Fakamaau 2–4; 6–8; 13–16

Fakakaukau ke fakafeʻiloaki ʻa e taukei “Ko Hono Kumi ha Ngaahi Sīpinga ʻi he Folofolá” ʻi he Ngaahi Taukei Ako Folofolá. Ke fakatātaaʻi e mahuʻinga ʻo hono kumi e ngaahi sīpingá, te ke lava ʻo fakaʻaliʻali e fakatātā ko ʻení pea ʻai ke sio e kau akó pe ko e mataʻifika ʻe fiha te nau lava ʻo maʻu ʻi hono fakahokohokó, ʻo kamata mei he fika 1, ʻi ha sekoni ʻe 30.

Fakaafeʻi e kau akó ke vahevahe kapau naʻa nau fakatokangaʻi ha sīpinga ʻi he founga hono fokotuʻutuʻu ʻo e ʻū mataʻifiká. Kapau ʻe fiemaʻu, fakamatalaʻi ange kapau te ke fakahū ha laine fakavetikale mo ha laine fakaholisonitale ʻi lotomālie ʻi he sātí ke faʻu ha tapafā tatau ʻe fā, te ke ʻiloʻi ʻoku muimui ʻa e ʻū mataʻifiká ʻi ha sīpinga ʻoku takai fakatoʻomataʻu, pea ʻasi e mataʻifika takitaha ʻi he puha hono hokó (vakai ki he ʻīmisí).

Fakaafeʻi e kau akó ke fakaʻaongaʻi ha toe sekoni ʻe 30 ke toe fai ʻa e ʻekitivitií pea vakai ki he faikehekehé ʻi he taimi ʻoku nau muimui ai ki he sīpingá.

Fakamatalaʻi ange ʻoku fakamatalaʻi ʻe he tohi Fakamāú ʻa e hisitōlia ʻo e kakai ʻIsilelí hili ʻenau nofoʻi e fonua ko Kēnaní pea mo e pekia ʻa Sōsiuá (vakai, “Ko e hā e tohi ʻa Fakamāú?” ʻi he Ngaahi Tokoni Fakafolofolá: Fuakava Motuʻá). ʻI he tohi ʻa e Kau Fakamāú, ʻoku tau ako ai ki ha sīpinga fakalaumālie pe siakale naʻe foua ʻe he kakai ʻIsilelí koeʻuhí ko ʻenau toutou tōnounou ʻi he muimui ki he ngaahi fakahinohino ʻa e ʻEikí. Fakakaukau ke fakaʻaliʻali ha fakatātā ʻoku teʻeki fakafonu ʻo e siakalé, hangē ko ia ʻi laló, ʻi he palakipoé. Fakaafeʻi e kau akó ke nau hiki tatau ia ʻi ha laʻipepa.

Fakaafeʻi e kau akó ke nau ako e ngaahi veesi ko ʻení mo ha hoa pe kulupu tokosiʻi, ʻo kumi e sīpinga ʻulungaanga naʻe hoko ʻi he lotolotonga ʻo e kakai ʻIsilelí. ʻE lava ke fakamatalaʻi fakanounou ʻe he kau akó ʻa e seti veesi takitaha ʻaki ha foʻi lea pe kupuʻi lea pea hiki leva e foʻi lea pe kupuʻi lea ko iá ʻi he puha totonu ʻi heʻenau fakatātaá.

1. Fakamaau 3:5–7

2. Fakamaau 3:8

3. Fakamaau 3:9 (ʻuluaki kupuʻi lea ʻo e vēsí)

4. Fakamaau 3:9–11

Hili hono ako ʻe he kau akó ʻa e ngaahi vēsí, fakaafeʻi ke nau vahevahe ʻa e ngaahi foʻi lea pe kupuʻi lea naʻa nau fakakau ʻi heʻenau ʻū fakatātaá. Kapau ʻe fiemaʻu, te ke lava ʻo ʻoange ʻa e ngaahi fokotuʻu ko ʻení maʻá e puha takitaha: (1) Angahalá, (2) Ngaahi Nunuʻá, (3) Tangi ki he ʻEikí, (4) Fakahaofí. Te ke lava foki ʻo ʻai ke nau fekumi ki ha ngaahi sīpinga lahi ange ʻo e siakalé pe ngaahi konga ʻo e siakalé ʻi he Fakamaau 2:10–18; 3:12–15, 26–30; 4:1–4, 14–16. Fakakaukau leva ke fehuʻi ange:

• Ko e hā ha ngaahi moʻoni ʻokú ke ako fekauʻaki mo e ʻEikí mei he siakale ko ʻeni ʻi he tohi Fakamāú? (ʻOku kau ʻi he ngaahi sīpinga ʻo e ngaahi moʻoni te nau lava ʻo vahevahé ʻa e ngaahi meʻá ni: Kapau te tau fili ke fakafisingaʻi ʻa e ʻEikí, ʻe mole mei heʻetau moʻuí ʻEne fakahinohinó mo e maluʻí. ʻI heʻetau fili ke tafoki ki he ʻEikí mo ui ki Hono huafá, te Ne fakahaofi kitautolu.)

Fakamahinoʻi ange ko e taha ʻo e ngaahi huafa ʻo Sīsū Kalaisí ko e Fakamoʻuí (vakai, 2 Samuela 22:2). Fakaafeʻi e kau akó ke vahevahe ha ngaahi sīpinga ʻo ha ngaahi tūkunga ʻoku tau fiemaʻu ai ke fakahaofi kitautolu ʻe he Fakamoʻuí mei ai. Fakakaukau ke hiki ʻenau ngaahi talí ʻi he palakipoé. (Ke maʻu ha ngaahi fakakaukaú, te ke lava ʻo ʻai ke ako ʻe he kau akó ʻa e ʻAlamā 36:27–29; 38:5.)

• Ko e hā ha ngaahi ngāue te tau lava ʻo fai ke tokoni ke tau maʻu e mālohi faifakahaofi ʻo e Fakamoʻuí? (Fakakaukau ke ako ʻa e Mōsaia 7:33; 29:20; ʻAlamā 58:10–11 ko ha konga homou fealeaʻakí.)

• Ko e hā ha ngaahi sīpinga ʻo e faifakahaofi ʻa e Fakamoʻuí te ke lava ʻo fakakaukau ki ai ʻi he folofolá, ʻi he moʻui ʻa e kakai ʻokú ke ʻiloʻí, pe ʻi hoʻo moʻuí?

Fakakaukau ke toe vakaiʻi ʻe he kau akó e fakatātā ʻo e siakalé mei he konga kimuʻa ʻo e ʻekitivitií. Te ke lava ʻo tohi Ko Au ʻi he palakipoé ʻi he lotomālie ʻo e siakalé. Fakaafeʻi e kau akó ke nau fakalaulauloto ki he feituʻu ʻoku nau lolotonga ʻi ai ʻi he siakalé pea mo fakakaukau ki he ngaahi tūkunga ʻi heʻenau moʻuí ʻa ia ʻoku nau fiemaʻu ai e fakahaofi ʻa e Fakamoʻuí. Poupouʻi ke nau lekooti e ngaahi ngāue te nau lava ʻo fai ke fakaafeʻi ai e mālohi faifakahaofi ʻa e Fakamoʻuí ki heʻenau moʻuí.

Foki ki he “Ngaahi ʻEkitivitī Ako ke Fili Mei Aí.”

Fakaafeʻi e kau akó ke nau hiki ha lisi ʻo ha niʻihi fakafoʻituitui kuo nau tākiekina lahi taha ʻenau tui kia Sīsū Kalaisí. ʻE lava ke kau ai ha ngaahi ʻulungaanga, tōʻonga, pe angafai pau ʻo e niʻihi fakafoʻituitui ko ʻení naʻá ne ueʻi fakalaumālie kinautolu. Fakakaukau ke fakaafeʻi e kau akó ke vahevahe ha ngaahi sīpinga ʻe niʻihi mo e kalasí.

Fakamanatu ki he kau akó ʻoku fakamatalaʻi ʻe he tohi Fakamāú ʻa e ngaahi taimi lahi naʻe fakavaivai ai e kakai ʻIsilelí ki he angahalá hili ʻenau hū ki he fonua ʻo e talaʻofá. Naʻe iku ʻeni ki he ʻikai ke toe maluʻi kinautolu ʻe he ʻEikí mei honau ngaahi filí. ʻI he taimi naʻe fakatomala ai e kakai ʻIsilelí, naʻe fokotuʻu ʻe he ʻEikí ha kau fakamaau ke fakahaofi kinautolu. Ko e taha ʻo e kau fakamaau ko ʻení ko Tēpola, ko ha fefine tui lahi. Fakaafeʻi e kau akó ʻi heʻenau ako e talanoa ʻo Tēpolá ke nau fakakaukau ki ha ngaahi founga te nau lava ai ʻo hoko ko ha sīpinga ʻo e tuí ki honau ngaahi kaungāmeʻá, fāmilí, pe niʻihi kehé.

Fakaafeʻi e kau akó ke nau lau ʻa e Fakamaau 4:4; 5:7 ke ʻilo e hingoa ʻe ua ne fakafatongia ʻaki ʻa Tēpolá. Mahalo ʻe tokoni ke fakamahinoʻi ange ko e palōfita fefiné “ko ha fefine ia kuó ne maʻu ha fakamoʻoni kia Sīsū pea fiefia ʻi he laumālie ʻo e fakahaá” (Fakahinohino ki he Ngaahi Folofolá, “Palōfita Fefine,” Gospel Library).

Kole ki he kau akó ke nau ako ʻa e Fakamaau 4:1–15, ʻo kumi e ivi tākiekina ʻo Tēpola ki he kakai naʻá ne feohi mo iá. Hili iá pea fakakaukau ke ʻeke ha ngaahi fehuʻi hangē ko ʻení:

• Ko e hā ha niʻihi ʻo e ngaahi lea pe tōʻonga ʻa Tēpola naʻe fakahaaʻi ai ʻene tui ki he ʻEikí?

• Naʻe tākiekina fēfē ʻe he tui ʻa Tēpolá ʻa Pēlaki mo e niʻihi kehé? (Fakakaukau ke hiki ʻa e moʻoni ko ʻení ʻi he palakipoé ko ha konga ʻo e fealeaʻaki ko ʻení: ʻI heʻetau ngāue ʻi he tui ki he ʻEikí, te tau lava ʻo tokoni ki he niʻihi kehé ke nau maʻu e mālohi ke muimui kiate Iá.)

Tokoni ki he kau akó ke nau fakakaukau ki he founga te nau lava ai ʻo muimui ki he sīpinga ʻo e tui ʻa Tēpolá. Ko e founga ʻe taha te ke lava ai ʻo fai ʻení ko hono fakaʻaliʻali e ngaahi fakamatala ko ʻení mo e ngaahi fehuʻi mo e fakaafe ʻoku ʻomi fakataha mo iá. Fakaafeʻi e kau akó ke lekooti ʻenau tali ki he fehuʻi ʻe taha pe lahi ange ʻoku fakaʻilongaʻí.

• Naʻe hoko e tui ʻa Tēpola ki he ʻEikí ke tokoniʻi ia ke ne ngāue taʻeufi mo loto-toʻa. Ko e hā ha ngaahi meʻa faingataʻa ʻe lava ke hanga ai ʻe hoʻo tui kia Sīsū Kalaisí ʻo ʻoatu ha loto-toʻa ke ke faí? Ko e hā ha meʻa te ke lava ʻo fai ke fakatupulaki ai hoʻo tui kia Sisū Kalaisí?

• Naʻe fakafalala ʻa Tēpola ki he ʻEikí ʻi heʻene tataki ʻa ʻIsileli lolotonga ha taimi ʻo e faingataʻa lahí. ʻOku hoko fēfē ʻa e falala kia Sīsū Kalaisí ke ne ʻomi ai ha mālohi kiate koé? ʻE lava fēfē hoʻo tuí ʻo tokoni ke fakamālohia e niʻihi kehé lolotonga e ngaahi taimi faingataʻá?

• Naʻe hoko e tui ʻa Tēpola ki he ʻEikí ke fakamālohia ai e niʻihi kehé. Hiki ha lisi ʻo e ngaahi meʻa ʻokú ke ʻilo fekauʻaki mo Sīsū Kalaisí—mei he folofolá, mei he ngaahi lea ʻa e kau palōfita moʻuí, pea ko hoʻo aʻusia pē ʻaʻaú. Ko hai ʻoku fiemaʻu ke ne ʻiloʻi ʻení? Te ke vahevahe fēfē nai iá?

Fakaafeʻi ha kau ako ʻe niʻihi ke vahevahe ha ngaahi fakakaukau ʻe niʻihi ne nau lekooti. Fakamoʻoni ki he ngaahi moʻoni kuo mou aleaʻi he ʻaho ní.

Foki ki he “Ngaahi ʻEkitivitī Ako ke Fili Mei Aí.”

Fakaʻaliʻali ʻa e fakatātā ko ʻení:

Fakaafeʻi e kau akó ke nau fakakaukau fakalongolongo ki he feituʻu te nau tuʻu ai he lainé ʻi he ngaahi tūkunga takitaha ko ʻení. Te ke lava foki ʻo fakaafeʻi e kau akó ke fokotuʻu atu ha ngaahi tūkunga lahi ange.

1. Fakakaukauʻi ha ngāue maʻuʻanga moʻui

2. ʻAlu ʻo akó

3. Fehangahangai mo e ngaahi faingataʻá pe ʻahiʻahí

4. Fakalakalaka fakatāutahá

5. Tali e ngaahi fehuʻi fekauʻaki mo e ongoongoleleí

Fakamatalaʻi ange ʻoku talanoa ʻa e Fakamaau 6 ki ha taimi naʻe ngalo ai ʻi he kakai ʻIsilelí ʻa e ʻEikí pea mole [meiate kinautolu] ʻEne ngaahi tāpuakí. Naʻe fakaaoao ʻa e kau Mitiané ʻi he kakai ʻIsilelí ʻi ha taʻu ʻe fitu. ʻI heʻenau fuʻu fiemaʻu vivilí, ne faifai pea nau tafoki ki he ʻEikí ki ha tokoni (vakai, Fakamaau 6:1–7). Hili hono manatuʻi ʻe he kakai ʻIsilelí ʻa e ʻEikí pea nau tangi kiate Iá, naʻá Ne fokotuʻu hake ha tangata māʻoniʻoni ko Kitione ke fakahaofi kinautolu mei honau ngaahi filí. Fakaafeʻi e kau akó ke kumi e ngaahi moʻoni ʻe lava ʻo tokoni ke nau fakafalala lahi ange ai ki he ʻEikí ʻi heʻenau ako e talanoa kia Kitioné.

Fakaafeʻi e kau akó ke lau ʻa e Fakamaau 6:11–16, 24–27, ʻo kumi e ngaahi fakahinohino ʻa e ʻEikí kia Kitioné. Fakaafeʻi e kau akó ke vahevahe ʻa e meʻa naʻe makehe kiate kinautolu mei he ngaahi veesi ko ʻení. Te ke lava ʻo fai ange ha ngaahi fehuʻi hangē ko ʻení:

• Ko e hā e meʻa ʻoku akoʻi atu ʻe he ngaahi veesi ko ʻení fekauʻaki mo e ʻEikí?

• Ko e hā nai e meʻa naʻe akoʻi ʻe he ʻEikí kia Kitione pea mo e kakaí ʻi Heʻene ngaahi fakahinohino ʻi he veesi 25–27?

Fakamatalaʻi ange naʻe tali ʻe Kitione ʻa e ui ʻa e ʻEikí ke tataki ʻa ʻIsileli ke tauʻi ʻa e kau Mitiané. Mahalo ʻe tokoni ke fakamahinoʻi ange naʻe ʻuluaki ʻi ai ha kau tangata ʻe toko 32,000 ʻi he kau tau ʻa e kau ʻIsilelí (vakai, Fakamaau 7:3), kae ʻi ai ha kau tangata ʻe toko 135,000 ʻi he kau tau ʻa e kau Mitiané (vakai, Fakamaau 8:10).

Fakaafeʻi e kau akó ke nau lau ʻa e ngaahi veesi ko ʻení pea aleaʻi ʻa e ongo fehuʻi ʻoku ʻoatu fakataha mo iá mo hanau hoa.

• Kimuʻa ʻi he taú: Fakamaau 7:2–7

• Lolotonga e taú: Fakamaau 7:15–21; 8:28

• Kapau naʻá ke ʻi he tūkunga ʻo Kitioné, ko e hā ha ngaahi fehuʻi pe hohaʻa naʻá ke mei maʻu kimuʻa he taú mo e lolotonga e taú?

• Ko e hā e meʻa ʻokú ke ako fekauʻaki mo e mahuʻinga ʻo e falala ki he ʻEikí mei he talanoa kia Kitioné?

Fakaafeʻi ha kau ako ke vahevahe mo e kalasí ʻenau fakakaukau mei heʻenau ngaahi fealēleaʻakí. Lolotonga ʻenau vahevahé, ʻe lava ke tala atu ʻe he kau akó ha foʻi moʻoni hangē ko ʻení: ʻI heʻetau falala ki he ʻEikí, te Ne tāpuakiʻi kitautolu ʻaki Hono mālohí.

Ke tokoni ke mahino lelei ange ki he kau akó ʻa e foʻi moʻoni ko ʻení, fakakaukau ke ʻai ke nau hiki ha tatau ʻo e saati ko ʻení. Fakaafeʻi ke nau aleaʻi mo ha hoa pe kulupu tokosiʻi ha ngaahi founga kehekehe te nau lava ai ʻo fakakakato ʻa e puha takitaha ʻi he sātí.

Fakaafeʻi e kau akó ke vahevahe ha niʻihi ʻo e ngaahi meʻa ne nau hiki ʻi heʻenau sātí. Te ke lava foki ʻo ʻeke ha ngaahi fehuʻi hangē ko ʻení:

• Ko e hā ha ngaahi veesi pe talanoa ʻi he folofolá ʻokú ne ueʻi koe ke ke falala ki he ʻEikí? (Kapau ʻe fiemaʻu, te ke lava ʻo fokotuʻu ange ha ngaahi sīpinga ʻe niʻihi, hangē ko e Lea Fakatātā 3:5–6; Filipai 4:13; ʻAlamā 26:12; ʻEta 12:27.)

• Ko e fē nai ha taimi kuo fakamālohia ai koe ʻe he ‘Eikí ʻo ope atu ia mei he meʻa ʻokú ke malavá?

Te ke lava foki ʻo vahevahe ʻa e lea ko ʻeni ʻa Palesiteni Lāsolo M. Nalesoní:

Naʻe ikunaʻi ʻe he ʻEiki ko Sīsū Kalaisí ʻa e māmaní ʻo fakafou ʻi Heʻene Fakaleleí. Ko ia ai, ʻokú Ne “māfimafi ke … fakamaʻa [koe] mei he taʻe-māʻoniʻoni kotoa pē” (ʻAlamā 7:14). Te Ne fakahaofi koe mei ho ngaahi tūkunga fakamamahi tahá ʻi Heʻene founga mo e taimi pē ʻAʻana. ʻI hoʻo haʻu kiate Ia ʻi he tuí, te Ne tataki, tauhi, mo maluʻi koe. Te Ne fakamoʻui ho loto-mafesifesí mo fakafiemālieʻi koe ʻi hoʻo faingataʻaʻiá. Te Ne ʻoatu ke ke maʻu Hono mālohí. Pea te Ne ʻai ke malava ʻa e meʻa ʻoku taʻemalava ʻi hoʻo moʻuí. (“Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], Gospel Library)

Vakai ki he fakatātā ʻo e taó mei he kamataʻanga ʻo e ʻekitivitī akó. Kole ki he kau akó ke nau fakakaukau ki ha tafaʻaki ʻi heʻenau moʻuí ʻe lava ke nau fili ai ke fakafalala lahi ki he meʻa te nau malavá. Poupouʻi ke nau hiki ha faʻahinga fakakaukau pe ongo fakalaumālie kuo nau maʻu fekauʻaki mo e founga te nau lava ai ʻo falala lahi ange ki he ʻEikí.

Foki ki he “Ngaahi ʻEkitivitī Ako ke Fili Mei Aí.”