Na “Vu” ni Noqu Lomana na iVakabula

O bau raica beka ni noda parofita lomani, o Peresitedi Russell M. Nelson, e tomana tu ga nona sureti keda? E sega ni ka vou, e sureti keda meda vulica ka vakasamataka vakatitobu na veivosa a wasei ena rua na koniferedi sa oti. A kaya o koya, ena Epereli ni 2024, “Au nuitaka nio ni na vulica vakawasoma na itukutuku ni koniferedi oqo ena vei vula muri mai.” A qai kaya ena Okotova ni 2024, “Au vakauqeti kemuni moni vulica na nodra itukutuku [na vosa]. Vakayagataka mo kila kina na veika e dina kei na ka e lasu ena loma ni ono na vula ka tarava.”

Na veisureti oqo e rawa ni vakuri kina veisureti vakaparofita eda sa ciqoma oti ena noda bula taucoko, vakabibi o ira eda se qai ciqoma ga ena vica na yabaki sa oti. Eda rawa ni vakila se nanuma, na veisureti oqo e gadrevi ga me ikuri ni veika meda cakava, baleta nida sureti se kerei meda cakava. Ia e tiko tale beka eso?

Au vakasamataka tiko kei na veisureti kece eda ciqoma, au nanuma edua na ka au vulica ka vakatulewa kina ena dua na gauna balavu sa oti. Au saga tiko meu cakava na veika oqo, ni bibi vei au baleta niu lomani Koya; au lomana na noda iVakabula. Oqo na vuna dina kei na kaukaua au cakava kina na veika au cakava, ka sema vata na noqu lomani kemuni na noqu itokani taciqu kei na ganequ.

Vaka niu tacimuni, au nuitaka nio ni na okata na noqu vosa mera veisureti ena yalodina, me qarai ka kilai na madigi ena semata na veika kece eda cakava kei na noda lomana na iVakabula.

Na kena vakayacori oqo ena vukei keda meda kila na “vu” dina ni veika kece eda cakava vakatisaipeli ni iVakabula. Oqo ena vukei keda me qaqaco kina na noda isema ni veiyalayalati kei na Kalou, kilai vakamatata na Nona veidina vakalou ka tawamudu—na Nona veidina tawamudu duadua ga ka na sega ni veisau. Na veidina tawamudu me vaka “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, mera rawata ga na bula tawamudu.”

E matalia ni ena so na gauna, baleta ga nida sa cakava wasoma na ka mera yaco mera ivakarau tudei ni bula, eda vakatarai ira na veivakarau se itavi oqo mera vakatulewataka na noda sasaga meda tara cake na vakabauti Jisu Karisito. Kena irairai nida cakava na veika oqo baleta nida sa dau cakava tu ena vuqa vata na yabaki, eda sega ni vakasamataka na kena revurevu kina noda isema ni veiyalayalati kei na iVakabula.

Ena noda vuravura, eda dau vakanamata ga me rawati e veigauna na itavi kei na takete, ena ka eda cakava. Ena ituvaki vakayalo oqo, e tiko kina vei keda na madigi meda uasivita na vakayacori ga ni ka se na rawati ni takete ena kilai ni inaki eda vakayacori ira tiko kina. Eda rawa ni kila ka semata na inaki ni noda cakava edua na ka kei na noda lomana na iVakabula kei na Tamada Vakalomalagi, ena noda cakava na veimadigi oqo eda na kila kina ni dina ga ni vakayacori ni veika dodonu me vaka na itaviqaravi ni Lotu kei na ivakarau tudei eso kei na nodra vakayacori vakadodonu e ka vinaka, ia, nida semati ira kei na “vuna”, eda na vakalougatataki me kila na kena ibalebale. Eda sega walega ni cakava na veikavinaka ena ivakarau dodonu; eda na kila tale ga na kena inaki donu.

Me ivakaraitaki, nio tuvana mo wilika na ivolanikalou, masu ena lomadina, se vakarautaka edua na itaviqaravi ni nomu matavuvale se tabanalevu, na kena inaki dina beka ga mera caka na veitavi oqo? Se na ivalavala oqo mo, vakayagataka, me rawati kina na inaki dina? E kena inaki beka ga meda cakava edua na itaviqaravi baleta nida sa dau cakava tiko ena vuqa na yabaki ka toqa na kato nida sa vakacavara rawa? Se, vakadua tale, sa ira beka oqo na sala eda dau vuli kina, vakila, ka sema kei na iVakabula?

Yalovinaka kua ni nanuma cala me baleta na itaviqaravi kei na veiivakarau tudei se na navuci ni takete kei na cakacaka vakaukaua mera rawati kina; era sega ni ca. Ia, au sureti kemuni moni dolava na lomamuni kei na nomuni vakasama kina madigi kei na veivakalougatataki ni kena kilai na vuna eda cakava kina na veika oqo kei na ivakarau eda bulataka kina na noda lotu.

Edua na ivakaraitaki uasivi ni ivakarau tudei ka yavutaki vei Karisito, oya na bolebole a solia o Peresitedi Dallin H. Oaks vei keda kece, ena vukudratou na Mataveiliutaki Taumada. A kaya o Peresitedi Oaks, “Nida curuma yani na yabaki vou oqo, meda vakavakarau yani kina dua na Siganimate ena marautaki kina na veisorovaki i Jisu Karisito. Se mani vakacava na ka era vakabauta ka cakava na tani, e dodonu meda marautaka na Tucaketale ni noda iVakabula bula, ena noda vulica na Nona ivakavuvuli ka veivuke me vakadeitaki ena keda maliwa na ivakarau tudei ni Siganimate, vakabibi ena loma ni noda veimatavuvale.” Me vaka oni rawa ni raica, oqo e sega wale ga ni kena ivakarau ni veisureti. Ia, eda vakayagataki ira na ivakarau tudei oqo, me sala ni noda vulica e levu tale na ka me baleta na iVakabula, ka nanuma na Nona Tucaketale.

Na levu ga ni noda rawa ni semata na inaki kei na noda lomana na iVakabula, na levu tale ga ni noda rawa ni ciqoma na ka eda gadreva se vakasaqara tiko. O Peresitedi Nelson a kaya, “Na vakatataro se leqa cava ga o sotava, na kena isau e veigauna kece ena kunei ena bula kei na ivakavuvuli i Jisu Karisito.” A qai vakatetea o koya na veisureti oqo: “Vulica vakalevu na Nona Veisorovaki, Nona loloma, Nona loloma soliwale, Nona ivunau, kei na Nona kosipeli vakalesui mai ni veivakabulai kei na tubu. Gole Vua! Muri Koya!”

Vakananuma e lomamu kei na nomu vakasama; O vakabauta beka ni veisureti nei Peresitedi Nelson e nakiti me vukei keda meda vakarautaka edua na lisi meda rawata vakalevu kina na kila ka vakacavara na itavi eso ni nona veisureti ena noda lisi? Se sureti keda tiko o koya meda vakasamataka na veitiki ni dina tawamudu oqo kei na veiivakavuvuli me dua na madigi me kilai kina na inaki, ka semata na loloma ni veiyalayalati ni iVakabula vei keda, vata kei na noda ilakolako ni bula vakatisaipeli ena bula taucoko?

Meu vakamatatataka mada na ivakavuvuli au via tukuna tiko. Edua na madigi, ena via dredre toka, oya me wiliki taucoko na itukutuku mai na koniferedi, ka oti, au na toqa na veisureti oqo mai na noqu lisi ni veika me caka ka sega ni cakava edua tale na ka ena ka au sa wilika oti. Au kila ni dredre me na yaco, ia e rawa ni yaco dina. E rairai beka, e levu era tiko ena maliwa ni veika oqo kei na ka dina e gadrevi.

Na veisureti e kena inaki meda vulica ka vakananuma matua na veiitukutuku mai na koniferedi raraba ka vakayagataki ira me vakatulewataki ka kilai kina na veika eda rawa ni cakava yadua meda vinaka kina.

Nida ciqoma na veisureti, kila na kena inaki, ena levu kina na noda madigi meda voleka kina vua na iVakabula. Eda na tekivu kila vakavinaka ni baleta niu lomana na noqu iVakabula, au vinakata meu vulica vakalevu cake baleti Koya ena noqu vulica nodra vosa na parofita bula. Baleta niu lomani ira talega na kainoqu, au na wasea na nodra ivakavuvuli na parofita, daurairai, ka daunivakatakila vei ira na tani, me tekivu vei ira au dau lomana.

Ena ivakaraitaki ruarua oqo, o cakava tiko kina edua na ka dodonu. Na kena imatai, na takete oya me vakayagataki na iyaya e Rau solia veikeda na Tamada Vakalomalagi kei na iVakabula, oya sai ira na itukutuku ka wasei ena koniferedi raraba. Na kena ikarua e vakabibitaka na veivakalougatataki ni kena kilai na kena inaki titobu, ka veimuataki kina veidina tawamudu kei na veivakalougatataki e yalataki vei ira kece era cakava na ivakavuvuli kei na ivakaraitaki ni noda iVakabula, o Jisu Karisito, me iusutu ni nodra bula.

Taciqu kei na ganequ lomani, au nuitaka nio ni rawa ni vakila ka raica na bibi ni kena semati na ka eda cakava kei na noda lomana na iVakabula. Ena vuravura rabai levu oqo, e vuqa na domo era na tovolea mera vakayarayarataki iko ka, kevaka e rawa, muataki iko mo vakabauta ni eso na dina bibi ni kosipeli vakalesui mai nei Jisu Karisito e sega soti ni bibi. Era na tekivu na domo oqo mai na dina bibi ni gadrevi e dua na veivakalesui mai ena iotioti ni taba gauna, oka kina na gadrevi talega ni matanitu ni Kalou e vuravura, ka matataka na Lotu vakalesui mai i Jisu Karisito ni Yalododonu Edaidai.

Ona rawa ni rogoca na veidomo e tutaka ni gadrevi ga edua na veiwekani vakatamata yadua se veikilai kei na iVakabula, ka sega ni gadrevi se bibi na vakabauta se na Lotu vakalesuimai. Au sureti iko mo kua ni ciqoma ka qarauni iko sara mo kua ni vakayarayarataki ena veivakasama veivakacalai vaqo, ka mo totolo sara ni nanuma na veika sa dau tukuna ka vakavullica vei keda na iVakabula mai na veigauna sa oti—tekivu ena loloma nei Tamada Vakalomalagi kei Jisu Karisito vei keda, ka semata na noda loloma vei Rau me inaki ni noda muri Rau.

Erau lako mai na Tamana kei na Luvena ka veivosaki kei Josefa Simici, me vakalesui mai na Lotu i Jisu Karisito ka tavoci kina na veitabagauna taucoko, na Nona Matanitu e vuravura. O koya gona, Na Lotu i Jisu Karisito ni Yalododonu Edaidai e vakaturi mai vua na Tamada Vakalomalagi me rawati kina na veiyalayalati me rawa nida lesu tale kina i vale. O koya gona eda sega ni gadreva ga edua na veiwekani vakatamata yadua kei na Tamada Vakalomalagi kei na Luvena; eda gadreva na veicakacaka vakalotu bibi ni matabete meda caka veiyalayalati kina kei Rau. Oqo e vakarautaka edua na isema ni veiyalayalati kei Rau ka vakatarai keda kina Nodrau loloma ni veiyalayalati, me rawati kina na matanitu lagilagi cecere duadua ka vakarautaki tu vei ira era dinata ka yalodina kina nodra veiyalayalati.

Ena kaukaua kece mai vuniyaloqu, au tusanaka na dina kei na itutu vakalou ni noda iVakabula, o Jisu Karisito. O Koya e lomani iko. E kila o Koya na veika kece e yaco tiko ena nomu bula. E dodo tu na Ligana, ka veisureti tiko, “Dou lako mai vei au, ia kau na vakacegui kemudou.”

Au lomana na iVakabula, oya na “vu” ni noqu lomani Koya Ena yacai Jisu Karisito, emeni.