Qarauna na iKarua ni Veitemaki
Kakua ni vuni mai vei ira era lomani iko ka tokoni iko, cicivi ira.
Vica na yabaki sa oti, noqu a yacova na yabaki 12, au a sureti meu tiko ena imatai ni noqu keba bogi dua ni kuoramu ni Matabete vaka Eroni. Sa dua na gauna balavu noqu nanamaki tiko na veisureti oqo ni liuliu ni kuoramu na tamaqu ka dau laki keba vakawasoma kei ira na cauravou ena tabanalevu, qai biuti au duadua tu ivale.
Ni tadu mai na siga oya, dua na ka noqu marau. Au vinakata vakaukauwa meu bau oka kei ira na cauravou matua. Au vinakata meu vakadinadiantaka vei ira. Ena noqu sasaga oqo, sega ni bera nodra tovolea sara mera vakatovolei au kevaka meu tiki ni ilawalawa oqo.
Na noqu itavi meu kauta mai na ki ni motoka nei tamaqu me keitou qitora edua na qito vata kei ira na veiliutaki. Au sega ni nanuma na veika au tukuna meu rawati tamaqu, ia au cici vei ratou na ilawalawa cauravou oqo kei na ki ni motoka e ligaqu, dua na ka noqu sakitaka na noqu rawaka.
Oti qai lako mai na ikarua ni itavi. Oqo meu dolava na motoka ka vakaciqira e dua na kau ena tadrua ni raviravi ni dabedabe nei draiva kei na sici ni motoka. Ka meu lokataka tale na katuba me rawa ni tagi tu na sici ni motoka ena loma ni bogi me kakua ni vakatara me dua e curu ena lomani motoka me raica na veika e sa vakayacori kina.
Oqo na gauna e veivakamaduatakikina na italanoa oqo. Gauna sa ciqiri vinaka kina na kau, au sa lokataka sara na katuba kau cici vakatotolo meu laki vuni ena dua na veikau lailai. Noqu tekivu roso sobu, au vakila e dua na mosi kaukaua. Na noqu vakatotolo ena vanua butobuto oqo, au dabeca e dua na vuni pea cactus vakavotona.
Na domo ni noqu kaikaila e vakadromuca na rogo levu ni sici ni motoka, sa sega tale ni dua na ka meu cakava au sa mani kiso lesu kina motoka, tusanaka na noqu caka cala ka lesu tale ena noqu madualaka na kerea na veivuke vakavuniwai.
Na vo ni bogi oya, au davo tu e ketequ ena loma ni valelaca, e yasai tamaqu, e vakayagataka na pliers, mecavuta kina na votoni cactus mai vei au, via vakaraitaka niu sega ni dabe vinaka ena loma ni vica na siga.
Au taleva lesu na veika au lako curuma ena vuqa na gauna. Audredrevaka na noqu dau vosalevu ena gauna ni cauravou dina ga ni eso na ivakavuvuli bibi e matalia vei au.
E vuqa na noda ivakarau na tamata e matalia vei keda na tamata—na gagadre meda okati, na gagadre meda vakaraitaka se o cei o keda, na noda dau rere meda kakua ni calata, kei na noda gagadre meda vuni meda calata na irevurevu ni digidigi. Na iotioti ni vakarau ni tovo ena vakanamata kina na noqu vosa nikua—noda dau vuni ni oti na noda tauca e dua na ivalavala e sega ni dodonu.
Au sega ni vakatauvatana na noqu itovo vakagone me ivalavala ca, ia au via kauta mai valavoleka eso na lesoni e rawa ni yaga vei keda nida lako curuma na veivakatovolei ni bula.
Ena Were ko Iteni, a daumaka sara na kedrau i tuvaki o Atama kei Ivi—kakana e vuabale, sega ni vakatautauvata taki na vakasakiti ni were oqo—sega walega ni were totoka, ia e were e sega kina na co se pea vakavotona.
Ia, eda kila tale ga ni bula ena were e vakaiyalayalaga. Na were e sega ni kena icavacava ia e veivakatovolei, e imatai ni vuqa na ivakadinadina, vakarautaka ka vakatara me rau mua kina nodrau icavacava ni lesu ki vua na Tamada kei na Luvena.
Ona kila ni rau saqati ena were. A vakatarai o Lusefa me vakatovolei Atama kei Ivi. A temaki Atama i liu me kania na vuanikau ni vunikau sa kilai kina na vinaka mai na ca. Na nona nanuma na ivakaro me kakua ni kania na vuanikau, a vakasuka o Atama. Sa qai tiko o Ivi na marama kalougata, a digia me kania na vuanikau, ka vakauqeti Atama me kania talega.
Ni oti oya, a tukuna o Atama kei Ivi ni digidigi oqo a gadrevi me vakayacora kina na inaki ni Tamada Vakalomalagi Ia oqo mai na nona kania na vuanikau, erau sa talaidredre ki na lawa—na lawa a solia vakadodonu vei rau na Tamada. Na isau ni nodrau kilaka vakacacani ni vinaka kei na ca e vakakidrowataki rau ena gauna rau rogoca kina na domona na Tamada ni sa kacivaka na Nona lesu tale kina were. E rau qai kila kina ni rau sa luvaiwale, e dina ni sega ni rau vakaisulu, baleta ni rau bula tu ena ivakarau tawacala. Ena mosi sara mai na nodrau sega ni vakaisulu ena gauna oya, ni rau sa ceburaki baleta ni rau talaidredre. Rau malumalumu ka sega ni taqomaki. Rau sa luvaiwale vakaidina sara
Na nona kila o Lusefa na kedrau ituvaki malumalumu, sa qai temaki rau tale—na gauna oqo me rau vuni mai vua na Kalou.
Na veitemaki oqo, au vakatoka, na “karua ni veitemaki,” oya na veitemaki e kauta mai na itinitinica levu duadua kevaka erau coriti kina. E dina, ni bibi na noda saga meda kua ni temaki ena imatai ni gauna me voroki na lawa ni Kalou, ia eda kila nida na coriti kina vuqa na veimataqali imatai ni veitemaki e vuravura oqo. Nitubu meda matua kei na kilaka, eda nuutaka na kaukauwa meda sabaya kina na imatai ni veitemaki ena vakavinakataki kevaka eda saga meda vaka na iVakabula o Jisu Karisito.
Eso era na saga mera vuni mai vua na Kalou baleta era sega ni vinakata mera kunei se laurai, ka era vakila na madua. Ia, e vuqa na ivolanikalou e vakavulici keda ni e sega ni rawa meda vuni mai vua na Kalou. Au na wasea ga e vica:
E vakavulici Jeremaia na Turaga ena veitaro e muri oqo: “Me vunitaki koya rawa beka e dua e na yasana vuni, meu kakua ni raici Koya? sa kaya ko Jiova Au sa sega li ni roboti lomalagi kei vuravura?”
Ka vakavuli o Jope:
“Ni sa rai tiko na matana ki na ivalavala ni tamata, ka sa raica kecega na nona ilakolako.
“Sa sega na butobuto, se na iyaloyalo ni mate, me ra vunitaki ira kina na daucaka ca.”
Na Daunisame o Tevita, e serekali taka ena nona vosa:
“I Jiova, ko ni sa dikevi au, ka kilai au.
“Oni sa kila na noqu tiko sobu kei na noqu tu cake, o ni sa kila na nanuma ni lomaqu ni sa yawa tiko.
“Ni sa sega ni dua na vosa ena gusuqu, sa sega ni kilai deivaki kece sara vei kemuni Jiova
“Meu lako tani ki vei meu yali kina mai na yalomuni?
“Kevaka kau cabe ki lomalagi, ko ni sa tiko mai kina: kevaka kau vakarautaka na noqui mocemoce mai bulu, raica, ko ni sa tiko mai kina.”
Vei ira na Curuvou ena Lotu
Vei kemuni na curuvou ena Lotu i Jisu Karisito ni Yalododonu Edaidai, na ikarua ni veitemaki ena rairai e veivakatovolei toka. Na nomu veiyalayalati ni papitaiso o sa yalataka mo taura na yacai Jisu Karisito, kena ibalebale vei ira na lewevuqa, na kena veisau vakadua na nodra ivakarau ni bula. Na veisau ni dua na ivakarau ni bula e sega ni ka rawarawa. Vuqa na gauna ena gadrevi me veisau na iwalewale, ivakarau kei eso na veimaliwai me rawa nida mua vua na Tamada Vakalomalagi loloma.
E kila na vunica nio rawa ni coriti ena nona veitemaki matailalai. Ena vakayacora mo galeleta na nomu bula makawa koya a sega ni vakasinaiti iko me rairaivinaka vei iko. Na dauveibeitaki, e vakatokai tiko kina ena ivola ni Vakatakila, ena temaki iko ena vakanananu kei na rorogo vaka oqo: “E sega vei iko na kaukauwa mo veisautaka na nomu bula; e sega nio rawa ni vakayacora na ka oqo; o sega ni okativata kei ira na tamata oqo; era na sega ni ciqomi iko; o sa rui malumalumu.”
Kevaka e lako mai ena nomu vakasama na vakanananu oqo vei kemuni na seqai teivaki vou ena salatu ni veiyalayalati, au kerei kemuni moni kakua ni rogoca na domoi koya na dauveibeitaki. Keitou lomani kemuni, oni na rawata; oni ciqomi, ka, vei Koya, ena drodrovi kemuni na kaukauwa mo vakayacora taucoko. Ena gauna oni gadreva kina na loloma kei na veitokoni, kakua ni rawai ena vakanananu nio sega ni ciqomi kevaka oni lesu kina nomu ivakarau ni bula makawa. Ena kaukauwa ni veivakarautaki ni Veisorovaki i Jisu Karisito, ena rawa mo vakataucokotaki tale. Ia kevaka mo vuni mai Vua ka vayawakitaki iko mai na nomu isoqosoqo ni vakabauta vou, ona vayawakitaki iko tiko mai na ivurevure e solia na kaukauwa mo uabaleta.
E dua na noqu itokani voleka, curu vou mai ena lotu, a wasea na kena dredre vei koya me tudei tiko ena nona vakabauta ni tu duadua. E dua na kaukauwa e drodrovi keda nida tiko ena dua na isoqosoqo veitokoni—dina nira tamata ga ia era toso tiko ka qai vakalougatataki ena loloma ni Vakabula o Jisu Karisito.
Vakavulica o Peresitedi Russell M. Nelson “na vakamalumalumutaki vuravura e sega ni dua na ka me na yaco ena loma ni dua se rua ga na siga. Ena yaco ena loma ni dua na gauna ni bula taucoko nida karona vakawasoma na ivakavuvuli i Karisito. Eda vakatorocaketaka na vakabauti Jisu ena veivutuni e veisiga ka maroroya na veiyalayalati ena vakaukauwataki keda. Eda tikoga ena salatu ni veiyalayalati ka vakalougatataki ena kaukauwa vakayalo, ivakatakila yadua, vakabauta e vakalevutaki, kei na nodra veiqaravi na agilosi.”
Kevaka e yaco mo mavoa, ena vakacacani valevu ka rawa me taura na nomu bula kevaka o sega ni vakasaqara na veivukei vaka vuniwai. Oqo e dina talega ke o mavoa vakayalo. Na mavoa vakayalo ke sega ni qaravi ena rawa ni vakaleqa na nomu bula tawamudu. Kakua ni vuni mai vei ira era lomani iko ka tokoni iko, cicivi ira. O ira na bisopi vinaka, peresitedi ni tabana, kei ira na iliuliu era rawa ni vukei iko mo ciqoma na veivakabula ni Veisorovaki i Jisu Karisito.
Vei kemuni na vuni tu, kerekere ni lesu mai. Oni gadreva na kaukauwa e solia na kosipeli kei na Veisorovaki i Jisu Karisito, ka keimami gadreva na veika oni rawa ni solia. E kila na nomu caka cala na Kalou, ka sega ni rawa mo vuni mai Vua. Vakadodonutaki iko vei Koya.
Nida Nona Yalododonu, e dodonu meda vakaraitaka na ivakarau nida tiki ni Lotu e dau loloma, veiciqoma ka veivakauqeti vei ira era gadreva mera mua tiko ena Nona sala.
Qarauna na ikarua ni veitemaki! Vakamuria na ivakaro ni parofita ni gauna iliu kei na gauna oqo ka kila deivaki ni sega ni rawa mo vuni mai vua na Tamada dauloloma.
Vakarautaki iko mo ciqoma na kaukauwa ni veivakabulai ni Veisorovaki i Jisu Karisito. Oqo na inaki ni noda bula meda vakatovolei tu mai na veimataqali malumalumu kecega ni yago kei na vakasama” ka na rawati keda, e, vuqa na imatai ni veitemaki; me da mua tiko ga ni yaco me rawai keda na veitemaki; ka me da vakasaqara na kaukauwa vakalomalagi, me rawa ni da vakataka na iVakabula kei na Tamada Vakalomalagi. Oqo na Nona sala. Sa ikoya duadua ga na sala. Au vakadinadinataka na dina oqo ena yaca i Jisu Karisito, emeni.