Toka Sara ga e Matada

Kemuni na taciqu kei na ganequ, sa ka marautaki dina na mai tiko kei kemuni. Keimami lomani kemuni, keimami vakavinavinaka ena vukumuni, ka keimami sa vakalougatataki ena vuku ni nomuni masu.

A kaya o Peresitedi Russell M. Nelson ena noda koniferedi sa oti: “O ni sa raica tiko beka na veika sa yaco sara toka ga e matada? Au masuta meda kua ni calata na vakaturaga ni gauna oqo! Sa vakatotolotaka dina tiko na Turaga na Nona cakacaka.

Vakatotolotaka na Nona cakacaka. Na “Vakatotolotaka” e sa rui vosa bibi. E vakatura me totolo na toso, totolo cake, ia na vakusakusa. Ena tubu ni Lotu kei na ituvatuva i Karisito, sa yaco tiko na kusa. O keda kece eda vakaitavi kina.

Ena Epereli 1834, mai Kirtland, Ohio, a soqoni ira kece era taura tu na matabete na Parofita o Josefa Simici. kina dua na valenivuli lailai rauta ni 14 na fiti (4.3 m). E rawa ni biu e loma ni Vale ni Koniferedi oqo e vicasagavulu na valenivuli vakaoya ka se vo ga na vanua me tawani. E kaya o Josefa Simici, “E vica walega na matabete oni raica nikua, ia na Lotu oqo ena vakasinaita na Vualiku kei na Ceva kei America—ena vakasinaita na vuravura.”

Sa vakayacori tiko na parofisai oya “e matada sara ga.” Na Lotu i Jisu Karisito ni Yalododonu Edaidai e tubu tiko na lewena kei na matavuvale, na daukaulotu kei na tabana ni kaulotu, valenilotu kei na valetabu, kei na volayaca ena semineri, inisitute, kei na veiunivesiti e vuravura taucoko.

Eda vakavinavinaka ni da tiko e vuravura ni sa tubu tiko na iwiliwili kei na veivakayarayarataki ni Lotu, vakabibi cake e yalodra kei na nodra bula na lewena. Eda kilai ni da tisaipeli i Jisu Karisito. Eda wasea na noda ivakadinadina me baleti Koya, Nona Lotu, Nona ivakarau, kei na Nona salatu ni veiyalayalati. O keda na Nona tamata, o Koya na noda iVakabula.

Au qoroya na ka e vakatoka o Peresitedi Nelson me “vakaturaga ni gauna oqo” ka vakaraitaka na vakavinavinaka cecekia vua na Turaga ena vuku ni Nona cakacaka. Au vakayaloqaqataki keda me da tu vakabalavu ni da Nona tisaipeli, ivakadinadina bula ni sa vakayacori na parofisai, ruarua ni gauna makawa kei na gauna oqo.

Era tu o ira era kaya ni sega, “dou curu mai ki ke!” me vaka era a vakayacora ena gauna ni Parofita o Josefa Simici. Ia, o ira oqori, ena gauna oqo vakakina ena veigauna mai muri era sa ka walega ena cakacaka oqo. E kaya vei keda na Parofita o Josefa Simici: “Ena sega ni dua na liga tawasavasava ena rawa ni tarova na kena toso na cakacaka oqo; ia na dina ni Kalou ena lako yani ena doudou, vakaturaga, ka tu vakaikoya, me yacova ni sa curubasikata yani na veiyasana yadudua, sikova na veivanua, curuma yani na veimatanitu, ka rogovaki ena veidaliga yadudua me yacova ni sa vakacavari na veinaki ni Kalou, ka na qai kaya ko Jiova sa Cecere ni sa qaravi oti na cakacaka.”

Ena noqu ilesilesi ena yabaki oqo, au dabe sara toka ga ena iyatu e liu vua na Turaga ni sa vakatotolotaka na Nona cakacaka. Sa tara valetabu tiko na Lotu ena kena totolo se bera vakadua ni bau yaco, sa rawa kina vei ira e lewe levu cake na lewenilotu na madigi mera sokalou ena vale ni Turaga. iKarua, sa cavuisausau na cakacaka ni kaulotu ena iwiliwili era sa sokumuni kina qelenisipi ni iVakatawa Vinaka, ko Jisu Karisito. Kei na ikatolu, na vuli ena Lotu ena vuqa na kena iwalewale, sa cecere na ka e rawata ena nodra vakavulici o ira era “vakasaqara na Jisu oqo.”

Nikua sa 367 na valetabu ena Lotu, duidui na kedra itagede, mai na droini, sa tara tiko, se sa vakayagataki tiko. Cava na kena inaki? Na kena isau e tukuni ena valetabu yadua: “Tabu me Nona na Turaga.” Na valetabu e dolava na sala kina veivakalougatataki cecere duadua e vakarautaka na Turaga baleti keda yadua. Taciqu kei na ganequ, eda sa vakatotolotaka tiko na noda vakatabui nida bula meda kilikili kaya na valetabu, nida sokalou ena vale ni Turaga, ka da sa veiyalayalati kei na Kalou ena vukuda kei na vukudra na tubuda ena yasa kadua ni ilati.

E kaya o Peresitedi Nelson, “Na ravuravu nei vu-ni-ca sa tubu cake sara vakatotolo, ena kena warumisa kei na kedra veimataqali. Na noda gagadre meda tiko vakawasoma e valetabu e veigauna sa kaukauwa sara nikua. Au kerei kemuni mo ni raica ena yalomasumasu na nomuni vakayagataki gauna.”. Ena Nona vale e rawa nida vakila na iserau tabu ni Turaga kei na vakacegu e vakaiyanaqa.

Ena yabaki sa oti a ka dokai meu vakatulewa ena kena vakatabui na valetabu e Mendoza Argentina. Ena noqu vosa, au dusia na parofisai nei Elder Melvin J. Ballard ena 1926 ena toso malua vakalailai ena dua na gauna na cakacaka ni Turaga ena Ceva kei Amerika, “me vaka ga na kena tubu vakamalua e dua na oki mai na sorena. Ena sega ni tubu cake ga mai ena dua na siga,” ia e udolu era na curu ki na Lotu, na veimatanitu ena Ceva kei Amerika era na yaco “me ra kaukauwa ena Lotu.” Au raica na kena sa vakayacori e mataqu saraga.

O Mendoza, a dua ga na sorenioki lailai ena dua na gauna, sa yaco me dua na oki vakaitamera. Na tubu oya sa tokaruataki ena veivanua lelevu kei na veiyanuyanu ni wasawasa.

Eda raica ni sa vakatotolotaka tiko na Turaga na Nona cakacaka ena veitabana ni kaulotu. Ena 2024, e 80,000 na daukaulotu era a veiqaravi tiko ena 450 na tabana ni kaulotu. E tolusagavulukaono vei ira oqori era tabana ni kaulotu vovou. Ena yabaki sa oti, na cakacaka ni kaulotu a kauta mai e sivia ni 300,000 na lewenilotu vou kina Lotu. E sivia cake na iwiliwili, na yalo ni vakasoqoni vata sa kauta tiko mai na yalo vei Jisu Karisito kei na Nona kosipeli.

Au vakasamataki rau na iApositolo o Brigham Young kei Heber C. Kimball, ka rau a biubiu ena ilakolako vakadaukaulotu ki Peritani ena 1839. Erau tauvimate tu; erau biuta tu mai na matavuvale tauvimate ka dravudravua. Ia, erau a vodo na lewe rua ena qiqidreti ena ose, ni rau se bera ni yawa sara mai vei ira na nodrau daulomani, a kaya o Heber, “Daru tucake ka kaila vei ira.” Erau a sasaga me rautucake ka kailavaka, “Uraa, uraa vei Isireli.”

Au a raica na gumatuataki ni cakacaka ni Turaga vata oqori e Lima, Peru, niu sotavi ira na daukaulotu mai na Koronivuli ni Vakarau kina Kaulotu kei na veitabana ni kaulotu e Lima. Sa totoka dina! Au raica saraga na vakatotolo ni tu e mataqu. Sa vitu na tabana ni kaulotu ena koro levu ga o Lima.

Ni tini na neimami soqoni, era a vakidacalataki au na daukaulotu. Era a tucake ka kailavaka, “Urei vei Isireli.” Au na sega vakadua ni guilecava na gauna oya; au diva mo ni a tiko kina. “Era tu sara ga e mataqu” na daukaulotu era sa biuta tu vakatikitiki “na veika ni vuravura oqo” me ra qarava na Turaga ka veivuke ena vakatotolotaki ni Nona lako mai.

Eda raica na nona vakatotolotaka na Turaga na madigi vakavuli baleti ira na noda lewenilotu, kei ira sara mada ga eda sega ni lotu vata, e vuravura taucoko. E dua na ka eda duatani kina na lotu oqo na noda vakabibitaka na vuli. A vakarota na Turaga ena veisiga taumada ni Veivakalesui mai me “vakasaqarai na kila ka, io ena vuli kei na vakabauta.” Sa yaco tiko oqori nikua ka kilikili me dua na kena “urei” rogolevu.

Ena gauna oqo e sivia na 800,000 na gonevuli e vuravura taucoko era sa volayaca tu ena semineri kei na inisitute, na volayaca levu duadua ena itukutuku ni Lotu. Era soqoni vata mai na noda itabagone ena vuqa na sala duidui, na kalasi ena mataka lailai, sigalevu, kei na yakavi ki na initaneti kei na vuli e vale. O ira e dua na mataivalu kaukauwa ka buladodonu, era veivaqaqacotaki vakataki ira ni ra vulica baleti Jisu Karisito, muria ka vakadinadinataki Koya ni Luve ni Kalou.

Ena vulaimago sa oti au a vosa ena dua na lotu ena buturara ni qito sinai tu ena gonevuli ni semineri kei na inisitute kei ira na nodra itubutubu ena University of Utah. Na nodra tiko sa votuka ni nodra gagadre levu me ra kila ka muri Jisu Karisito. A matata na noqu itukutuku vei ira na gone oya: Solia vakatautauvata vua na Turaga na gauna. Au vakasalataki ira me ra vakatautauvatataka na nodra gauna ni vuli kei na vuli cecere cake, na vulici sara mada ga ni “Luve ni Kalou bula.”

Au kerea na ka vata oqori vei kemuni kece oqo nikua: Na cava ga e tiko ena nomuni “Lisi ni ka me caka,” solia vakatautauvata na gauna, sega ni vo ni gauna, vua na Turaga ena vuli ivolanikalou yadua, vuli vakamatavuvale ena Lako Mai mo Muri Au, masumasu, veikacivi ena Lotu, veiqaravi, vakaivotavota ena sakaramede, sokalou ena valetabu, ka vakananuma vakatitobu na veika ni Kalou. E kaya na noda Turaga ka iVakabula, “Vuli vei au … dou na kunea na vakacegu ni yalomudou” Tauri Koya ena Nona Vosa. Ka solia Vua vakatautauvata na gauna.

O Peresitedi Russell M. Nelson e kaya: “Au vakamasuti kemuni mo ni laiva me qaqa tikoga na Kalou ena nomuni bula. Solia vei Koya e dua na iwase veirauti ni nomu gauna. Ni o cakava tiko, sarava na ka ena yaco kina nomu igu vinaka vakayalo.”

Eda raica na toso oqori ni tara cake tiko ena semineri, inisitute, kei na univesiti ni Lotu. Ena veidraki oqori, me liu na Turaga. O koya sa dodonu kina me tiko o Koya ena noda dui bula yadua.

E dua tale na vanua e laurai kina na tatara tubu cake tikoga ni vuli ena Lotu na BYU–Pathway. E vuravura taucoko, sa sivia na 75,000 ka tubu cake tikoga vakatotolo na levu ni volayaca. E levu duadua na lewenilotu, ka sivia na dua na ikatolu mai Aferika. Na Pathway e baleta na noda rawa ni vuli. Na kena vakacavari na lesoni ni vuli e kena ibalebale ni sa rawa na cakacaka, kei na rawa ni cakacaka e kena ibalebale na bula vinaka cake kina matavuvale ka levu cake na madigi me qaravi na Turaga.

Niu sota tiko kei ira na iliuliu ni iteki mai Uganda, au kila kina ni o iratou kece na mataveiliutaki ni iteki eratou sa volayaca tu ena BYU–Pathway. Na noda sa vakarau vinaka ga vakayago ka vakayalo, na levu ni noda rawa ni vakaseva na nona ivadi qaseqase na vunica. Nanuma na vosa nei Pita: “Na tevoro, me vaka e dua na laione kudru, sa lako voli, ka vaqara e dua me tiloma.”

Au raica ena maliwa ni itukutuku vinaka ni kosipeli, era tu o ira era sasaga bula, o ira e bolei tu na nodra vakabauta, vakatitiqa, kei na taro vaka me sega na kena isau. Taciqu kei na ganequ, o Jisu Karisito na kena isau. Tekivu vei Koya Vaqara na Ligana ena nomu bula. Vakarorogo vei Koya. “Me kua ni rarawa na yalomudou,” A kaya ena iotioti ni Nona auwa vei iratou na Nona tisaipeli ni se bera o Kecisemani, ni se bera ni colata na Nona kauveilatai ena veigaunisala kei Jerusalemi, ni bera o Kolikoca, me vakacavara kina na Nona isoro ni veivakaduavatataki, na cakacaka o Koya duadua ga na luvena Duabau na Kalou, e rawa ni cakava.

Kila ni kila vinaka o Koya. A colata o Koya na noda ivalavala ca kecega, na cala, yaluma, kei na veisiga ca, me rawa nida bula tale kei na Tamada mai Lomalagi me tawamudu. Sa kaya o Koya, “Drau vakararavi tiko mai vei au ena vakasama kece; kakua ni vakatitiqa, kakua ni rere.” Na vakabauti Jisu Karisito e rawa ni “laveti iko cake” ka vakabula na yalomu mavoa. Mo vakararavi vei Jiova oni na vakatotolotaka na nomu lesu tale “ena liga ni nona loloma.”

Au cavuta tale na nona vosa na noda parofita bula: “Oni sa raica tiko beka na veika sa yaco sara tikoga e matamu? Au masuta meda kua ni calata na vakaturaga ni gauna oqo! Sa vakatotolotaka dina tiko na Turaga na Nona cakacaka. Meda kailavaka “Uraa vei Isireli,” me vaka nida tisaipeli ena gauna oqo, nida vakavakarau ena nona lesu mai na noda Turaga ka iVakabula. Ena yacai Jisu Karisito, emeni.