“Dou Toro Voleka mai vei Au”

Kemuni na taciqu kei na ganequ, sa ka ni marau vei au na noqu mai tiko kei kemuni ena koniferedi raraba oqo ni Lotu i Jisu Karisito ni Yalododonu Edaidai. Oqo na Nona Lotu. Eda soqoni vata ena veivale kei na itikotiko e vuravura taucoko ena Yacana.

Eda taura vei keda na Yacana nida mai curuma na Nona matanitu ena veiyalayalati. Sai Koya na Luvena na Kalou sa tucake tale ka vakalagilagi. Eda tamata ga, eda na valavala ca ka mate. Ia, ena Nona loloma vei keda vakayadua, e sureti keda na iVakabula meda toro voleka Vua.

Oqo na veika a cavuta: “Dou toro voleka mai vei au kau na qai toro voleka yani vei kemudou; dou vakasaqarai au vagumatua dou na qai kunei au; dou na kerekere ka na soli vei kemudou; dou tukituki ka na dolavi vei kemudou.”

Ena so na gauna eda dau vakila nida voleka cake vua na iVakabula o Jisu Karisito. Ia, ena so na gauna ena noda bula, eda vakila nida yawa mai Vua ka gadreva na veivakadeitaki ni kila o Koya na veika e tu e lomada ka lomani keda vakayadua.

Na nona veisureti na iVakabula e okati kina na ivakarau me da vakila kina na veivakadeitaki oya. Toro voleka Vua ena nomu nanumi Koya tikoga. Vakasaqarai Koya vagumatua ena vuli ivolanikalou. Kerea ena masuta mai na yaloda vua na Tamada Vakalomalagi meda vakavolekati keda Vua na Luvena Duabau.

E dua na sala rawarawa meda vakasamataka kina. Sai koya na ka ona cakava kevaka drau veitawasei tu ena dua gauna kei na nomu itokani lomani. O na vaqara e dua na sala mo veitalanoa kina kei koya, o na vakamareqeta sara na na itukutuku cava ga o ciqoma mai vua, ka na rawa nio cakava na veika kece o rawata mo vukei koya kina.

Na balavu ni kena yaco,, na kena dede, na titobu na kemudrau isema, ka ona vakila nio volekati koya. Kevaka sa tasiri e levu na gauna ka sega tiko na veivosaki, na veirogoci domo, kei na vakayacoka, sa na malumalumu na ivau.

E lomani keda vakayadua o Jisu Karisito. E vakarautaka tu o Koya na madigi me da toro voleka yani Vua. Me vaka e dua na itokani lomani, ona vakayacora vakakina ena sala vata ga, ena nomu veitalanoa kei na Tamada Vakalomalagi ena masumasu ena yacai i Jisu Karisito, vakarogoca na veidusimaki ena loloma, ka qaravi ira na tani ena yalomarau ena vukuna na iVakabula. Sega ni dede o sa na vakila na veivakalougatataki oya ni toro voleka cake yani Vua.

Noqu gauna ni itabagone au dau vakila na reki ni toro voleka vua na iVakabula—kei na Nona toro voleka mai vei au—ena veitovo lalai ni talairawarawa kina ivakaro. Niu se gone, e dau soli na sakaramede ena soqoni ni lotu ena yakavi. Au se nanuma tiko ena dua na bogi sivia na 75 na yabaki sa oti, ni butobuto ka batabata e tuba. Au nanuma na kena rarama ka raragi na yaloquniu kila niu sa muria na ivunau meu soqoni vata kei ira na Yalododonu me vakaivotavota ena sakaramede, kau yalataka vua na Tamada Vakalomalagi niu na dau nanuma tikoga na Luvena ka muria na Nona ivakaro.

Ni mai cava na soqoni keimami lagata na sere “Mo ni Mai Tiko Ga kei Au; ’Ni sa Karobo Mai,” kei na qaqana guilecavi dredre “Turaga, mo ni tauri au.”

Na malanivosa oqori e luvuci au kina na Yalotabu, niu se gonetagane lailai sara. Au vakila na loloma kei na nona voleka mai na iVakabula ena yakavi oya. au vakila kina na veivakacegui ni Yalo Tabu.

Ena veiyabaki e muri au vinakata meu vakila tale na loloma vata oya ni iVakabula kei na veika au vakila niu voleka vua na Turaga ena gauna ni sakaramede niu se tabagone. Au mani muria tale e dua na ivunau ena: noqu vakasaqaqara na ivolanikalou.

Ena ivola i Luke, au wilika ena ikatolu ni siga ni oti Nona vakamatei ena kauveilatai ka bulu, nira lako yani na italai yalodina, ena nodra lomana na iVakabula mera lumuta na Yagona. Nira yaco yani era raica ni sa vaqiqici tani tu na vatu mai na ibulubulu ka sa sega e kea na Yagona.

Rau a tucake tu e kea e rua na agilosi ka taroga se cava na vuna era rere kina:

“Ena cava dou sa mai vakasaqarai koya sa bula ena kedra maliwa na mate?

“Sa sega eke ko koya, sa tu cake tale: nanuma na nona vosa vei kemudou ni sa tiko kei kemudou mai Kalili,

“Ni sa kaya, Ena soli yani na Luve ni tamata ki na ligadra na tamata ca, ka na vakoti ki na kauveilatai, ka na tucake tale ena ikatolu ni siga.”

Ena bogi oya ni sa buto, erau sa taubale e rua na tisaipeli mai Jerusalemi ena gaunisala ki Emeo, sa rairai vei rau na iVakabula sa tucake tale ka lako vata kei rau.

Na ivola i Luke ena kauti keda meda lako vata kei iratou ena yakavibogi oya:

“Ia ni ra sa vosa tiko vakaoqo, sa toro voleka ko Jisu, ka lako vata kei rau.

“A sa matabuawataki na matadrau me rau kakua ni kilai koya.

“A sa kaya vei rau ko koya, Ai tukutuku cava oqo drau sa veivosakitaka, ni drau sa lako tu, ka rau sa tu vakadua ka vakaveveku mata?

“A sa dua vei rau, na yacana ko Kaliopasa, sa vosa ka kaya vua, O iko duadua beka na vulagi mai Jerusalemi, ka sega kina ni kila na veika sa qai yaco kina ena gauna oqo?”

Rau tukuna Vua na nodrau rarawa ni sa mai mate o Jisu nirau sa vakabauti Koya ni Dauveivueti kei Isireli.

E vakilai na loloma ni Turaga sa tucake tale ni sa vosa vei rau na tisaipeli yalorarawa oqo.

Niu tomana noqu wiliwili, a yaco mai na veivosa oqo ka ragita na yaloqu, me vaka ga au vakila niu se gonetagane lailai:

“A ratou sa torova na koro lailai, e rau sa lako kina: a sa lako ko koya me vaka sa via lako ki liu.

“A rau sa cikeva matua, ka kaya, Ni tikoga vei keirau, ni sa qai yakavi, a sa kala na siga. A sa curu ko koya me tiko vata kei rau.”

Sa mai ciqoma na iVakabula ena bogi na veisureti me curuma na nodrau vale na Nona tisaipeli. A sa tiko sobu ka kana magiti vata kei rau. A taura na madrai, masulaka, dovia, ka solia vei rau. “A sa qai lau na matadrau, a rau sa kilai Koya; A sa qai yali yani mai vei rau.

E vola vei keda o Luke na veika rau a vakila na tisaipeli kalougata o ya: “A rau sa veikayaka vakai rau, Sa sega li ni katakata sara na yalodaru, ni datou sa veivosaki kaya e na gaunisala, ni sa vakamacalataka talega vei kedaru na iVola Tabu ko koya?”

Erau sa vakusakusa lesu ki Jerusalemi na tisaipeli e rua me rau tukuna vei ira na iApositolo le tinikadua na ka sa yaco. Nirau tukuna tiko na veika a yaco, sa rairai tale na iVakabula.

A tu ena kedra maliwa ka “kaya vei ira, dou vakacegu ga.” A vakamacalataka tale na kena parofisaitaki tu mai na Nona ilesilesi me mai sorovaka na nodra ivalavala ca na Luvena taucoko na Tamana ka me mai sereka na ivesu ni mate.

“A sa kaya vei ira, Sa volai vakaoqo, ni sa kilikili kei koya na Karisito me vosota vakakina, me tucake tale mai na mate e na ikatolu ni siga:

“Me vunautaki talega na veivutuni kei na vakabokoci ni ivalavala ca, ena vuku ni yacana vei ira na lewe ni veivanua kecega, me vakatekivu e Jerusalemi.

“Ia koi kemudou, dou na dautukutuku ena veika oqo.”

Me vakataki ira ga na Nona tisaipeli lomani, na luvena vakayadua na Tamada Vakalomalagi era digitaka me curu mai ena matamata ni papitaiso era sa yalataka me ra ivakadinadina bula ni iVakabula ka qaravi ira era leqa tu ena gauna taucoko ni bula oqo. Na yalayala oqo a vakamatatataka vei keda na parofita ni iVola i Momani o Alama ena vica na senijiuri sa oti ena Wai ko Momani:

“Ia me vaka dou sa gadreva mo dou curu ki na lomanibai ni Kalou, ka vakatokai me nona tamata, ka sa lomamudou mo dou veivuketaka na nomudou icolacola me mamada kina;

“Io, ni sa lomamudou mo dou tagi vata kei ira sa tagi; ka vakacegui ira sa rarawa, ka vakadinadinataka na Kalou ena veigauna kecega, ena veika kecega, kei na veivanua kecega dou sa tiko kina, me yacova na mate, me nomudou kina na bula tawamudu.”

Nio yalodina kina veiyalayala oqo, ona raica ni na maroroya na Turaga na Nona yalayala me duavata kei iko ena nomu veiqaravi, ka vakamamadataka na nomu icolacola. E na yaco mo kilai Koya, ni toso na gauna ena yaco mo vakataki Koya ka “vakataucokotaki vua.” Ena nomu vukei ira na tani ena vukuna na iVakabula, ona raica nio sa toso voleka tiko Vua.

E vuqa vei kemuni e tiko na nomuni daulomani era sa butusevata na salatu kina bula tawamudu. Oni vakataroga beka na cava tale moni cakava moni kauti ira lesu mai kina. Sa rawa moni vakararavi ga vua na Turaga me torovi ira yani vakavoleka nio qaravi Koya tiko ena vakabauta.

Ko ni nanuma tiko na yalayala ni Turaga vei rau o Josefa Simici kei Sidney Rigdon ena gauna rau a tiko yawa kina mai na nodrau dui matavuvale ena Nona veitalai: “Raica sa kaya vakaidina na Turaga vei kemudrau Sidney kei Josefa na wekaqu, era sa bula vinaka tiko na nomudrau vuvale; io era sa tiko ena qeteqete ni ligaqu, kau na vakayacora vei ira na veika sa dodonu vei au; raica sa tu vei au na kaukauwa kecega.”

Nio sa vauca na nodra mavoa o ira era vakaleqai, ena tokoni iko na kaukauwa ni Turaga. Ena dodoka yani o Koya na ligana kei na ligamuni me veivuke ka vakalougatataki ira na luvena na Tamada Vakalomalagi

Na italai vakaveiyalayalati yadua nei Jisu Karisito ena ciqoma na Nona veidusimaki ni ra vakalougatataki ira ka qaravi ira na tani ena Vukuna. Era na vakila na Nona loloma ka kunea na reki ni nodra toro voleka yani Vua.

Oi au e dua na ivakadinadina ni nona Tucaketale na Turaga me vaka ga au tiko beka kina ena yakavi oya vata kei na rua na tisaipeli ena vale e gaunisala ki Emeo. Au kila ni bula tiko o Koya.

Oqo na Lotu dina i Jisu Karisito—na Lotu i Jisu Karisito. O keda ena Siga ni Lewa eda na tucake e mata ni iVakabula, ena veirai e matanavotu. Ena gauna ni reki vei ira, ena bula oqo, era a toro voleka Vua ena Nona veiqaravi ka rawa ni ra namaka me ra rogoca na vosa oqo: “E vinaka, a tamata vinaka ka dina.”

Au vakadinadinataka oqo niu sa ivakadinadina ni iVakabula sa tucaketale ka noda Dauveivueti ena yaca i Jisu Karisito, emeni.