“Talateú,” Fuakava Motuʻá – Tohi Lēsoni ʻa e Faiako ʻInisititiutí (2026)

Fuakava Motuʻá – Tohi Lēsoni ʻa e Faiako ʻInisititiutí

Talateu ki he Kalasí

Ko e taumuʻa ʻo e Seminelí mo e ʻInisititiuti Fakalotú

“Ko ʻetau taumuʻá ke tokoni ki he toʻu tupú mo e kakai lalahi kei talavoú ke fakaloloto ʻenau ului kia Sīsū Kalaisi mo ʻEne ongoongolelei kuo fakafoki maí, taau ke maʻu ʻa e ngaahi tāpuaki ʻo e temipalé, pea teuteuʻi kinautolu, honau ngaahi fāmilí, mo e niʻihi kehé ki he moʻui taʻengata mo ʻenau Tamai Hēvaní” (“Ko e Kaveinga Ngāue ʻo e Seminelí mo e ʻInisititiutí,” Gospel Library).

Ko e hā e meʻa ʻe aʻusia ʻe he kau akó ʻi he kalasi ko ʻení?

ʻOku fakataumuʻa ʻa e kalasi ko ʻení ke tokoni ki he kau faiakó ke fakahoko ʻa e Kaveinga Ngāue ʻo e Seminelí mo e ʻInisititiuti Fakalotú ʻaki hono tokoniʻi e kau akó ke:

Tokanga taha ki he sīpinga, ngaahi ʻulungaanga, mo e mālohi huhuʻi ʻo Sīsū Kalaisí ʻi heʻenau ako ʻa e Fuakava Motuʻá.
Fakaloloto ʻenau mahino ki he ongoongolelei ʻo Sīsū Kalaisí ʻo hangē ko hono akoʻi ʻi he Fuakava Motuʻá.
Fakatupulaki ha ngaahi taukei ako folofola te ne fakatupulaki ʻenau malava ʻiate kinautolu pē ʻo maʻu ha mahino ki he folofolá.
Fakatokangaʻi ʻa e founga ʻe lava ke tokoni ai ʻa e ngaahi moʻoni ʻoku nau ako mei he Fuakava Motuʻá ki heʻenau ngaahi fehuʻí, fiemaʻú, mo e ngaahi tūkungá.
Fakamatalaʻi, vahevahe, mo fakamoʻoni ki he ngaahi moʻoni ʻoku maʻu ʻi he folofolá.
Fakaʻaongaʻi e ngaahi akonaki ʻo e folofolá ʻi heʻenau moʻuí ʻi heʻenau feinga ke hoko ʻo hangē ange ko Sīsū Kalaisí.
Fekumi, ʻiloʻi, pea mo ngāueʻi ha fakahā fakataautaha mei he Laumālie Māʻoniʻoní.

ʻOku fokotuʻutuʻu fēfē ʻa e kalasí?

ʻOku ʻi he naunau ʻa e faiakó ha lēsoni ʻe 50 ʻoku fenāpasi mo e taimi-tēpile ʻo e Haʻu, ʻo Muimui ʻIate Aú . ʻOku fakataumuʻa ia ke poupouʻi ʻa e founga angamaheni ʻo e semesitā uike ʻe 14 ʻo e Kalasi Fakalotu 301 mo e 302 ʻi he taimi ʻoku fakaʻaongaʻi fakataha ai mo e “Taimi-tēpile ʻo e Ngaahi Lēsoni ki he Kalasi Fakalotu 301 mo e 302” ʻa ia ʻoku maʻu ʻi he fakaʻosinga ʻo e talateu ko ʻení.

Ko e founga ʻe tahá, ʻe lava ke fakahoko ʻa e kalasi ko ʻení ko ha kalasi fili ʻoku ui ko e Kalasi Fakalotu 210R: Haʻu, ʻo Muimui ʻIate Aú. ʻI he fokotuʻutuʻu ko ʻení, ʻoku nofotaha pē ʻa e kau faiakó ʻi he fakamatala ʻoku fekauʻaki mo e taimi-tēpile Haʻu, ʻo Muimui ʻIate Aú , ʻo fakaʻatā ʻa e ngaahi kalasí ke nau kamata mo fakaʻosi ʻi ha faʻahinga taimi pē ʻi he taʻú ʻo fakatatau mo e ngaahi fiemaʻu mo e taimi-tēpile fakalotofonuá. ʻE lava foki ke fakatahaʻi ʻe he kau faiakó ha ngaahi lēsoni mei he tohi lēsoni ko ʻení ke faʻu ha aʻusia fakaako nounou mo fakapatonu ange. Hangē ko ʻení, ʻe lava ke fakaʻaongaʻi e ngaahi lēsoni ʻi he tohi Sēnesí ki ha fakataha ako uike ʻe nima ki he fitu.

ʻE lava ke akoʻi e lēsoni ʻuluakí, “Ko e Kalaisi Moʻuí,” ʻi ha faʻahinga taimi pē lolotonga e kalasí. Hangē ko ʻení, te ke lava ʻo akoʻi ʻeni ko e ʻuluaki lēsoni ʻo e kalasí pe lolotonga e ngaahi uike kimuʻa he Toetuʻú pe Kilisimasí.

ʻOku fokotuʻutuʻu fēfē ʻa e ngaahi lēsoní?

ʻOku fakataumuʻa ʻa e naunau ʻa e faiakó ke tokoniʻi ʻa e kau faiakó ke nau faʻu ha ngaahi aʻusia fakaako ʻoku fakatefito ʻia Kalaisi, fakatefito ʻi he folofolá, pea nofotaha ʻi he tokotaha akó pea mo ne fakaafeʻi e ivi tākiekina ʻo e Laumālie Māʻoniʻoní. ʻE lava ke tokoni ʻa e ngaahi konga ko ʻeni ʻo e naunau ʻa e faiakó ʻi he ngāué ni:

Ko Hono Poupouʻi ʻo e Ako Fakatāutahá

Fakakaukau ki ha ngaahi founga ke fakaafeʻi, poupouʻi, mo tokoniʻi ai e kau akó ke ako ʻenau folofolá ʻi he lolotonga ʻo e uiké. Hangē ko ʻení, te ke lava ʻo ʻave ha ngaahi pōpoaki ʻe tokoni ki he kau akó ke nau ako e konga folofola kuo vahe ki he uiké pea haʻu mateuteu ki he kalasí ke vahevahe e ngaahi fehuʻí mo e ngaahi fakakaukaú. ʻOku maʻu e ngaahi fakakaukau ki he ngaahi pōpoaki te ke lava ʻo ʻave ki he kau akó ʻi he kamataʻanga ʻo e lēsoni takitaha.

Te ke lava foki ʻo siviʻi e ngaahi fiemaʻu ʻa e kau akó ʻaki hono fakaafeʻi kinautolu ke ʻoatu ha ngaahi fehuʻi ʻoku nau maʻu fekauʻaki mo e konga folofolá. ʻI he ngaahi fetuʻutaki kehé, te ke lava ʻo fakaafeʻi e kau akó ke kamata hono aleaʻi ha kaveinga mo honau kaungāakó pe ngaahi kaungāmeʻá mo e kau mēmipa ʻo e fāmilí kimuʻa ʻi he kalasí. Fakakaukau ki ha ngaahi founga ke tokoniʻi ai e kau akó ke aʻusia ʻenau ngaahi taumuʻa akó mo fakaloloto ʻenau manako ke ako fakataautaha e folofolá.

Ngaahi Fehuʻí mo e Vahevahé

ʻOange ha taimi ki he kau akó ke fakahoko ai ha ngaahi fehuʻi mo vahevahe ha ngaahi fakakaukau mo ha ngaahi aʻusia. ʻE lava ke tokoni ʻeni ke nau fakafekauʻaki ʻa e folofolá ki heʻenau moʻuí. ʻOkú ne fakaʻatā foki ke ke vakaiʻi lelei ange ʻa e ngaahi fiemaʻu mo e meʻa ʻoku fakaʻamu ki ai ʻa e kau akó. ʻE lava foki ke hoko ʻeni ko ha taimi lelei ke muimuiʻi ai e ngaahi fakaafe mo e ngaahi aʻusia mei he ngaahi kalasi kimuʻá.

ʻOku hanga ʻe hono ʻoange ha taimi ki he kau akó ke fakahoko ha ngaahi fehuʻi mo vahevahe ha ngaahi fakakaukau fekauʻaki mo e konga folofolá ʻo fakaʻatā ke nau tākiekina ʻa e huʻunga ʻo e fealeaʻakí. ʻOku totonu ke feliliuaki pē ʻa e lahi ʻo e taimi ʻoku fakaʻaongaʻi ki he vahevahé. ʻE fiemaʻu ke ke ʻiloʻi e taimi ke tokoniʻi ai e kau akó ke nau hoko atu ki ha taha ʻo e ngaahi ʻekitivitī akó, ʻa ia ʻe lava ʻo tokoni ke nau fakaʻaongaʻi ʻa e meʻa ʻoku nau aleaʻí.

Ke kamataʻi e ʻeke fehuʻí mo e vahevahé, fakakaukau ki he ngaahi founga ko ʻení ke kamata ʻaki e ʻekitivitií:

Toe vakaiʻi e ngaahi pōpoaki naʻá ke ʻave ki he kau akó lolotonga e uiké pe ko ha faʻahinga fehuʻi naʻa nau ʻoatu kiate koe.
Fakaʻaliʻali ha ʻū fakatātā pe ngaahi foʻi lea ʻoku fakatātaaʻi ai e ngaahi meʻa naʻe hoko pe ngaahi tefitoʻi akonaki ʻi he konga folofolá.
ʻEke ki he kau akó pe ko e hā ha ngaahi fehuʻi pe ʻilo te nau fie aleaʻi.

Te ke lava ʻo fakaafeʻi e kau akó ke fai ha ngaahi fehuʻi mo vahevahe ha ngaahi fakakaukau fakakalasi, ʻi ha fanga kiʻi kulupu iiki, mo ha hoa, pe ʻi ha founga kehe, hangē ko hono fakaʻaongaʻi e mītia fakasōsialé. Fakakaukau ke ʻoange ki he kau akó ha taimi ke toe vakaiʻi pe ako ai e konga folofolá kimuʻa pea nau vahevahé.

Fakatokangaʻi ange: Kapau ʻoku iku ha fehuʻi pe fakakaukau pau ke mavahe ai mei he kaveingá, kumi ha ngaahi founga ke fakafoki mai ai e fealeaʻakí ki he ngaahi moʻoni mahuʻinga ʻi he folofolá. Mahalo ko e lelei tahá ke tali ha ngaahi fehuʻi hili ʻa e kalasí pe hili ha toe ako makehe. ʻOku sai pē ke pehē, “ʻOku ʻikai ke u ʻilo. Tau ako lahi ange ki heni pe ʻiate kitautolu pē pea vakai ki he meʻa te tau lava ʻo ako kimuʻa ʻi he kalasi hono hokó.”

Ako Fakataukeí

ʻOku tokoni e kalasi ko ʻení ki he kau akó ke fakatupulaki ha ngaahi taukei ʻe fakalahi ai ʻenau malava ke maʻu ha mahino mo talanoa fekauʻaki mo e folofolá. ʻOku faʻa fakakau ʻa e ngaahi taukei ko ʻení ʻi he ngaahi ʻekitivitī akó. Ke maʻu ha tokoni lahi ange ʻi hono fakaʻaongaʻi e ngaahi taukei ʻoku fokotuʻu atu ʻi he ngaahi ʻekitivitī akó, ʻe lava e kau faiakó mo e kau akó ʻo vakai ki he Ngaahi Taukei Ako Folofolá ʻi he Gospel Library. ʻOku ʻomi ʻi he maʻuʻanga tokoni ko ʻení ʻa e fakahinohino ki he founga ke fakamatalaʻi, faʻifaʻitaki, mo fakaʻaongaʻi ai e taukei takitaha.

ʻI hono toutou fakaʻaongaʻi ʻe he kau akó e ngaahi taukei ko ʻení ʻi he kalasí, te nau ongoʻi ha loto-falala lahi ange ki heʻenau malava ke ako mei he folofolá. Kumi ha taimi ke muimuiʻi mo fakaafeʻi ai e kau akó ke vahevahe ʻenau ngaahi aʻusiá ʻo fakaʻaongaʻi e ngaahi taukei ko ʻení.

Ngaahi ʻEkitivitī Ako ke Fili Mei Aí

ʻOku kau ʻi he lēsoni takitaha ha ngaahi ʻekitivitī ako kehekehe ke fili mei ai. ʻOku ʻikai fiemaʻu ia ke ke fakaʻaongaʻi kotoa e ngaahi ʻekitivitī ako ki he lēsoní ʻi ha foʻi kalasi pē ʻe taha. Tokanga taha ki he ului ʻa e kau akó, kae ʻikai ko e ʻosi kotoa ʻa e lēsoní. Fakatokangaʻi e ngaahi fiemaʻu ʻa e kau mēmipa hoʻo kalasí, pea kolea e fakahinohino ʻa e Laumālie Māʻoniʻoní ʻi hoʻo fili e ngaahi ʻekitivitī ako te ke fakaʻaongaʻí. Te ke lava foki ʻo fehuʻi ki he kau mēmipa ʻo e kalasí pe ko e fē ʻa e ngaahi lēsoni mo e ngaahi ʻekitivitī ako ʻe ʻaonga taha kiate kinautolú.

ʻE tokoni fēfē ʻa e Ngaahi Tokoni Fakafolofolá: Fuakava Motuʻá ke fakalahi e aʻusia fakaakó?

Ko e Ngaahi Tokoni Fakafolofolá: Fuakava Motuʻá ko ha maʻuʻanga tokoni ia ʻokú ne ʻomi ha fakakaukau ki he puipuituʻa ʻo e folofolá (taimí mo e feituʻú, anga fakafonuá, hisitōliá, mo e siokālafí), fakamahinoʻi e ʻuhinga ʻo e ngaahi foʻi leá mo e kupuʻi leá, mo tokoni ke mahino e ngaahi potufolofola faingataʻá. ʻOku maʻu ʻi ha ngaahi ʻekitivitī ako lahi ʻi he naunau ʻa e faiakó ha ngaahi fakamatala ki he Ngaahi Tokoni Fakafolofolá: Fuakava Motuʻá. Tokoni ke maʻu ʻe he kau akó ʻa e maʻuʻanga tokoni ko ʻení ʻi he Gospel Library. Poupouʻi kinautolu ke fakaʻaongaʻi e maʻuʻanga tokoni ko ʻení ʻi heʻenau ako e Fuakava Motuʻá ʻi he kalasí pea mo ʻapi fakatouʻosi.

Ko e hā ha ngaahi maʻuʻanga tokoni kehe ʻe lava ʻo tokoni mai ke u hoko lahi ange ai ʻo faiako hangē ko Kalaisí?

Makehe mei he kau atu ki he ngaahi fakataha ako ʻa e kau faiakó mo hoʻo kouʻōtineitá pe kau faiako fakalotofonuá, fakakaukau ke toe vakaiʻi ʻa e ngaahi maʻuʻanga tokoni ko ʻení:

ʻOku vahevahe ʻi heKo e Faiako ʻi he Founga ʻa e Fakamoʻuí: Maʻanautolu Kotoa ʻOku Faiako ʻi he ʻApí mo e Siasí (2022) ha ngaahi tefitoʻi moʻoni ke tokoni atu ke ke faiako ʻo hangē ange ko e Fakamoʻuí.
ʻE lava ke tokoni atu ʻa eFakatupulaki ʻa e Ngaahi Taukei ʻa e Faiakó (2022) ke ke akoako fakaʻaongaʻi e ngaahi tefitoʻi moʻoni ʻi he Ko e Faiako ʻi he Founga ʻa e Fakamoʻuí.
ʻOku fakakau e fanga kiʻi tokoni fakafaiako ʻoku ui “Ko Hono Fakatupulaki ʻo ʻEtau Founga Akoʻí mo e Akó” ʻi he ngaahi lēsoni ʻi he tohi lēsoni ko ʻení pea ʻe lava ʻo tokoni atu ke ke akoako ha ngaahi taukei pau lolotonga e kalasi takitaha.

Ko e hā e meʻa ʻoku fiemaʻu mei he kau akó ke nau maʻu ha māká?

Ko e fakamatala fekauʻaki mo e founga ke maʻu ai ha maaka ke ʻosi mei he ʻinisititiutí pe ha maaka ʻe lava ke ʻave ki he ngaahi akoʻanga ʻa e Siasí, vakai ki he InstituteCredit.ChurchofJesusChrist.org.

ʻE lava fēfē ke u liliu ʻa e ngaahi lēsoní maʻá e kakai ʻoku faingataʻaʻia fakaesinó?

ʻI hoʻo faiakó, tokanga ki he kau ako ʻoku ʻi ai haʻanau ngaahi fiemaʻu makehé. Fulifulihi ʻa e ngaahi ʻekitivitií mo e ngaahi lēsoní ke fakakau e kau ako ko ʻení mo tokoniʻi ke nau lavameʻa. Ki ha ngaahi maʻuʻanga tokoni lahi ange ʻi he founga ke akoʻi ai ʻa e kakai ʻoku faingataʻaʻiá, vakai ki he disabilities.ChurchofJesusChrist.org.

Taimi-tēpile ʻo e Ngaahi Lēsoni ki he Kalasi Fakalotu 301 mo e 302

Ko ha ngaahi sīpinga ʻeni ʻo e ngaahi fakahinohino ki he vave hono akoʻí te ke lava ʻo fakaʻaongaʻi ke fakafeʻungaʻi ʻa e ngaahi lēsoní ki he taimi-tēpile angamaheni ʻo e semesitā uike ʻe 14 ʻo e Lēsoni Fakalotu 301 mo e 302. Liliu ʻa e ngaahi meʻa ko ʻeni ke fili mei aí ke tatau mo e ngaahi fiemaʻu hoʻo polokalamá.

Lēsoni Fakalotu 301

Mōsese–ʻĒpalahame; Sēnesi 1–1 Ngaahi Tuʻi 11

Uike	1	2	3	4	5	6	7
Uike Lēsoni	1 Talateu ki he Fuakava Motuʻá	2 Mōsese 1; ʻĒpalahame 3 Sēnesi 1–2; Mōsese 2–3; ʻĒpalahame 4–5	3 Sēnesi 3–4; Mōsese 4–5	4 Sēnesi 5; Mōsese 6 Mōsese 7	5 Sēnesi 6–11; Mōsese 8 Sēnesi 12–17; ʻĒpalahame 1–2	6 Sēnesi 18–23 Sēnesi 24–33	7 Sēnesi 37–41 Sēnesi 42–50

Uike

Lēsoni

Talateu ki he Fuakava Motuʻá

Mōsese 1; ʻĒpalahame 3

Sēnesi 1–2; Mōsese 2–3; ʻĒpalahame 4–5

Sēnesi 3–4; Mōsese 4–5

Sēnesi 5; Mōsese 6

Mōsese 7

Sēnesi 6–11; Mōsese 8

Sēnesi 12–17; ʻĒpalahame 1–2

Uike	8	9	10	11	12	13	14
Uike Lēsoni	8 ʻEkesōtosi 1–6 ʻEkesōtosi 7–13	9 ʻEkesōtosi 14–18 ʻEkesōtosi 19–20; 24; 31–34	10 ʻEkesōtosi 35–40; Levitiko 1; 4; 16; 19 Nōmipa 11–14; 20–24; 27	11 Teutalōnome 6–8; 15; 18; 29–30; 34 Sōsiua 1–8; 23–24	12 Fakamaau 2–4; 6–8; 13–16 Lute; 1 Samuela 1–7	13 1 Samuela 8–10; 13; 15–16 1 Samuela 17–18; 24–26; 2 Samuela 5–7	14 2 Samuela 11–12; 1 Ngaahi Tuʻi 3; 6–9; 11

Uike

Lēsoni

ʻEkesōtosi 1–6

ʻEkesōtosi 7–13

ʻEkesōtosi 14–18

ʻEkesōtosi 19–20; 24; 31–34

ʻEkesōtosi 35–40; Levitiko 1; 4; 16; 19

Nōmipa 11–14; 20–24; 27

Teutalōnome 6–8; 15; 18; 29–30; 34

Sōsiua 1–8; 23–24

Fakamaau 2–4; 6–8; 13–16

Lute; 1 Samuela 1–7

1 Samuela 8–10; 13; 15–16

1 Samuela 17–18; 24–26; 2 Samuela 5–7

2 Samuela 11–12; 1 Ngaahi Tuʻi 3; 6–9; 11

Lēsoni Fakalotu 302

1 Ngaahi Tuʻi 12–Malakai 4

Uike	1	2	3	4	5	6	7
Uike Lēsoni	1 Talateu ki he Fuakava Motuʻá 1 Ngaahi Tuʻi 12–13; 17–22	2 2 Ngaahi Tuʻi 2–7 2 Ngaahi Tuʻi 16–25	3 2 Fakamatala Meʻa Hokohoko 14–20; 26; 30 ʻĒsela 1; 3–7; Nehemaia 2; 4–6; 8	4 ʻĒseta Siope 1–3; 12–14; 19; 21–24; 38–40; 42	5 Saame 1–2; 8; 19–33; 40; 46 Saame 49–51; 61–66; 69–72; 77–78; 85–86	6 Saame 102–3; 110; 116–19; 127–28; 135–39; 146–50 Lea Fakatātā 1–4; 15–16; 22; 31; Tangata Malanga 1–3; 11–12	7 ʻĪsaia 1–12

Uike

Lēsoni

Talateu ki he Fuakava Motuʻá

1 Ngaahi Tuʻi 12–13; 17–22

2 Ngaahi Tuʻi 2–7

2 Ngaahi Tuʻi 16–25

2 Fakamatala Meʻa Hokohoko 14–20; 26; 30

ʻĒsela 1; 3–7; Nehemaia 2; 4–6; 8

ʻĒseta

Siope 1–3; 12–14; 19; 21–24; 38–40; 42

Saame 1–2; 8; 19–33; 40; 46

Saame 49–51; 61–66; 69–72; 77–78; 85–86

Saame 102–3; 110; 116–19; 127–28; 135–39; 146–50

Lea Fakatātā 1–4; 15–16; 22; 31; Tangata Malanga 1–3; 11–12

ʻĪsaia 1–12

Uike	8	9	10	11	12	13	14
Uike Lēsoni	8 ʻĪsaia 13–14; 22; 24–30; 35 ʻĪsaia 40–49	9 ʻĪsaia 50–57 ʻĪsaia 58–66	10 Selemaia 1–3; 7; 16–18; 20 Selemaia 31–33; 36–38; Tangilaulau ʻa Selemaiá 1; 3	11 ʻIsikieli 1–3; 33–34; 36–37; 47	12 Taniela 1–7 Hōsea 1–6; 10–14; Sioeli	13 ʻĀmosi; ʻOpataia; Siona Maika; Nēhumi; Hapakuki; Sefanaia	14 Hakeai 1–2; Sākalaia 1–4; 7–14 Malakai

Uike

Lēsoni

ʻĪsaia 13–14; 22; 24–30; 35

ʻĪsaia 40–49

ʻĪsaia 50–57

ʻĪsaia 58–66

Selemaia 1–3; 7; 16–18; 20

Selemaia 31–33; 36–38; Tangilaulau ʻa Selemaiá 1; 3

ʻIsikieli 1–3; 33–34; 36–37; 47

Taniela 1–7

Hōsea 1–6; 10–14; Sioeli

ʻĀmosi; ʻOpataia; Siona

Maika; Nēhumi; Hapakuki; Sefanaia

Hakeai 1–2; Sākalaia 1–4; 7–14

Malakai