Manomboka ny famerenana amin’ny laoniny

Palmyra, New York (1820): Teto i Joseph Smith sy ny fianakaviana no nipetraka. Niangona tany amin’ny fiangonana samy hafa ny olona rehetra tao amin’ny fianakavian’i Joseph ka tsy nahafantatra izay fiangonana tokony hidirany ho mpikambana i Joseph. Namaky tao amin’ny Baiboly izy hoe: “Raha misy ianareo tsy manam-pahendrena, aoka izy hangataka amin’ Andriamanitra” (Jakoba 1:5).

Ilay Alakely masina (lohataonan’ny taona 1820): Nivavaka i Joseph Smith ary nangataka tamin’ Andriamanitra hoe inona no fiangonana tokony hidirany ho mpikambana. Niseho taminy ny Ray any An-danitra sy i Jesoa Kristy. Nolazain’izy Ireo taminy fa tsy tokony hiditra ho mpikambana na tamin’iza na tamin’iza tamin’ireo fiangonana nisy izy. Nantsoin’izy Ireo i Joseph mba hanampy hamerina amin’ny laoniny eto an-tany ny filazantsara fenon’i Jesoa Kristy.

Efitranon’i Joseph (1823): Namangy an’i Joseph Smith ny anjely Môrônia. Nambarany tamin’i Joseph ny momba ireo takela-bolamena izay misy ny filazantsara fenon’i Jesoa Kristy. Teo am-pitenenan’i Môrônia dia nahita fahitana momba ny toerana nilevenan’ireo takelaka i Joseph.

Ny Havoan’i Komôrà (1827): Nomen’ny anjely Môrônia an’i Joseph Smith teo amin’ny Havoan’i Komôrà ireo takela-bolamena. I Joseph ihany koa dia nandray fitaovana manokana izay niara-nalevina tamin’ireo takelaka. Nomanin’ Andriamanitra ireo mba hanampy azy handika ireo takelaka. Lasa Bokin’i Môrmôna ireo takelaka vita dikan-teny mba hahafahan’ireo zanak Andriamanitra rehetra mamaky ny Teniny.