Loloma Uasivi—E Dua na iVakatakilakila ni Tisaipeli Yalodina

Na tisaipeli e dua na dauvakamumuri se gonevuli ni dua tale. Na tisaipeli era “vuli cakacaka” ka solia na nodra bula mera vaka na nodra ivakavuvuli. O koya gona, na bula vakatisaipeli i Jisu Karisito e okata vakalevu cake mai na vakabauta ga na Nona ivakavuvuli kei na vunau. E okata vakalevu cake mai na noda vakatusa na Nona ilesilesi vakalou ka ciqomi Koya me noda iVakabula kei na Dauveivueti, me vaka ni kena bibi oya.

E vakamacalataka o Peresitedi Oaks ni: “Na vakamuri Karisito e sega ni ka vakarairai se caka vagauna. Meda dau cakava tikoga ni sa ivakarau ni bula ka na dau caka ena veigauna kece kei na veivanua kece.” Na bula vakatisaipeli e dua na ilakolako nakiti eda muria meda veisautaki ena veisorovaki ni Turaga kei na Nona kaukauwa ni veirawati. Na icavacava ni vanua dina ni bula vakatisaipeli meda ucua vakaidina me vakai Jisu Karisito—me yacova sara nida sa ciqoma ni “ucui Koya tiko li ena [keda] irairai.”

Meda i tisaipeli ni Turaga, e dodonu meda nakita meda vakamuria na Nona vakasama kei na veika e cakava e veisiga—me kena ivakaratiaki, Nona talairawarawa, yalomalumalumu, kei na vosota vakadede. Nida vakasotara vata na ivakarau ni bula vakaoqo kina noda dui ituvaki, eda na “rawata kina na ka sa Vakalou.” Na kena vakatotomuri vakaoqo na ituvaki ni iVakabula e tiko ena uto ni sokalou Vua. Me vaka e vakavulica o Peresitedi Nelson, “Na ivakadinadina vinaka duadua ga ni noda dokai Jisu tiko sai koya na noda vakatotomuria tiko na Nona ivalavala.”

Mai na vei ivakarau vakalou i Jisu Karisito sa rawa vei keda meda vakatotomuria, e dua e tiko duadua ka umana vata na kena vo. Na ivakarau oya na Nona loloma savasava, se loloma uasivi. O rau na parofita o Momani kei na Apositolo Paula e vakananuma vei keda ni ke sega na loloma uasivi, “[eda] sa ka wale ga.” Se, me vaka ni vakaraitaki vua na Parofita Josefa Simici, ke sega na “loloma uasivi, [keda] na sega ni rawata e dua na ka.”

Na iVakabula vakai Koya e vakaraitaka ni loloma edua na maka se ivakatakilakila ni Nona tisapeli yalodina ena kilai tani kina ni a kaya o Koya:

“E dua na ivunau vou au sa solia vei kemudou; mo dou veilomani; me vaka kau sa lomani kemudou, mo dou veilomani talega vakakina.

“A ka oqo era na kila kina na tamata kecega ni dou sa noqu tisaipeli, kevaka dou sa veilomani.”

Na loloma uasivi e dua na vakasama cecere ka rawa ni dredre na kena vakamacalataki rawa ia e kilai vakarawarawa vei ira kece era vakila. Na Vunautaka na Noqu Kosipeli e vakavulica ni “na loloma uasivi, me vaka na vakabauta, e veimuataki ki na cakacaka.” E dina, na loloma uasivi e rawa ni vakamacalataki me “loloma e cakacakataki.” Na ivakamacala oqo e vakarautaka na vakasama cecere ki na itukutuku vakalekaleka ni Nona bula na iVakabula—oKoya “a lako voli ka dau caka vinaka.”

Nida daumuri Jisu Karisito, eda vakasaqara meda vakatotomuria na sala na noda iVakavuvuli ea vakaraitaka vei ira tale eso na Nona loloma savasava. E dina ga ni dau vakaraitaka na iVakabula na loloma uasivi ena vei sala eso, au na via vakadreta e tolu na ituvatuva bibi ni Nona loloma uasivi ka laurai vei iratou na Nona tisaipeli yalodina.

iMatai, e vakaraitaka na iVakabula na loloma uasivi ni yalololoma. Na gauna ni Nona veiqaravi vei ira na Nifai me vaka ni volai tu ena Vola i Momani, na Turaga e sureti ira na tamata mera lesu tale i vale ka vakasama vakatitobu na veika e vakavulica o Koya ka me vakavakarau kina Nona lesu mai na siga tarava. E tukuna na ivolatukutuku:

“Ka raica nira sa tagi ka raici koya vakamatua yani ka vaka era sa vakamasuti koya me tiko vata mada vakalailai kei ira.

“Ka sa kaya vei ira: Raica, Raica, sa vakasinaiti na lomaqu ena yalololoma vei kemuni.”

Na yalololoma e tiki ni loloma uasivi ka saga me vakamamadataka na veivakararawataki. Vakasinaiti ena yalololoma, na Turaga e vakabulai ira na tauvimate kei na rarawa mai vei ira na tamata. Ni oti, e vakalougatataki ira na luvedra o Koya ni sa lako sobu mai lomalagi o ira na Agilosi ka tu wavoliti ira. E vakayacora na veicakacaka oqo ni yalomalua, dauloloma, kei na vuqa tale, baleta ni “sa lomani ira” o Koya.

Niu se daukaulotu gone mai na Ceva kei Amerika, au vakalougataki ena yalololoma mai vei dua na itokani lomani. E dua na bogi niu draiva tiko kei na noqu itokani ki na nona vale na neitou peresitedi ni kaulotu, e dua na cauravou ena basikeli ea mua vakasauri e mata ni noqu motoka. E yaco vakasauri ka sega niu levea rawa kina na coqa. Na ka vakaloloma, ni mai leqa na cauravou oqo mai na kena revurevu. Au mai kavoro e na vuku ni mai yali na bula. Lomaleqa kei na domobula e tarai au ni sa matata mai na vakacalaka ea yaco, au mani kau sara kina valeniveivesu ka sogo iloma. Au se sega vakadua ni se bau rere vakalevu ka galili. Sa vakatawani au na veilecayaki kei na rere niu na vesu ena vo ni noqu bula taucoko.

E dua na itokani daukaulotu, o Elder Brain Kochever, e mai rogoca na noqu coqa ka yavalati ena yalololoma. E gole mai kina valeniveivesu ka vakamasuti ira na turaga ni ovisa me vakatarai koya me tiko vata kei au e loma meu kua kina ni tiko duadua. E veivakurabuitaki, ni ratou duavata kina. Me yacova mai nikua, au vakavinavinaka vakalevu ki na loloma va-Karisito e cakava na tisaipeli qo, e vakamamadataka, veivakacegui, ka vakayalia na lomaleqa levu au a sotava ena dua na gauna dredre ni noqu bula. Na nona yalololoma uasivi e ivakatakilakila ni nona bula vakatisaipeli. A kaya o Peresitedi Russell M. Nelson, “E dua na sala rawarawa duadua me kilai kina e dua ka muri Jisu Karisito dina sa ikoya na ivalavala ni nona qaravi ira na tani ena yalololoma.”

E dua tale na ivakaraitaki ni sala e vakaraitaka kina na Nona loloma na iVakabula ena Nona raica ka veiqaravi ki na nodra gagadre sega ni tukuni na tani. Ki vua na tagane lokiloki ka 38 na yabaki ni sega ni dua e vukei koya, na Turaga e laveti koya cake ka vakayaloqaqataki koya me bula savasava. Vei koya na yalewa a laurai ni a dautagane, e solia na inuinui kei na vakacegu o Koya ka sega ni cudruva. Vei koya na tagane paralasi ka biu sobu mai ena doka ni vale, ea solia na Turaga na veivosoti ni ivalavalaca, ka sega walega ni vakabulai ni yagona.

Na gauna au kaicivi kina meu bisopi, e dau bolei watiqu, o Cristin, o ratou na lewe ono na luvei keirau ena soqoni ni sakaramede, ka dau vakaraici iratou duadua niu dabe tiko mai icake. Me vaka oni sa kila, vakavuqa e ratou dau sega soti ni vakarokoroko na luvei keirau. Ni rau raica na veika e yaco tiko, e rua na lewe ni tabanalevu, o John kei Debbie Benich, rau tekivu me veivuke ka dabe vata kei koya ena vei Sigatabu. Na nodrau yalovinaka e tomani ena veiyabaki, erau qaiyaco merau itubutubu dauniveisusu kina noqu vuvale. Me vaka na Turaga, na tisaipeli oqo e raica na gagadre sega ni tukuni ka cakava ena loloma—e dua na ivakatakilakila cecere ni bula vakatisaipeli.

Me itinitini, na loloma uasivi ni iVakabula e vakanamatataki ira kece na luve ni Kalou meda rawa ni rawata vakalou meda “vakaivotavota ena nona veivakabulai, kei na kaukauwa ni nona veivueti.” Nida ucua vakalevu na noda iVakavuvuli, e vakalevutaki na noda gagadre meda vukei ira na tacida kei na ganeda ena salatu ni veiyalayalati.

Me ivakaraitaki, e rawa nida veilaveti ka veitokoni vei ira era leva se guilecavi, vukei ira mera kidavaki o ira era lako vou yani kina ivavakoso, se sureti ira na itokani mera sokalou vata kei keda ena soqoni ni sakaramede—rairai ena Siganimate oqo. E levu tu na sala ni veitokoni kei na veivuke vei ira na tani ena nodra itosotoso kevaka eda nakita ena masumasu meda vakasaqara na veivuke mai lomalagi me rai na mata kei na lomamu me vakila na sala cava o Jisu Karisito e raica ka vakilai ira.

E rawa ni taura eso na itavi ni veiqaravi sega ni kilai levu me vukei kina o ira na tani ena salatu ni veiyalayalati. Me dua na ivakaraitaki, na neitou ilesilesi ena gauna oqo mai na Filipai, au vulica me baleta na matavuvale na Agamata. E ratou papitaiso ena 2023, ka ratou maqusa sara ena kena tuvai e dua na tikinisiga me ratou vauci vata vakamatavuvale ena Valetabu voleka e Urdaneta Filipai. Ia, ni bera na nodratou gauna lokuci na matavuvale, e vica vata na cava e ravuta na nodratou vanua. O Baraca Agamata, e dua na dautei raisi, a sega ni rawa ni tea na nona itei ena gauna ni cava kaukauwa. Ni oti na cava, e gadreva okoya me tea vakatotolo na raisi ni se suasua tiko na qele—ka ituvaki vinaka ni teitei. E ka ni rarawa, ni daro tiko na ilakolako kina valetabu.

E rua na tisaipeli, o Elda kei Sisita Cauilan, vata kei tolu tale na daukaulotu gone, e rogoca na nodratou sasaga ka ratou lai veivuke dina ga ni ratou sega ni kila na teitei. Ni cakacaka voli ena ruku ni siga katakata, eratou veivuke ena kena tei na itei, ka vakatarai o ratou na Agamata me ratou vakacavara kina na nodratou cakacaka ka tiko ena valetabu me ratou vauci me vaka sa lokuci. E kaya o Elda Cauilan ni “na rairai kei ratou na [Agamatas] e serau sara ni keitou raici iratou ni ratou vakaisulu vulavula tu ena vale ni Turaga. Na reki keitou vakila ena veiqaravi vua e dua sa ka marautaki dina!”

Eratou marautaka na Agamata na veivakalougatataki cecere ni vauci vata vakamatavuvale baleta ni vica na tisaipeli ka vakasinaiti ena loloma uasivi—dua na ivakatakilakila ni nodratou bula vakatisaipeli—dei ena inaki me vukei ira na tacidra kei na ganedra ena salatu ni veiyalayalati.

Taciqu kei na ganequ, na bula vakatisaipeli i Jisu Karisito e sala duadua ga meda rawata kina na marau. E sala vakatawani vata kei na veicakacaka nakiti ka vakainaki ni loloma vei ira na tani. Dina ni dredre ka dau veibolei na sala ni bula vakatisaipeli, ka eso na gauna eda yavalati ka yaco koso, e rawata na vakacegu ni Kalou e kilai keda ka vinakata me vukei keda ena veigauna eda sasaga kina. E vakananuma vei keda o Aisea “Kalou na taura na [ligada] imatau, ka kaya, Mo kakua ni ko rere; kau na vukei iko.”

Na veivakadeitaki oqo mai vua na Tamada Vakalomalagi, au masulaka vakabibi nida na vakamuria na veisureti ni Peresitedi Nelson meda dau vakabibitaka na noda bula vakatisaipeli. Meda, “masuta na Tamada ena yalomudou taucoko” ka “me vakasinaiti kemudou ena loloma oqo, ka sa solia vei ira era sa muria ena yalodina na Luvena, o Jisu Karisito; ia ni sa rairai mai ko koya eda na tautauvata kaya,” baleta nida kauta tiko na ivakatakilakila dina ni bula vakatisaipeli, o koya na loloma uasivi na loloma taucoko i Karisito.”

Au vakadinadinataka ni o Jisu Karisito sa noda iVakabula lagilagi, Dauveivueti, iVakaraitaki kei na iTokani bula. Ena yacai Jisu Karisito, emeni.