1 Ngaahi Tuʻi 12–13; 17–22

Hili e pekia ʻa Solomoné, naʻe hoko hono foha ko Lehopoamí ko e tuʻi ki ʻIsileli kotoa. Naʻe fakalahi ʻe Lehopoami ʻa e ngaahi kavenga mafasia ʻa e kakaí, ʻa ia naʻe hoko ia ke angatuʻu ai e faʻahinga ʻe hongofulu ʻi he fakatokelaú kiate ia. Naʻa nau fili ʻa Selopoami ko honau tuʻi pea fokotuʻu ʻa e meʻa naʻe ʻiloa ko e Puleʻanga Fakatokelau ʻo ʻIsilelí. Naʻe hoko atu e Puleʻanga Fakatokelaú ʻi ha senituli nai ʻe ua kimuʻa pea kapa ia ʻe he kau ʻAsīliá pea puke pōpula ai ha kakai tokolahi. Naʻe faifai pea fakamoveteveteʻi ʻa e ngaahi faʻahinga ko ʻení ʻi he ngaahi puleʻanga kotoa ʻo e māmaní. Kuo ʻiloa kinautolu talu mei ai ko e faʻahinga ʻe hongofulu ʻo ʻIsileli kuo molé.

Naʻe kau ʻi he Puleʻanga Fakatongá ʻa e vahefonua ʻoku kau ki he faʻahinga ʻo Siuta mo Penisimaní. Naʻe ui ia ko e Puleʻanga ʻo Siutá pea naʻa nau ʻi Selusalema. Naʻe ngata ʻa e puleʻanga ko ʻení ʻi he taimi naʻe fakaʻauha ai ʻe he kau Pāpiloné ʻa Selusalema ʻi he 586 BC.

Naʻe manavasiʻi ʻa Selopoami ʻe fononga fakatonga hono kakaí ke moihū ʻi he temipale ʻi Selusalemá pea faifai ʻo nau toe kau ki he Puleʻanga Fakatongá. Ke taʻofi ʻení, naʻá ne ngaohi ai ha ongo ʻuhikiʻi pulu koula, fokotuʻu ha ngaahi feituʻu moihū foʻou, fakafeʻiloaki ha ngaahi kātoanga kai makehe, pea fokotuʻu mo haʻane kau taulaʻeiki pē ʻaʻana. Mahalo naʻe fakataumuʻa ʻa Selopoami ke fetongi ʻe he ongo ʻuhikiʻi pulu koulá ʻa e puha ʻo e fuakavá. Tatau ai pē pe ko e hā e taumuʻa ʻa Selopoamí, ka naʻe hanga ʻe heʻene ngaahi angafaí ʻo tataki ʻa hono kakaí ke hē mei he moʻoní.

Naʻe fekauʻi mai ʻe he ʻEikí ha palōfita mei Siuta ke fakatokanga kia Selopoami fekauʻaki mo ʻene faiangahalá mo e tauhi ʻotua tamapuá. Neongo ʻene mamata tonu ki he ngaahi fakaʻilonga fakaofo ʻo e mālohi ʻo e ʻEikí, ka naʻe ʻikai fakatomala ʻa Selopoami pea hokohoko atu ʻene poupouʻi ʻa e lotu tamapuá.

ʻOku siʻi ha ʻilo fekauʻaki mo e uitoú kimuʻa peá ne fetaulaki mo ʻIlaisiaá. Naʻá ne nofo ʻi Salifati, ko ha kolo Fīniki naʻe lotu ai e kakaí kia Peali mo ha ngaahi ʻotua loi kehe. Neongo naʻe ʻikai ko ha taha ʻIsileli ia, ka naʻá ne tui lahi ki he ʻEikí mo ʻEne palōfita ko ʻIlaisiaá. Lolotonga e ngāue fakafaifekau ʻa e Fakamoʻuí ʻi he matelié, naʻá Ne fakaʻaongaʻi e sīpinga ʻa e uitoú ke fakamalaʻiaʻi Hono kakaí koeʻuhí ko ʻenau taʻetui kiate Iá.

Naʻe akoʻi ʻe ʻEletā Lini G. Lōpini, ko e Fitungofulu Taki Māʻolunga mālōlō fakalāngilangi ʻo pehē:

“Mahalo ʻe siʻisiʻi ʻaupito ha kiʻi maʻu meʻatokoni, mahalo ʻe feʻunga pē ki ha houa kai ʻe taha, ʻa ia ʻokú ne ʻai e tali ʻa ʻIlaisiaá ke fakatupu fakakaukau … : ʻPea naʻe pehē ʻe ʻIlaisiā kiate ia, ʻOua naʻá ke manavahē; ʻalu ʻo fai ʻo hangē ko hoʻo leá: ka ke tomuʻa ngaohi mei ai ha kihiʻi foʻi mā maʻaku’ [1 Ngaahi Tuʻi 17:13; tānaki atu hono fakamamafaʻí]. …

“Naʻe mahino kia ʻIlaisiā ʻa e tokāteliné, ʻoku maʻu ʻa e ngaahi tāpuakí hili hono siviʻi ʻo ʻetau tuí [vakai, ʻEta 12:6; Tokāteline mo e Ngaahi Fuakava 132:5]. Na‘e ʻikai ke ne siokita. ʻI heʻene hoko ko e tamaioʻeiki ʻa e ʻEikí, naʻe ʻi ai ʻa ʻIlaisiā ke foaki, kae ʻikai toʻo.”

ʻOku fakatefito e liliu ʻo e fehuʻi ʻa ʻIlaisiaá ʻi he Liliu ʻa Kingi Sēmisi ʻo e Fuakava Motuʻá ʻi ha ʻitiome faka-Hepelū ʻa ia ʻoku hangē ʻoku ʻuhinga ia ki ha puna ʻa ha foʻi manupuna mei he vaʻa ʻe taha ki he vaʻa ʻe taha. Lolotonga e kuonga ʻo ʻIlaisiaá, naʻe feinga ha kau ʻIsileli tokolahi ke lotu ki ha ngaahi ʻotua lahi fakataha mo Sihova. Naʻe hoko e pōpoaki ʻa ʻIlaisiaá ko ha ui ki he kakaí ke tuku ʻenau veiveiuá pea tukupā kakato ki he ʻEikí.

Naʻe akoʻi ʻe ʻEletā D. Toti Kulisitofāsoni ʻo pehē:

“ʻI he fakataha mai ʻa e kakaí, naʻe pehē atu ʻe ʻIlaisiā kiate kinautolu, ‘ʻE fēfē ʻa hono fuoloa ʻo hoʻomou lotolotouá? [pe ko hono ʻai ʻe tahá, ‘Te mou fakapapauʻi koā ʻafē hoʻomou filí?’] kapau ko e ʻOtuá ʻa [e ʻEikí], mou muimui kiate ia: pea kapau ko Peali, muimui leva kiate ia. Pea naʻe ʻikai toe lea ʻaki mai ʻe he kakaí ha momoʻi lea ʻe taha.’ …

“ʻI he ngaahi ʻahó ni, ʻe ala pehē atu ʻa ʻIlaisiā:

• ʻOku ʻi ai e ʻOtua ko ʻetau Tamai Hēvaní pe ʻoku ʻikai ke Ne ʻi ai, ka ʻo kapau ʻokú Ne moʻui, moihū kiate Ia.

• Ko Sīsū Kalaisi pē ʻa e ʻAlo ʻo e ʻOtuá, ʻa e Huhuʻi kuo toetuʻu ʻo e faʻahinga ʻo e tangatá, pe ʻoku ʻikai, ka ʻo kapau ko Ia ia, muimui kiate Ia.”

“Ko Peali ʻa e ʻOtua ʻo e matangi ʻa e kau Kēnaní, ʻoku fekauʻaki mo e ʻuhilá mo e ʻuhá.” Ka ʻi he lolotonga ʻo e feʻauhi mo ʻIlaisiaá, naʻe ʻikai hoko ha vela ʻi he taimi naʻe ui ai ʻa e kau taulaʻeiki ʻa Pealí ki honau ʻotua loí. Naʻe ʻikai foki ha mālohi ʻo e kau taulaʻeiki ʻa Pealí ke taʻofi ʻa ʻIlaisiā mei haʻane fakatupu ha laʻalaʻā ʻaki hono tāpuni ʻo e langí. ʻI he tafaʻaki ʻe tahá, naʻe fekauʻi mai ʻe Sihova ha afi mei he langí ke tutu ʻa e feilaulaú mo e ʻesi feilaulaú, neongo naʻe fakatou pīponu fakatouʻosi ʻi he vaí, ʻa ia naʻe siʻisiʻi pē ʻi he lolotonga ʻa e laʻalaʻaá. Naʻe hā mahino ʻaupito e mālohi ʻo Sihová pea ko kinautolu kotoa pē naʻe ʻi aí naʻa nau tō ki he kelekelé ʻo pehē, “Ko [e ʻEikí], ko e ʻOtuá pē ia; ko [e ʻEikí], ko e ʻOtuá pē ia.” Ke toe fakahaaʻi ange ʻa e mālohi ʻo Sihova ki he ngaahi ʻelemēniti kotoa pē, naʻe tokoni leva ʻa ʻIlaisiā ke ʻomi ha matangi naʻe fakangata ai e laʻalaʻaá.

Hili hono lipooti ʻe ʻĒhapi kia Sisipeli ʻa e meʻa naʻe hoko ʻi he vahaʻa ʻo ʻIlaisiā mo e kau taulaʻeiki ʻa Pealí, naʻe fuakava ʻa Sisipeli ʻi ha fuakava te ne tāmateʻi ʻa ʻIlaisiā ʻi loto ʻi ha houa ʻe 24. Naʻe hola ʻa ʻIlaisiā mei he fonua ko ʻIsilelí ʻo fononga ʻi ha ngaahi ʻaho lahi kae ʻoua kuó ne aʻu ki he Moʻunga Hōlepí, pe Sainai.

ʻOku tuʻu fehangahangai ʻaupito e aʻusia ʻa ʻIlaisiā mo e ʻEikí ʻi he Moʻunga Hōlepí mo ʻene fetaulaki kimuʻa mo e kau taulaʻeiki ʻa Pealí, ʻi hono fakahā mai ʻe he ʻEikí Ia ʻi ha founga fakaofo. ʻI Hōlepí, naʻe ʻikai ke ʻi he matangí, afí, pe mofuiké ʻa e ʻEikí ka naʻe lea ia ʻi ha “kihiʻi leʻo mālie.”

Kuo fakamamafaʻi mai ʻe he kau palōfita mo e kau ʻaposetolo ʻo onopōní ʻoku angamaheni ange ki he ʻEikí ke fetuʻutaki mo ʻEne fānaú ʻi ha ngaahi founga fiemālie kae ʻikai ko ha ngaahi fakahā fakaofo. Naʻe fakatokanga mai ʻa Palesiteni Tāleni H. ʻOakesi: “ʻOku fie maʻu ke tau ʻilo ʻoku tātaaitaha ke lea leʻolahi e ʻEikí. ʻOku meimei ke vanavanaiki maʻu pē ʻEne ngaahi pōpoakí.” Naʻe akoʻi ʻe Palesiteni Poiti K. Peeka ʻo pehē: “ʻOku ʻikai ke tohoakiʻi ʻe he Laumālié ʻetau tokangá ʻaki ha kaikaila pe luluʻi kitautolu ʻaki ha nima mālohi. Ka ʻokú ne fanafana mai. ʻOku ongo vaivai moʻoni pea kapau ʻoku tau femoʻuekina, he ʻikai pē ke tau ongoʻi ia.”

Vakai, “2 Ngaahi Tuʻi 2:12–13. Ko e hā ʻoku makehe fekauʻaki mo e foaki ʻa e pulupulu ʻo ʻIlaisiaá kia ʻIlaisá?”

ʻI ha ngaahi anga fakafonua lahi he kuonga muʻá, naʻe tui ʻa e kakaí naʻe fakangatangata pē ʻa e mālohi ʻo e ʻOtuá ki ha puleʻanga, feituʻu fakasiokālafi, pe feituʻu pau. Mahalo naʻe tui ʻa e kau Sīliá naʻe fakangatangata pē ʻa e mālohi ʻo e ʻEikí ki he ngaahi tafungofungá mo e ʻotu moʻungá koeʻuhí he naʻá Ne ʻaʻahi ki he kakai ʻIsilelí ʻi Sainai. Naʻe fakaʻaiʻai ai kinautolu ke nau ʻunuakiʻi ʻa e taú ki he ngaahi teleʻá kae lava ke nau ikuna ʻa e taú. Neongo e tui ʻa e kakai Sīliá, ka ʻoku fakamahinoʻi ʻe he folofolá ko Sihova ʻa e ʻOtua “ki he māmani kotoa.”

ʻOku toe maʻu foki ʻa e fakamatala ʻoku lekooti ʻi he 1 Ngaahi Tuʻi 22 ʻi he 2 Fakamatala Meʻa Hokohoko 18. ʻOku fakamahinoʻi ʻe he Liliu ʻa Siosefa Sāmita ʻo e 2 Fakamatala Meʻa Hokohoko 18:20–22 naʻe maʻu ʻe he ʻEikí ha laumālie loi ʻi he kau palōfita ʻo ʻĒhapí kae ʻikai ko hano ʻoange ha laumālie loi kiate kinautolu. Naʻe fakalotoʻi ʻe he kau palōfita loi ʻa ʻĒhapí ʻa ʻĒhapi ke ʻalu ʻo tauʻi ʻa e kau Sīliá neongo e kikite ʻa Mikaia ʻe ikunaʻi ʻa ʻIsilelí pea ʻe mate ʻa ʻĒhapi ʻi he taú. Naʻe ʻalu fakapuli ʻa ʻĒhapi ki he taú ka naʻe kei tāmateʻi pē ia.

• D. Todd Christofferson, “Ko e Mālohi Faisilá,” Liahona, Nōvema 2023, 19–22

• Jeffrey R. Holland, “A Handful of Meal and a Little Oil,” Ensign, May 1996, 29–31

• Carol F. McConkie, “Moʻui ʻo Fakatatau mo e Lea ʻa e Kau Palōfitá,” Liahona, Nōvema 2014, 77–79

• D. Todd Christofferson, “Tuʻu Maʻu mo Tuʻu ʻAliʻaliaki ʻi he Tui ʻa Kalaisí,” Liahona, Nōvema 2018, 30–33

• Jorge F. Zeballos, “Let Us Not Fail to Feel,” Ensign, July 2018, 59–61