Na Loloma ni Kalou

Ena dua na ivula ikatakata keitou a gade voli ena dua na vanua tiko vagalala, keitou moce toka vakavuvale e taubale ka sega ni dua na o. Keitou raica vinaka tu na Milky Way vakasakiti, sinai ena kalokalo sega ni wili rawa kei na kalokalo veitosoyaki vagauna. Keitou qoroya na vakasakiti ni ibulibuli ni Kalou, keitou vakila e dua na isema rokovi vei Koya. O ratou na gone, ka susu mai Hong Kong, a sega ni se sotava vakadua na veika oqo. Eratou taroga kevaka keitou bula ena ruku ni lomalagi vaka ga mai vale. Au tovolea meu vakamacalataka vei iratou ni tautauvata na lomalagi, ia e vakataotaka tu na kena laurai na kalokalo dina ga nira tiko na cagi ca kei na vagagai ni veika bula.

Na ivolanikalou e vakavulici keda ni, “na vakabauta sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune.” Na veivakasesei kei na veitemaki vakateresitieli e tarova na noda rai vakayalo, nida cakacakataka na noda vakabauta vua na Kalou kei na Luvena o Jisu Karisito, eda ciqoma na veivakadeitaki matata ni nodrau ituvaki dina kei na nodrau kauwai vei keda.

Ena Vola i Momani, na parofita o Liai a raica “e dua na vunikau, ka sa talei sara na vuana me marau kina na tamata” ka sa “kamikamica sara, ka uasivi cake.” Ni sa tovolea okoya na vuana, e vakasinaiti na yalona ena reki cecere sara, ka vinakata okoya me tovolea talega na nona matavuvale. Eda vulica ni ivakatakilakila ni vunikau na “loloma ni Kalou,” ka vakai Liai, keda talega e rawa ni ciqoma e dua na ivakadinadina talei ni Kalou ni gauna eda sureti Koya ki na noda bula.

O Jisu Karisito e ivakatakarakara cecere ni loloma ni Tamada Vakalomalagi vei keda. Mai na nona solibula ni veisorovaki, e colata o Koya na noda ivalavala ca ka vakamavoataki ena vuku ni noda talaidredre. E sa colata duadua o Koya na noda rarawa, ka sa colata na rarawa ni lomada, ka colata vakai Koya na noda mosi kei na tauvimate. E tala mai o Koya na Yalo Tabu me vakacegui keda, ka sa vua ni Yalo e oka kina na reki, vakacegu kei na vakabauta, ka vakasinaiti keda ena inuinui kei na loloma.

Ia eda rawata kece na loloma ni Kalou, e lewelevu era vakasaqara ena yalodina, ia eso tale era vinakata mera vakila na loloma ni Kalou ia era sega ni vakabauta ni rauti ira vinaka. Eso tale era sagasaga dredre mera tautauri kina. Na ivolanikalou kei na parofita ni Turaga e vakavulici keda ni rawa vei keda meda vakila e veigauna kece na loloma ni Kalou , ena loloma soliwale nei Jisu Karisito, eda veivutuni vakawasoma, dauveivosoti, dau maroroya na Nona ivakaro, ka dau qaravi ira na tani. Eda vakila na loloma ni Kalou nida cakava na veika meda toro voleka kina vei Koya, me vaka na veitalanoa vata kei Koya e veisiga ena masu kei na vulici ni ivolanikalou, ka tarova na veika e yawaki keda mai vei Koya, me vaka na dokadoka, veileti, kei na veivorati.

Sa sureti keda o Peresitedi Nelson meda, “vagalalataka, ena veivuke ni iVakabula, na veisoqosoqowa makawa ena noda bula” ka “me biu vakatikitiki kina na yaloca.” E vakayaloqaqataki keda meda vaqaqacotaka na noda yavu vakayalo ka yavutaka na noda bula kina iVakabula kei na cakacaka vakalotu kei na veiyalayalati ni Nona valetabu. E yalataka o Koya “nida maroroya na noda veiyalayalati ni valetabu, eda na rawata vakalevu cake na mana ni veivaqaqacotaki ni Turaga. Eda na sotava vakalevu sara na loloma savasava i Jisu Karisito kei na Tamada Vakalomalagi!”

E dua na noqu itokani e vakalougatataki ena dua na matavuvale kei na cakacaka vinaka. E qai veisau ena gauna e tauvi koya kina e dua na mate ka tarova kina na nona cakacaka, ka muria na veisere. Na veiyabaki tarava e sa rui dredre sara, ia na nona lomani iratou na luvena kei na veiyalayalati ea cakava vata kei na Kalou a tokoni koya. E dua na siga e rogoca o koya ni sa vinakata na watina eliu me vakamau tale ka kerea me bokoci na nodrau veivauci ena valetabu. E lomaleqa ka veilecayaki sara o koya. E vasaqara na vakacegu kei na kilaka ena vale ni Turaga. Na oti na nona gole, au ciqoma na itukutuku oqo mai vei koya:

“E dua na ka totoka au sotava ena valetabu na bogi nanoa. Au kila ni kilai levu ni se tiko eso na cudru lalai. Au kila ni dodonu meu na veisau, au sa masumasu tiko na macawa kece meu cakava vakakina. Na bogi nanoa ena valetabu au vakila na Yalotabu ni vagalalataka na cudru mai lomaqu. E dua na vakacegu meu sereki mai kina. Au sa galala mai na icolacola levu e bikai au tu.”

Dina ga ni se tiko na nona ibolebole, a vakamareqeta na noqu itokani na veika a vakila mai na vale ni Turaga oya na kaukauwa ni veisereki ni loloma ni Kalou a vukei koya me toro voleka vua na Kalou, me kakavaki vakalevu me baleta na bula, ka lailai na nona leqataka na veisiga ni mataka.

Nida vakila na loloma ni Kalou, sa rawa vei keda meda colata vakarawarawa na noda icolacola ka lomasoli meda dauvosota ka marautaka na Nona lewa. Sa tu vei keda na yalodei ni dau nanuma na Kalou na Nona veiyalayalati vata kei keda, sikovi keda ena noda veigauna ni rarawa, ka vueti keda mai na vei vakabobulataki. Eda na vinakata talega meda wasea na reki eda vakila vata kei ira na noda matavuvale kei ira na daulomani. Me Vaka na matavuvale nei Liai, sa tu na galala ni digidigi vei ira na tamata yadua me digitaka me kania na vuata se sega, ia sa noda madigi meda veilomani, veiwasei, ka dauveisureti ena sala era rawa ni vakila kina na loloma ni Kalou.

Me vukei ira na tani mera vakila na loloma ni Kalou, e gadrevi meda cakacakataka na ivakarau ni bula va-Karisito me vaka na yalomalumalumu, loloma uasivi, dauloloma, kei na vosota vakadede, ka vukei ira na tani me mua ki vua na iVakabula ena kena muri na ivunau cecere ni lomana na Kalou kei na lomani ira na wekada.

E dua na luvei keirau tagane e sasaga me dau veikilai ka vakadeitaki koya ena nona gauna ni yabaki vakacauravou. Keirau masulaka vakaveiwatini na sala me keirau vukei koya kina, ka keirau lomasoli me vakayacora na veika e vinakata na Turaga me keirau cakava. E dua na siga au vakauqeti meu tarogi noqu peresitedi ni italatala qase kevaka e kila e dua e gadreva na veisiko mai vei au kei luvequ tagane. Ni oti na vakasama, e kerei keirau okoya me sikova e dua na marama etauvimate levu tu, ka ena veivakadonui ni peresitedi ni tabana, me kauta na sakaramede vei koya e vei macawa. Au marautaka ia au lomaleqataki luvequ na sala ena ciqoma kina na veidinadinati oqo ni veimacawa.

Nierau matai ni veisiko, e mositi keirau na marama oqo, ni mosi tu ga e vei gauna kece. E vakavinavinakataka na sakaramede, ka keitou dau taleitaka na sikovi koya kei watina. Ni oti e vica na veisiko, dua na Sigatabu au gole tu ka sega ni rawa ni tomani luvequ ia au vakananumi koya me baleta na neirau itavi. Noqu lesu mai vale, au sega ni waraka rawa meu rogoca me baleta na veisiko. Sauma mai na luvequ tagane ni sega tu ni kila ni dua na lewe ni nona kalasi e vakayacora tu eso na ka talei vakaya oya. A sauma lesu mai o luvequ ni sega ni nanuma okoya nio ira na nona lewe ni kalasi e dau cakava na veika vinaka vakaoqo, ka qai tomana ni a kauti tacina me lai vukei koya, ka qaravi vakavinaka na sakaramede, ia e rarawa tu na marama oqo ena loma ni macawa baleta ni a sureti ira na nona itokani mera mai sara iyaloyalo e nona vale, ia qai sega ni cakacaka tu na nona vidio. A tukuna o luvequ ni vakasaqara ena monalivaliva, ka kunea na iwali ni leqa, ka qai walia vei koya. E vakila okoya ni yaga, marau, ka nuitaki me cakava e dua na ka e vakararamataka na nona siga. E vakila okoya na loloma ni Kalou vei koya.

Ke mani vakacava sara mada na noda sasaga vinaka duadua, e dredre na bula, kevaka o nanuma na masu e sega ni saumi, se kevaka o sega ni vakila na loloma ni Kalou, yalovinaka kila na nomu sasaga kece me vaka na kalokalo e cake, na Tamada Vakalomalagi kei Jisu Karisito e kila, rogoca, ka lomani iko.

Ena dua na gauna o ratou na Nona tisaipeli a tiko e loma ni waqa ka “suaigelegele e na ua,” ea taubale yani vei iratou na iVakabula e wai ka vakadeitaki iratou ni kaya, “Dou vakacegu; koi au ga; dou kakua ni rere.” Na gauna sa vinakata o Pita me taubale vua na iVakabula e wai, e yalovi koya yani o Jisu ka kaya, “Lako ga mai.” Kei na gauna sa yali kina na nona rai o Pita ka tekivu me lutu dromu, a dodoka yani na Ligana me tauri koya ka liutaki koya ki na tataqomaki ni kaya voli, “O iko sa lailai na nomu vakabauta, o sa vakatitiqa e na vuku ni cava?”

Na gauna e vorata kina na noda bula na cagi, eda sa tu vakarau beka meda dau marau ka yaloqaqa? Eda na rawa vakacava ni nanuma ni sega ni dau biuti keda tu na iVakabula ka tiko volekati keda rairai ena sala eda sega beka ni kila? Eda lomasoli meda lako vei Koya ena vakabauta vakabibi ena gauna e dau dredre kina na sala e matada? Ena sala cava e dau laveti keda ki na veitaqomaki o Koya ena gauna eda yavalati kina? E rawa vakacava meda rai vei Koya ena yalodina ena vakasama kece; kakua ni vakatitiqa, se rere?

Kevaka o vinakata mo vakila vakalevu na loloma ni Kalou ena nomu bula, au sureti iko mo vakasamataka e vica na veika oqo:

• iMatai, dau cegu vakawasoma mo nanuma kina ni ko luve ni Kalou ka vakasamataka na veika o vakavinavinakataka.

• iKarua, masu e veisiga, ka kerea na Tamada Vakalomalagi me vukei iko mo kila o cei e tiko wavoliti iko e gadreva me vakila na Nona loloma.

• iKatolu, kerekere ena yalodina na cava o rawa ni cakava me vukea na tamata yadua me vakila na loloma ni Kalou.

• Kei na ikava, mo vakayacora ena kena gauna totolona veivakauqeti o ciqoma.

Kevaka eda masu vakawasoma ka kerekere ena vukui ira tale eso, e na vakaraitaka vei keda na Kalou na tamata eda rawa ni vukea. Kevaka eda cakava ena kena gauna totolo, eda rawa ni sala ena sauma kina o Koya na nodra masu. Me vakakina, ni kena gauna, eda na ciqoma na isau ni noda masu, ka vakila na loloma ni Kalou ena noda bula.

Vica na vula sa oti ni keirau gole i Vietnam kei na watiqu, ena dua na waqavuka ka biubiu tiko ena loma ni dua na cava levu. Sa kaukauwa sara na yavavala, kei na o loaloa, uca bi, kei na yaseyase e rawa ni laurai mai na neirau katubaleka. Ni oti e dua na vuka cake balavu ka veilecayaki, na neitou waqavuka ea botea yani na o ni cava ka basika mai na rai lagilagi oqo. Keirau a vakananumi tale me baleta na Tamada Vakalomalagi kei Jisu Karisito ka vakila na nodrau loloma levu vei keirau.

Noqu itokani lomani, me vaka edua e sa vakila na loloma ni Kalou, au vakadinadinataka ena marau ni o Jisu Karisito na iVakabula sa i loloma ni Kalou. Na Nona loloma vei keda e uasivi, vei keda yadudua, ka tawamudu. Nida muri Koya ena yalodina, meda vakatawani ena Nona loloma ka meda dua na valenicina e dusimaki ira na tani ki na Nona loloma. Ena yacai Jisu Karisito, emeni.