Na iTuvatuva ni Loloma Cecere

Ena koniferedi ni Epereli ena yabaki sa oti, ni oti ga vakalailai na itukutuku rekitaki ni sa volia na Lotu na Valetabu e Kirtland, a sureti keda o Peresitedi Russell M. Nelson meda vulica na masu ni vakatabui ni Valetabu e Kirtland, ka volai tu ena wase 109 ni Vunau kei na Veiyalayalati. Na masu ni vakatabui oya, e kaya o Peresitedi Nelson, “e vakatavulica ni rawa ni vakaukauwataki iko kei au vakayalo na valetabu me daru sotava kina na bolebole ni bula ena vakataoitoti ni gauna oqo.”

Au kila ni nomu vulica na wase 109 e solia na rai titobu eso ka vakalougatataki iko. Ena yakavi nikua, au wasea e vica na ka au vulica niu muria ena veisureti ni noda parofita. Na sala veivakacegui ka liutaki au kina na noqu vuli a vakananuma vei au ni sa yalololoma na Turaga ka sa ituvatuva dina ga ni loloma cecere na ituvatuva ni veivakabulai ni Tamada Vakalomalagi.

Me vaka oni kila tiko, “era vakauqeti na daukaulotu kacivi vou mera ciqoma na enidaumeni ni valetabu ena kena gauna totolo e rawa ka mera lako kina valetabu ena kena levu ga e rawa.” Nira vaka edaumeni, sa “rawa nira veiqaravi vakaliganicakacaka vakalotu ni valetabu ni bera nira tekivu veiqaravi vakadaukaulotu.”

Na gauna ena valetabu ni bera nira curu kina MTC e rawa ni dua na veivakalougatataki totoka vei ira na daukaulotu vou nira vulica e levu tale na ka me baleta na veiyalayalati ni valetabu ni bera nira wasea na veivakalougatataki ni veiyalayalati oqori ki vuravura.

Ia ena noqu vulica na wase 109, au vulica kina ni, ena valetabu, e dau vakaukauwataki ira kina na daukaulotu vou na Kalou—e dina sara, o keda kece—ena dua na ikuri ni sala tabu. Ena masu ni vakatabui, ka soli ena ivakatakila, a masulaka kina o Josefa Simici “nira sa lako yani na nomuni tamata mai na nomuni vale mera vakadinadinataka na yacamuni,” na “lomadra” na “tamata kecega”mena “vakamalumalumutaki”—ira ruarua na “veika cecere ni vuravura” kei “ira na dravudravua, na vakaleqai, kei [na] vakararawataki.” A masulaka o koya me “vakamalumalumutaki me rawa ni vakatakilai na dina, ka mera kune loloma na nomuni tamata e matadra na tamata kecega; mera kila ena iyalayala kei vuravura ni oi keimami, na nomuni tamata, keimami sa rogoca na domomuni, ia ko ni sa talai keimami.”

Oqo e dua na iyalayala totoka vua e dua na daukaulotu kacivi vou—me “vakamalumalumutaki na nanuma ni lomadra ena veika e dina,” me “kune loloma e matadra na tamata kecega,” ka me kila ko vuravura nira sa talai mai vua na Turaga. O keda yadua eda gadreva vakaidina na veivakalougatataki vata oqo. Sa na dua na veivakalougatataki dina me vakamalumalumutaki na lomada nida veimaliwai kei ira na wekada kei na itokani vakacakacaka. Na masu ni vakatabui e sega ni vakamacalataka vakavinaka ena vakamalumalumutaka vakacavana noda gauna ena valetabu na yalodra, ia au vakadeitaka ni sa vauci na kena vakamalumalumutaki na yaloda ena noda gauna ena valetabu me tvakanamata vei Jisu Karisito kei na Nona loloma veivueti.

Niu vulica na masu ni vakatabui ni Kirtland, au a kidroa talega ni a kerea ka kerea tale o Josefa na loloma cecere—me baleti ira na lewe ni Lotu, me baleti ira na meca ni Lotu, me baleti ira na iliuliu ni vanua e vuravura. Kei, na nona kerekere, e kerea na Turaga me nanumi koya ka me yalololoma vua na watina o Emma kei na luvedrau.

Na cava beka a vakila o Josefa ena gauna, ni oti e dua na macawa, ena Siganimate, 3 ni Epereli, 1836, ena Valetabu e Kirtland, ni rairai kina na iVakabula vei koya kei Oliver Cowdery ka, me vaka e volai ena wase 110 ni Vunau kei na Veiyalayalati, ni kaya, “Au sa ciqoma na vale oqo, ka na dau tiko eke na yacaqu; ka’u na vakatakilai au vei ira na noqu tamata ena loloma cecere ena vale oqo.” Na yalayala ni loloma cecere oqo a rairai vakaibalebale vakabibi vei Josefa. Ka me vaka a vakavulica o Peresitedi Nelson ena Epereli sa oti, na yalayala talega oqo “era okati kina na valetabu vakatabui kece nikua.”

E vuqa na sala eda rawa ni kunea yadua kina na loloma cecere ena vale ni Turaga. E dina tu ga mai na gauna a vakaroti ira taumada kina na Isireli na Turaga mera tara e dua na valecavu ka biuta ena lomadonu ni “cabocabo‑ni‑bulubulu.” Ena valetabu, eda kunea na loloma cecere ena veiyalayalati eda cakava. Na veiyalayalati oqori, me ikuri ni veiyalayalati ni papitaiso, e vauci keda vua na Tamada kei na Luvena ka solia vei keda na kena rawati vakalevu cake na veika sa vakavulica o Peresitedi Nelson me “dua na mataqali loloma uasivi kei na yalololoma digitaki ka vakatokai na hesed” ena vosa vaka‑Iperiu.

Eda kunea na loloma cecere ena madigi meda vauci kina noda matavuvale me tawamudu. Eda kila vakavinaka cake talega ni Veibuli, na Lutu, na isoro ni veisorovaki ni iVakabula, kei na noda rawa ni curu tale ki na iserau ni Tamada Vakalomalagi—na veitiki yadua ni yavu ni veivakabulai—e ivakaraitaki ni loloma cecere. E rawa ni tukuni ni yavu ni veivakabulai e dua na ituvatuva ni bula marau baleta sara ga ni sa “ituvatuva ni loloma cecere.”

Au vakavinavinakataka na yalayala totoka ena wase 110 ni na vakatakilai Koya na Turaga ena loloma cecere ena Nona valetabu. Au vakavinavinakataka na ka e vakatakila me baleta na sala e vakatakilai Koya kina na Turaga ena loloma cecere e veigauna eda, me vakataki Josefa, kerea kina na loloma cecere.

Na kerekere nei Josefa Simici me baleta na loloma cecere ena wase 109 e sega ni imatai ni gauna a vakauqeta kina na ivakatakila na nona kerekere me baleta na loloma cecere. Ena loma ni Veikau Tabu, a sega walega ni masulaka na cauravou o Josefa me kila se Lotu cava e dina, ia a kaya talega ni a “tagica vua na Turaga me baleta na loloma cecere, ni a sega tale ni dua meu lako vua meu rawata kina.” E vaka me kila ni gadreva o koya na loloma cecere ka rawa ni vakarautaka duadua ga na Turaga ena veivukeni kena dolavi na katuba ni lomalagi. Ni oti e tolu na yabaki, a rairai mai na agilosi o Moronai ni oti na nona “masu ka vakatakekere vua na Kalou Kaukauwa meu vosoti ena noqu ivalavala ca kei na noqu malumalumu.”

Na ivakarau oqo ni ivakatakila e dau muria e dua na kerekere ni loloma cecere sa dua na ka kilai levu ena ivolanikalou. A qai rogoca rawa ga o Inosi na domo ni Turaga ni oti na nona masuta na veivosoti. Na saumaki nei tamai Tui Lamonai e tekivu ena nona masu: “Au na veivutunitaka na noqu ivalavala ca kecega meu kilai kemuni.” Eda na sega beka ni vakalougatataki ena veika vakasakiti vata oqo, ia vei ira e dau dredre ena so na gauna mera vakila na isau ni masu, na vakasaqarai ni loloma cecere ni Turaga sa dua na sala kaukauwa duadua me vakilai kina na ivakadinadina ni Yalo Tabu.

E dua na ivakavuvuli vata oqori e vakavulici vakavinaka ena Moronai 10:3–5. Eda dau vakalekalekataka na veitikina oqo meda vakavulica kina ni, na masu ena yalodina, eda rawa ni vulica kina se dina na iVola i Momani. Ia na vakalekalekataki e rawa ni vakawaletaka na itavi bibi ni loloma cecere. Rogoca na ivakarau e tekivuna kina o Moronai na nona veivakauqeti: “Au vakamasuti kemudou ni ena gauna dou sa wilika kina na veika oqo, ka kila kina na nona loloma na Turaga vei ira na luve ni tamata, mai na buli nei Atama ka yacova sara mai na gauna dou sa na taura kina na itukutuku oqo, ka vakananuma sara e lomamudou.”

E vakauqeti keda o Moronai meda kakua walega ni wilika na veika oqo—na ivolatukutuku e vakarau dregata o koya—ia meda vakasamataka vakatitobu e lomada na veika e vakatakila na iVola i Momani “ni sa yalololoma dina na Turaga vei ira na luve ni tamata.” Sa ikoya na vakasamataki vakatitobu ni loloma cecere ni Turaga e vakarautaki keda meda “kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo.”

Nida vakasamataka vakatitobu na iVola i Momani, eda na taroga beka: E dina li, me vaka a vakavulica o Alama, ni ituvatuva ni loloma cecere ni Kalou e vakadeitaka nio ira kece era a bula e vuravura oqo era na tucaketale ka ra na vakalesui tale kina kedra itutu uasivi sara? e dina beka o Amuleki—E rawata beka na loloma cecere ni iVakabula kece na bibi ni kena tau na lewa meda na sauma rawa vakacava kei se meda “[ologi} ena liga ni veitaqomaki”?

E dinam, me vaka e vakadinadinataka o Alama, ni mate o Karisito sega wale baleta na noda ivalavala ca ia baleta na noda “mosi kei na veivakararawataki” me rawa ni kina vei Koya me kila me vukei ira kina na nona tamata me vaka na nodra maluamalumu”? E dau yaloloma dina na Turaga. me vaka tukuna na Tui Penijamini, me vaka na iloloma soliwale, me sorovaka koya na “nodra ivalacala ca ka ra mate ka se ni kila na inaki ni Kalou me baleti irase ko ira era sa seg ani kila nira sa ivalavala ca”?

Edina, vaka e tukuna o Liai “Sa lutu o Atama me sucu kina na tamata; sa sucu na tamata me rawata na marau”? Ia e ka dina sara, ni vakadinadinataka o Apinatai, vaka e tukuna o Aisea baleti Jisu Karisito “ni sa vakamavoataki ko koya ena vuku ni noda taleidredre, ka sa dakusi ena vuku ni noda caka cala, sa tauvua nacudu ni nodavakcacegu tale; ia ena we ni kena kuita esa sa vakabulai kina”?

Vakalekaleka, e loloma cecere dina na ituvatuva ni Tamada ka vakatavulici ena iVola i Momani? Au vakadinadinataka ni vakakina ni dina na ivakavuvuli ni veivakacegui kei na vakanuinui ni loloma cecere ena iVola i Momani.

Ia, au raitayaloyalotaka ni so era sotava tiko beka na dredre, e dina ga ni o wiliwili ka masu tiko ena yalodina, mo kila kina na yalayala i Moronai ni Tamada Vakalomalagi “ena vakatakila vei kemudou … ena kaukauwa ni Yalo Tabu ni sa dina.” Au kila na dredre oqo baleta niu a vakila, ena vuqa na yabaki sa oti, ena imatai ni rua noqu wilika na iVola i Momani a sega ni saumi vakatotolo ka matata na noqu masu.

Kevaka o sotava tiko na dredre, au sureti ikomo muria na ivakasala i Moronai mo vakasamakata na vuqa na sala e vakavulica kina na iVola i Momani na “nona loloma cecere na Turaga [vei] ira na luve ni tamata”? Mai na veika au sa sotava, au nuitaka, ni gauna o cakava kina, ena rawa ni curuma na yalomu na vakacegu ni Yalo Tabu ka na rawa kina ni o kila, vakabauta, ka vakila ni sa dina na iVola i Momani kei na ituvatuva ni loloma cecere e vakavulica.

Au vakaraitaka na noqu vakavinavinaka ena vuku ni ituvatuva cecere ni loloma veivueti i Tamada kei na lomasoli ni iVakabula me mai vakayacora. Au kila ni na vakaraitaki Koya ena loloma cecere ena Nona valetabu savasava ka vakakina ena veitiki ni noda bula kevaka eda na vakasaqarai Koya. Ena yacai Jisu Karisito, emeni.