Sēnesi 37–41

Te ke lava ʻo vahevahe ʻa e lea ko ʻeni ʻa ʻEletā Lānolo A. Lasipení, hili iá pea fakaafeʻi ha niʻihi ʻo e kau akó ke vahevahe ha ngaahi sīpinga ʻo e ivi tākiekina ʻa e ʻEikí ʻi heʻenau moʻuí:

ʻOku tataki koe ʻe he toʻukupu ʻo e ʻEikí. ʻI ha “palani fakalangi,” ʻokú Ne kau ai ʻi he ngaahi meʻa iiki mo mahuʻinga ʻi hoʻo moʻuí. (“ʻI ha Palani Fakalangi,” Liahona, Nōvema 2017, 57)

Fakaafeʻi e kau akó ʻi heʻenau ako e talanoa kia Siosefa ʻo ʻIsipité he ʻaho ní ke fakakaukau ki ha ngaahi taimi kuo nau fakatokangaʻi ai hono tataki ʻe he ʻEikí ʻenau moʻuí ʻi ha ngaahi founga taʻeʻamanekina. Ke tokoni ke mahino ki he kau akó ʻa e puipuituʻa ʻo e ngaahi aʻusia ʻa Siosefa ʻi heʻene hoko ko ha pōpula ʻi ʻIsipité, fakakaukau ke fakaʻaliʻali e fakatātā ko ʻení pea fakaafeʻi ha mēmipa ʻo e kalasí ke ne fakamatalaʻi fakanounou ʻa e Sēnesi 37. (Kapau ʻe fiemaʻu, ʻe lava foki ke lau ʻe he kau akó ʻa e ʻuluʻi fakamatala ʻo e vahé.)

Fakakaukau ke fakaʻaliʻali ʻa e tēpile ko ʻení. Tuku ha taimi ki he kau akó ke nau ako fakafoʻituitui pe ʻi ha fanga kiʻi kulupu iiki ha seti veesi ʻe taha pe lahi ange ʻi he kōlomu ʻi he toʻohemá. Fakaafeʻi ke nau kumi pea lekooti ʻenau tali ki he ongo fehuʻi ʻi he kōlomu ʻe tahá.

Fakaafeʻi e kau akó ke vahevahe e ngaahi meʻa ne nau maʻú. Te ke lava foki ʻo kole ange ke nau vahevahe ha ngaahi moʻoni ne nau ako fekauʻaki mo e ʻEikí mei he ngaahi aʻusia ʻa Siosefá. ʻE lava ke kau ʻi he ngaahi tali ʻa e kau akó ha ngaahi moʻoni hangē ko ʻení: ʻE lava ke kau ʻa e ʻEikí mo ktiautolu ʻi he ngaahi tūkunga kotoa pē ʻo ʻetau moʻuí. ʻE lava ke fakaʻaongaʻi ʻe he ʻOtuá hotau ngaahi faingataʻá ke faitāpuekina ʻetau moʻuí mo e moʻui ʻa e niʻihi kehé. (ʻE lava ke ke fakakaukau ke ako ʻa e Tokāteline mo e Ngaahi Fuakava 90:24 pea fakaafeʻi e kau akó ke aleaʻi e founga ʻe lava ke fakaʻaongaʻi ai e ngaahi akonaki ʻa e ʻEikí ʻi he veesi ko ʻení ki he tūkunga ʻo Siosefá.)

Fakakaukau foki ke ʻeke ha ngaahi fehuʻi hangē ko ʻení:

• Ko e fē ha taimi kuó ke fakatokangaʻi ai hono fakaʻaongaʻi ʻe he ʻOtuá ho ngaahi faingataʻá ke faitāpuekina hoʻo moʻuí pe moʻui ʻa e niʻihi kehé?

• Kuo fakahaaʻi fēfē ʻe he ʻOtuá ʻokú Ne kau ʻi he fanga kiʻi meʻa iiki pe ngaahi makamaile lalahi ʻo hoʻo moʻuí?

• ʻOkú ke tauhi fēfē ha fakakaukau ʻoku taʻengatá ʻi he taimi ʻokú ke foua ai e ngaahi taimi faingataʻá pe ʻikai ke ngali mahino e ngaahi talí?

Ki ha ngaahi sīpinga kehe ʻo ha kakai ne tuʻunga ʻi honau ngaahi faingataʻá ʻa ʻenau aʻusia e ngaahi tāpuaki ʻa e ʻOtuá, te ke lava ʻo huluʻi ʻa e ongo vitiō “Trial of Adversity” (2:40) pe “How I Found Out Out God Loves Me” (5:26).

2:51

1:36

Fakakaukau ke fakaafeʻi e kau akó ke nau hiki ha meʻa ʻoku nau fakaʻamu ke manatuʻi ʻi heʻenau fehangahangai mo honau ngaahi ʻahiʻahí. Vahevahe hoʻo fakamoʻoni ki he malava ʻe he ʻOtuá ʻo fakaʻaongaʻi ʻa e ngaahi faingataʻá ke tākiekina ʻetau moʻuí ki heʻetau leleí.

Foki ki he “Ngaahi ʻEkitivitī Ako ke Fili Mei Aí.”

Fakaafeʻi e kau akó ke nau fakakaukauloto ʻoku ʻi ai haʻanau kaungāmeʻa ʻokú ne pehē, “ʻOku ʻikai ke u ʻilo pe ʻoku lava fēfē ʻa e kakaí ʻo kei maʻa fakasekisuale ʻi he māmani ʻoku tau nofo aí.”

Te ke lava ʻo fakaafeʻi e kau akó ke aleaʻi ha ngaahi fehuʻi hangē ko ʻení:

• Ko e hā e ʻuhinga ʻe ala ongoʻi peheni ai ha taha?

• ʻOkú ke pehē ko e hā ha meʻa ʻe ala tokoni ki ha taha ʻokú ne maʻu e hohaʻa ko ʻení?

Fakamahinoʻi ange naʻe fakamālohiʻi ʻa Siosefa ʻo ʻIsipité ʻe he uaifi ʻo Potifaá ke ne fai ha angahala fakasekisuale lolotonga ʻene hoko ko e pule ʻo e fale ʻo Potifaá. Fakaafeʻi e kau akó ke nau fakatokangaʻi e meʻa ʻoku nau ako mei he Laumālie Māʻoniʻoní he lolotonga ʻenau akó ʻe ala tokoni ke nau tekeʻi ʻa e ngaahi faingataʻa pe ngaahi ʻahiʻahi te nau ala fehangahangai mo iá.

Ke tokoni ke fakahinohino e ako ʻe he kau akó ʻo e Sēnesi 39, tufa e laʻipepa tufa “Ako mei he Sīpinga ʻa Siosefa ki Hono Tekeʻi ʻo e ʻAhiʻahí.” Fakaafeʻi e kau akó ke fakakakato ia mo hanau hoa pe kulupu tokosiʻi. (ʻE lava foki ke hoko ʻeni ko ha feituʻu lelei ke tokoni ki he kau akó ke nau akoako e “Ko Hono Fakatatau ʻa e Folofolá” ʻi he Ngaahi Taukei Ako Folofolá.)

Hili e fealēleaʻaki ʻa e kau akó, fakaafeʻi ha niʻihi ke vahevahe mo e kalasí ha ngaahi fakakaukau ʻe niʻihi ne nau hiki mo honau hoá pe kulupú. (ʻI he vahevahe ʻa e kau akó, te ke lava ʻo tokoni ke nau ʻilo ha ngaahi moʻoni hangē ko ʻení: ʻE lava heʻetau līʻoa ki he ʻOtuá ʻo ʻomi ha mālohi ke tau matuʻuaki ʻa e ʻahiʻahí. Kapau te tau mavahe mei he ngaahi tūkunga ʻoku fakatupu ʻahiʻahí, ʻe lahi ange leva ʻetau malava ke matuʻuaki e ʻahiʻahí.)

Mahalo ʻe ʻi ai hao kau ako ʻoku nau fāifeinga ke tekeʻi ʻa e ʻahiʻahí pea fiemaʻu ke nau ongoʻi ha ʻamanaki lelei te nau lava ʻo fakatomala mo ikunaʻi ʻenau ngaahi angahalá. Fakamoʻoni ki he natula ʻofa, faʻa kātaki, mo faʻa fakamolemole ʻo Sīsū Kalaisí, “ʻa ia ʻoku māfimafi ke fakamoʻui mo fakamaʻa mei he taʻe-māʻoniʻoni kotoa pē” (ʻAlamā 7:14). Fakakaukau ke huluʻi ʻa e foʻi vitiō “Temptation Fades as We Seek Christ in Every Thought” (2:57) pea fakaafeʻi e kau akó ke kumi e founga ʻe lava ke ʻomi ai ʻe he Fakamoʻuí ha ʻamanaki lelei kiate kitautolú.

2:58

Fakakaukau ke fakaʻaliʻali e ngaahi fakahinohino ko ʻení ke tokoni ke fakaʻaongaʻi ʻe he kau akó ʻa e ngaahi moʻoni kuo nau akó:

Faʻu ha palani ʻe ala tokoni atu ke ke fakaʻehiʻehi mo tekeʻi ʻa e ʻahiʻahí. Hangē ko ʻení, te ke lava ʻo:

1. Fakakaukau ki ha ʻahiʻahi ʻokú ke faʻa fehangahangai mo ia.

2. Feinga ke ʻiloʻi ha ngaahi tūkunga te ke ala fiemaʻu ke fakaʻehiʻehi mei ai kae lava ke ke fakasiʻisiʻi ʻa e ʻahiʻahí.

3. Feinga ke ʻiloʻi ʻa e founga te ke “hola” aí ʻi he taimi ʻe hoko mai ai ʻa e ʻahiʻahí.

4. Lotua ha mālohi mo ha fakahinohino ke ikunaʻi e ʻahiʻahi ko ʻení.

Lekooti hoʻo palaní, pea toutou vakai ki ai ʻi he ngaahi uike ka hoko maí ke fakafuofuaʻi hoʻo fakalakalaká.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke fakaʻaliʻali e fakamatala ko ʻení. Fakaafeʻi e kau akó ke nau fakafuofuaʻi kinautolu ʻi he fakamatala takitaha, ʻo fakaʻaongaʻi ha meʻafua mei he 1 (ʻikai teitei poupou) ki he 5 (poupou lahi ʻaupito). He ʻikai vahevahe ʻenau talí mo e niʻihi kehé.

ʻI he kau ʻa e kau akó ʻi he ʻekitivitī ako ko ʻení, fakaafeʻi ke nau fakakaukau ki he founga ʻe lava ke hoko ai ʻa e mateuteú ke ne ʻomi ʻa e nongá mo e tuʻunga paú ʻi he kahaʻú.

Fakamanatu ki he kau akó naʻe tuʻunga ʻi he tokoni ʻa e ʻOtuá ʻa e ola lelei hono fakaʻuhingaʻi ʻe Siosefa ʻa e misi ʻa Feló ʻa ia naʻe ʻikai ke lava ʻe ha taha kehe ʻo fakamatalaʻí. ʻI he misí, naʻe fakatokanga ai ʻa e ʻOtuá kia Felo fekauʻaki mo ha honge naʻe ʻamanaki ke hoko, pea naʻe fokotuʻu ange ʻe Siosefa ha palani ngāue ke tokoni ke ne mateuteu.

Lau fakakalasi ʻa e Sēnesi 41:33–42, 53–57, ʻo kumi e ngaahi fokotuʻu ʻa Siosefa kia Feló pea mo e meʻa naʻe fai ʻe Feló.

Fakaafeʻi e kau akó ke vahevahe e meʻa naʻa nau ako mei he ngaahi veesi ko ʻení ʻaki hano ʻeke ha ngaahi fehuʻi hangē ko ʻení:

• Naʻe tāpuekina fēfē ʻe he ʻEikí ʻa Siosefa pea mo e kakai naʻá ne feohi mo iá?

• Ko e hā ha foʻi moʻoni ʻokú ke ako mei he ngaahi veesi ko ʻení fekauʻaki mo e founga ʻoku teuteuʻi ai kitautolu ʻe he ʻEikí ki he kahaʻú? (ʻE lava ke fakahā ʻe he kau akó ha foʻi moʻoni hangē ko ʻení: ʻOku faleʻi kitautolu ʻe he ʻEikí ʻo fakafou ʻi Heʻene kau tamaioʻeiki kuo ueʻi fakalaumālié, ke tau teuteu ki he kahaʻú.)

Tuku ha taimi ki he kau akó ke nau kumi mo vahevahe ʻa e faleʻi kuo fai ʻe he ʻEikí ʻo fakafou ʻi Heʻene kau palōfitá ʻa ia te ne ala teuteuʻi kitautolu ki he kahaʻú ʻi ha niʻihi ʻo e ngaahi tafaʻaki ko ʻení:

• Fakalaumālie

• Fakaʻatamai

• Fakapaʻanga

• Fakatuʻasino

• Fakaeloto

Fakakaukau ke hiki e ngaahi tali ʻa e kau akó ʻi he palakipoé. Te ke lava foki ʻo kole ki he kau akó ke vahevahe ʻa e meʻa ʻe lava ke akoʻi ange ʻe he ngaahi faleʻi ko ʻení fekauʻaki mo e finangalo ʻa e Fakamoʻuí maʻanautolú.

Fakakaukau ke vahevahe ʻa e fakamatala ko ʻeni naʻe fai ʻe Pīsope W. Kulisitofā Uatoló:

ʻI he ʻaho ní, kuo tāpuekina kitautolu ke tataki ʻe ha kau palōfita ʻa ia ʻoku mahino kiate kinautolu ʻa e fiemaʻu ko ia ke tau teuteu ki he ngaahi fakatuʻutāmaki “ʻa ia ʻe hoko maí” [Tokāteline mo e Ngaahi Fuakava 1:17] pea ʻokú Ne ʻafioʻi ʻa e ngaahi fakangatangata pe ngaahi fakataputapui te tau ala fepaki mo ia ʻi heʻetau feinga ke muimui ki heʻenau faleʻí. …

… [ʻOku totonu] ke toki fakaʻaongaʻi pē ʻa e ngaahi tefitoʻi moʻoni ko ʻeni [ʻo e teuteú] “ʻi he fakapotopoto mo e maau,” [Mōsaia 4:27] kae lava ke tau lea ʻo hangē ko ia naʻe fakahoko ʻe Siosefa ʻi ʻIsipité, “Naʻe ʻi ai ʻa e mā” [Sēnesi 41:54].

ʻOku ʻikai ʻamanaki mai ʻa e ʻEikí ke tau fakahoko ha meʻa ʻo lahi ange ʻi he meʻa te tau malavá, ka ʻokú Ne ʻamanaki mai ke tau fakahoko ʻa e meʻa te tau malavá, ʻi he taimi te tau lava aí. (“Naʻe ʻi ai ʻa e Mā,” Liahona, Nōvema 2020, 43)

• Kuo tāpuekina fēfē koe ʻe he ʻEikí ʻi hoʻo ngaahi feinga ke teuteu ki he kahaʻú? Ko e hā ha founga kuo ʻaonga ai kiate koe ʻa e tokateu ʻa e niʻihi kehé?

Fakaafeʻi e kau akó ke nau fakakaukau ki he founga ʻoku nau muimui ai ki he ngaahi fakaafe ʻa e ʻEikí ke tokateu ki he kahaʻú. Fakaafeʻi ke nau fakakaukau ki ha ngaahi liliu te nau lava ke fai ʻo makatuʻunga ʻi he meʻa kuo nau ako pe ongoʻi mei he Laumālie Māʻoniʻoní. Poupouʻi ke nau lekooti ʻenau ngaahi taumuʻá pea ngāueʻi ia.

Foki ki he “Ngaahi ʻEkitivitī Ako ke Fili Mei Aí.”