Nōmipa 11–14; 20–24; 27

Ko e tohi Nōmipá ko e fika fā ia ʻi he ʻū tohi ʻe nima ʻa Mōsesé. ʻOku fakatefito hono hingoá ʻi he fakahinohino ʻa e ʻEikí kia Mōsese ke lau kotoa e kakai tangata ʻIsileli taʻu 20 mo motuʻa ange ne nau lava ʻo ʻalu ki he taú. ʻOku maʻu e hingoa faka-Hepelū ki he tohí mei he kupuʻi lea “ʻi he toafá.” ʻOku lekooti ʻi he tohi Nōmipá ʻa e ngaahi aʻusia ʻa e kakai ʻIsilelí ʻi heʻenau hē holo ʻi he toafá ʻi he taʻu ʻe 40. ‘E lava ke vahevahe ʻa e tohí ki ha konga ‘e tolu:

1. Vahe 1–10: Ko e teuteu ʻa e kakai ʻIsilelí ke mavahe mei Sainai hili ʻenau nofo kemi taʻu kakato aí.

2. Vahe 10–21: Ko e fononga ʻa e kakai ʻIsilelí mei Sainai ki he kauʻāfonua fakatonga ʻo Kēnaní, ko ʻenau fakafisi ke hū ki Kēnaní, pea mo e hoko atu ʻenau hē ʻi he toafá.

3. Vahe 22–36: Ko e ngaahi meʻa naʻe hoko ʻi he ngaahi potu tokalelei ʻo Mōapé ʻi tuʻa pē ʻi he fonua ʻo e talaʻofá.

Naʻe ʻikai fuoloa mei he mavahe ʻa e kakai ʻIsilelí mei Sainaí, naʻa nau lāunga kia Mōsese fekauʻaki mo ʻenau kai mana ʻi he ʻaho kotoa pē. Ko e ʻuluaki ʻeni ʻo e ngaahi taimi lahi ʻo e lāungá ʻoku lekooti ʻi he Nōmipá. Naʻe taʻe-fakafiemālie e lāunga ʻa e kakai ʻIsilelí ki he ʻEikí mo Mōsese fakatouʻosi. ʻI he taimi naʻe talanoa ai ʻe Nīfai ko e palōfita ʻo e Tohi ʻa Molomoná ʻa e ngaahi meʻa ko ʻeni naʻe hokó ki hono ngaahi tokouá, naʻá ne pehē naʻe lāunga ʻa e kau ʻIsilelí koeʻuhí ko ʻenau loto-fefeká. Naʻe akoʻi ʻe Nīfai neongo e ngaahi meʻa kotoa kuo fai ʻe he ʻEikí maʻá e fānau ʻa ʻIsilelí, ka “naʻa nau fakafefeka pē honau lotó mo fakakuihi honau ʻatamaí, mo lea kovi kia Mōsese pea ki he ʻOtua moʻoni mo moʻuí.”

Naʻe fakatokanga mai ʻa ʻEletā Teili G. Lenilani fekauʻaki mo e taʻehoungaʻia te tau ala ongoʻi ʻi he taimi ʻoku tau mamaʻo ai mei he ʻOtuá. Naʻá ne akoʻi ʻo pehē: “Ko ʻetau Tamai Hēvaní mo Hono ʻAlo ko Sīsū Kalaisí, ko e Ongo Foaki taupotu tahá ia. Ko e lahi ange ʻetau fakamamaʻo meiate Kinauá, ko e lahi ange ia ʻetau ongoʻi ʻoku ʻi ai ʻetau totonu ki aí. ʻOku tau kamata fakakaukau tokua ʻoku ʻi ai ʻetau totonu ki he ʻaloʻofá pea ʻi ai mo ha ngaahi tāpuaki ʻoku teʻeki totongi mai. ʻOku tau fakahehema lahi ange ke vakavakai holo, kumi e ngaahi fehalaākí, mo ongoʻi loto-mamahi—pea aʻu ʻo tau ʻita—tupunga ʻi heʻetau fakakaukau atu ʻoku ʻikai potupotu tataú. ʻOku kamata ʻa e ʻikai potupotu tataú mei he fanga kiʻi meʻa īkí ki he lahi ange, ka ʻi he taimi ʻoku tau mamaʻo ai mei he ʻOtuá, naʻa mo e fanga kiʻi fehālaaki īkí ʻoku hā ngali lahi ia. ʻOku tau ongoʻi ko e fatongia ia ʻo e ʻOtuá ke fakaleleiʻi e meʻa ʻoku hokó—pea fakaleleiʻi leva ia he taimí ni!”

Naʻe hanga ʻe he fakaʻamu ʻa Mōsese “ke kikite ʻa e kakai kotoa pē [ʻa e ʻEikí], pea ke tuku ʻe [he ʻEikí] ʻa hono laumālié kiate kinautolú” ʻo fakahaaʻi ʻene loto-holi ke aʻusia ʻe he niʻihi kehé ʻa e ngaahi tāpuaki ʻo e fakahaá. Ka neongo ia, naʻe ʻikai fokotuʻu mai ʻe Mōsese ia ʻe lava ha faʻahinga taha pē ʻo hoko ko e tokotaha lea ʻa e ʻEikí. ʻOku hā ʻeni ʻi he Nōmipa 12, ʻi he taimi naʻe valokiʻi ai ʻa ʻĒlone mo Meliame ʻe he ʻEikí ʻi heʻena poleʻi e mafai ʻo Mōsese ko e taki fakalaumālie ki ʻlsileli kotoá.

Kuo fakamamafaʻi ʻe he kau palōfita ʻi hotau kuongá ʻa e fiemaʻu ʻo e fakahā fakatāutahá mo e fakahinohino fakapalōfitá fakatouʻosi. Naʻe akonaki ʻa Palesiteni Tāleni H. ʻOakesi ʻo pehē: “Kuo ʻomi ʻe he Tamai Hēvaní ki Heʻene fānaú ha founga fetuʻutaki ʻe ua kiate Ia—ʻa ia ʻe lava ke tau ui ko e founga fakataautaha pea mo e founga lakanga fakataulaʻeikí. ʻOku totonu ke mahino pea tataki e tokotaha kotoa pē ʻe he ongo founga fetuʻutakí ni.”

Naʻe pehē ʻe ʻEletā Teili G. Lenilani “ko e totonu ia ʻa e palōfita moʻuí ko hono ʻomi e tokāteline, ngaahi fekau, mo e ngaahi fakahā maʻá e Siasí, ʻa ia ʻokú ne maʻu ia mei he ʻEiki ko Sīsū Kalaisí.” Naʻe akoʻi ʻe ʻEletā Tēvita A. Petinā fekauʻaki mo e fakahā fakatāutahá ʻo pehē: “ʻOku lava ke maʻu ʻa e laumālie ʻo e fakahaá ʻe he taha kotoa pē. … ʻOku ʻikai ke fakangatangata pē ʻa e tāpuaki ko ʻení ki he kau maʻu mafai pule ʻo e Siasí; ka ʻoku maʻu pea totonu ke ngāue ia ʻi he moʻui ʻa e tangata, fefine mo e fānau kotoa pē kuo … nau fai e ngaahi fuakava toputapú. ʻOku fakaafeʻi mai ki heʻetau moʻuí ʻa e laumālie ʻo e fakahaá ʻe he holi fakamātoató mo e moʻui tāú.”

Naʻe fakahinohinoʻi ʻe he ʻEikí ʻa Mōsese ke fekauʻi mai ha taki mei he faʻahinga takitaha ke fekumi ʻi he fonua ko Kēnaní. Naʻe liliu ʻe Mōsese e hingoa ʻo e taki ʻo e faʻahinga ʻo ʻIfalemí meia ʻOsea (ʻuhinga ki he “fakamoʻui”) kia Sōsiua (ʻuhinga ko “Sihova ʻa e fakamoʻuí”). Mahalo ne hoko e liliu ko ʻení ko ha fakamanatu ki he kakai ʻIsilelí naʻe tataki kinautolu ʻe he ʻOtuá pea te nau lava ʻo maʻu e fonua ʻo e talaʻofá ʻo fakafou ʻi Hono mālohí.

Hili ha ngaahi senituli mei ai, ʻe foaki ʻa e hingoa tatau pē ki he ʻAlo ʻo e ʻOtuá. Naʻe akoʻi ʻe Palesiteni Lāsolo M. Nalesoni: “Naʻe ʻikai fiemaʻu ia ke akoʻi kia Mele mo Siosefa ʻa e ʻuhinga loloto ʻo e huafa ko e Sīsuú. ʻOku ʻuhinga ʻa hono tupuʻanga faka-Hepelū ko e, Jehoshua, ko e ‘ko Sihova ʻa e fakamoʻuí.’ Ko ia ko e ngāue ʻa … Sihová, ʻa ia ne vave pē hano fakahingoa ko Sīsuú, ko e fakamoʻuí, [pea] ko [Hono ikuʻanga taupotu tahá ke] hoko ko e Fakamoʻui ʻo māmaní.”

Naʻe ui ʻe he kau mataki taʻetui ʻe toko 10 ʻa e ngaahi foha ʻo ʻAnakí ko e “kau tangata lalahi fakamanavahē” ʻi heʻenau ʻoange ʻa e ngaahi ʻuhinga naʻa nau ongoʻi ai he ʻikai lava ʻe ʻIsileli ʻo kapa e fonua ʻo e talaʻofá. ʻOku pau pē naʻe kāinga e ngaahi foha ʻo ʻAnakí mo e kakai ʻo Lapá, ʻa ia naʻe tupu mei ai ʻa Kolaiaté.

Ke maʻu ha fakamatala lahi ange, vakai, “Mōsese 7:15. Ko e hā hono ʻuhinga ʻo e pehē naʻe ʻi ai ha kakai lalahi ʻi he fonuá?”

Naʻe tali ʻe he tokolahi taha ʻo e kau ʻIsilelí ʻa e lipooti ʻa e kau mataki ʻe toko 10, ʻa ia naʻa nau pehē he ʻikai malava ke kapa ʻa e fonua ʻo e talaʻofá. Naʻe kamata ke feinga ha kau ʻIsileli ʻe niʻihi ke fakafisingaʻi ʻa Mōsese pea fili ha taki te ne fakafoki kinautolu ki ʻIsipité. ʻI he taimi naʻe feinga ai ʻa Sōsiua mo Kēlepi ke taʻofí, naʻe feinga ʻa e haʻofangá ke tolomakaʻi kinaua.

Neongo e ngaahi tōʻonga fakafepaki ʻa e kakaí kia Mōsesé, ka naʻá ne tautapa ki he ʻEikí ke ʻaloʻofa mai kiate kinautolu. Naʻe folofola ʻa e ʻEikí he ʻikai ke Ne fakaʻauha ʻa e kakaí, ka te nau hē fano ʻi he toafá ʻi ha taʻu ʻe 40. Naʻá Ne folofola he ʻikai moʻui “ha taha ʻiate kinautolu naʻe fakaʻita kiate [Ia]” ke ne maʻu e fonua ʻo e talaʻofá. Naʻe kau heni ʻa e kakai lalahi kotoa pē naʻe laka hake he taʻu 20 tukukehe pē ʻa Kēlepi mo Sōsiua.

Ko e taha ʻeni ʻo e ngaahi meʻa lahi naʻe hoko ʻi he toafá ʻa ia naʻe mole ai mei he kakai ʻIsilelí ʻa e ngaahi tāpuaki ʻa e ʻEikí koeʻuhí ko ʻenau angatuʻú mo e taʻetuí. ʻOku faʻa ui ʻe he folofolá he taimi ʻe niʻihi ʻa e ngaahi meʻa ko ʻení ko e “fakahouhau lahi” ʻi he toafá.

ʻI he taimi naʻe toe lāunga ai ʻa e kakai ʻIsilelí ʻi heʻenau fiemaʻu vaí, naʻe ʻoange ʻe he ʻEikí kia Mōsese mo ʻĒlone ha ngaahi fakahinohino pau ki he founga ke tokonaki ʻaki ʻenau ngaahi fiemaʻú. ʻI hono fakahinohino ange ha fuʻu maka pau, naʻe folofola ʻa e ʻEikí kia Mōsese ke tānaki fakataha ʻa e kakaí pea “lea ki he maká ʻi honau ʻao, pea ʻe foaki mai ʻe ia ʻa hono vaí.” Ka neongo ia, naʻe ʻikai ke muimui ʻa Mōsese ki he fekau ʻa e ʻOtuá ke lea ki he maká, ka naʻá ne taaʻi tuʻo ua ia ʻaki hono tokotokó. ʻIkai ngata aí, naʻe ʻikai fakamālō ʻa Mōsese mo ʻĒlone ki he ʻEikí ʻi he mana ko ʻení. Kimuʻa pea taaʻi ʻe Mōsese ʻa e maká, naʻá ne fehuʻi ange, “ʻOku lelei ke ma ʻomi ʻa e vai mei he maká ni kiate kimoutolu?”

Naʻe valokiʻi ʻe he ʻEikí ʻa Mōsese mo ʻĒlone ʻi heʻena aafe mei heʻene ngaahi fakahinohinó pea ʻikai ke na “fakaongoongolelei [Ia] ʻi he ʻao ʻo e fānau ʻa ʻIsilelí.” Naʻá Ne fakahā koeʻuhí ko ʻena ngaahi angafaí, he ʻikai fakangofua ʻa Mōsese mo ʻĒlone ke na tataki e kakai ʻIsilelí ki he fonua ʻo e talaʻofá.

Neongo ʻoku ʻikai fakamatalaʻi kakato ʻe he folofolá ʻa e ngaahi ʻuhinga ki he nunuʻa ko ʻení, ka naʻe ʻikai hanga ʻe he ngaahi angafai ʻa Mōsesé ʻo toʻo meiate ia ʻa e ngaahi fatongia mo e ngaahi tāpuaki kotoa pē ʻi he kahaʻú. ʻOku akoʻi ʻe he Tohi ʻa Molomoná ʻi he fakaʻosinga ʻo e moʻui ʻa Mōsesé, “naʻe ʻave ʻe he ʻEikí ʻa Mōsese kiate ia.” ʻI he hoko ʻa Mōsese ko ha tokotaha kuo liliú, naʻá ne hā ʻi he Moʻunga ʻo e Liliú ʻo foaki ʻa e ngaahi kī ʻo e lakanga fakataulaʻeikí kia Pita, Sēmisi, mo Sione. Naʻe hā foki ʻa Mōsese kia Siosefa Sāmita mo ʻŌliva Kautele ʻi hotau kuonga fakakosipelí ko ha tokotaha kuo toetuʻu, ʻo foaki kiate kinaua ʻa e ngaahi kī ʻo hono tānaki fakataha ʻo ʻIsilelí.

ʻOku fakamatala ʻa eNōmipa 21 ki he talanoa ʻo hono huhu e kakai ʻIsilelí ʻe he fanga ngata huhu koná pea fakamoʻui leva kinautolu ʻi heʻenau sio ki he ngata palasa naʻe fokotuʻu ʻe Mōsesé. ʻOku tānaki mai ʻe ha ngaahi potufolofola kehe ha ngaahi fakakaukau mo ha ʻuhinga mahuʻinga ki he talanoa ko ʻení.

Kae mahuʻinga tahá, naʻe akoʻi ʻe Sīsū Kalaisi naʻe hanga ʻe he meʻa ko ʻení ʻo fakataipe ʻEne feilaulau fakaleleí. Naʻá Ne fakamoʻoni ʻo pehē, “Hangē [ko e] hiki hake ʻe Mōsese ʻa e ngata ʻi he toafá, ʻe pehē hono hiki hake ʻa e Foha ʻo e tangatá ki ʻolunga: koeʻuhí ko ia kotoa pē ʻoku tui kiate iá ke ʻoua naʻa ʻauha ia, kae maʻu ʻa e moʻui taʻengatá.” ʻI he founga tatau, naʻe tomuʻa kikiteʻi ʻe Nīfai ko e foha ʻo Hilamaní ʻe hiki hake ʻa Sīsū Kalaisi ʻi he kolosí pea ko “kinautolu kotoa pē te nau sio ki he ʻAlo ʻo e ʻOtuá ʻi he tui, pea maʻu ha laumālie fakatomalá, te nau lava ʻo moʻui, ʻio ʻi he moʻui ko ia ʻoku taʻengatá.”

Naʻe ʻomi ʻe Nīfai ko e foha ʻo Līhaí ʻa e fakaikiiki mahuʻinga ko ia neongo ko e meʻa pē naʻe fiemaʻu ke fakahoko ʻe he kakai ʻIsilelí ko e sio, ka naʻe mate ʻa e tokolahi “ko e meʻa ʻi hono faingofua ʻo e foungá, pe ko hono faingofuá.” Naʻe toe fakamatalaʻi ʻe he palōfita ko ʻAlamaá ko e ʻuhinga naʻe ʻikai sio ai ha niʻihi ki he ngatá “ko e ʻikai te nau tui ʻe fakamoʻui ai ʻa kinautolu.”

Ko Pēlamí naʻe ʻikai ko ha tokotaha ʻIsileli ia pea naʻe ʻiloa ia ʻi hono foaki ʻo e ngaahi tāpuakí mo e fakamalaʻiá. Neongo naʻe ʻikai ke teitei ui ʻa Pēlami ko ha palōfita ʻi he Nōmipa 22–24, ka ʻoku lahi ha ngaahi sīpinga ʻi he ngaahi vahe ko ʻení ʻo ʻene ngāue ko ha palōfita maʻá e ʻEikí. Hangē ko ʻení, neongo e toutou kole ʻa Pēlaki kia Pēlami ke ne fakamalaʻiaʻi e kakai ʻIsilelí, ka naʻe “tuku ʻe [he ʻEikí] ʻa e lea ki he ngutu ʻo Pēlamí,” pea naʻe fakahā ʻe Pēlami ha ngaahi tāpuaki kiate kinautolu.

Neongo naʻe fakaʻaongaʻi ʻe he ʻEikí ʻa Pēlami ke fakahoko ʻEne ngaahi taumuʻá, ka ʻoku ʻi ai ha ngaahi fakaʻilonga naʻe ʻikai ke lelei maʻu pē ʻa e ngaahi taumuʻa ʻa Pēlamí. Hangē ko ʻení, “naʻe tupu ʻa e houhau ʻo e ʻOtuá” kia Pēlami ʻi heʻene loto ke talanoa mo Pēlakí, pea naʻe fekauʻi atu ʻe he ʻOtuá ha ʻāngelo ke ne taʻofi e hala ʻo Pēlamí. Naʻe fakaava leva ʻe he ʻEikí ʻa e ngutu ʻo e ʻasi ʻa Pēlamí ke ʻiloʻi ʻe Pēlami ʻoku ʻi ai ʻa e ʻāngeló, ʻa ia hangē ʻokú ne fakahaaʻi ʻa e kui fakalaumālie ʻa Pēlamí. Ko e tangata ko ia naʻe ongoongoa koeʻuhí ko ʻene hoko ko ha taulatukí, naʻe ʻikai ke ne lava ʻo mamata ki he meʻa naʻe mamata ki ai ʻene ʻasí.

ʻOku fakahaaʻi ʻe he folofolá naʻe faifai pē pea moʻulaloa ʻa Pēlami ki he teke mālohi ʻa Pēlakí peá ne lavakiʻi ʻa ʻIsileli. ʻOku pehē ʻe he tohi ʻa Fakahaá naʻe akoʻi ʻe Pēlami ʻa Pēlaki “ke lī ʻa e tūkiaʻanga ʻi he ʻao ʻo e ngaahi foha ʻo ʻIsilelí, ke nau kai ʻa e ngaahi meʻa kuo feilaulau ʻaki ki he ngaahi tamapuá, pea ke fai ʻa e feʻauaki.” ʻI ha feituʻu kehe ʻi he folofolá, ʻoku fakaʻaongaʻi ai e sīpinga ʻa Pēlamí ke fakatokanga fekauʻaki mo e mānumanú mo e fekumi ki he ngaahi meʻa ʻo e māmaní.

• Dale G. Renlund, “Ko ha Founga Ngāue ki he Fakahā Fakafoʻituituí,” Liahona, Nōvema 2022, 16–19

• Dallin H. Oaks, “Ongo Founga ʻo e Fetuʻutakí,” Liahona, Nōvema 2010, 83–86.

• S. Michael Wilcox, “The 12 Spies,” Ensign, Mar. 2002, 35–37

• W. Mark Bassett, “Look and Live,” Ensign, Jan. 2018, 30–33

• Jose L. Alonso, “To Live, Look to God and Trust in Him” (fakamatala fakaʻilekitulōnika pē), Liahona, Apr. 2022, Gospel Library

• Kerry Muhlestein, “Israel’s Exodus and Deliverance—Then and Now,” Ensign, Mar. 2018, 46–51