“Ko e Kalaisi Moʻuí: Ko e Fakamoʻoni ʻa e Kau ʻAposetoló”

Fakaʻaliʻali ha fakatātā ʻo Sīsū Kalaisi, hangē ko ia ʻi he kamataʻanga ʻo e lēsoni ko ʻení. Te ke lava foki ʻo fakaafeʻi e kau akó ke kumi e ʻīmisi ʻo e Fakamoʻuí ʻoku nau saiʻia taha aí. Fakaafeʻi kinautolu ke fakakaukauloto fakalongolongo pea tohi ha tali fakataautaha ki ha fehuʻi hangē ko ʻení:

• Ko hai ʻa Sīsū Kalaisi kiate koe? Ko e hā hoʻo ngaahi fakakaukau, ongo, pe tui fekauʻaki mo Iá?

Fakamanatu ange ki he kau akó ʻi he ʻaho 1 ʻo Sānuali 2000, naʻe vahevahe ai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa ʻenau fakamoʻoni kia Sīsū Kalaisí ʻi he “Ko e Kalaisi Moʻuí: Ko e Fakamoʻoni ʻa e Kau ʻAposetoló.”

Fakamatalaʻi ange kuo poupouʻi kitautolu ʻe he kau taki ʻo e Siasí ke tau ako ʻa e fakamatala toputapu ko ʻení. Fakakaukau ke lau fakataha ha niʻihi pe kotoa ʻo e ngaahi fakamatala ko ʻení ke teuteuʻi e kau akó ke nau ako ʻa e “Ko e Kalaisi Moʻuí.” Fakaafeʻi e kau akó ke vahevahe pe ko e hā e meʻa ʻoku mahuʻinga kiate kinautolú.

ʻOku tau mamata, fanongo, lau, ako mo vahevahe e ngaahi lea ʻa e kau palōftá ko ha fakatokanga mo ha maluʻanga. Hangē ko ʻení, ne fuoloa hono ʻomi e “Ko e Fāmilí: Ko ha Fanongonongo ki Māmani” kimuʻa pea tau aʻusia e ngaahi faingataʻa ʻoku fehangahangai mo e fāmilí he taimi ní. Naʻe teuteuʻi e “Ko e Kalaisi Moʻuí: Ko e Fakamoʻoni ʻa e Kau ʻAposetoló” kimuʻa ʻi he taimi te tau fiemaʻu lahi taha aí. (Robert D. Hales, “Konifelenisi Lahí: Ko e Fakamālohia ʻo e Tuí mo e Fakamoʻoní,” Liahona, Nōvema 2013, 7)

Kuo ako maʻuloto ʻe ha kāingalotu tokolahi [ʻa e ngaahi moʻoni ʻi he “Ko e Kalaisi Moʻuí”]. ʻOku ʻi ai ha niʻihi ʻoku ʻikai ke nau fuʻu ʻilo ʻoku ʻi ai ha meʻa pehē. ʻOku ou tapou atu ʻi hoʻomou feinga ke ʻilo lahi ange kia Sīsū Kalaisí, ke mou ako e “Ko e Kalaisi Moʻuí.” (Russell M. Nelson, “Ko Hono Tohoakiʻi mai e Mālohi ʻo Sīsū Kalaisí ki Heʻetau Moʻuí,” Liahona, Mē 2017, 40)

ʻI heʻeku ako ki he moʻui mo e ngaahi akonaki ʻa Sīsū Kalaisí ʻi he tokanga lahi mo tukupā ange ke ako maʻuloto e “Ko e Kalaisi Moʻuí,” naʻe tupulaki ai ʻeku houngaʻia mo e ʻofa ki hotau Fakamoʻuí. ʻOku ʻi he sētesi takitaha ʻo e tohi fakalaumālie ko iá, ha akonaki pea ʻokú ne fakalahi ʻeku mahino ki Hono ngaahi fatongia fakalangí mo e misiona he māmaní. (Jean B. Bingham, “Ke Kakato Ai Hoʻomou Fiefiá,” Liahona, Nōvema 2017, 85)

Ke tataki e kau akó ʻi heʻenau ako ʻa e “Ko e Kalaisi Moʻuí,” fakakaukau ke fakaʻaliʻali ʻa e ngaahi fakahinohino ko ʻení.

1. Ako ʻa e “Ko e Kalaisi Moʻuí.” Fakaʻilongaʻi e ngaahi lea pe kupuʻi lea ʻoku ʻuhingamālie kiate koé.

2. Kumi ha ngaahi moʻoni mei he “Ko e Kalaisi Moʻuí” ʻoku fakatātaaʻi ʻi he Fuakava Motuʻá pe ʻoku fekauʻaki mo e ngaahi folofola ʻo e Fuakava Motuʻá. Hangē ko ʻení, ko e hā e meʻa ʻokú ke maʻu ʻi he “Ko e Kalaisi Moʻuí” ʻoku fekauʻaki mo e ngaahi moʻoni ʻi he ngaahi potufolofola ko ʻeni ʻi he Fuakava Motuʻá? Sēnesi 1:1–2, 31 (vakai foki, Mōsese 2:1); Siope 19:25–26; Saame 9:7–8; Lea Fakatātā 3:5–6; ʻĪsaia 12:2; 45:23; 53:3–5.

3. Lekooti e ngaahi fakakaukau mo e ngaahi ongo ʻokú ke maʻu fekauʻaki mo Sīsū Kalaisi ʻi hoʻo akó.

Ke tokoni ke feakoʻaki ʻa e kau akó, fakaafeʻi kinautolu ke vahevahe ʻenau ngaahi fakakaukaú ʻi ha fanga kiʻi kulupu tokosiʻi. Te ke lava foki ʻo fakaafeʻi kinautolu ke aleaʻi e ongo fehuʻi ko ʻení:

• Fakakaukau ki he ngaahi moʻoni naʻá ke ʻilo fekauʻaki mo e Fakamoʻuí. Ko e hā ha meʻa ʻoku nau tokoni ke mahino kiate koe fekauʻaki mo e fatongia te Ne lava ʻo fakahoko ʻi hoʻo moʻuí?

• ʻE ʻaonga fēfē kiate koe haʻo tokanga lahi ange kia Sīsū Kalaisi ʻi hoʻo moʻuí?

Ke fakaʻosí, fakaafeʻi e kau akó ke fakakaukau ki he founga te nau lava ai ʻo fakaʻaongaʻi ʻa e “Ko e Kalaisi Moʻuí” ke tokoni ke fakamālohia honau vā fetuʻutaki mo e Tamai Hēvaní mo Sīsū Kalaisí. ʻOange ha taimi ki he kau akó ke nau fakakaukau mo hiki ai e ngaahi ongo mei he Laumālie Māʻoniʻoní kuo nau maʻu lolotonga e lēsoní.