iSolisoli Cecere Tawamudu: Veisorovaki i Jisu Karisito, Tucake Tale, Vakalesui Mai

Vica na yabaki sa oti, na neimami kalasi ni kosipeli ena veimataka keimami dau cavuqaqataka na tikini iVolatabu. Au malele ena veitikina lailai Qo e wili kina na Joni 11:35—na tikina lailai duadua ena ivolanikalou, e vica ga na vosa—“sa tagi ko Jisu.”

Vei au ena gauna oqo, ni a tagi o Jisu ena yaluma kei na reki e vakadinadinataka na mana dina: ni a lako dina mai vakayago kina bula oqo na Luve ni Kalou ka vulica me vaka ena yagona na ivakarau me dau tiko ga kina kei keda na vakalougatataki.

Nida tagi yani ena rarawa se na reki, e kila tu vakavinaka o Jisu Karisito. E rawa ni tiko o Koya ena gauna eda gadreva vakalevu kina na isolisoli cecere tawamudu: na Veisorovaki i Jisu Karisito, Tucake tale, veivakalesui mai.

Erau tagicaka o Meri kei Marica na ganedrau o Lasarusa, ka sa mate. Ena yalololoma, a tagi ko Jisu. A vakaturi Lasarua cake me bula.

A raici Jerusalemi o Jisu ena yakavi ni Lakosivia. A tagi, ni sega ni vakasoqona rawa na Nona tamata me vaka na tinanitoa kei ira na luvena. Nikua sa solia vei keda na inuinui na Nona Veisorovaki nida rarawataka na veika a dodonu me yaco.

E tagi na Turaga ni loganivaini ena Nona taroga na Nona italai, ka rawa ni okati kina o keda nida turaga ka marama dauveiqaravi, “Na cava tale beka au rawa ni cakava ena noqu loganivaini?”

A tucake tu ena lolosi o Meri ena ibulubulu. A taroga yani vakamalua ko Jisu, “Na cava ko sa lolosi kina?” Sa kila tiko o Koya ni “Sa ia na tagi e na bogi, ia sa yaco ena mataka na marau.” Na tucake tale e kauta mai keda kece dua na siga vou.

Ena veivanua ena iVola i Momani, nira tucake yani vua na lewevuqa yalodina, sa ka levu na nona reki o Jisu. A tagi.

“A sa keveti ira yadua na gone lalai ka vakalougatataki ira ka masulaki ira vei Tamana.

“A sa tagi ni sa vakalougatataki ira oti.”

Oqo na Siganimate vei Jisu Karisito: E sauma o Koya na gagadre ni yaloda kei na taro ni lomada. E tavoya o Koya na wai ni matada, vakavo ga na wainimatada ni reki.

Ni drodro na wai ni matada, ena so na gauna eda dau kere veivosoti, ena madua. Ia ni da kila ni kila vakavinaka tu o Jisu Karisito na mosi kei na reki ni bula e rawa ni solia vei keda na kaukauwa ka sivia sara na noda ni da lako curuma na wiwi kei na kamica.

Mai na Ceva kei Amerika,e tagicaka e dua natama. Na ka talei ena nona bula, na nona goneyalewa, sa leqa. “Au na solia na ka kecega meu raici koya tale,” a tagi lagalaga e ligaqu. Au a tagi talega o au.

Ena kena vakatabui ni Valetabu na Puebla Mexico, e turu na wainimata ni marau ni dua na marama. E sereka mai na kena irairai na vakabauta kei na solibula. E kaya vaqo, “Todos mis hijos estan aqui en el templo hoy”—“Era tiko kece ena valetabu nikua na luvequ.” Era tagi ena marau kei na vakavinavinaka nira soqoni vata na veitabatamata ena vale ni Turaga.

Ena ivalu levu, era veivorati vakataki ira na matavuvale kei na veiwekani. E seyavu yani vakamalua na wainimate ni cudru yaco na inuinui. E sautaninini na domona, a kaya cake e dua na marama ena dua na koro lailai “Na wekaqu, ni bera niu lako kina noqu ibulubulu, au vinakata mo kila na vanua mo kunei ira kina na lewe ni nomu matavuvale era yali tiko.”

E rau vauci ena vale ni Turaga.edua na cauravou kei na goneyalewa totoka. Sa yabaki 70 o koya, vakakina o tagane. Na goneyalewa totoka, e vosota tu ka waraka na siga oqo. E wirica vaqo na nona ivinivo ni vakamau ka wirica va ya. E turu na wai ni matai keimami ena reki. Sa yaco na nona yalayala na Kalou. Na Nona veiyalayalati e kauta mai na veivakalougatataki.

E vulica na cauravou o Boyd K. Packer e dua na lesoni vinaka ena gauna e sikova kina e dua na marama yada. Ni oti e dua na vakaduidui ile kei na watina, a kacivaka yani o marama e dua na vosa e tonotonomata. A yaco e dua na vakacalaka ena siga oya ka kau tani kina na bula i tagane. “Ena limasagavulu na yabaki,” e lagata o yada, “Au a bula tu mai eli niu kila tu na gaga kei na tonotonomata ni iotioti ni vosa a rogoca mai tebenigusuqu.”

Na siganimate vei Jisu Karisito e vukei keda meda botana, vakavinakataka, ka vakadodonutaka na keda isema, ena yasa ruarua ni ilati. O Jisu e rawa ni vakabula na yaluma, e vakatra o Koya me yaco na veivosoti. E rawa Vua me sereki keda kei ira tale eso mai na veika eda kaya se cakava ka da vesuki tu kina.

Na siganimate vei Jisu Karisito e vakatara me da vakila na Nona veivakadonui na Kalou. Na vuravura oqo e kaya vei keda ni da sa rui balavu, rui lekaleka, rui rabalevu, rui qiqo—sega ni vuku, rairai vinaka, se kaukauwa vakayalo. Ena veivakasavasavataki vakayalo i Jisu Karisito, eda rawa ni levea na veivakacacani.

Ena reki ni Siganimate, eda lagata, “Sa druka ko mate; sa sereki na tamata. Sa rawata na qaqa ko Karisito.” Na tucake tale nei Karisito e sereki keda mai na ivau ni mate, na malumalumu ni gauna kei na guce ni yago. Na Veisorovaki talega i Jisu Karisito e vakalesui keda mai vakayalo. A turu na dra mai na qara kecega ni yagona, e dra na wainimatana, meda dro kina mai na valavala ca kei na tawasei tani. E vakaduavatataki keda, taucoko ka savasava, keda vakataki keda kei na Kalou. Ena veika vinaka kece, a vakalesuya mai vakayauyau o Karisito—sega walega ni ka sa tu rawa ia na veika e rawa ni yaco.

Na bula kei na rarama i Karisito e vakadinadina ni loloma ni Kalou vei ira kece na luvena. Baleta na loloma ni Kalou na Tamada vei ira kece na Luvena ena itabayabaki kei na vanua, eda raica na Nona veisureti loloma meda lako mai ka kunea na vakacegu kei na reki Vua ena vuqa na iivakarau kei na itovo. Ena vanua cava ga, gauna cava ga, o cei ga o keda, eda wasea vata na ivakatakilakila vakalou ni da luvena na Dauveibuli vata ga. Ena yalo vata oya, o ira na Musulomani, Jiu, kei na lotu Vakarisito, era wasea na ivotavota vakalotu mai vei Tamadra o Eparaama kei na vakaveiyalayalati e semati kina veika a yaco mai Ijipita.

Na Tamadra o Eparaama a lako mai i Ijipita ka vakalougatataki.

O Josefa,ka volitaki vakabobula i Ijipita, a kila na tadra nei Fero ni na vitu na yabaki ni sautu ka muria mai e vitu na yabaki ni lauqa. A vakabula o Josefa na nona matavuvale kei ira na nona tamata. A tagi o Josefa ni raica na ituvatuva levu ni Kalou, ka cakacaka vata kina na ka kecega me vinaka kina o ira era rokova na nodra veiyalayalati.

O Mosese, a susu mai Ijipita ena vuvale nei Fero, a ciqoma ka qai vakalesuya mai na idola ni nodra vakasoqoni vata na luvena na Kalou.

Me yaco na parofisai, O Josefa, Meri, kei na gone lailai o Jisu eratou vakarurugi e Ijipita. Mai Cairo, a kaya ena vakarokoroko e dua na Musulomani: “E vakatavulica na Quran ni ratou a taqomaki ka vakarurugi o Josefa, Meri, kei na gonelailai ko Jisu ena noqu vanua. Ena noqu vanua, na gonelailai o Jisu a kania na keimami kakana, cavuta na imatai ni Nona kalawa, ka cavuta na imatai ni Nona vosa. Ena noqu vanua, keimami vakabauta nira cuva na vunikau mera solia Vua kei na Nona matavuvale na vuadra. Na Nona a tiko ena noqu vanua sa vakalougatataki ira kina na tamata kei na qele.”

Na nona ituvatuva ni bula savasava kei na bula vakayago e rawa kina meda vuli mai na veika eda sotava. Eso na lesoni cecere duadua ni bula e yaco mai ena veika eda na sega sara ga ni digia. Ena loloma, a siro kina o Jisu Karisito kina ruku ni veika kecega ka cabe kina dela ni veika kecega. E marautaka o Koya na noda rawa ni cakava, nayalovinaka sega ni namakiaumi, na vakabauta kina veivutuni kei na veivosoti. E tagi o Koya ena yaluma ena vuku ni rarawa levu ni tamata, na itovo ca, sega ni caka dodonu—ena vuku ni digidigi vakatamata—vakakina o lomalagi kei na Kalou ni lomalagi kei ira.

Na vei Siganimate kece e ivakadinadina ni veika veitaravi vakayalo ka cokotivata e sa tiki ni iwalewale vakalou ni veisorovaki, tucake tale, kei na veivakalesui mai vei Jisu Karisito. Na kena vakatabui kei na kena irairai e sega ni yaco vakacalaka. Sigatabu ni curu vakatui, Macawa Tabu kei na Siganimate e marautaki kina na Veisorovaki nei Karisito kei na Tucake tale. Nikua, ena ika 6 ni Epereli eda vakananuma kina na tauyavu kei na cokonaki ni Lotu i Jisu Karisito ni Yalododonu Edaidai. Na Vakalesui mai oqo e dua na vuna eda dau soqoni vata kina ena imatai ni Sigatabu ni Epereli ena koniferedi raraba.

A yaco talega na Veivakalesui mai ena nodra vakalesuya mai na idola ni matabete kei na lewa ena valetabu se qai vakatabui vou mai Kirtland o Jisu Karisito, Mosese, Ilaisa, kei Ilaija era tucake tale mai na mate ena Sigatabu ni Siganimate, 1836 ena gauna oqori ena siga koya e yaco mai kina kina Lotu vakalesui mai nei Jisu Karisito na lewa ni Kalou kei na veivakalougatataki mera vakasoqoni na luvena mera lesu Vua, ka vakaduavatataki na matavuvale me tawamudu. Na veivakalesui mai ena siga oya sa vakayacori kina na parofisai ena kena yaco ruarua ena Siganimate kei na Lako Sivia.

Oka kina na Valetabu e Kirtland, au sikova ena dua na gauna walega oqo e vica na vanua tabu mai Ohio ka raica kina na Parofita o Josefa kei ira tale eso ena raivotu na Kalou na Tamada kei na Luvena, o Jisu Karisito. A raica na Parofita o Josefa na irairai ni lomalagi. Mai lomalagi, na Tamada Vakalomalagi, ena vukui Jisu Karisito, “sa vakabula na ibulibuli kece ni ligana” ena dua na matanitu lagilagi. Na kena vo ga o ira era “cakitaka na Luvena ni sa vakatakilai oti na Tamana.”

Ni tekivuna na Nona cakacaka ena bula oqo, e kacivaka o Jisu na nona ilesilesi me vakalougatataki keda yadua ena veika kece eda tu vakarau meda ciqoma—ena veigauna kece, e veivanua, kei na ituvaki kecega. Ni oti nona lolo voli ena 40 na siga, a lako ko Jisu kina valenilotu ka wilika: “Sa tu vei au na Yalo i Jiova, ni sa lumuti au ko koya meu vunautaka na itukutuku vinaka vei ira era sa dravudravua; ka talai au meu vakabulai ira sa yalorarawa meu vunautaka na sereki vei ira na bobula, kei na rai tale vei ira sa mataboko, meu vagalalataki ira era sa mavoa. ”

Dravudravua, mosiniyalo, vesuki, mataboko, mavoa—oya o keda.

Na ivola i Aisea e tomana na yalayala vaka-Mesaia ni inuinui, veisereki, veivakadeitaki: “Lesia vei ira era lolosi tiko ena ulunivanua ko Saioni, solia vei ira na totoka me baleta ni dravusa, na ilumu ni reki vei ira na lolosi, na isulu ni vakacaucau vei ira na yalo bibi.”

O koya eda tagicaka kina, “Au na rekitaki Jiova vakaidina, na yaloqu ena rekitaki koya na noqu Kalou,” a kaya o Aisea, “ni sa vakasulumi au ena isulu ni bula, ka vakaitutuvitaki ena itutuvi ni yalododonu.”

Ena vei Siganimate eda dau cibitaka, na ivakatakarakara, na isolisoli cecere ni tawamudu ena vukui Jisu Karisito: Nona Veisorovaki, Nona kei na (noda yalayala ni) Tucake tale, Vakalesui mai ni Nona Lotu oqo kei na idola ni matabete kei na lewa mera vakalougatataki kina na luvena kecega na Kalou. Eda reki ena qameni ni veivakabulai kei na icurucuru ni buladodonu. Eda kaila “Osana vua na Kalou kei na Lami!”

“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, mera rawata ga na bula tawamudu.”

Meda kunea na veisorovaki i Jisu Karisito, tucake tale mai na mate, kei na veivakalesui mai—na sautu, yaco me vaka, taukena—na veika e dina ka rekitaki, marau ka tawamudu, au masuta ena Yacana tabu, o Jisu Karisito, emeni.