Sēnesi 37–41

ʻE lava ke fakamanatu mai ʻe ha konga lahi ʻo e moʻui ʻa Siosefá ʻa Sīsū Kalaisi. Ko ha ngaahi sīpinga ʻeni ʻe niʻihi:

ʻE lava foki ke ʻuhinga ʻa e foʻi lea faka-Hepelū naʻe liliu ko e “kofutuʻa” ʻi he Pulusinga ʻa Kingi Sēmisi ʻo e Tohi Tapú ki ha “kofu,” “pulupulu,” pe “teunga.” Kuo fokotuʻu mai ʻe he kau mataotaó ʻe lava ke fakamatalaʻi ʻe he kupuʻi lea “kofutuʻa pulepulé” ha vala naʻe tuitui lelei ʻa ia naʻe aʻu ki he ongo ʻaofinimá mo e vaʻé. ʻOku malava pē naʻe maʻu ʻe Siosefa ʻa e kofutuʻa ko ʻení ke fakafofongaʻi hono fatongia ko e foha ʻo e tofiʻa ʻo Sēkopé. Naʻe hoko e kofutuʻa ʻo Siosefá, fakataha mo ʻene ngaahi misí pea mo e ʻofa makehe ʻa ʻene tamaí ʻiate iá, ke fakalalahi ai e meheka ʻa hono ngaahi tokouá kiate iá.

Naʻe ʻomi ʻe he ʻEikitau ko Molonaí ʻi he Tohi ʻa Molomoná ha fakamatala lahi ange fekauʻaki mo e kofutuʻa ʻo Siosefá ʻa ia ʻoku ʻikai lekooti ʻi he Tohi Tapú. Naʻá ne fakamatalaʻi naʻe haehae kongokonga ʻe he ngaahi tokoua ʻo Siosefá hono kofutuʻá pea nau tauhi ha konga ʻe taha. Naʻe kikiteʻi kimui ʻe he tamai ʻa Siosefa ko Sēkopé, naʻe fakataipe ʻe he toenga ʻo e kofutuʻa ʻo Siosefá ha toenga ʻo e hako ʻo Siosefá ʻa ia ʻe fakahaofi ʻe he ʻOtuá. Ko e kau Nīfai mo e kau Leimana ʻi he Tohi ʻa Molomoná ko ha “toenga ʻa [kinautolu] ʻo e hako ʻo Siosefá.” Naʻe talaʻofa ʻe he ʻEikí “ʻe ʻikai ʻauha ʻa [e] hako [ʻo Siosefá] lolotonga ʻa e kei tuʻu ʻa māmaní.”

Naʻe faʻa fakahoko ʻe he kakai ʻi he Fuakava Motuʻá ha ngaahi tōʻonga pe fakaʻilonga tukufakaholo ke fakahaaʻi ʻaki ʻenau loto-mamahí. Naʻe haehae ʻe Sēkope hono kofú peá ne tui ha tauangaʻa ʻi he taimi naʻá ne tui ai kuo mate ʻa Siosefá. Ko e tauangaʻá ko ha tupenu petepete ia naʻe ngaohi mei he fulufuluʻi kosí pe kamelí ʻa ia naʻe tui lolotonga e ngaahi taimi ʻo e tengihiá pe fakatomalá. Naʻe faʻa kau fakataha hono tui ʻo e tauangaʻá mo hono haehae ʻo e valá.

Naʻe muimui ʻa e kau ʻIsileli ʻo e kuonga muʻá ki ha ʻulungaanga angamaheni ʻo e malí ʻa ia naʻe ʻiloa ko e “mali fakalīvaí.” Ko e Levir ko e foʻi lea faka-Latina ia ki he “tokoua ʻo e husepānití.” Fakatatau ki he lao angamaheni ko ʻení, naʻe ʻi ai e totonu ʻa ha uitou ʻoku ʻikai haʻane fānau ke mali mo e tokoua hoko hake hono husepānití pe ko e kāinga ofi taha [ʻo e husepānití] ʻoku kei moʻuí. Ko e fānau ko ia ʻoku fanauʻi ʻi he ngaahi mali fakalīvai ko ʻení, ʻe ohi hake kinautolu ko ha fakafofonga ʻo e husepāniti ʻo e fefiné kuo maté pea naʻe lau kinautolu ko ʻene fānau, kae ʻikai ko e fānau ʻa e tokoua [ʻo e husepānití] ʻoku kei moʻuí. Naʻe hoko foki ʻa e ngaahi mali fakalīvaí ke ne fakapapauʻi ʻe tokoniʻi ʻa e uitoú pea maʻu mo ha tofiʻa ʻi loto he fāmilí.

Hili e mālōlō ʻa e ongo ʻuluaki husepāniti ʻo Temá—ko e ongo foha lahi ʻo Siutá—naʻe palōmesi ange ʻa Siuta ʻe hoko hono foha hono tolu ko Silá ko hano husepāniti ʻi he taimi te ne fuʻu lahi aí. ʻI he taimi naʻe ʻikai tauhi ai ʻe Siuta ʻa e palōmesi ko ʻení, naʻe tafoki ʻa Tema ʻo fai ha anga kākā koeʻuhí ke ne lava ai ʻo maʻu ha fānau mo Siuta. Naʻe mei fakaʻatā ʻe he ngaahi tōʻonga ʻo e mali fakalīvaí ke mali ʻa Siuta mo Tema kapau he ʻikai lava ke mali ʻa Tema mo ha taha ʻo e ngaahi foha ʻo Siutá.

ʻOku ngalingali naʻe ʻiloʻi pē ʻe Tema ʻe lava ke hoko ha ngaahi nunuʻa fakamamahi ʻi heʻene ngaahi angafaí. ʻI he taimi naʻe fekau ai ʻe Siuta ke tutu ʻa Tema hili e ʻilo ʻokú ne feitamá, naʻe fakaʻaongaʻi ʻe Tema ʻa e foʻi mama, ʻū vesa mo e tokotoko naʻe ʻoange ʻe Siuta kiate iá ko ha fakamoʻoni ko ia ʻa e tamaí. Naʻe tala moʻoni ʻe Siuta ʻene angahalá peá ne pehē, “ʻOku tonuhia lahi ia ʻiate au.” Naʻe fakahaofi e moʻui ʻa Temá peá ne fanauʻi ai ha ongo māhanga tangata. ʻOku fakafou ʻi he foha ʻo Tema ko Felesí, ʻa e hoko ʻa Tema ko ha kui ʻa Sīsū Kalaisí.

Naʻe ʻi he fale fakapōpulá ʻa Siosefa ʻi ha taʻu ʻe ua hili ʻene fakaʻuhingaʻi e misi ʻa e pule fua ipú mo e tangata taʻo maá. Naʻe fakatau atu ia ki he nofo pōpulá ʻi hono taʻu 17 nai, pea naʻá ne taʻu 30 ʻi he taimi naʻe fili ai ia ʻe Felo ke hoko ko e pule fika ua ki ʻIsipité. Ko hono fakakātoá, naʻá ne nofo pōpula ʻi ha taʻu ʻe 13 nai ʻi he fale ʻo Potifaá. ʻOku ʻikai fakamatala ʻe he lekōtí ʻa e fuoloa ʻo e ngāue ʻa Siosefa kia Potifā kimuʻa pea tuku pōpula iá, ka ko e foʻi moʻoni ko ia naʻá ne ngāue ʻo aʻu ki heʻene hoko ko e leʻo ʻo e fale fakapōpulá, ʻokú ne talamai ai naʻe ʻi ai ha vahaʻataimi kimuʻa pea toki kau atu ʻa e tangata fua ipú mo e tangata taʻo maá. ʻOku malava pē ke pehē naʻe nofo pōpula ʻa Siosefa ʻi ha taʻu ʻe tolu pe lōloa ange ai.

Ko e pulú [kine] ko ha foʻi lea ia ʻe taha ki he “fanga pulú [cattle],” pea ʻoku fakaʻaongaʻi ʻa e kupuʻi lea “fua koane” ke fakafofongaʻi ʻa e faʻahinga keleni kehekehe, hangē ko e uité mo e paʻalé.

ʻOku ʻikai mahino e ʻuhinga faka-ʻIsipite ʻo e hingoa Safinati-peaneá. ʻOku kau ʻi he ngaahi fokotuʻu ki hono ʻuhingá ʻa e “ko ia ʻokú ne fakahā ʻa e meʻa ʻoku fufuú” pe “ʻoku folofola mai ʻa e ʻOtuá pea ʻokú Ne moʻui.”

• “Ngaahi faitatau ʻia Siosefa ʻo ʻIsipité mo Sīsū Kalaisí,” Liahona, Māʻasi 2022, 48

• Kelly R. Johnson, “Naʻe ʻia Siosefa ʻa e ʻEikí,” Liahona, Māʻasi 2022, 44–47

• Ngaahi Tefitó mo e Ngaahi Fehuʻí, “Angamaʻá,” Gospel Library

• W. Christopher Waddell, “Naʻe ʻi ai ʻa e Mā,” Liahona, Nōvema 2020, 42–45