na kaukauwa ni veisaututaki ni loloma soliwale ni Kalou. Nida veiqaravi, eda sa tubu ena loloma me yacova nida sa vakarau tu me “laveti cake mai vua na Tamada, ka tu ena mata i [Jisu Karisito].”
Vukea na Tani Mera Ciqoma ka Marautaka na iSolisoli ni Veikacivi
Au sega ni kila na ka taucoko ena tarogi au kina na iVakabula niu duri tu e Matana, ia na dua tu beka na taro na, “O cei o kauta mai vata kei iko?” Era sa isolisoli tabu na veikacivi mai vua na Tamada Vakalomalagi lomani me vukea na noda kauti ira mai na tani kivei Karisito. Au sureti ira na veiliutaki kei keda yadua meda vaqarai ira matua e sega tu nodra veikacivi. Vakauqeti ka vukei ira mera vakaitavi ena cakacaka ni Kalou me rawa ni ra vakavakarau ki na lesu mai i Karisito.
A sega ni vakadeitaki koya tu o Jone ena Lotu ni sikovi koya na nona bisopi ka tukuna vua ni sa tiko vua na Turaga e dua na nona cakacaka me cakava. A sureti Jone me muduka na nona vakatavako. Dina ga ni tovolea tu vakavuqa o Jone me muduka, oqo sa vakila o koya ni dua na kaukauwa vuni sa vukei koya tiko.
Ni oti ga e tolu na macawa, a sikovi Jone na peresitedi ni iteki. A kacivi koya me veiqaravi ena matabisopi. A kidroa o Jone. A tukuna o koya vua na peresitedi ni iteki ni se qai cegu saraga na vakatavako. Sa kena ibalebale oqo ni na calata o koya na nona dau tiko ena qito saumi eso ena Sigatabu, esa dua sara ga kerekere bibi. Na veika e qai tukuna o peresitedi ni iteki e matalia: “Jone, au sega ni kerei iko tiko; na Turaga ga.”
Sauma lesu kina o Jone, “Ke sa vakaoqori, au na vakayacora.”
A tukuna vei au o Jone na solibula oqo ni veiqaravi esa vu ni veisaututaki vakayalo ki vua kei na nona matavuvale.
Au vakasamataka ke tu na veika e vaka matabutotaki keda, ka sega ni dolea na veikacivi kina so vei keda era rairai sega ni veiganiti se tawakilikili tu. Se da kauwaitaka vakalevu na qaravitavi vakavanua mai na ivakavuvuli ni toso ki liu, ka sega ni raica na sala e vakalevutaka kina na rawaka na iVakabula ena ka tawalokuci ka tawadinati ena kena soli na madigi eso mera veiqaravi.
E vakatavulica o Elder David A. Bednar na bibi ni vakatulewa ni volanikalou oya “na tamata yaduame vulica na [nodra] itavi, ka vakayacora [tu].” Eda cakava tiko? Ni ra vakatautaka na iliuliu kei na itubutubu vei ira na tani mera vulica ka cakacakataka vakai ira, era kadre ka seraka. E rairai gaunisala rawarawa meda solia vei ira na lewenilotu yalodina na ikarua ni veikacivi, na sala cecere duadua mera sureti o ira era sega ni rawa ni veiqaravi ka solia vei ira mera vuli ka tubu.
Ke tiko vakatamata eke na Karisito, ena sikovi ira na tauvimate, vakatavulica na kalasi ni Matawilivola ni Sigatabu, dabe vata kei na goneyalewa lomabibi, ka vakalougatataki ira na gone. E rawa ni kitaka o Koya na Nona cakacaka vakai Koya. Ia e bulataka o Koya na ivakavuvuli oqo me vakavulici keda, ka talai keda ena Vukuna.
Nida vakaitavi ena cakacaka ni Kalou e sala vata mai na “dodonu, madigi, kei na itavi me matataka na Turaga [Jisu Karisito].” Nida veiqaravi meda vakalevulevuya na Karisito ka sega o keda, ena ka ni reki na noda veiqaravi. Nira biuta eso na noda kalasi, soqoni, veisiko, se itaviqaravi ka nanumi Karisito vakalevu mai na nodra nanumi keda, sa bulabula na cakacaka.
Ena noda gadreva ena yalodina meda matataka na iVakabula, eda yaco me vakataki Koya vakalevu cake. Oqori na vakavakarau vinaka duadua kina gauna vakatabui eda na tekiduru vakayadua kina ka vakatusa ni sa Karisito o Jisu, au vakadinadinataki Koya, ka sa Nona “gusunivosa kina iyalayala kei vuravura” o Peresitedi Russell M. Nelson me vukea na noda “vakavakarau kina veika ena lako mai.” Ena yaca tabu i Jisu Karisito, emeni.