ʻEkesōtosi 35–40; Levitiko 1; 4; 16; 19

Mahalo te ke fakakaukau ke fakaafeʻi e kau akó ke vahevahe ha fakatātā ʻo ha temipale kuo nau ʻaʻahi ki ai pe ko ha temipale ʻoku nau saiʻia taha ai. Te ke lava foki ʻo fakaʻaliʻali ha niʻihi ʻo e ngaahi ʻīmisi ko ʻeni ʻo e loto temipalé.

ʻE lava ke vahevahe ʻe he kau akó ʻa e ʻuhinga ʻo e temipalé kiate kinautolú pe ko ha faʻahinga fakakaukau pe ongo ʻoku nau maʻu ʻi he taimi ʻoku nau sio ai ki he temipalé. Poupouʻi e kau akó ke nau fakakaukau ki he meʻa ʻe lava ke akoʻi ange ʻe he temipalé fekauʻaki mo e Tamai Hēvaní mo Sīsū Kalaisi ʻi heʻenau ako he ʻaho ní.

Fakamatalaʻi ange naʻe hili hono ʻoange ʻe he ʻEikí ʻa e Fekau ʻe Hongofulú ki he kakai ʻIsilelí, naʻe foki ʻa Mōsese ki he Moʻunga Sainaí ke maʻu ha toe ngaahi fakahinohino mei he ʻEikí.

Fakaafeʻi e kau akó ke nau lau ʻa e ʻEkesōtosi 25:8, ʻo kumi e meʻa naʻe finangalo e ʻEikí ke fai ʻe he fānau ʻIsilelí pea ko e hā hono ʻuhingá.

• Ko e hā e meʻa ʻe lava ke akoʻi atu ʻe he fekau ko ʻení fekauʻaki mo e ʻEikí mo e ongo ʻokú Ne maʻu ki Hono kakaí?

Fakamatalaʻi ange naʻe ʻoange ʻe he ʻEikí kia Mōsese ha ngaahi fakahinohino ki hono langa ha hūfangaʻanga pe tāpanekalé. Neongo naʻe fakalele ʻa e tāpanekale ʻo e kuonga muʻá ʻi he malumalu ʻo e fono ʻa Mōsesé pea naʻe fakahoko ai ha ngaahi ngāue kehekehe mei he temipale ʻo onopōní, ka ko e ongo fale fakatouʻosi pē kinaua ʻo e ʻEikí. Hangē ko e ngaahi temipale ʻo onopōní, naʻe fakataipe ʻe he ngaahi meʻa mo e ngaahi ouau ʻo e tāpanekalé ʻa e Tamai Hēvaní mo Sīsū Kalaisi pea naʻe fakataumuʻa ia ke tokoni ki he fānau ʻIsilelí ʻi heʻenau fononga ke foki kiate Kinauá.

Te ke lava ʻo tā pe fakaʻaliʻali ha fakatātā hangē ko ʻení ke fakaʻaliʻali e fokotuʻutuʻu ʻo e tāpanekalé ʻi he kuonga ʻo Mōsesé.

Fakaafeʻi e kau akó ke nau fakaʻaongaʻi e ngaahi potufolofola ʻoku hiki atu ʻi he tēpile ko ʻení ke ako fekauʻaki mo ha niʻihi ʻo e ngaahi ʻelemēniti ʻo e tāpanekalé. (ʻE lava ke hoko ʻeni ko ha feituʻu ʻaonga ke fakaʻaongaʻi ai ʻa e taukei “Ko e Mahino ʻa e Ngaahi Fakataipe ʻi he Folofolá,” ʻi he Ngaahi Taukei Ako Folofolá. Te ke lava foki ʻo fakahinohino ʻa e kau akó ki he “ʻEkesōtosi 35–40. Ko e hā e taumuʻa ʻo e tāpanekalé?” ʻi he Ngaahi Tokoni Fakafolofolá: Fuakava Motuʻá pe huluʻi e vitiō “Ko e Tāpanekalé” [7:18] ke tokoni ke nau ako fekauʻaki mo e ngaahi meʻa kehekehe ʻi he tāpanekalé.)

7:23

ʻI he ʻosi e ako ʻa e kau akó, fakaafeʻi ke nau vahevahe ʻa e meʻa ne nau akó mo hanau hoa pe ko ha kulupu tokosiʻi. Te mou lava ʻo aleaʻi fakataha ʻa e ngaahi fehuʻi ko ʻení mo e kalasí.

• Ko e hā e ngaahi fakataipe naʻe ʻuhingamālie kiate koé? Ko e hā hono ʻuhingá?

• ʻOkú ke pehē naʻe tataki fēfē ʻe he ngaahi fakataipe ko ʻení ʻa e fānau ʻIsilelí ki he Tamai Hēvaní mo Sīsū Kalaisí?

Fakaafeʻi e kau akó ke vahevahe e ngaahi moʻoni ne nau ʻilo mei heʻenau ako ki he tāpanekalé ʻa ia ʻe lava foki ke fakaʻaongaʻi ki he ngaahi temipale ʻi onopōní. ʻE lava ke vahevahe ʻe he kau akó ha ngaahi moʻoni hangē ko ʻení: ʻOku fekauʻi kitautolu ʻe he ʻEikí ke langa ha ngaahi temipale koeʻuhi ke Ne lava ʻo ʻafio ʻi hotau lotolotongá. ʻOku akoʻi ʻe he ngaahi ouau mo e ngaahi fakataipe ʻo e temipalé fekauʻaki mo e Tamai Hēvaní mo Sīsū Kalaisi. ʻOku tokoniʻi kitautolu ʻe he temipalé ke tau teuteu ke foki ki he Tamai Hēvaní mo Sīsū Kalaisi.

Mahalo te ke fili ha taha ʻo e ngaahi meʻa ko ʻení ke tokoni ke mahino ki he kau akó ʻa e ngaahi moʻoni naʻa nau ʻiló:

1. Fakaafeʻi e kau akó ke kumi ha fakamatala fekauʻaki mo e temipalé pe ngaahi ouau fakatemipalé ʻi ha lea mei ha konifelenisi lahi kimuí ni. Te nau lava ʻo vahevahe mo hanau hoa pe kulupu tokosiʻi ʻa e fakamatalá mo e ʻuhinga ʻoku mahuʻingamālie ai kiate kinautolú.

2. ʻOange ha taimi ki he kau akó ke ʻaʻahi ki he ChurchofJesusChrist.org/temples ʻo kumi ha ngaahi fakakaukau lahi ange fekauʻaki mo e temipalé.

3. Mamata fakataha ʻi he ongo vitiō “Tataki ʻe ha Ongo ʻAposetolo ha Takimamata ʻInitaneti ʻo e Temipale Lomá ʻi ʻĪtali” (11:31) pe “Welcome to the Washington D.C. Temple” [Talitali Lelei Kimoutolu ki he Temipale Washington D.C.] (11:45) pea tuku ke vahevahe ʻe he kau akó ʻa e meʻa ʻoku nau ako fekauʻaki mo e founga ʻoku fakamoʻoni ai e ngaahi temipale ʻo onopōní ki he Tamai Hēvaní mo Sīsū Kalaisí.

   

   10:37
   

   11:45

Te ke lava foki ʻo fakaʻaliʻali ʻa e lea ko ʻeni ʻa Sisitā J. ʻAneti Tenisí pea tuku ke vahevahe ʻe he kau akó ʻa e meʻa ʻoku ʻuhingamālie kiate kinautolú.

“ʻOku fakataumuʻa ʻa e meʻa kotoa pē ʻoku tau fai ʻi he temipalé ki he palani ʻa ʻetau Tamaí maʻatautolú, ʻa ia ko hono uhó ʻa e Fakamoʻuí mo ʻEne feilaulau fakaleleí. ʻE akoʻi kitautolu ʻe he ʻEikí ʻi he ʻotu lea ki he ʻotu lea ʻo fakafou ʻi he fakataipe ʻo e ngaahi ouaú mo e ngaahi fuakavá ʻi heʻetau fakaava hotau lotó mo fekumi ʻi he faʻa lotu ke mahino kiate kitautolu ʻa e ngaahi ʻuhinga ʻoku loloto angé.” (“Ke ʻAi ʻe Kimoutolu ʻa e ʻEiki ko Sīsū Kalaisí,” Liahona, Mē 2024, 11)

Fakakaukau ke aleaʻi fakataha mo e kalasí ʻa e ongo fehuʻi ko ʻení:

• ʻOku tataki fēfē koe ʻe he temipalé ki he Tamai Hēvaní mo Sīsū Kalaisí?

• Ko e hā ha founga kuo tāpuekina ai koe ʻe he ngaahi ouau mo e ngaahi fuakava ʻo e temipalé?

Te ke lava ʻo fakaafeʻi ha niʻihi ʻo e kau akó ke vahevahe mo e kalasí ha meʻa ne nau ako pe ongoʻi he ʻahó ni ʻa ia te nau loto ke manatuʻi. Kapau ʻokú ke nofo ofi ki ha temipale, poupouʻi e kau akó ke nau ō ki he temipalé pe ʻaʻahi ki he kelekele ʻo e temipalé ʻo fakatatau mo honau tūkungá. Fakaafeʻi ke nau fekumi ki he ngaahi fakataipe ʻo Sīsū Kalaisí ʻi he ngaahi ouau pe fakataipe ʻo e temipalé.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke kamata ʻaki hono fakafeʻiloaki e taukei “Ko e Tokanga Taha kia Sīsū Kalaisi ʻi he Folofolá” ʻi he Ngaahi Taukei Ako Folofolá. Te ke lava foki ʻo ʻeke ʻa e fehuʻi ko ʻení:

• Ko e hā e meʻa kuó ke ako fekauʻaki mo Sīsū Kalaisi ʻi hoʻo ako folofola kimuí ni maí?

Fakamatalaʻi ange ʻoku nofotaha e tohi Levitikó ʻi he ngaahi ouau mo e ngaahi tōʻonga fekauʻaki mo e fono ʻa Mōsesé. ʻOku kau heni ha ngaahi fakahinohino fakaikiiki ki he feilaulaú, ʻa ia ko ha fakataipe ʻo e feilaulau fakalelei ʻa Sīsū Kalaisí (vakai, ʻAlamā 34:14; Mōsese 5:5–7).

Fakaafeʻi e kau akó ke nau ako ʻa e Levitiko 1:1–9 pe Levitiko 16:7–9, 15–22 fakataha mo e fakamatala ki he Levitiko 1–7 pe Levitiko 16 ʻi he Ngaahi Tokoni Fakafolofolá: Fuakava Motuʻá. ʻI heʻenau akó, fakaafeʻi ke nau kumi e ngaahi foʻi lea pe kupuʻi lea ʻokú ne fakamanatu kiate kinautolu ʻa Sīsū Kalaisi mo ʻEne feilaulau fakaleleí.

ʻI he ʻosi e ngāue ʻa e kau akó, fakaafeʻi ke nau vahevahe ʻenau ngaahi fakakaukaú mo hanau hoa pe kulupu tokosiʻi. Hili iá pea kole ki ha kau ako tokosiʻi ke vahevahe ʻenau fakakaukaú mo e kalasí. ʻE lava ke kau ʻi he ngaahi moʻoni ʻe niʻihi ʻe ala vahevahe ʻe he kau akó ʻa e ngaahi meʻá ni: Naʻe finangalo lelei ʻa Sīsū Kalaisi ke foaki ʻEne moʻuí ko ha feilaulau maʻatautolu. Naʻe totongi ʻe Sīsū Kalaisi ʻetau ngaahi angahalá ʻaki ʻEne toʻo kinautolu kiate Ia ʻo fakafou ʻi Heʻene feilaulau fakaleleí. ʻE lava ke fakamolemoleʻi ʻetau ngaahi angahalá koeʻuhí ko Sīsū Kalaisi.

Te ke lava ʻo fakaʻaliʻali ʻa e fakatātā ko ʻení ʻi hoʻomou aleaʻi e fehuʻi ʻi laló.

• Ko e hā e meʻa ʻe lava ʻo tokoni ke tau manatuʻi ʻa e feilaulau fakalelei ʻa Sīsū Kalaisí mo ongoʻi houngaʻia ʻiate Iá? (Ko ha konga ʻo e fealēleaʻaki ko ʻení, ʻe ala tokoni ke fakamanatu ki he kau akó “naʻe ngata ʻa e fekau ko ia ke feilaulau ʻaki e fanga monumanú ʻi he pekia ʻa Sīsū Kalaisí. ‘I he Siasí he ʻahó ni, ko e ouau ko ia ʻo e sākalamēnití ko ha fakamanatu ia ʻo e feilaulau fakalelei ʻa e Fakamoʻuí” [Ngaahi Tefitó mo e Ngaahi Fehuʻí, “Feilaulaú,” Gospel Library].)

Fakakaukau ke ʻoange ha taimi ki he kau akó ke nau fakakaukauloto mo lekooti ai ʻenau ngaahi fakakaukau fekauʻaki mo Sīsū Kalaisí pea mo e ʻuhinga ʻo ʻEne feilaulau fakaleleí kiate kinautolú. Ke teuteuʻi kinautolu ke fai ʻení, te mou lava ʻo hivaʻi pe fanongo ki ha himi sākalamēniti hangē ko e “ʻOku Fakaofo” pe “As Bread Is Broken” (Gospel Library), pe te mou mamata ʻi he “For God So Loved the World” (4:48).

4:49

Ke fakaʻosi e lēsoní, fakakaukau ke vahevahe hoʻo fakamoʻoni kia Sīsū Kalaisí pe fakaafeʻi ha kau ako tokosiʻi ke nau fai ia. Te ke lava foki ʻo vahevahe ʻa e lea ko ʻeni ʻa Palesiteni Tāleni H. ʻOakesí:

Na‘e kātekina ‘e Sīsū Kalaisi e mamahi taʻefaʻalauá, koe‘uhí ke Ne hoko ai ko ha feilaulau ma‘á e ngaahi angahala ‘a e kakai kotoa pē. Na‘e ‘oatu ‘e he feilaulau tuʻumoʻunga lelei ko iá—‘a e Lami haohaoa ta‘e-hano melé—ke fetongi ʻaki e kovi fulikivanu tahá—‘a ia ko e ngaaahi angahala ‘a e māmaní kotoa. Pea hangē ko e ngaahi lea fakangalongata‘a ‘a ‘Ilisa R. Sinoú:

[Hono ta‘ata‘a mahu‘inga naʻá ne lilingi ta‘e-totongí;

Naʻe foaki taʻe-totongi ‘Ene mo‘uí,

Ko ha feilaulau haohaoa maʻá e angahalá,

Ki ha māmani ne mate ke fakahaofí.]

Ko e feilaulau ko iá—‘a e Fakalelei ‘a Sīsū Kalaisí—ko e uho ia ‘o e palani ‘o e fakamo‘uí. (“Feilaulaú,” Liahona, Mē 2012, 19)

Foki ki he “Ngaahi ʻEkitivitī Ako ke Fili Mei Aí.”

Tohiʻi mataʻāʻā ʻa e foʻi lea ko e feilaulau ʻi lotomālie he palakipoé. Fehuʻi ki hoʻo kau akó pe ko e hā ha ngaahi fakakaukau pe ongo ʻoku haʻu ki heʻenau fakakaukaú ʻi he taimi ʻoku nau sio ai ki he foʻi lea ko iá.

Fakaafeʻi e kau akó ke nau fakakaukau ki he founga ʻoku nau vēkeveke ai ke fai ha ngaahi feilaulau maʻá e Tamai Hēvaní. ʻI heʻenau ako he ʻaho ní, poupouʻi ke nau kumi e ngaahi moʻoni ʻe lava ʻo tokoni kiate kinautolu ʻi heʻenau feinga ke moʻui ʻaki e fono ʻo e feilaulau ʻa e ʻEikí.

Fakamatalaʻi ange ʻoku ʻi he Levitiko 1 ʻa e ngaahi fakahinohino ʻa e ʻEikí ki he kakai ʻIsilelí ke nau fai ha ngaahi feilaulau tutu. Naʻe fakahoko fakaʻaho ʻe he kau taulaʻeikí ʻa e ngaahi feilaulau ko ʻení. ʻE lava ke vakai ki he ngaahi feilaulaú ko ha fakataipe ʻo e Fakalelei ʻa e Fakamoʻuí. Naʻe hoko ia ko ha fakaʻilonga ʻo e tukupā maʻu pē ʻa ʻIsileli ki he ʻEikí.

Fakaafeʻi e kau akó ke nau kumi e ʻuhinga ʻo e foʻi lea feilaulau ʻi he lea ko ʻeni ʻa Pīsope L. Toti Pātisi ʻo e Kau Pīsopeliki Pulé:

ʻI hono fakaʻaongaʻi fakaonopōní, kuo fokotuʻu mai ʻe he foʻi lea ko e feilaulaú ʻa e fakakaukau ko e “foaki atu” ha ngaahi meʻa maʻá e ʻEikí mo Hono puleʻangá. Ka, ʻi he kuonga muʻá, naʻe fehokotaki vāofi ange e ʻuhinga ʻo e foʻi lea feilaulaú ki hono tupuʻanga faka-Latina ʻe ua ko e: sacer, ʻoku ʻuhinga ko e “toputapu” pe “māʻoniʻoni,” mo e facere, ʻa ia ʻoku ʻuhinga “ke ngaohi.” Ko ia ai, ne ʻuhinga moʻoni ʻa e feilaulaú ʻi he kuonga muʻá “ke ngaohi ha meʻa pe tokotaha ke [māʻoniʻoni].” ʻI he vakai ko ia ki aí, ko e feilaulaú ko ha founga ia ʻo e hoko ʻo māʻoniʻoni pea ʻilo ʻa e ʻOtuá, kae ʻikai ko ha meʻa ʻoku hoko pe founga hono “foaki atu” ha ngaahi meʻa maʻá e ʻEikí. …

ʻOku siʻi ʻa e ʻuhinga ʻo e feilaulaú ke “foaki atú” kae lahi ange ke “foaki ki” he ʻEikí. (“Ko hono Foaki e Māʻoniʻoní ki he ʻEikí,” Liahona, Nōvema 2021, 101)

• Ko e hā e meʻa ʻoku tokoni atu ʻa e fakamatala ko ʻení ke mahino kiate koe fekauʻaki mo e taumuʻa ʻo e feilaulaú? (ʻE lava ke ʻiloʻi ʻe he kau akó ha foʻi moʻoni hangē ko ʻení: ʻOku tokoni ʻa hono fai ha ngaahi feilaulau ki he ʻEikí ke tau hoko ʻo māʻoniʻoni pea ʻunu ke ofi ange kiate Ia.)

Fakakaukau ke fakaʻaliʻali ʻa e ngaahi fakahinohino ko ʻení pea ʻoange ha taimi ki he kau akó ke fakakakato ʻa e ʻekitivitī akó:

1. Ako ʻa e Levitiko 1:1–9, ʻo kumi e ngaahi tafaʻaki ʻo e feilaulau ʻaki e monumanú ʻe lava ke fekauʻaki mo hono fai ʻo e ngaahi feilaulau maʻá e ʻEikí he ʻaho ní.

2. Kumi ha toe ngaahi potufolofola pe lea mei he kau taki ʻo e Siasí ʻoku tokoni ke mahino kiate koe ʻa e founga ke moʻui ʻaki e fono ʻo e feilaulaú ʻi hotau kuongá ni. ʻOku kau ʻi he ngaahi sīpingá ʻa e Loma 12:1–2; ʻAmenai 1:26; 3 Nīfai 9:19–20.

Hili hono maʻu ʻe he kau akó ha taimi feʻunga ke akó, fakaafeʻi ke nau vahevahe ʻa e meʻa ne nau akó mo ha hoa pe kulupu tokosiʻi. Te ke lava foki ʻo fakaafeʻi kinautolu ke aleaʻi e ongo fehuʻi ko ʻení:

• Ko e hā e meʻa te tau lava ʻo ako fekauʻaki mo e feilaulaú mei he moʻui ʻa Sīsū Kalaisí? (Te ke lava ʻo kumi ha ngaahi sīpinga mei he folofolá ke vahevahe.)

• ʻE tokoni fēfē hoʻo vilitaki ke fakahoko ha ngaahi feilaulau maʻá e Tamai Hēvaní mo Sīsū Kalaisí ke ke hoko ʻo hangē ange ko Kinauá?

Fakakaukau ke kole ki he kau akó ke nau fakakaukau ki ha ngaahi taimi ne nau vilitaki ai ke fai ha ngaahi feilaulau maʻá e ʻEikí. Fakaafeʻi ha kau ako ʻe niʻihi ʻoku nau loto-fiemālié ke vahevahe fekauʻaki mo ʻenau aʻusiá pea mo e founga naʻe tāpuekina ai kinautolu ʻe he ʻEikí.

Fakaafeʻi e kau akó ke nau fakakaukau ki he founga te nau lava ai ʻo moʻui kakato ange ʻaki e fono ʻo e feilaulau ʻa e ʻEikí. ʻOange ha taimi ke nau lekooti ai ʻa e ngaahi fakakaukau pe ngaahi ongo fakalaumālie naʻa nau maʻú. Te ke lava foki ʻo fakaafeʻi ha niʻihi ʻo e kau akó ʻe loto-fiemālié ke vahevahe ʻenau fakakaukaú mo e kalasí.

Foki ki he “Ngaahi ʻEkitivitī Ako ke Fili Mei Aí.”