Na Noda iDusidusi Vakalomalagi
Ni da vakataudonutaka na noda bula vei Jisu Karisito, eda na kunea na noda sala lesu i vale, ka vosota ka reki me yacova na ivakataotioti.
O Jisu Karisito a veisautaka na noqu bula niu a papitaiso niu sa yabaki 26 ena noqu vanua lomani o Frutillar, e Chile. Ena gauna oya, ena vuku ni noqu cakacaka au takosova kina na waitui, veiuciwai, kei na veidrano totoka e Pataqonia e Chile. Ni oti na noqu papitaiso, au raica na noqu cakacaka kei na noqu bula ena dua na rai vou ka duatani, ka kila ni dina ni “veika kece sa vakaraitaka ni dua na Kalou.”
E vuravura, era sucu na samani mai na ivurevure ni veiuciwai. Ena dua na tiki ni gauna ena nodra bula, ena gadrevi mera qalo muria sobu na uciwai ki waitui, mera kunea kina na kakana kei na ituvaki eso ka gadrevi ena nodra tubu.
Ia na waitui e vanua rerevaki tale ga era tiko kina na ika daukata kei ira na dausiwa era tovolea me siwati ira na samani ena batinisiwa caliva ka vaka na irairai ni kakana ia e sega ni vakamamautaki ira. Kera dro bula rawa na samani mai na veika rerevaki oqo, era na tu vakarau mera vakayagataka na nodra ivakarau ni veidusimaki kaukaua, ka qalo lesu kina vanua ga era a sucu kina, ka sotava eso na bolebole vou kei na kena era sa kila tu. Era vulica na saenitisi na ivalavala ni nodra veilakoyaki me vuqa na yabaki ka ra kunea nira vakayagataka na samani edua na mataqali mape kabi, me vaka na GPS, me dusimaki ira kina nodra icavacava, ka sega ni dau cala.
Eda rawa kece ni lesu tale ena dua na siga kina noda itikotiko vakalomalagi na vanua eda a lako mai kina. Ka vaka na samani, e tiko na noda mape kabi vakaikeda se na Rarama i Karisito—me dusimaki keda i kea. O Jisu a vakavulica vei iratou na Nona tisaipeli, “O au na sala, kei na vunidina, kei na vunibula; sa sega ni torovi Tamaqu wale ga edua na tamata, ena vukuqu ga.”
Nida vakataudonutaka na noda bula vei Jisu Karisito, eda na kunea na noda sala lesu i vale, ka vosota ka reki me yacova na ivakataotioti. Peresitedi Nelson a vakavulica ni “reki eda vakila e vakatau vakalailai sara ena ituvaki ni noda dui bula ia sa baleta vakatabakidua na veika e vakanamata kina na noda bula.”
Na Noda iTuvaki kei na iCavacava Vakalou
Mai na ivakaro kina matavuvale eda wilika kina ni “o [keda] yadudua eda luvena yalewa se tagane lomani vakayalo na noda itubutubu vakalomalagi, ka, tu na, keda dui ituvaki kei na icavacava vakalou. Ena bula taumada, era kila ka dau qarava na Kalou na luvena tagane kei na yalewa vakayalo me vaka ni Tamadra Tawamudu ka ciqoma na Nona yavu, me rawa kina vei ira na Luvena mera taukena edua na yago vakalewe kara bulataka na bula oqo me rawa kina nira vinaka sara ka yaco me kila na nodra icavacava vakalou, mera vakaivotavota ena bula tawamudu.”
Ni bera Nona mai sucu e vuravura, a rairai o Jisu Karisito vei Mosese ka vosa vua ena vukui Tamana. A kaya o Koya vei Mosese nia tiko Vua edua na cakacaka cecere me cakava. Ena nodrau veitalanoa, na Turaga a kacivi koya vakavica vata “na luvequ”.
Ni oti na ka e yaco oya, a lako mai o Setani me temaki koya, ka kaya, “I Mosese, na luve ni tamata, mo qaravi au.”
A sauma na veitemaki o Mosese ena nona nanuma na nona ituvaki vakalou, ka kaya: “O cei o iko? Raica, o au na luve ni Kalou.” Na dina a sereki Mosese mai na nona ravuravu na vunica.
Taciqu kei na ganequ, na batinisiwa ni bula vakayago era ka dina. Era dau veisiwati, ia era qara edua ga na takete: mera dreti keda tani mai na sala kina waibula ka na tuberi keda vei Tamada kei na bula tawamudu.
Taciqu kei na ganequ, au kila nira ka dina na batinisiwa ni bula vakayago. Ena dua na Sigatabu, niu se saumaki vou, au vakavulica tiko edua na kalasi ni matabete nia tubu cake edua na veitalanoa sega ni vinaka. Au saga vakaukauwa meu tinia na noqu lesoni. Au rarawa ka vakila niu beitaki vakailasu. Au sega ni tukuna edua na ka, ka vakadodonu ki katuba kei na vakanananu meu kua ni mai lotu me dua na gauna.
Ena gauna vata oya, e kauwaitaki au e dua na matabete ka duri e mataqu. A sureti au ena yalololoma meu vakanamata vei Karisito ka sega kina ituvaki keimami a sotava ena kalasi. Niu raica lesu na veika au sotava vata kei koya, a wasea vei au o koya nia rogoca edua na domo ni tukuna vua, “Muri koya; e bibi o koya vei au.”
Kemuni na noqu itokani lomani, o keda kece eda sa bibi vei Koya. O Peresitedi Nelson a vakavulica, “Ena vuku ni noda veiyalayalati kei na Kalou, ena sega vakadua ni oca ena Nona sasaga me vukei keda, ka sega vakadua nida na vakaotia rawa na Nona dauvosoti keda ena yalololoma.” Na keda ituvaki vakalou kei na noda veiwekani ena veiyalayalati kei na Kalou ena rawa kina vei keda meda ciqoma na veivuke vakalou.
Na Gagadre ni Kana
Me vaka ga na nodra gadreva na samani mera kana e waitui mera tubu kina, eda gadreva vakakina meda kana vakayalo meda levea kina na mate ni kana vakaca vakayalo. Na masu, na ivolanikalou, na valetabu, kei na noda dau tiko ena soqoni ni lotu ena Sigatabu era bibi ena keda kakana vakayalo.
Ena Noveba ni 1956, o Ricardo Garcia a sobu kina wai ni papitaiso e Chile, ka yaco me isevu ni lewe ni Lotu ena noqu vanua. Ni vo ga edua na siga me takali kina o koya, ea vakaraitaka vei iratou na nona vuvale kei na itokani, “Ena vuqa na yabaki sa oti, erau a sureti au na kaulotu meu marau vata kei iratou na noqu matavuvale. Au turaga mamarau. Tukuna vei ira kece e Chile ni kosipeli e kauta mai na marau.”
Ni oti na nona vakani ena kosipeli i Jisu Karisito, ea vakatabuya o Ricardo na nona bula taucoko me qarava na Kalou kei ira na kainona ena loloma. Na nona ivakaraitaki vakatisaipeli sa vakalougatataka na veiitabatamata, oka kina o au. Na Parofita o Josefa Simici a vakavulica ni “tamata e sa vakasinaiti tu ena loloma ni Kalou, e sega ni tiko vakacegu ni vakalougatataka duadua ga na nona matavuvale, ia e rai yani ki vuravura taucoko ka maqusa me vakalougatataka na kawatamata taucoko.”
Na Lesu Tale kina Noda iTikotiko Vakalomalagi
E tiko e vuniyaloda yadua edua na gagadre meda lesu tale kina noda itikotiko vakalomalagi, ka sai Jisu Karisito na noda idusidusi vakalomalagi. O Koya na sala. Na Nona veisorovaki sa rawa kina vei keda meda cakava na veiyalayalati tabu vata kei na Kalou. Ni oti na noda cakava na veiyalayalati, eda na kunea ena so na gauna nida qalo saqata tiko na kui. Na veika rerevaki, rarawa, veitemaki, kei na mosi ena vakatovolea na noda vakabauta kei na noda igu vakayalo. Kerea na veivuke. O Jisu Karisito, e kila vinaka ka dau tu vakarau tu me vakamamadataka na noda icolacola.
Nanuma nio Koya li, “e tamata dau rarawa, ka dau rvakasinaiti ena loloma.” Na iVakabula a vakavulica, “Dou na kunea e vuravura na rarawa: ia mo dou vakacegu; au sa vakamalumalumutaki vuravura.” Na Nona veisorovaki e vakatara me vosoti na noda ivalavala ca me yacova ni sa lai guilecavi ira vakadua o Koya.
Eda na sega beka ni guilecava sara vakadua na noda ivalavala ca ni tiki tiko ni noda vuli ena bula oqo baleta meda na nanuma kakua ni vakayacori ira tale. Ia, eda na nanumi Koya nida vakayagataka na sakaramede ena lotu e vei Sigatabu. Na cakacaka vakalotu oqo sa tiki bibi ni noda sokalou kei na noda tubu cake vakayalo. Na reki ena yaco mai nida kila ni oqo e sega ni dua na siga wale ga. “Sa caka na Siga ni Vakacecegu ena vukudra na tamata,” ena inaki meda cegu kina mai vuravura ka vakabulabulataka na yagoda kei na yaloda.
Eda nanumi Koya tale ga nida gole i valetabu—na vale ni Turaga. Na valetabu e solia vei keda na kila titobu me baleti Jisu Karisito na uto ni veiyalayalati ka tuberi keda kina bula tawamudu, na isolisoli uasivi duadua … vei ira na isolisoli ni Kalou.”
Na tiko e valetabu e solia vei au na vakacegu kei na inuinui cecere me baleta na noda icavacava tawamudu. Au vakila na veisemati vakalomalagi kei ira na tamata ena yasa ruarua ni ilati. Au raica na veivakabulai mana ena nodratou bula na luvequ gone, ka rua e tiko veirau na mate tawakilai ka gadrevi merau wanonovi e veisiga ena vo ni nodrau bula.
Keitou reki vakavuvale ni keitou veiwaseitaka na yavu ni bula marau. E serau na matadratou na luvequ niratou rogoca ni, ena vuku i Jisu ena “lekaleka wale ga na gauna ni nomu rarawa.” Keirau lomani iratou vakabibi na luvei keirau, ka keirau kila ni dua na siga, me vaka a vakavulica o Peresitedi Jeffery R. Holland, era na “tucake e matada ena lagilagi kei na totoka, ka ra sa na vakaukauwataki e yagodra kei na yalodra.” Na noda veiyalayalati e kauti keda voleka vua na Kalou me rawati kina na veika e nanumi ni dredre, me vakatawani kina na veivanua butobuto ena rarama kei na sautu.
Ena vuku i Jisu Karisito, sa tiko na inuinui kei na vuna vinaka me tomani na veilomani, veimasulaki kei na nodra tokoni o ira eda lomana.
Au kila ni bula tiko oKoya. E kilai keda o Koya ka lomani keda. O koya na sala, na dina, kei na vunibula kei vuravura.
Au sureti keda kece edaidai meda yavutaka na noda bula vei Jisu Karisito kei na Nona ivakavuvuli. Nida cakava vakakina eda na vukei meda kua ni tiloma na batinisiwa ni veitemaki, vakatarabetaki, kei na noda beci keda vakai keda. Eda tucake me vaka na valetabu—e savasava, dei ka sega ni yavalati. Eda na tusaqata na cava, ka cakava me itikotiko, vosota ka reki tiko me yacova na ivakataotioti. Ena yacai Jisu Karisito, emeni.