Ha’e Ñandejára Arandu Rupive Jaguerekoha Mormón Kuatiañe’ẽ

Hermano ha hermana pohayhuetéva, ore aguyje peneñeha’ãre pemoñe’ẽ hag̃ua escritura-kuéra Eju, Chesegi. ndive. Aguyje opa pejapóvare hína. Pene joaju ára ha ára Tupã ha Iñe’ẽre ogureko consecuencia ipypukúva. “[Pemoĩ] hína peteĩ tembiapo guasu pyenda. Ha umi mbaʼe michĩvagui ou umi tuichavéva”.

Umi Salvador rekombo’e ñemoñe’ẽ escritura-kuérape ñanepytyvõ ñamoambue ñane rogakuéra jerovia tenda marangatu ha evanhélio ñehekombo’e rendakuérape. Ha oinvita Espíritu ñande rogakuérape. Espíritu Santo omyenyhẽ ñane ánga vy’a reheve ha ñanemoambue Jesucristo discípulo-pe opa ñande rekove aja.

Heta umi ary ohasa ramóvape, ñamoñe’ẽvo escritura marangatu kuatiañe’ẽnguéra, jahechakuaa mba’épa umi mba’e Tupã ñehekombo’e ita’yrakuérape g̃uarã opa dispensación tuichavévape.

Opa dispensación-pe, jahecha mba’e oiko jey jeýva jaikuaáva. Tupã omoĩjey terã ohechauka Jesucristo Evanhélio Iprofetakuéra rupive. Tapichakuéra osegi profetakuérape ha tuicha ojehovasa. Ha katu, ára ha ára ohasavo, oĩ tapichakuéra naiñe’ẽrenduvéiva profetakuéra ñe’ẽre ha oñemomombyry Ñandejára ha Iñevanhéliogui. Kóva ha’e ñambohérava apostasía. Evanhélio ojehechauka raẽ va’ekue Adán-pe, ha katu oĩva’ekue Adán ha Eva mitãnguéra apytépe oñemomombyrýva va’ekue Ñandejáragui apostasía-pe Jahecha Evanhélio ñemoĩjey ha apostasía oikojey jey va’ekue Enoc, Noé, Abraham, Moisés ha ambue dispensación-pe.

Ko’ag̃a, ko árape, jaiko dispensación ára oñekumplipaitetahápe. Kóva ha’éta pe dispensación añoite opa’ỹtava apostasía-pe. Ko dispensación ha’e omoñepyrũtava Salvador Jesucristo Jeju Mokõiha ha Irréino milenario-pe.

Upeicharamo, mba’épa iñambue ko dispensación-pe? Mba’épa Ñandejára ome’ẽ ñandéve ko’ag̃a, ñande araitépe g̃uarã, ñaneipytyvõtava ñañemo’ag̃uĩ Salvador-re ha araka’eve ndajahejái Chupe?

Peteĩ ñembohovái oúva che akãme ha’e escritura-kuéra, tenonderãme pe Mormón Kuatiañe’ẽ: Ambue Jesucristo Testamento.

Tupã oñe’ẽme’ẽ jepe araka’eve ndaiporimo’ãvéimaha apostasía general, jajesareko ha ñañangareko va’erã ani ja’a apostasía personal-pe, ñanemandu’ávo, Presidente Russell M. Nelson ombo’ehaguéicha, “Peteĩ teĩ ñande ha’e responsable ñane ñemongakuaa espiritual individual-re”. Mormón Kuatiañe’ẽ jeestudia, jajapóvaicha ko áñope, akói ñanemo’ag̃uĩ Salvador-re, ha ñanepytyvõ japyta hag̃ua ag̃uĩ Chugui.

Ñahenói upéva “estudio”, ha upéva iporã oikotevẽgui ñeha’ã. Ha katu natekotevẽi akói ñañemoarandu mba’e ipyahúva rehe. Sapy’a Mormón Kuatiañe’ẽ ñemoñe’ẽ ha’e ñañemboajuve Tupãre ko árape, ánga ñeñangareko, ñañemomabrete espiritualmente ñambohovake mboyve mundo, térã jatopa ñemonguera peteĩ ára hasýva mundo-pe rire.

Jaestudia escritura-kuéra pe Espíritu Santo, pe mbo’ehára tuicháva, ombopypukuve hag̃ua ñane conversión Túva Yvagagua ha Jesucristo-re ha ñaneipytyvõ jajoguave hag̃ua Chupekuéra.

Ko’ã akãremiandu reheve, ikatu ñañemopy’amongeta, “Mba’e ñanembo’e kuri Espiritu Santo jaestudia aja Mormón Kuatiañe’ẽ?” ha “Mba’éicha upéva ñañemoag̃ui Salvador-re?”

Ko’ã ha’e porandu iporãva ñane escritura-kuéra estudio-pe g̃uarã ñande rógape. Ha’e avei porandu iporãitereíva oñemoñepyrũ hag̃ua peteĩ domingo clase tupaópe. Ñamoporãve ñaporombo’eháicha domingo tupaópe ñamoporãvévo ñehekombo’e ñande rógape pe semana pukukuére. Upéicha, clases dominicales aja, “pe omboʼeva ha pe oñehekomboʼeva, oñoikũmbýta, ha mokõive ojeʼedifika ha ovyʼata oñondive.”

Ko’ã ha’e pokã versíkulo pe Espíritu ohaiguýva’ekue che akãme ko semana-pe Mormón Kuatiañe’ẽ estudio-gui:

• Nefi he’i Jacob-pe “oñongatuva’erãha ko’ã pláncha ha ombohasa … ñemoñare’atýgui ñemoñareʼatýpe. Ha oĩramo mboʼepy imarangatúva, térã rrevelasiõ … , térã profesía,” Jacob “ohaivaʼerãha … umíva koʼã pláncha ári … itavayguakuéra ñeimeporãrãre.”

• Jacob upéi otestifika, “rohesaʼỹijo [escritura-kuéra], … ha roguerekóvo opa koʼã testimónio rohupyty peteĩ ñehaʼarõ, ha ore jerovia imbareteve.”

Koʼag̃a, koʼã versíkulo chemomanduʼa mbaʼépa Nefi heʼivaʼekue umi plancha de bronce-re upe mboyve:

“Ha rohupyty umi kuatiajehaipyre … ha rohesaʼỹijo ha rojuhu … [hepyha] oréve g̃uarã, ikatúgui péicha rupi roñongatu Ñandejára rembiapoukapykuéra ore raʼykuérape g̃uarã.

“Upévare, haʼe Ñandejára arandu rupive rogueraha koʼãva orendive, roho aja taveʼỹre pe yvy ñeʼẽmeʼẽngue gotyo.”

Ko’ag̃a, ha’éramo arandu Lehi ha hogayguakuérape g̃uarã oguereko escritura-kuéra, ha’e arandu avei ñandéve g̃uarã ko árape. Escritura-kuéra repykue ha pokatu espiritual noñemomichĩri ñane rekovépe ko árape.

Araka’eve tembiasakuépe ndaipóri tekovekuéra ohupytykuaáva’ekue Mormón Kuatiañe’ẽ ha ambue escritura ñande jaguerekóva ko árape. Héẽ, Lehi ha hogayguakuéra ojehovasa ogueraha hag̃ua umi plancha de bronce hendivekuéra, ha katu ndoguerekói hikuái peteĩ kópia peteĩ teĩ tienda-pe g̃uarã! Pe Mormón Kuatiañe’ẽ kópia oĩva tenonderãme ha’e pe kópia ñanemba’e teetéva. Ha’e pe kópia ñamoñe’ẽva.

Lehi visión-pe, yvyramata jeikove rehegua , Lehi ñanembo’e iñimportanteha ñane experiencia personal Tupã mborayhu ndive. Ho’u rire upe yva, Lehi ohecha hembireko, Saríah, ha ita’yrakuéra Sam ha Nefi ndoĩriha mombyry.

“Oñembo’y hikuái ndoikuaairamoguáicha moõ gotyopa ohóta.

“… Ajepoity chupekuéra,“ heʼi Lehi, “ha avei haʼe chupekuéra ñeʼẽ sapukáipe ou hag̃ua che aĩháme ha hoʼu hag̃ua pe yva, ojeipotavéva opaite apytégui.

“Ha … ou hikuái che aĩháme ha avei hoʼu pe yva.”

Ahayhu Lehi ñemongakuaa ñeha’ã techapyrã. Saríah, Nefi ha Sam oikóva’ekue tekove porã ha hekojojávape. Ha katu Ñandejára oguerekova’ekue mba’e iporãvéva, mba’e he’ẽvéva chupekuérape g̃uarã. Hikuái ndoikuaái moõpa otopakuaa, ha katu Lehi oikuaa. Upérõ ha’e ohenói chupekuéra “ñe’ẽ sapukáipe” ou hag̃ua yvyramáta tekove reheguápe ha ho’u upe yvágui ijupe g̃uarã. Isãmbyhy hesakã. Ndaipóri oñeikumby vai.

Che ha’e asẽva’ekue upeichagua ñemongakuaa ñeha’ãgui Che mitã’irõ guare, oime aguerekonera’e 11 terã 12 ary, che sy oporandu chéve, “Mark, reikuaapa ndejehegui, Espíritu Santo rupive, pe evanhélio añeteguaha?”

Iñeporandu chesorprende Che akói añeha’ã taha’e “mitã hekoporãva,” ha aimo’ã upéva ovaléma. Ha katu che sy, Lehi-cha, oikuaa oñeikotẽveha ambue mba’e. Che ajapo ha aikuaava’erã chejehegui.

Che ambohovái ndaguerekoihague gueteri upe experiencia. Ha ha’ete nosorprendéiva chupe che ñembohovái.

Ha’e upéi he’i peteĩ mba’e araka’eve ndacheresaráivagui. Chemandu’a iñe’enguérare ko ára peve: “Túva Ygagagua oipota reikuaa ndejehegui. Ha katu nde reñeha’ãva’erã upevarã. Reikotevẽ remoñe’ẽ pe Mormón Kuatiañe’ẽ ha reñembo’e reikuaa hag̃ua Espiritu Santo rupive. Túva Yvagagua ombohováita ne ñembo’ekuéra.”

Néi, che araka’eve namoñe’ẽmbáiva pe Mormón Kuatiañe’ẽ upe mboyve. Naimo’ãi che tuichamaha ajapo hag̃ua upeva. Che sy katu oikuaa porãve chehegui.

Iñeporandu omyataindy che ryepýpe peteĩ potapy aikuaa hag̃ua chejehegui.

Upéicha, peteĩ teĩ pyhare, che kotýpe akompartíva mokõi che ryvy ndive, amyandy tesape che rupa ári ha amoñe’ẽ peteĩ kapítulo Mormón Kuatiañe’ẽmegui. Upéi, amboguerõ pe tesape, asẽ che rupágui, añesũ ha añembo’e. Añembo’e tuichave añete ha potapy araka’eve upe mboyvégui. Ajerure Túva Yvagaguápe tohejami taikuaa Mormón Kuatiañe’ẽ añeteguágui.

Ára añepyrũ guive amoñe’ẽ pe Mormón Kuatiañe’ẽ, añandu Túva Yvagagua oikuaaha che ñeha’ãgui. Ha añandu cheimportanteha Chupe g̃uarã. Amoñe’ẽ ha añembo’evo, temiandu kunu’ũ opombopy’aguapýva oguejy cherehe. Kapítulo kapítulo rire, jerovia tesape heñói mimbive che ánga ryepýpe. Ára ohasávo, ahechakuaa umi temiandu ha’eha añetegua ñemoneĩ oúva Espíritu Santo-gui. Aikuaa chejehegui Mormón Kuatiañe’ẽ añeteguaha ha Jesucristo ha’eha múndo Salvador. Cheaguijevete che sy invitasiõ inspirado rehe.

Ko experiencia amoñe’ẽvo Mormón Kuatiañe’ẽ chemitã’irõ guare omoñepyrũ peteĩ escritura estudio ajapo jey jeýva ombohovasáva che rekove ko ára peve. Amoñe’ẽ gueteri Mormón Kuatiañe’ẽ ha añesũ ñembo’épe. Ha Espíritu Santo omoneĩ umi añetegua jey jey.

Nefi he’i porã va’ekue. Ha’e Ñandejára arandu jagueraha hag̃ua escriturakuéra ñanendive ñande rekove pukukue aja. Mormón Kuatiañeʼẽ ha’e pe “ita henonderãva“ omoambuéva ko dispensación ambue dispensación ou mboyvévagui. Jaestudiávo Mormón Kuatiañe’ẽ ha jasegi profeta oikovévape, ndaiporimo’ãi apostasía personal ñane rekovépe.

Pe invitaciòn jaju hag̃ua yvyramáta tekove reheguápe jajapyhy hatãvo Tupã ñe’ẽre ndaha’éi peteĩ invitación Lehi-gui hogayguakuérape g̃uarãnte, ha ndaha’éi peteĩ invitación che sýgui chéve g̃uarãnte, amoñe’ẽ ha añembo’e hag̃ua Mormón Kuatiañe’ẽre. Ha’e avei invitación ñane profeta-gui, Presidente Russell M. Nelson-gui, peteĩ teĩ ñandéve g̃uarã.

“Che apromete peẽme“ he’i kuri ha’e, “pestudiávo ñembo’e reheve pe Mormón Kuatiañe’ẽ opaite ára, peiporavóta iporãvéva—opaite ára. Apromete peñepy’amongetávo umi pestudiávare, ojeipe’ataha yvága rovetãkuéra, ha pehupytýta ñembohovái pene ñeporandúpe g̃uarã ha ñembohape pende rekovetépe g̃uarã.”

Ha’e che ñembo’e ñamoñe’e Mormón Kuatiañe’ẽ ko árýpe taha’e mba’e ñanembovy’átava ha tovasapy peteĩ teĩ ñandévepe g̃uarã, ha ñanemoag̃uĩtava Salvador-re.

Túva Yvagagua oikove. Jesucristo ha’e ñande Salvador ha Redentor. Mormón Kuatiañe’ẽ oguereko Iñe’ẽ ha ombohasa Imborayhu. Presidente Russell M. Nelson ha’e Ñandejára profeta oikovéva yvy ári ko ára. Aikuaa ko’ã mba’e añeteguaha Espiritu Santo testimonio omoneĩva rupive, testimonio ahupyty ypyva’ekue amoñe’ẽvoguare Mormón Kuatiañe’ẽ chemitã’irõ guare. Jesucristo rérape, amén.