Sokalou

Dua na ivakarau ni sokalou kilai levu ka bibi oya na soqoni vata ena dua na vanua tabu meda qarava na veika vakalotu. E kaya na Turaga, “Ka mo qarauni iko vakavinaka me kakua ni tauvi iko na duka ni vakavuravura, ia mo lako kina vale ni masumasu ka cabora na nomu sakaramede ena noqu siga tabu.” Oqo, e dina sara, e usutu ni kena tara na vei valenilotu. Ia, e gadrevi, e dua na vanua e vakatabui vakatabakidua me vanua tabu.

E bibi na ka eda cakava nida soqoni ena siga ni Turaga. E dina, eda na vakaisulu vinaka vaka na noda gagadre—sega ni ukutaki ia me rakorako ga me tukuna nida doka ka rokova na Kalou. E vakakina na noda veirokovi ka veidokai. Eda sokalou ka sema ena masu, eda sokalou ena laga serenilotu (sega ni rogoca walega ia meda lagata na serenilotu); eda sokalou ena veivakasalataki kei na veivakavulici vakai keda. E kaya o Jisu, “Nanuma tiko ena siga ni Turaga e dai, mo vakacabora na nomu isoro [kena ibalebale, nomu ‘isolisoli ni gauna, taledi, se iyau, mo qarava na Kalou kei ira na wekamu’] kei na nomu isoro vei Koya sa Cecere Sara, mo tusanaka na nomu ivalavala ca vei ira na tacimu, kei na Turaga.” Eda sega ni lako mai meda veivakamarautaki se vakamarautaki—me vakataka na mataivakatagi—ia meda nanumi Koya ka meda “dusimaki vakavinaka cake” ena Nona kosipeli.

Ena koniferedi raraba se qai oti ga qo, e vakananumi keda kina o Elder Patrick Kearon “eda sega walega ni soqoni ena Siga ni Vakacecegu meda tiko ena soqoni ni sakaramede ka toqa na kena lisi. Eda lako vata mai meda sokalou. E tiko e dua na duidui levu vei rau na rua oqo. Mo tiko rawa e kena ibalebale mo tiko kina. Ia mo sokalou oya movakacaucautaka ka qoroya na noda Kalou ena sala e veisautaki keda!”

Me nona vakatabakidua na Turaga na Siga ni Vakacecegu kei na Nona inaki oya na sokalou. Ena vica na yabaki sa oti, e taroga o Elder Russell M. Nelson: “Eda na vakatabuya vakacava na siga ni Vakacecegu? Niu se cauravou, au dau dikeva na nodra cakacaka eso era vola na veika mera cakava kei na veika mera kua ni cakava ena siga ni Vakacecegu. Au qai vulica mai na ivolanikalou ni noqu ivakarau kei na itovo ena siga ni Vakacecegu e ivakatakilakila vei au kei na Tamaqu Vakalomalagi [raica Na Lako Yani 31:13; Isikeli 20:12, 20 Ena kila oya, e sega tale ni gadrevi meu vola na veika meu cakava se kua. Ni gauna meu vakatulewa kina se vinaka se ca edua na itavi e ganita na siga ni Vakacecegu, au na tarogi au ga, ‘Na ivakatakilakila cava meu vakaraitaka vua na Kalou?’’

Na sokalou ena siga ni Turaga sa vakadeitaka na rai vakatabakidua kina solibula cecere ni veisorovaki i Jisu Karisito. E dodonu meda marautaka na Nona Tucaketale ena Siganimate, ia vakakina ena vei macawa nida taura na ivakatakarakara ni sakaramede ni Nona Veisorovaki, kei na Nona Tucaketale. O koya sa veivutuni, ni taura na sakaramede sa ka cecere sara ni sokalou ena Siga ni Vakacecegu.

Na sokalou vata me vaka na “yago i Karisito” e duatani na kena kaukauwa ka yaga nida veivakavulici, veiqaravi, ka veitokoni vakai keda. E veivakurabuitaki, na vakadidike e kune kina nio ira era raica na nodra bula vakayalo me baleti ira ga era sega ni kawaitaka vakalevu na tubu vakayalo, se meda kaya ni bibi na nodra vakabauta, se mo sokalou ena veigauna kei na Kalou. Nida lewe ni Yalododonu, eda veivaqaqacotaki vakaikeda ena sokalou kei na vakabauta.

E vakakina, meda kua ni guilecava meda sokalou e veisiga meda cakava vakaikeda yadua vakakina e vale. E vakananumi keda na iVakabula, “Ia na nomu yalayala me vakacabori tiko ena yalododonu ena veisiga kecega kei na veigauna kecega.” E tukuna e dua na marama, “Au sega ni raica e dua na sala e bibi cake ni sokalou vua na Kalou me vakataka noda kidavaki ira na Luvena lalai kina noda bula ka qaravi ira ka vakavulici ira ena Nona ituvatuva baleti ira.”

O Alama kei Amuleki a vakavulici ira na Soramaiti era vakasevi mai na nodra valenilotu mera sokalou vua na Kalou sega walega vakadua ena veimacawa, ia e veigauna, kei “na veivanua cava ga ko ni tiko kina.” Rau tukuna na masu ni sokalou.

“Moni sovaraka yani na yalomuni nio ni tiko e nomuni loqi, kei na nomuni tikina vuni, kei na nomuni lekutu.

“Io, nio ni sega ni tagi vua na Turaga, me vakasinaiti na yalomuni, ni ko ni masuti koya tikoga.”

Era tukuna mera vakasaqara na ivolanikalou, mera ivakadinadina i Karisito, na cakacaka ni loloma kei na veiqaravi, ciqoma na Yalo Tabu, ka bula ena vakavinavinaka e veisiga. Nanuma na vakasama oya: “bula e veisiga ena vakavinavinaka.” E tukuni kina na ikarua ni noqu vakasama:

Na veika eda vakila kei na noda vakavinavinaka vua na Kalou, sa i koya, na ka e vakatara meda kune reki ena noda sokalou mai na noda raica me dua tale na itavi.

Na sokalou dina sai koya na lomana na Kalou ka solia na lomada ki Vua—na iloloma talei duadua eda rawa ni solia. Ni tarogi se cava na ivunau levu duadua ena vunau taucoko, a sauma o Jisu, “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.” E vakatoka tale ga o Koya me imatai ni vunau.

Oqo na ivakarau ni nona sokalou o Jisu vua na Tamana. Na Nona bula kei na Nona solibula veisorovaki a vakatabui me lagiti kina na Tamana. Eda luvuci nida nanuma na vakamamasu o Jisu ena nona rarawa tawa tukuni rawa: “I Tamaqu kevaka e rawarawa, me lako tani mada vei au na bilo oqo,” ia ena Nona talairawarawa “me kakua ga ni vaka na noqu lewa me vaka ga na nomu lewa.”

Na sokalou oya na sasagataki me muri na ivakaraitaki cecere oqo. Ena sega ni yaco totolo na noda vinaka, ia ena veisiga yadua eda na “cabora ga me isoro [Vua] na yalo raramusumusu kei na yalo bibivoro,” ena papitaisotaki keda tale ena Yalona ka vakasinaiti keda ena Nona loloma soliwale.

Ena imatai ni wase ni Vunau kei na Veiyalayalati, a kaya kina na Turaga na veivakacacani ni vuravura:

“Ia era sa lako tani mai na noqu cakacaka vakalotu, ka voroka na noqu veiyalayalati tawavakaiyalayala;

“Era sega ni vakasaqara na Turaga ka vakadeitaka na nona yalododonu; ia era sa dui muria ga na nodra sala na tamata yadua, kei na ivakatakarakara ni nodra kalou vakataki ira, na kena vakatakarakara sa vakataki vuravura.”

E vinaka vei keda meda nanuma na ivakaraitaki ni tolu na cauravou Jiu, o Enanaia, Misaeli, kei Asaraia, a kau vakavesu i Papiloni ni oti ga nona biuti Jerusalemi o Liai kei na nona vuvale. E veisautaka na yacadratou na sotia ni Papiloni me Setareki, Mesaki, kei Apetiniko E muri, ni ratou a sega ni via cuva kina ivakatakarakara a cakava na Tui o Nepukanesa, a vakarota o koya me ratou biu kina loma ni qara bukawaqa, ka kaya vei iratou, “Ko cei na Kalou ko ya me na vakabulai kemudou mai na ligaqu?”

O rawa ni tukuna na nodratou sauma ena yaloqaqa:

“Na neitou Kalou o koya keitou sa qarava sa rawata me vakabulai keitou mai na lovo ni bukawaqa, ia ena vakabulai keitou mai na ligamuni, na tui.

“Ia ke sega, moni kila ni keitou sa bese ni qarava na nomuni kalou, sa bese talega ni vakarokoroko kina matakau koula oni sa vakaduria.”

A katakata sara na bukawaqa ka vakamatei ira era biuti iratou kina, ia o Setareki, Mesaki, kei Apetiniko a sega ni vakaleqai. “Sa qai kaya ko Nepukanesa, Me vakacaucautaki ko koya na Kalou i Setareki, kei Mesaki kei Apetiniko, o koya ka vakabulai iratou na nona tamata e ratou sa vakararavi vua ni solia na yagodratou, me qarava se vakarokoroko vua e dua tale na kalou, na nodratou Kalou duadua ga.” Ratou a nuitaki Jiova me vakabulai iratou, “ia ke sega,” oya, na Kalou ena Nona vuku ke sega ni tarova nodratou mate, ia e ratou na dina tikoga Vua.

Na veika eda na vakaliuca mai na sokalou vua Tamada kei na Luvena e yaco me kalou tani. O ira sa cakitaka na Kalou me nodra ivurevure ni dina, se cakitaka nodra dinati Koya, e yaco mera vakasosomitaki me nodra kalou. Ni dua e solia nona dina vua e dua se inaki ka sega ni dusimaki vakalou sa qarava na kalou lasu. Ira mada ga era kaya nira sokalou vua na Kalou ka sega ni muria na Nona ivakaro era sa lako duadua ga: “Era sa toro voleka ga vei au ena tebe ni gusudra, ia na lomadra sa yawa tani vei au.” Na inaki ni noda sokalou e vakatabakidua “kina Kalou dina duadua ga, kei Jisu Karisito o [Koya] ka a tala mai.”

Koya gona, na ivakarau ni noda bula me sa vinaka sara, ka ivakarau dina ni sokalou. Nida vakaraitaka noda dina oya me vakataka na Tamada kei na Luvena—ka teivaka na Nodrau itovo kei na ivakarau ki lomada. Kevaka, na ivosavosa, vakatotomuria e ivakaraitaki ni veidokai, eda qai rawa ni kaya nida doka na Kalou, ni vamuri sa ivakarau dina ni veirokovi. E vakatura me cakacakataki, tokoni na noda itavi meda vakasaqara na veika vakalou. Ia me yaco meda Vakarisito cake e sa ivakaraitaki dina talega ni noda vakayaco sokalou. Na malanivosa nei Elder Kearon a tukuna taumada na sokalou, “ni sala e veisautaki keda,” e ka bibi. Na sokalou dina e veisautaki keda.

Oqo na totoka ni salatu ni veiyalayalati—na sala ni sokalou, loloma, kei na dina vua na Kalou. Eda curuma na salatu oya ena papitaiso, ka bubului meda taura na yaca i Karisito ka maroroya na Nona ivakaro. Eda ciqoma na isolisoli ni Yalo Tabu, na italai ni loloma soliwale ni iVakabula e vueta ka vakasavasavataki keda mai na ca nida veivutuni. Eda rawa talega ni kaya nida veivutuni eda sa sokalou tiko Vua.

E muria mai na ikuri ni cakacaka vakalotu ni matabete kei na veiyalayalati e caka ena vale ni Turaga eda qai vakasavasavataki kina. Na soqoni kei na cakacaka vakalotu ni valetabu e tiki ni ivakarau cecere ni sokalou.

A vakamacalataka o Peresitedi Russell M. Nelson ni “tagane kei na yalewa yadua era vakaitavi ena cakacaka vakalotu ni matabete era cakava ka maroroya na veiyalayalati kei na Kalou era rawata vakadodonu na kaukauwa ni Kalou.” Oqo e sega ga ni kaukauwa eda taura mai meda veiqaravi ka veivakalougatataki kina. E kaukauwa talega vakalou e cakacaka e lomada meda savasava ka vakavoutaki keda. Nida lakova na salatu ni veiyalayalati, na veivakatabui ni “vakatakilai mai na kaukauwa ni bula vakalou” ki lomada.

Meda, vakataki ira na Nifai kei na Leimanaiti makawa, meda “cuva sobu e yavai Jisu, ka vakarokoroko vua.” Meda, qai vakaroti mai vei Jisu meda, “cuva sobu ka sokalou vua na Tamada [ena] yaca [ni Luvena].” Meda sa qai ciqoma na Yalo Tabu ka solia na yaloda vua na Kalou, ka me kua tale ni dua na kalou tani e Matana, nida sa tisaipeli i Jisu Karisito, ka vakatomuria na Nona itovo kina noda bula. Au vakadinadinataka nida cakava oqo, eda na sotava na reki ni sokalou. Ena yacai Jisu Karisito, emeni.