ʻEkesōtosi 14–18

Fakaafeʻi e kau akó ke nau fakakaukau ki ha ngaahi tūkunga ʻe ala fehangahangai mo e kakai lalahi kei talavoú te ne lava ʻo ʻai ke nau ongoʻi ʻefihia pe ilifia. Fakakaukau ke hiki ʻenau ngaahi talí ʻi he palakipoé. Te ke lava foki ʻo fakaafeʻi ʻa e kau akó ke nau fakakaukauloto fakalongolongo ki ha ngaahi taimi kuo nau ongoʻi ʻefihia ai pea ʻikai lava ke nau sio ki ha founga ke nau laka atu ai ki muʻa ʻi heʻenau moʻuí. Poupouʻi kinautolu ʻi heʻenau ako he ʻaho ní ke fekumi ki ha ueʻi fakalaumālie mei he Laumālie Māʻoniʻoní ke tokoniʻi kinautolu ke nau ʻiloʻi e founga ke fakafeangai ai lolotonga e ngaahi tūkunga pehení.

Fakamanatu ki he kau akó naʻe hili e mavahe ʻa Mōsese mo e fānau ʻIsilelí mei ʻIsipité, naʻa nau ʻapitanga ʻo ofi ki he Tahi Kulokulá. ʻI he taimi naʻe tuli ai kinautolu ʻe Felo mo ʻene kau taú, naʻe ʻilo ʻe he kakai ʻIsilelí ʻoku nau fihia kovi ʻo ʻikai ha toe hala ke nau hola ai (vakai, ʻEkesōtosi 14:1–9). Fakaafeʻi e kau akó ke fakalaulauloto pe ne nau mei ongoʻi fēfē ʻi he tūkunga ko iá. Te ke lava ʻo fakaʻaliʻali ha fakatātā ʻo e Tahi Kulokulá ke tokoni ke nau fakakaukauloto ki he meʻa naʻe hokó.

Fakamahinoʻi ange ʻe ala tokoni ke fakafehoanaki e tali ʻa e kau ʻIsilelí ʻi he tūkunga ko ʻení mo e tali ʻa Mōsesé. (Te ke lava ʻo maʻu ha ngaahi fakakaukau ki hono fakafeʻiloaki ʻo e taukei ko ʻení ʻi he “Ko e Kumi ʻa e Ngaahi Fakafehoanaki ʻi he Folofolá” ʻi he Ngaahi Taukei Ako Folofolá.)

Fakaafeʻi e kau akó ke lau ʻa e ʻEkesōtosi 14:10–14, ʻo kumi e ngaahi faikehekehe ʻi he founga tali ʻa e kakai ʻIsilelí ki he tūkunga ko ʻení mo e founga tali ʻa Mōsesé. Te mou lava foki ʻo aleaʻi fakataha ʻa e ngaahi fehuʻi ko ʻení:

• Ko e hā e meʻa naʻe tokanga taha ki ai ʻa e kau ʻIsilelí ʻi he ngaahi tūkunga ko ʻení? Ko e hā e meʻa naʻe tokanga taha ki ai ʻa Mōsesé?

• Ko e hā e meʻa ʻokú ke ako mei he fakafehoanaki ko ʻení? (Makehe mei he ngaahi moʻoni kehe ʻe lava ke vahevahe ʻe he kau akó, tokoni ke mahino kiate kinautolu ʻa e meʻá ni: Te tau lava ʻo ikunaʻi ʻa e manavaheé ʻi he taimi ʻoku tau tuʻu maʻu ai mo hanga ki he ʻEikí.)

Fakaafeʻi e kau akó ke nau ako e kolosi ʻa ʻIsileli ʻi he Tahi Kulokulá ʻi he ʻEkesōtosi 14:15–31. Tuku ke nau tokanga ki he meʻa te nau lava ʻo ako fekauʻaki mo e ʻEikí mei he ngaahi veesi ko ʻení. Hili ha taimi feʻunga, fakaafeʻi e kalasí ke nau vahevahe ha ngaahi fakakaukau ʻaki hono aleaʻi e ongo fehuʻi ko ʻení mo hanau hoa:

• Ko e hā e meʻa naʻá ke ako fekauʻaki mo e ʻEikí mei he talanoa ko ení?

• ʻE lava fēfē ke tokoniʻi kitautolu ʻe hono manatua e aʻusia ʻa e kau ʻIsilelí ʻi heʻenau kolosi he Tahi Kulokulá ʻi he ngaahi faingataʻa ʻoku tau fehangahangai mo ia he ʻaho ní?

Fakakaukau ke fakaafeʻi e kau akó ke fakakaukau ki ha ngaahi taimi ʻi heʻenau moʻuí naʻe tokoniʻi ai kinautolu ʻe he ʻEikí ʻi heʻenau tui kiate Ia lolotonga honau ngaahi faingataʻaʻiá. Te ke lava ʻo fakaafeʻi ha kau ako ʻe loto-fiemālie ke vahevahe ʻenau ngaahi aʻusiá. Fakakaukau ke huluʻi e foʻi vitiō “Feeling the Lord’s Love and Goodness in Trials” (4:17).

4:21

Foki ki he “Ngaahi ʻEkitivitī Ako ke Fili Mei Aí.”

Fakakaukau ke fakaʻaliʻali e ngaahi fakamatala ko ʻení pea ʻoange ha taimi ki he kau akó ke nau fakafuofuaʻi fakalongolongo kinautolu ʻo fakaʻaongaʻi ha meʻafua mei he 1 (tātātaha ke moʻoni kiate au) ki he 5 (meimei moʻoni maʻu pē kiate au).

1. ʻOku ou ongoʻi mo fakahaaʻi ʻeku houngaʻia ki he ʻOtuá.

2. ʻOku ou faʻa lāunga ʻi he taimi ʻoku faingataʻa ai ʻa e ngaahi meʻá.

3. ʻOku ou feinga ke fakafetaʻi ki he ʻOtuá ʻo tatau ai pē pe ko e hā hoku tūkungá.

Fakamanatu ki he kau akó naʻe fehangahangai e kakai ʻIsilelí mo ha ngaahi faingataʻa lahi hili ʻenau mavahe mei ʻIsipité. Fakaafeʻi kinautolu ke ako ʻa e ngaahi potufolofola ko ʻení, ʻo kumi e founga naʻe tali ʻaki ʻe he kakai ʻIsilelí honau ngaahi faingataʻaʻiá:

• ʻEkesōtosi 15:22–25

• ʻEkesōtosi 16:1–8

• ʻEkesōtosi 17:1–6

Hili hono ako ʻe he kau akó e ngaahi veesi ko ʻení, fakakaukau ke fehuʻi ange:

• Ko e hā ha meʻa ʻoku makehe kiate koe fekauʻaki mo e founga naʻe tali ʻaki ʻe he kakai ʻIsilelí honau ngaahi faingataʻaʻiá?

• Ko e hā e ʻuhinga ʻoku faingofua ai ke lāunga ʻi he taimi ʻoku ʻikai hoko ai e ngaahi meʻá ʻi heʻetau foungá?

• ʻOku kehe fēfē nai ʻa e lāungá mei hono ʻohake totonu e ngaahi hohaʻá pe kole ha tokoní?

Fakakaukau ke tufa ʻa e laʻipepa tufa “Ko Hono Ikunaʻi ʻo e ʻAhiʻahi ke Lāungá” pea fakaafeʻi e kau akó ke nau fakakakato ia ʻiate kinautolu pē pe mo hanau hoa.

Hili hono fakakakato ʻe he kau akó ʻa e laʻipepa tufá, fakaafeʻi kinautolu ke vahevahe ha niʻihi ʻo e ngaahi tefitoʻi moʻoni naʻa nau maʻú. ʻOku kau ʻeni ʻi he ngaahi sīpinga ʻo e ngaahi moʻoni te nau ala lave ki aí: ʻI he taimi ʻoku tau lāunga ai fekauʻaki mo e kau tamaioʻeiki kuo uiuiʻi ʻe he ʻEikí, ʻoku tau lāunga foki ai fekauʻaki mo e ʻEikí. ʻE lava ke fakaʻatā kitautolu ʻe he tokanga taha kia Sīsū Kalaisí ke tau ongoʻi fiefia, neongo pe ko e hā hotau ngaahi tūkungá. ʻOku tokoniʻi kitautolu ʻe he ongoʻi houngaʻiá ke tau aʻusia ʻa e fiefiá.

Te mou lava foki ʻo aleaʻi ha ngaahi fehuʻi hangē ko ʻení:

• ʻOkú ke pehē ʻe tokoniʻi fēfē kitautolu ʻe he ngaahi moʻoni naʻá ke maʻú ke tau ikunaʻi ʻa e ʻahiʻahi ke lāungá?

• ʻOkú ke pehē ko e hā e ʻuhinga ʻe lava ke tokoniʻi ai kitautolu ʻe he tokanga taha kia Sīsū Kalaisí ke tau ongoʻi fiefia neongo pe ko e hā hotau ngaahi tūkungá?

• Ko e hā ha meʻa kuó ne tokoniʻi koe ke siʻisiʻi ange hoʻo lāungá kae falala lahi ange ki he ʻOtuá?

Te ke lava ʻo ʻai ke fakalaulauloto ʻa e kau akó ki he ngaahi ngāue te nau lava ʻo fai ke fakaʻehiʻehi ai mei he lāungá. Fakaafeʻi kinautolu ke lekooti e ngaahi fakakaukau mo e ngaahi ueʻi fakalaumālie kuo nau maʻú.

Foki ki he “Ngaahi ʻEkitivitī Ako ke Fili Mei Aí.”

Kamata ʻaki hano fakaafeʻi e kau akó ke nau fakakaukau ki heʻenau fiemaʻu fakataautaha ke falala kia Sīsū Kalaisi ʻi he ʻaho takitahá. Ko e founga ʻe taha te ke lava ʻo fai ai ʻení ko hono lau, hivaʻi, pe fanongo ki he himi “ʻOku ou Fiemaʻu Koe” (Ngaahi Himí) pe ko ha himi ʻe taha fekauʻaki mo e falala kia Sīsū Kalaisí. Poupouʻi e kau akó ke vahevahe mo e kalasí pe mo ha hoa ha ngaahi foʻi lea pe kupuʻi lea ʻoku mahuʻingamālie kiate kinautoluú pea mo hono ʻuhingá.

Kole ki he kau akó ke fakalaulauloto ki heʻenau ngaahi feinga ke falala ki he ʻEikí ʻi he ʻaho takitaha. Te nau lava ʻo fakakaukau ki ha ngaahi ngāue pau ʻoku nau fai ʻokú ne fakahaaʻi ʻa e falala ki he ʻEikí. Te nau lava foki ʻo fakakaukau ki ha ngaahi tafaʻaki ke fakaleleiʻi. Poupouʻi kinautolu ʻi heʻenau akó ke nau ongoʻingofua ʻa e ngaahi ueʻi mei he Laumālié fekauʻaki mo e founga te nau lava ai ʻo falala kakato ange ki he ʻEikí ʻi he ʻaho takitaha.

Fakakaukau ke fakaʻaliʻali ha fakatātā ʻokú ne fakahaaʻi hono tānaki ʻe he fānau ʻIsilelí ʻa e maná. Fakamanatu ki he kau akó, naʻe hili hono fakahaofi e fānau ʻIsilelí mei ʻIsipité pea nau kolosi fakaofo ʻi he Tahi Kulokulá, naʻa nau fehangahangai mo ha ngaahi faingataʻa lahi ʻi he feituʻu maomaonganoá. Ko e taha ʻo e ngaahi faingataʻa ko ʻení ko e siʻisiʻi ʻa e meʻakaí. Ko e talí, naʻe foaki ange ai ʻe he ʻEikí ha mana mei he langí ke fafanga kinautolu.

ʻOange ha taimi ke ako ʻe he kau akó ʻa e ngaahi potufolofola ko ʻení. ʻI heʻenau akó, fakaafeʻi kinautolu ke lekooti ha ngaahi lēsoni fakalaumālie te nau lava ʻo ako mei he ngaahi akonaki ko ʻeni fekauʻaki mo e maná.

• ʻEkesōtosi 16:2–5, 14–21, 31

• Sione 6:31–35, 47–51

ʻI he ʻosi e ako ʻa e kau akó, fakaafeʻi kinautolu ke vahevahe ʻenau ngaahi fakakaukaú ʻi ha fanga kiʻi kulupu tokosiʻi. Te ke lava ʻo fakaʻaliʻali ʻa e ngaahi fehuʻi ko ʻení pea fakaafeʻi ʻa e tokotaha ako takitaha ke ne fili ha fehuʻi ʻe taha pe lahi ange ke tali:

• Ko e hā ha ngaahi lēsoni fakalaumālie naʻá ke ako mei he ngaahi akonaki ko ʻeni fekauʻaki mo e maná?

• Ko e hā e meʻa naʻe tokoni e ngaahi akonaki ko ʻení ke mahino kiate koe fekauʻaki mo e falala kia Sīsū Kalaisí?

• Ko e hā e meʻa te tau lava ʻo fakahoko ʻi he ʻahó ni ʻa ia ʻoku tatau mo hono tānaki ʻo e maná?

Fakaafeʻi ha kau ako ke vahevahe mo e kalasí ʻenau fakakaukau mei heʻenau ngaahi fealēleaʻakí. Lolotonga e vahevahe ʻa e kau akó, te nau lava ʻo ʻiloʻi ha ngaahi moʻoni hangē ko ʻení: Kapau te tau falala fakaʻaho ki he ʻEikí, te Ne tāpuakiʻi kitautolu ʻaki ha fakaivia fakalaumālie. ʻI heʻetau manatuʻi fakaʻaho e ʻEikí, ʻe tupulaki ʻetau falala kiate Iá.

Ke tokoni ke mahino lelei ange ki he kau akó ʻa e ngaahi moʻoni ko ʻení, fakakaukau ke mamata ʻi he foʻi vitiō “Meʻakai Fakaʻahó: Sīpingá” (2:51). Te ke lava ʻo fai ange ha ngaahi fehuʻi hangē ko ʻení:

2:37

• Ko e hā e ʻuhinga ʻoku lelei ange ai ʻa e falala fakaʻaho ki he ʻEikí ʻi hano maʻu pē ha ngaahi aʻusia fakalaumālie maʻongoʻonga ʻoku tātātaha ʻene hokó?

• Ko e hā ha ngaahi founga ʻokú ke maʻu fakaʻaho ai ha ivi mo ha meʻakai ʻo fakafou ʻia Sīsū Kalaisi? Ko e hā ha faikehekehe kuo hoko ʻi hoʻo moʻuí koeʻuhí ko e ngaahi founga ko ʻení?

Fakakaukau ke vahevahe ʻa e fakamatala ko ʻeni naʻe fai ʻe Palesiteni Lāsolo M. Nalesoní:

ʻE holofa vave ʻaupito ha fakamoʻoni ʻoku ʻikai ke fafanga fakaʻaho “ʻaki ʻa e folofola lelei ʻa e ʻOtuá” [Molonai 6:4]. Ko ia ai, ʻoku mahino ʻa e faitoʻo ki he founga ʻa Sētané: ʻOku tau fiemaʻu ke fai ha moihū fakaʻaho ki he ʻEikí mo ako ʻEne ongoongoleleí. (“Ko e Mālohi ʻo e Ivi Fakalaumālié,” Liahona, Mē 2022, 99)

ʻOange ha taimi ki he kau akó ke nau fakakaukau ki he meʻa te nau fai ke nau falala kakato ange ai ki he ʻEikí ʻi he ʻaho takitaha. Poupouʻi kinautolu ke hiki ʻenau ngaahi taumuʻá mo ha faʻahinga ongo fakalaumālie pē ne nau maʻu.

Foki ki he “Ngaahi ʻEkitivitī Ako ke Fili Mei Aí.”