1 Ngaahi Tuʻi 12–13; 17–22

Fakakaukau ke hiki ʻa e fehuʻi ko ʻení ʻi he palakipoé pea ʻeke ia ki he kalasí. Te ke lava ʻo hiki e tali ʻa e kau akó ʻi he palakipoé.

• Ko e hā ha ngaahi tūkunga taʻepau ʻoku fehangahangai mo e kakai lalahi kei talavoú ʻe fiemaʻu ai ke nau falala lahi ki he ʻEikí?

Fakaafeʻi ʻa e kau akó ke nau fakakaukau ki he ngaahi tūkunga faingataʻa ʻoku nau lolotonga fehangahangai mo iá, tautautefito ki he ngaahi tūkunga ʻoku ongoʻi faingataʻa ai ʻa e falala ki he ʻEikí koeʻuhí he ʻoku ʻikai ke nau ʻilo pe ʻe iku fēfē ʻa e ngaahi meʻá. Poupouʻi kinautolu ʻi heʻenau ako ʻi he ʻaho ní ke kumi ʻa e ngaahi moʻoni ʻe lava ʻo tokoni ke nau falala ki he ʻEikí ʻaki ha loto-falala lahi ange, naʻa mo e taimi ʻoku ngali taʻepau ai ʻa e kahaʻú.

Ke tokoni ke mahino ki he kau akó ʻa e puipuituʻa ʻo e 1 Ngaahi Tuʻi 17, te ke lava pe ko ha tokotaha ako ʻo fakamatalaʻi fakanounou ʻa e fakamatala ʻi he palakalafi ko ʻení:

Naʻe nofo ʻa e palōfita ko ʻIlaisiaá ʻi he Puleʻanga Fakatokelau ʻo ʻIsilelí lolotonga ha taimi naʻe mafola ai ʻa e faiangahalá mo e tauhi ʻotua tamapuá. Naʻá ne fakaʻaongaʻi ʻa e mālohi ʻo e ʻOtuá ke taʻofi ʻa e ʻuhá mei heʻene toó, ʻa ia naʻe iku ai ki ha ngaahi taʻu lahi ʻo e laʻalaʻaá mo e hongé. Naʻe tokonaki ʻe he ʻEikí ʻa e ngaahi fiemaʻu ʻa ʻIlaisiaá ʻaki hono fakahinohinoʻi ia ke toitoi ʻi ha veʻe vaitafe, ʻa ia naʻe fafanga ai ia ʻe he fanga lēvení. Naʻe fakahā leva ʻe he ʻEikí kia ʻIlaisiā ke ʻalu ki he fonua ko Salifatí, ʻa ia ʻe tauhi ai ia ʻe ha uitou (vakai, 1 Ngaahi Tuʻi 17:1–9). Ko e konga lahi ʻo e ngaahi ngāue ʻa ʻIlaisiā ʻi he talanoa ko ʻení ʻe lava ke ne fakamanatu mai kiate kitautolu ha fakataipe ʻo Sīsū Kalaisi. (Mahalo ko ha taimi lelei ʻeni ke fakafe‘iloaki ai ‘a e taukei “Ko e Tokanga Taha kia Sīsū Kalaisi ʻi he Folofolá” ʻi he Ngaahi Taukei Ako Folofolá.)

ʻOange ha taimi ki he kau akó ke nau ako ʻa e 1 Ngaahi Tuʻi 17:10–24 pea ke hiki ʻenau tali ki he ongo fehuʻi ko ʻení:

• Ko e hā ʻa e meʻa naʻe fai pe lea ʻaki ʻe ʻIlaisiā ʻokú ne fakamanatu atu kiate koe ʻa Sīsū Kalaisí?

• Ko e hā ʻa e meʻa ʻokú ke ako mei he uitoú fekauʻaki mo e falala ki he ʻEikí?

Hili hono maʻu ʻe he kau akó ha taimi feʻunga ke akó, fakaafeʻi ke nau vahevahe ʻenau tali ki he ongo fehuʻi ko ʻení mo ha hoa pe kulupu tokosiʻi. ʻE lava foki ke vahevahe ʻe ha kau ako ʻe niʻihi ʻenau fakakaukaú mo e kalasí. Ko ha sīpinga ʻeni ʻe taha ʻo ha moʻoni te nau ala ʻiloʻi: ʻI he taimi ʻoku tau falala ai ki he ʻEikí, te Ne tāpuakiʻi mo poupouʻi kitautolu.

Fakakaukau ke fakaafeʻi ʻa e kau akó ke nau ako ha niʻihi ʻo e ngaahi potufolofola ko ʻení. Kole ange ke nau vahevahe ha ngaahi moʻoni mei he ngaahi veesi ko ʻení ʻokú ne akoʻi ʻa e mahuʻinga ʻo e falala ki he ʻEikí. Te nau lava foki ʻo vahevahe ʻa e founga ʻoku fakafōtunga ai ʻa e ngaahi moʻoni ʻoku akoʻi ʻi he ngaahi potufolofolá ʻi he talanoa kia ʻIlaisiā mo e uitoú ʻi he 1 Ngaahi Tuʻi 17.

• Saame 34:22

• Lea Fakatātā 3:5–6

• Sione 6:35

• Sione 11:25

• Sione 14:6

• ʻAlamā 36:3

Te ke lava ʻo taki e tokanga ʻa e kau akó ki he lisi naʻá ke faʻu ʻi he palakipoé ʻi he kamataʻanga ʻo e ʻekitivitī akó, pea ʻeke leva ha ngaahi fehuʻi ʻe niʻihi hangē ko ʻení:

• Ko e hā ha meʻa ʻe lava ke faingataʻa ai ke tau falala ki he ʻEikí ʻi he ngaahi tūkunga pehení?

• Ko e hā ha ngaahi founga ʻe lava ke fakahaaʻi ai ʻe he kakaí ʻenau falala ki he ʻEikí ʻi he ngaahi tūkunga ko ʻení?

Fakaafeʻi ʻa e kau akó ke nau fakaʻaongaʻi ha kiʻi taimi ke tohi fekauʻaki mo ha taimi naʻe pau ai ke nau falala kakato pe ko ha taha ʻoku nau ʻilo ki he ʻEikí taʻe te nau ʻiloʻi ʻa e olá. Te nau lava foki ʻo fakamatalaʻi ʻa e founga naʻa nau mamata ai ki he ngaahi tāpuaki ʻa e ʻEikí mei he aʻusia ko iá. Te ke lava leva ʻo fakaafeʻi ha kau ako tokosiʻi ʻoku nau loto-fiemālie ke vahevahe ʻenau ngaahi aʻusiá mo e kalasí.

Fakakaukau ke fakaʻaliʻali ha foʻi hina ʻoku ʻi ai ha meʻi lolo mo ha foʻi hina ʻe taha ʻoku ʻi ai ha meʻi mahoaʻa siʻisiʻi. Fakaafeʻi ʻa e kau akó ke fakalaulauloto ki he founga te nau lava ai ʻo muimui ki he sīpinga ʻa e uitou ʻo Salifatí ʻo falala ki he ʻEikí lolotonga ʻa e ngaahi tūkunga faingataʻa ʻoku nau fehangahangai mo iá. Poupouʻi kinautolu ke lekooti ʻenau ngaahi fakakaukaú pe ongó.

Foki ki he “Ngaahi ʻEkitivitī Ako ke Fili Mei Aí.”

Te ke lava ʻo kamata ʻaki hano vahevahe ʻa e lea ko ʻeni meia Palesiteni Tōmasi S. Monisoní mo aleaʻi ʻa e ngaahi fehuʻi ʻoku ʻoatu fakataha mo iá:

Kuo ʻosi atu e taimi ia naʻe meimei fenāpasi lelei ai e tuʻunga moʻui ʻa e Siasí pea mo e sosaietí, ka kuó na faikehekehe lahi ʻeni kinaua pea ʻoku fakaʻau pē ke toe lahi ange. (“Mālohi ʻo e Lakanga Fakataulaʻeikí,” Liahona, Mē 2011, 66)

• Ko e hā ha ngaahi sīpinga ʻokú ke lava ʻo fakakaukau ki ai ʻokú ne fakatātaaʻi ʻa e meʻa naʻe fakamatalaʻi ʻe Palesiteni Monisoni ʻi he lea ko ʻení?

Fakamatalaʻi ange naʻe moʻui foki ʻa e palōfita ko ʻIlaisiaá lolotonga ha taimi naʻe ʻi ai ha faikehekehe ʻi he ngaahi tuʻunga moʻui ʻa hono sosaietí pea mo e ngaahi tuʻunga moʻui ʻa e ʻEikí. Lolotonga e pule ʻa e Tuʻi ko ʻĒhapí mo Kuini Sisipeli ʻi he Puleʻanga Fakatokelau ʻo ʻIsilelí, naʻe feinga ha kau ʻIsileli tokolahi ke moihū ki he ngaahi ʻotua loí, kau ai ʻa Peali, fakataha mo Sihova. Naʻe poleʻi ʻe ʻIlaisiā ʻa e kau palōfita loi ʻe laungeau ki ha feʻauhi ʻi he Moʻunga Kāmelí ke fakamoʻoniʻi pe ko hai ʻia Peali mo Sihova ʻoku ʻOtua moʻoní (vakai, 1 Ngaahi Tuʻi 18:17–21). Kimuʻa pea kamata ʻa e feʻauhí, naʻe lea ʻa ʻIlaisiā ki he kakaí.

Fakaafeʻi ʻa e kau akó ke nau lau ʻa e 1 Ngaahi Tuʻi 18:21, ʻo kumi ʻa e fehuʻi ʻa ʻIlaisiā ki he kakai ʻIsilelí. Te ke lava leva ʻo ʻeke ange:

• Te ke fakamatalaʻi fakanounou fēfē ʻa e ngaahi lea ʻa ʻIlaisiā ʻi he veesi ko ʻení? (Kapau ʻe fiemaʻu, ʻe lava ke lau ʻe he kau akó ʻa e fakamatala ki he 1 Ngaahi Tuʻi 18:21 ʻi he Ngaahi Tokoni Fakafolofolá: Fuakava Motuʻá.)

• Ko e hā ha foʻi moʻoni te tau lava ʻo ako mei he fehuʻi ʻa ʻIlaisiā ki he kakaí? (ʻE lava ke ʻiloʻi ʻe he kau akó ha moʻoni hangē ko ʻení: He ʻikai ke tau lava ʻo muimui ki he ʻOtuá lolotonga iá ʻoku tau muimui foki ki he ngaahi ʻotua loí mo e ngaahi ivi tākiekina taʻemāʻoniʻoní.)

Fakakaukau ke vahevahe mo aleaʻi ʻa e lea ko ʻeni naʻe fai ʻe ʻEletā D. Toti Kulisitofasoní:

ʻI he ngaahi ʻahó ni, ʻe ala pehē atu ʻa ʻIlaisiā:

• ʻOku ʻi ai e ʻOtua ko ʻetau Tamai Hēvaní pe ʻoku ʻikai ke Ne ʻi ai, ka ʻo kapau ʻokú Ne moʻui, moihū kiate Ia.

• Ko Sīsū Kalaisi pē ʻa e ʻAlo ʻo e ʻOtuá, ʻa e Huhuʻi kuo toetuʻu ʻo e faʻahinga ʻo e tangatá, pe ʻoku ʻikai, ka ʻo kapau ko Ia ia, muimui kiate Ia. …

Ke vilitaki ʻo tuʻu maʻu mo tuʻu ʻaliʻaliaki ʻi he tui ʻa Kalaisí, ʻoku fiemaʻu ke fakatōloloto e ongoongolelei ʻo Sīsū Kalaisí ki he loto mo e laumālie ʻo ha taha, ʻo ʻuhinga ke ʻikai hoko e ongoongoleleí ko ha taha pē ʻo e ngaahi tākiekina ʻi ha moʻui ʻa ha taha, ka ko e tefitoʻi meʻa ia ʻoku nofo taha ai ʻene moʻuí mo e ʻulungāngá. (“Tuʻu Maʻu mo Tuʻu ʻAliʻaliaki ʻi he Tui ‘a Kalaisí,” Liahona, Nōvema 2018, 30, 31)

• Ko e hā ha ngaahi founga ʻe lava ke feinga ai ʻa e kakai ʻi hotau kuongá ke muimui ki he ʻOtuá lolotonga iá ʻoku nau muimui foki ki he ngaahi ʻotua loí mo e ngaahi ivi tākiekina taʻemāʻoniʻoní?

• Ko e hā ha meʻa ʻokú ke ʻilo fekauʻaki mo e ʻOtuá te ne lava ʻo tākiekina koe ke ke fokotuʻu Ia mo ʻEne ongoongoleleí “ko e tefitoʻi meʻa ia ʻoku nofo taha ai” hoʻo moʻuí?

Fakaafeʻi ʻa e kau akó ke nau lau ʻa e 1 Ngaahi Tuʻi 18:22–39, ʻo kumi ʻa e meʻa naʻe hoko ʻia ʻIlaisiā mo e kau taulaʻeiki ʻa Pealí. (ʻE lava foki ke lau ʻe he kau akó ʻa e fakamatala ki he 1 Ngaahi Tuʻi 18:22–46 ʻi he Ngaahi Tokoni Fakafolofolá: Fuakava Motuʻá.) Fakakaukau ke ʻeke ha ngaahi fehuʻi hangē ko ʻení ke tokoni ke vahevahe ʻe he kau akó ʻenau ngaahi fakakaukaú:

• Ko e hā nai ʻa e ʻuhinga naʻe huhua ai ʻe ʻIlaisiā ha vai lahi ki he feilaulaú mo e funga ʻesi-feilaulaú?

• Ko e hā ʻa e meʻa ʻoku tokoni atu ʻa e talanoa ko ʻení ke mahino kiate koe fekauʻaki mo e mālohi ʻo e ʻOtuá?

Te mou lava ʻo fakaʻosi ʻaki hano hivaʻi fakataha pe lau ʻa e fakalea ʻo e himi “Tau Nofo he ʻEiki Hono Tafaʻaki” (Ngaahi Himí, 163). Fakaafeʻi ʻa e kau akó ke nau fakalaulauloto mo tohi ʻa e ngaahi founga te nau lava ai ʻo līʻoa kakato ange ke muimui ki he ʻEikí.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke kamata ʻaki hano aleaʻi ʻa e fakamatala ko ʻeni naʻe fai ʻe ʻEletā Keuli E. Sitīvenisoní:

Kuó u fakatokangaʻi ʻi heʻeku ngāué ha fakaʻānaua fakamāmanilahi ʻa e taha kotoa pē ke nau ʻiloʻi ʻa e founga ke fakaafeʻi mo ʻiloʻi ai ʻa e ngaahi ueʻi ʻa e Laumālie Māʻoniʻoní. (“Ngaahi Ueʻi ʻa e Laumālié,” Liahona, Nōvema 2023, 43)

Ko e hā ʻa e ʻuhinga ʻoku faʻa faingataʻa ai ke tau ʻilo ʻa e founga ke fakaafeʻi mo fakatokangaʻi ai ʻa e ngaahi ueʻi ʻa e Laumālie Māʻoniʻoní?

ʻI he ʻekitivitī ako ko ʻení, te ke lava ʻo tokoniʻi ʻa e kau akó ke nau akoako fakahoko ʻa e taukei “Ko e ʻEke ha Ngaahi Fehuʻi ʻOkú Ne Fakaafeʻi ʻa e Ako Fakamātoató” mei he Ngaahi Taukei Ako Folofolá. Fakaafeʻi ʻa e kau akó ke hiki ha fehuʻi ʻe taha pe lahi ange ʻoku nau maʻu fekauʻaki mo hono fakaafeʻi mo fakatokangaʻi ʻa e ngaahi ueʻi mei he Laumālié. Poupouʻi kinautolu ʻi heʻenau akó ke kumi ʻa e ngaahi moʻoni ʻe lava ʻo tokoni ke tali ʻenau fehuʻí.

Fakamatalaʻi ange naʻe hili hono ikunaʻi ʻe ʻIlaisiā ʻa e kau palōfita loi ʻa Pealí, naʻe feinga ʻa e uaifi ʻo ʻĒhapi ko Sisipelí, ke tāmateʻi ʻa ʻIlaisiā. Naʻá ne hola mei he fonua ko ʻIsilelí pea fononga ʻi ha ngaahi ʻaho lahi kae ʻoua kuó ne aʻu ki he Moʻunga ko Hōlepí, ko ha hingoa ʻe taha ki he Moʻunga Sainaí.

Fakaafeʻi ʻa e kau akó ke nau lau ʻa e 1 Ngaahi Tuʻi 19:9–12 mo e fakamatala ki he ngaahi veesi ko ʻení ʻi he Ngaahi Tokoni Fakafolofolá: Fuakava Motuʻá, ʻo kumi ʻa e meʻa naʻe hoko ʻi he haʻu ʻa ʻIlaisiā ki he moʻungá. Hili iá, te ke lava leva ʻo fai ha ngaahi fehuʻi hangē ko ʻení:

• Ko e hā ha meʻa te tau lava ʻo ako mei he talanoa ko ʻení fekauʻaki mo e founga ʻoku fetuʻutaki ai ʻa e ʻEikí mo kitautolú? (Tokoni ke ʻiloʻi ʻe he kau akó ha moʻoni hangē ko ʻení: ʻOku faʻa folofola mai ʻa e ʻEikí kiate kitautolu ʻi he kihiʻi leʻo siʻi ʻo e Laumālié.)

• ʻOkú ke pehē ko e hā ʻa e ʻuhinga ʻoku mahuʻinga ai ke ʻiloʻi ʻoku faʻa folofola mai ʻa e ʻEikí kiate kitautolu ʻi ha kihiʻi leʻo siʻí? ʻOku fakahaaʻi fēfē heni Hono natulá mo e ngaahi ʻulungāngá?

• Te tau lava fēfē ʻo fakamālohia ʻetau malava ke fakatokangaʻi ʻa e ngaahi ueʻi fakalongolongo ʻa e Laumālie Māʻoniʻoní?

ʻOange ha faingamālie ki he kau akó ke tuku ha taimi ke ako ai ʻa e ngaahi fehuʻi naʻa nau hiki ʻi he kamataʻanga ʻo e ʻekitivitī akó. Te nau lava ʻo fekumi ʻi he folofolá, ngaahi akonaki mei he kau taki ʻo e Siasí, pe ngaahi maʻuʻanga tokoni kehe ʻi he Gospel Library ke maʻu e tali ki heʻenau ngaahi fehuʻí. ʻOku kau ʻi he sīpinga ʻo e ngaahi maʻuʻanga tokoni te nau lava ʻo fakaʻaongaʻí ʻa e Fakahinohino ki he Ngaahi Folofolá, “Fakahaá” (Gospel Library); Ngaahi Tefitó mo e Ngaahi Fehuʻí, “Fakahā” (Gospel Library); pe ko e lea ʻa ʻEletā Keuli E. Sitīvenisoni ʻoku ui ko e “Ngaahi Ueʻi ʻa e Laumālié” (Liahona, Nōvema 2023, 42–45).

Hili hono maʻu ʻe he kau akó ha taimi ke fekumi ai ki he ngaahi talí, fakaafeʻi kinautolu ke vahevahe ʻa e meʻa naʻa nau maʻú, ʻuluakí mo ha hoa pe kulupu tokosiʻi pea ʻi he hili iá pea vahevahe mo e kalasí. (Fakamanatu ki he kau akó kapau naʻe teʻeki ke nau maʻu ha ngaahi tali, te nau lava ʻo hokohoko atu ke fekumi ki ha tali ʻi he lotu, fealeaʻaki mo e niʻihi ʻoku nau falala ki aí, mo e ngaahi maʻuʻanga tokoni kehe kuo fokotuʻu fakalangí.)

Fakakaukau foki ke aleaʻi ha ngaahi fehuʻi hangē ko ʻení:

• Ko e hā ha faleʻi te ke fai ki he kakai lalahi kei talavou kehe ʻoku ʻi ai haʻanau ngaahi fehuʻi tatau mo koé?

• ʻE fakamālohia fēfē ho vā fetuʻutaki mo e Tamai Hēvaní mo Sīsū Kalaisí ʻi hoʻo fāifeinga ke ʻiloʻi mo tali ʻa e ngaahi ueʻi fakalaumālié?

• Ko e hā ha ngaahi sīpinga ʻo e founga naʻe toki folofola atu ai ʻa e ʻEikí kiate koe ʻi he kihiʻi leʻo siʻi ʻo e Laumālié? (Fakatokanga ki he kau akó ke ʻoua te nau vahevahe ha ngaahi aʻusia ʻoku fuʻu fakatāutahá.)

Fakaafeʻi ʻa e kau akó ke nau tohi ʻa e ngaahi sitepu te nau fie fakahoko ke fakatokangaʻi lelei ange pe maʻu ai ha fakahā mei he Laumālie Māʻoniʻoní. Fakamoʻoni ki he ngaahi moʻoni kuo mou aleaʻi ʻi he ʻaho ní.

Foki ki he “Ngaahi ʻEkitivitī Ako ke Fili Mei Aí.”