Teutalōnome 6–8; 15; 18; 29–30; 34

Te ke lava ʻo vahevahe ʻa e tūkunga ko ʻení mo hoʻo kau akó pea fakaafeʻi ke nau fakakaukau pe kuo nau maʻu nai ha ngaahi fakakaukau tatau:

ʻOku ʻalu ʻa ʻIsa ki he houalotu sākalamēnití ʻi ha hoʻatā Sāpate ʻe taha. ʻI heʻene fanongo ki he ongo lotu tāpuakiʻi ʻo e sākalamēnití, ʻoku makehe kiate ia ʻa e kupuʻi lea “manatu maʻu ai pē kiate Ia.” ʻOkú ne fifili pe ʻoku mahino moʻoni nai kiate ia ʻa e ʻuhinga ke manatu maʻu ai pē kia Sīsū Kalaisí mo e founga te ne lava ai ʻo fai ʻeni ʻi he meʻa kotoa pē ʻoku hoko ʻi heʻene moʻuí.

Te ke lava ʻo fakaafeʻi e kau akó ke nau fakakaukau ki he tuʻunga lelei ʻo ʻenau tauhi ʻa e fekau ke manatu maʻu pē kia Sīsū Kalaisí. Poupouʻi ke nau hiki ʻa e meʻa ʻoku nau ongoʻi ke fai ke manatu maʻu ai pē kiate Ia ʻi heʻenau ako ʻa e Teutalōnome 6–8.

Te ke lava ʻo fakamanatu ki he kau akó naʻe hili ha taʻu ʻe 40 ʻo e hē holo ʻa e fānau ʻIsilelí ʻi he toafá, naʻe ʻamanaki ke nau hū ki he fonua ʻo e talaʻofá. ʻOku ʻi he tohi Teutalōnomé ʻa e faleʻi fakaʻosi ʻa Mōsese ki hono kakaí. Ko e konga lahi ʻo ʻene faleʻí naʻe nofotaha ia ʻi he ngaahi meʻa mahuʻinga naʻe hoko ʻi he feituʻu maomaonganoá ʻa ia naʻá ne loto ke manatuʻi ʻe hono kakaí.

Ke tokoni ke ako ʻe he kau akó ʻa e faleʻi ʻa Mōsesé, fokotuʻutuʻu e kalasí ki ha ngaahi hoa pe fanga kiʻi kulupu iiki. Fakaʻaliʻali ʻa e ngaahi potufolofola mo e fakahinohino ko ʻení, pea ʻoange ha taimi feʻunga ki he kau akó ke nau ako mo fealeaʻaki ai:

• Teutalōnome 6:3–13, 20–25

• Teutalōnome 8:1–18

1. Ako fakafoʻituitui ʻa e Teutalōnome 6:3–13, 20–25 pe Teutalōnome 8:1–18.

2. Kumi e meʻa naʻe faleʻi ʻe Mōsese ki he kakaí ke nau manatuʻí. Fakakaukau ke fakaʻilongaʻi e ngaahi meʻa naʻá ke maʻú.

3. Vahevahe ʻa e faleʻi naʻá ke maʻú. Fakamatalaʻi ʻa e ʻuhinga ʻokú ke ongoʻi ai naʻe mei mahuʻinga ʻa e faleʻi ko ʻení ki he fānau ʻIsilelí ʻi he taimi ko iá.

Hili e fealeaʻaki ʻa e kau akó, fakaafeʻi ke nau vahevahe mo e kalasí ha niʻihi ʻo ʻenau ngaahi fakakaukaú. Te ke lava foki ʻo fehuʻi ange:

• Ko e hā e meʻa naʻá ke maʻu ʻi he ngaahi akonaki ʻa Mōsesé ʻe ala tokoni kiate kitautolu he ʻaho ní? (Mahalo ʻe vahevahe ʻe he kau akó ha ngaahi moʻoni kehekehe, kau ai ʻeni: ʻOku kole mai ʻe he ʻEikí ke tau manatuʻi Ia mo e ivi tākiekina kuó Ne fakahoko ʻi heʻetau moʻuí.)

Ke tokoni ke mahino ki he kau akó ʻa e founga ʻe lava ke ʻaonga ai kiate kitautolu ʻa hono manatua ʻo e ʻEikí, fakakaukau ke vahevahe ʻa e lea ko ʻeni ʻa ʻEletā Teili G. Lenilaní:

ʻOku finangalo ʻa ʻetau Tamai Hēvaní ke tau manatu ki Heʻene angalelei mo Hono ʻAlo ʻOfaʻangá, ʻo ʻikai ko e fakahōifua kiate Kinauá, ka ko e tākiekina ʻoku maʻu ʻe he manatu ko iá, ʻiate kitautolú. ʻI he fakakaukau ko ia ki Heʻena angaʻofá, ʻoku fakalahi ai ʻetau fakakaukaú mo e mahinó. ʻI heʻetau fakakaukauloto ki Heʻena ʻofa mamahí, ʻoku tau loto-fakatōkilalo, faʻa lotu, pea mo tuʻu taʻe-ueʻia. (“Fakakaukau ki he Angalelei mo e Māfimafi ʻo e ʻOtuá,” Liahona, Mē 2020, 41)

Fakakaukau ke aleaʻi ha niʻihi pe kotoa ʻo e ongo fehuʻi ko ʻení:

• Ko e hā ha meʻa te ne ala taʻofi e kakaí mei hono manatua ʻo e ʻEikí he ʻaho ní?

• Ko e hā ha ngaahi meʻa pau ʻe ala tokoni ke tau manatua ʻa e ʻOtuá mo Hono ivi tākiekiná ʻi heʻetau moʻuí? (Fakakaukau ke hiki e tali ʻa e kau akó ʻi he palakipoé. Te ke lava foki ʻo mamata ʻi he ongo vitiō “ʻOiauē, Manatu, Manatu” [1:28] pe “Spiritual Memories” [Ngaahi Manatu Fakalaumālié] [1:19].)

  

  1:34
  

  1:19

Te ke lava ʻo fakaafeʻi e kau akó ke nau fakaʻaongaʻi ha kiʻi taimi ke fakamanatu ai e angaʻofa ʻa e Tamai Hēvaní mo Sīsū Kalaisí. Te nau lava ʻo tuku ha taimi ke lekooti ʻenau ngaahi tali ki ha taha pe fakatouʻosi ʻo e ongo fehuʻi ko ʻení:

• Ko e hā e meʻa ʻokú ke fakakaukau ki ai ʻi he taimi ʻokú ke fakakaukau ai ki he angaʻofa ʻa e Tamai Hēvaní mo Sīsū Kalaisi ʻi hoʻo moʻuí pe moʻui ʻa e niʻihi kehé?

• Ko e hā ha ngaahi tāpuaki kuó ke aʻusia ʻi hoʻo feinga ke manatuʻi ʻa e ivi tākiekina ʻo e Tamai Hēvaní mo Sīsū Kalaisi ʻi hoʻo moʻuí?

Fakaafeʻi e kau akó ke nau fakakaukau ki ha founga ʻe taha ʻoku nau ongoʻi ai ke manatu lahi ange ki he ʻEikí ʻi heʻenau moʻuí, pea poupouʻi ke nau lekooti ʻenau ngaahi fakakaukaú. Te nau lava foki ʻo faʻu ha fakamanatu maʻanautolu ʻe lava ke fokotuʻu ʻi ha feituʻu te nau mamata maʻu pē ki ai.

Foki ki he “Ngaahi ʻEkitivitī Ako ke Fili Mei Aí.”

Fakaafeʻi e kau akó ke fakakaukau ki ha taha ʻoku nau ʻofa ai. Te nau lava ʻo fakaʻaliʻali ha tā ʻo e tokotaha ko iá ki he kalasí pe ko hanau hoa. Poupouʻi ke nau fakakaukau ki he founga kuo tupulaki pe liliu ai honau vā fetuʻutaki mo e tokotaha ko iá ʻi he fakalau ʻa e taimí. ʻE lava ke vahevahe ʻe he kau akó ʻa e ʻuhinga ʻoku nau ʻofa ai ʻi he tokotaha ko iá pe ko e meʻa kuo nau fai ke ongoʻi ai ha ʻofa lahi ange kiate iá.

Fakamatalaʻi ange ʻoku hangē pē ko ʻetau fakaʻaongaʻi e taimí mo ngāue ke fakamālohia hotau vā fetuʻutaki mo e niʻihi ʻoku tau ʻofa aí, ʻoku mahuʻinga foki ke tau tokanga taha ki hono fakamālohia hotau vā fetuʻutaki mo e ʻofa ki he ʻOtuá. Poupouʻi e kau akó ʻi heʻenau ako he ʻaho ní ke fekumi ki he fakahinohino ʻa e Laumālie Māʻoniʻoní ke tokoni ke nau fakatokangaʻi e founga te nau lava ai ʻo fakamālohia ʻenau ʻofa ki he ʻOtuá.

Fakamanatu ki he kau akó ʻoku ʻi he tohi Teutalōnomé ʻa e faleʻi fakaʻosi ʻa Mōsese ki he kakai ʻIsilelí kimuʻa pea tataki kinautolu ʻe Sōsiua ki he fonua ʻo e talaʻofá. Fakaafeʻi e kau akó ke nau lau ʻa e Teutalōnome 6:1–6 mo e 30:15–20, ʻo kumi ha niʻihi ʻo e ngaahi faleʻi ʻa Mōsese ki he kakaí. Fakakaukau ke ʻeke ange ha ngaahi fehuʻi hangē ko ʻení ke tokoni ke nau vahevahe ʻa e meʻa naʻa nau akó:

• Ko e hā e meʻa naʻe mahuʻinga kiate koe mei he faleʻi ʻa Mōsesé?

• Te ke fakamatalaʻi fakanounou fēfē nai ʻa e faleʻi ko ʻení ko ha fakamatala ʻo e moʻoní? (Mahalo ʻe fakahā ʻe he kau akó ha foʻi moʻoni hangē ko ʻení: ʻOku fekauʻi kitautolu ʻe he ʻOtuá ke tau ʻofa kiate Ia ʻaki hotau lotó, laumālié, mo e iví kotoa.)

Fakamahinoʻi ange lolotonga e ngāue fakafaifekau ʻa Sīsū Kalaisi ʻi he māmaní, naʻá Ne akoʻi ko e ʻofa ki he ʻOtuá “ko e ʻuluaki pea ko e lahi ia ʻo e fekaú” (Mātiu 22:38). Te ke lava ʻo fokotuʻu ange ki he kau akó ke nau fakafehokotaki pe fakafekauʻaki ʻa e Teutalōnome 6:5 ki he Mātiu 22:35–40.

Ke tokoni ke mahino lelei ange ki he kau akó ʻa e fekau ko ʻení, fakakaukau ke fakaʻaliʻali ʻa e ngaahi fehuʻi ko ʻení pea fakaafeʻi ke nau fili ha fehuʻi ʻe taha pe lahi ange ke nau tokanga taha ki ai. (Te ke lava foki ʻo fakafeʻiloaki ʻa e “Ko Hono ʻEke ha Ngaahi Fehuʻi ʻOkú Ne Fakaafeʻi ʻa e Ako Fakamātoató” ʻi he Ngaahi Taukei Ako Folofolá pea tuku ke faʻu ʻe he kau akó haʻanau ngaahi fehuʻi pē ʻanautolu.) ʻOange ha taimi ki he kau akó ke nau fekumi ʻi he folofolá, ngaahi pōpoaki mei he kau taki ʻo e Siasí, pe ngaahi maʻuʻanga tokoni kehe ʻi he Gospel Library ke maʻu ha ngaahi fakakaukau ʻoku fekauʻaki mo e ngaahi fehuʻi ko ʻení.

• ʻOku ʻuhinga ki he hā ke ʻofa ki he ʻOtuá ʻaki hoku lotó, laumālié, mo e iví kotoa?

• Lolotonga e ngāue fakafaifekau ʻa Sīsū Kalaisi ʻi he māmaní, naʻá Ne fakahaaʻi fēfē ʻEne ʻofa ʻi he Tamai Hēvaní?

• Ko e hā ha faikehekehe ʻe ala hoko ʻi heʻeku moʻuí ʻi heʻeku ʻofa ki he ʻOtuá ʻaki hoku lotó, laumālié, mo hoku iví kotoá?

• Ko e hā ha meʻa te ne ala taʻofi au mei he ʻofa ki he ʻOtuá ʻaki hoku lotó, laumālié, mo e iví kotoá?

• Ko e hā ha meʻa ʻe ala tokoni ke u ongoʻi ha ʻofa lahi ange ki he ʻOtuá?

Kapau ʻoku fiemaʻu tokoni e kau akó ki hono kumi e ngaahi maʻuʻanga tokoní, te ke lava ʻo fai ange ha ngaahi fokotuʻu hangē ko ʻení: Fakahinohino ki he Ngaahi Folofolá, “ʻOfá,” Gospel Library; D. Todd Christofferson, “Fakamuʻomuʻa ʻa e ʻUluaki Fekaú” (fakamatala fakakomipiuta pē), Liahona, Fēpueli 2023, (Gospel Library); “ʻOfa ki he ʻOtuá, ʻofa ki ho kaungāʻapí,” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022), 10–12.

ʻI he ʻosi e ngāue ʻa e kau akó, fakaafeʻi ke nau vahevahe ʻenau ngaahi fakakaukaú ʻi ha fanga kiʻi kulupu tokosiʻi. Fakaafeʻi leva ha kau ako ʻe niʻihi ʻe loto-fiemālie ke vahevahe ha niʻihi ʻo ʻenau fakakaukaú mo e kalasí. Te mou lava foki ʻo aleaʻi ha ngaahi fehuʻi hangē ko ʻení:

• Ko e hā ha meʻa kuó ne tokoniʻi koe ke fakaloloto hoʻo ʻofa ki he ʻOtuá?

• Ko e hā ha faikehekehe kuo hoko ʻi hoʻo moʻuí ʻi hoʻo ʻofa ki he ʻOtuá?

Foki ki he “Ngaahi ʻEkitivitī Ako ke Fili Mei Aí.”

Tohi ʻi he palakipoé ʻa e ongo foʻi lea ko e masiva mo e faingataʻaʻia. Kole ki he kau akó ke vahevahe ha ngaahi founga ʻe ala faingataʻaʻia ai ha taha—ʻo tatau ai pē pe ko e fakatuʻasino, fakaeloto, pe fakalaumālie. Te ke lava ʻe koe pe ko ha mēmipa ʻo e kalasí ʻo hiki ʻenau ngaahi talí ʻi he palakipoé. ʻI hono ako ʻe he kau akó ʻa e Teutalōnome 15, poupouʻi ke nau fakatokangaʻi e founga ʻoku akoʻi ai kitautolu ʻe he ʻEikí ke tokangaʻi e kakai faingataʻaʻiá.

Fakamatalaʻi ange naʻe fekauʻi ʻe he ʻEikí ʻa e fānau ʻIsilelí ʻi he taʻu ʻe fitu kotoa pē ke nau tauhi ha taʻu ʻo e Veteangé (Sabbatical). Ko e konga ʻo ʻenau tauhi ʻa e taʻu ʻo e Veteangé, naʻe pau ai ke nau fakamolemoleʻi e ngaahi moʻuá, tukuange ʻa e kakaí mei he nofo pōpulá, pea tokoniʻi e ngaahi faingataʻaʻia ʻa e niʻihi kehé. (Ke maʻu ha fakamatala lahi ange, vakai, “Teutalōnome 15:1–18. Ko e hā ʻa e taʻu ʻo e veteangé?” ʻi he Ngaahi Tokoni Fakafolofolá: Fuakava Motuʻá.)

Fakaafeʻi e kau akó ke nau lau ʻa e Teutalōnome 15:1–11, ʻo kumi e ngaahi fakahinohino ʻa e ʻEikí ki he taʻu ʻo e Veteangé. Fakaafeʻi e kalasí ke nau tali ʻeni:

• Ko e hā e meʻa ʻokú ke ako fekauʻaki mo e ʻulungaanga ʻo e ʻOtuá mei he ngaahi veesi ko ʻení?

• ʻOkú ke pehē ʻoku ʻuhinga ki he hā ke “mafola ke lahi [hotau] nimá” ʻi he taimi ʻoku tau foaki ai ki he niʻihi kehé? Ko e fē ha taimi kuo fakahā atu ai ʻe he ʻEikí ʻa ʻEne tokangá ʻaki ha “[toʻukupu] ʻoku mafolá”?

• Ko e hā ha ngaahi talaʻofa naʻá ke maʻu ʻi he ngaahi veesi ko ʻení ʻe lava ke fakaʻaongaʻi ʻi heʻetau ngaahi feinga ke tokoniʻi e kakai faingataʻaʻiá? (ʻE lava ke fakahā ʻe he kau akó ha foʻi moʻoni hangē ko ʻení: ʻI heʻetau faitokonia loto-fiemālie ʻa e kakai faingataʻaʻiá, ʻe tāpuekina kitautolu ʻe he ʻEikí ʻi he meʻa kotoa pē ʻoku tau faí.)

Fakakaukau ke fakaʻaongaʻi ha ʻekitivitī ʻe taha pe lahi ange mei he ngaahi ʻekitivitī ko ʻení ke tokoniʻi e kau akó ke nau fakatokangaʻi lelei ange e ngaahi founga te nau lava ai ʻo muimui ki he fekau ʻa e ʻEikí ke tokangaʻi ʻa e masivá mo e kakai faingataʻaʻiá:

1. Akoako ʻa e “Ko e Fekumi ʻi he Ngaahi Folofolá pea ʻi he Gospel Library” ʻi he Ngaahi Taukei Ako Folofolá. ʻE lava ke ʻiloʻi ʻe he kau akó ha ngaahi foʻi lea mahuʻinga mei he fealeaʻakí, hangē ko e “masiva,” “faingataʻaʻia,” “ngāue tokoni,” “tokangaʻi e niʻihi kehé,” mo e ngaahi meʻa pehē. ʻOange ha taimi ki he kau akó ke nau akoako fekumi ai ʻi he Gospel Library ki he ngaahi foʻi lea pe kupuʻi lea ko ʻení. Te nau lava ʻo fakahā e ngaahi potufolofola, lea mei he kau taki ʻo e Siasí, pe ngaahi maʻuʻanga tokoni kehe ʻoku akonaki fekauʻaki mo e founga ʻoku tokangaekina ai ʻe he ʻEikí mo Hono Siasí ʻa Hono kakaí he ʻaho ní.

2. Kumi ha sīpinga mei he moʻui ʻa Sīsū Kalaisí ʻa ia naʻá Ne tāpuekina ai e kakai faingataʻaʻiá. Te ke lava ʻo fakaafeʻi e kau akó ke vahevahe mo e kalasí e meʻa ne nau maʻú.

3. Hiki e ngaahi kulupu ko ʻení ʻi he palakipoé: fakapaʻanga, fakatuʻasino, fakalaumālie, fakasōsiale, fakaeloto. Fakaafeʻi e kau akó ke nau aleaʻi ha ngaahi founga pau te nau lava ai ʻo muimui ki he fekau ʻa e ʻEikí ke tokangaekina e kakai ʻoku nau fuesia e faʻahinga fiemaʻu ko ʻení.

Te mou lava foki ʻo aleaʻi ha ngaahi fehuʻi hangē ko ʻení:

• Kuo tāpuekina fēfē koe ʻe he Tamai Hēvaní ʻi hoʻo loto-fiemālie ke tokoniʻi ʻEne fānaú?

• Ko e fē ha taimi kuo tokangaekina ai koe ʻe ha taha ʻi ha founga faka-Kalaisí?

Fakakaukau ke fakaafeʻi e kau akó ke nau lotu ki he Tamai Hēvaní ke ʻiloʻi e founga te nau lava ai ʻo tokangaekina ha taha ʻoku nau feohi ʻa ia ʻoku faingataʻaʻia. Poupouʻi ke nau lekooti mo ngāueʻi e ngaahi ongo ʻoku nau maʻú.

Foki ki he “Ngaahi ʻEkitivitī Ako ke Fili Mei Aí.”