Upe Tupã oipotáva ha’e pendegueraha ógape

A’aguyjeme’ẽse peẽme pene ñembo’e rehe oñepyrũvo ko proceso de adaptación ñehenóime, presidente Nelson rupi, aservívo Ñandejára Jesucristo Apóstol ramo. Ikatu peñeimagina imirĩha oñeñanduháicha kóva, ha ha’ékuri peteĩ moménto oĩháme agitasiõ ha autoexamen oporombo’éva ijojaha’ỹva. Ha’e avei, peteĩ honor tuichaite aservi Salvador-pe, oimeraẽva kapasidápe, ha añekompromete penendive ñakomparti umi Iñevanhélio esperánsa mba’e porã pyahu.

Avei, oje’e opa Apóstol pyahu atukupépe oĩha peteĩ suegra oñemondýiva. Ndaikuaái oje’e añetépara’e kóva, ha katu ko kásope ikatu añete. Ha aimo’ãmínte pe che suegra noĩvéimava orendive nomomichĩmo’ãvéi iñemondýi.

Ojapo heta mése, che rembireko ha che rovisita ramo ambue tetã rojapo hag̃ua opaichagua umi Tupao asignasiõ, peteĩ pyhareve apáy voi ha amaña hotel ventána rupive tesa keraíre. Iguýpe, pe kalle ojeguataiteha rupi, ahecha oñemoĩha peteĩ control de carretera ha peteĩ policía oñemoĩva ag̃ui ombojere jey hag̃ua auto-kuéra og̃uahẽvo varrérape. Ñepyrũra sa’i umi kóche ohóva pe karretérare ha oñembojevy. Ha katu ohasávo ára ha hetave pe tráfico, oñepyrũ peteĩ kóla umi kóche atukupépe.

Pe ventána yvateguie, ahecha mba’éichapa pe policía ha’etévaicha ovy’áva ikatúre ojoko tráfico ha ojapo umi hénte ojevyjey. Upéicha, ha’etévaicha omongakuaáva peteĩ impulso iguatápe, oñepyrũramoguáicha peteĩ ñemomýi’imi, oñemoag̃uivo ohóvo káda kóche upe varrérare. Peteĩ conductor oñeñandúramo frustrado control de carretera-re, upe policía ndojoguái iservicial ni ikomprensivoha. Ombovava jeyjeýnte iñakã ha ohechauka jeyjey upe dirección oĩva ambue gotyo.

Che amigo-kuéra, che irũnguéra discípulo tekove mortal rape oguerahávare, ñande Ru plan porãite, jepe pe I“fabuloso” plan, oĩ diseñado pendegueraha hag̃uáicha ógape, ndaha’éi penemantene hag̃ua okápe. Avave ndojapói peteĩ control de carretera ha nomoĩri upépe peteĩ penembojere ha pendedespediva’erã. Upéva, ndaha’eiete upéicha. Tupã oĩ pendereka memévo. Ha’e “oipota opa Ita’ýra oiporavo ojevy Hendápe,”ha Ha’e oiporu opáichagua medída ikatu hag̃uáicha pendegueru jey.

Ñande Ru oporohayhuetéva osupervisa ko yvy apo ome’ẽ hag̃ua peẽme ha chéve oportunida jarekóvo umi mortalidad-gua experiencia estimulante ha refinadora, oportunida jaiporúvo Tupã ome’ẽva ñandéve jaiporavo hag̃ua, jaikuaa ha jakakuaa, jajavy, ñañearrepenti, jahayhu hag̃ua Tupã ha ñane próhimope ha peteĩ árape jajevy Hendie ñande rógape.

Ha’e ombou ko múndo ho’apyrévape pe Iporãitéva ha Ohayhuetéva Ita’ýra tovivi opaichagua experiencia humana, ome’ẽ hag̃ua peteĩ ehémplo osegi hag̃ua umi Ita’ýra hembývape g̃uarã, ha oexpia ha orredimi hag̃ua. Pe Cristo don expiatorio tuichaite oipe’a opa ñemano físico ha espiritual obstáculo ikatúva ñandepe’a ñande róga apyra’ỹgui.

Opa oñerrelasionáva Túva plan-re Ita’yrakuéra ohayhutévape g̃uarã ojejapo opavavépe ogueru hag̃uáicha hógape.

Mba’éicha ohenói umi Tupã mensahéro, Iprofetakuéra, ko Restaurasiõ plan Escritura-kuérape? Ohenói plan redensiõ rehegua,plan poriahuvereko rehegua ,upe plan vy´a rehegua tuichaitéva,ha pe plan salvasiõ rehegua ha’éva opavavépe g̃uarã, “che Unihénito ruguy rupive.”

Pe Túva plan vy´a rehegua tuichaite intensiõ ha’e pende vy´a ko’ápe, ko’ág̃a ha umi eternidad-pe. Ndaha’éi oimpedi hag̃ua pende vy´a ha, upéva rãngue, ogueru peẽme jepya’apy ha kyhyje.

Pe Túva plan redensiõ rehegua oipotáva ha’e pene redensiõ pene ánga ojerreskata Jesucristo jehasa’asy ha ñemano rupive, taisãso pekádo ha ñemano kautivériogui. Ndaha’éi pendereja hag̃ua peimeháicha.

Pe Túva plan poriahuvereko rehegua oipotáva ha’e omyasãi poriahuvereko pejevývo Chupe ha pe’onrra pene konvénio jeroviareko Hendie. Ndaha’éi poriahuvereko ñenega ha ome’ẽ mba’e’asy ha vy’a’ỹ.

Pe Túva plan salvasiõ rehegua oipotáva, ha’e, pene salvasiõreino celestial de gloria-pe pemog̃uahẽvo Jesús testimónioha peikuave’ẽ opa pene ánga Chupe. Ndaha’éi penemantene hag̃ua okápe.

He’ísépa kóva opa mba’e ovaleha umi mba’éichapa jaiko ñande rekove? Noñeimportái piko mba’éichapa jaipuru ñande albedrío? Ikatuha jajapyhy térã jaheja Tupã rembiapoukapykuéra? Nahániri, ndaupeichaiete. Añetehápe peteĩva umi Jesús invitasiõ ha ñembo’e tapiaguáva Iministerio terrenal aja ha’éne ñakambia, tañañearrepinti ha tajaju Hendápe. Oĩ katuete opa imbo’epykuérape tajavivi peteĩ conducta moral plano superior-pe oĩ peteĩ ñehenói progresión personal-pe, peteĩ fe transformadora Cristo-pe, peteĩ korasõ ñemoambue imbaretévape.

Tupã oipota ñandéve g̃uarã peteĩ reorientación radical umi ñande impulso egoísta ha orgulloso-gui, toho pe hombre natural,ikatu hag̃uáicha “jaha ha ndajapekavéi.”

Jaroviáramo pe Túva plan integral oipotáva ha’eha ñandesalva, ñanerredimi, omyasãi ñandéve poriahuvereko ha, upéicha, ogueru ñandéve vy´a, mba’épa pe Ta’ýra oipotáva ojeguerúva rupive ko plan tuichaite?

Ta’yraite he’i ñandéve Ijehegui: “Aguejýgui yvágagui, ndaha’éi ajapo hag̃ua che rembipota, terã upe chemboúva rembipota.”

Jesús rembipota ha’e Túva ipy’aporãva rembipota! Ha’e ojapose opa mba’e ikatúva Itúva ra’yrakuéra paha peve tomog̃uahẽ pe plan paha méta—tekove ijapyra’ỹva Hendiekuéra. Avave noñemboykéi ko potencial divino-gui.

Nde ha’érõ pe rejepy’apy mantéva araka’eve nereĩmo’ãiha a la altura, térã reimo’ã pe Cristo expiasiõ mborayhu poryahuverekópe ohupytytaha opavavépe ha katu ndéve nahániri, upéicharõ reinterpreta vai hína. Ijapyra’ỹva he’ise Ijapyra’ỹva. Ijapyra’ỹva ohupyty ndéve ha umi rehayhúvape.

Nefi omyesakã ko añetegua porãite: “ Haʼe ndojapói mbaʼeve ndahaʼéiramo yvóra mbaʼe porãrã; haʼe ohayhúgui yvórape, omeʼẽ meve hekove ogueru hag̃ua mayma yvypórape hendive. Upévare, nomandái avavépe ani hag̃ua oike isalvasiõme.”

Salvador, upe Buen Pastor, oho ohekávo umi ijovecha okañyvaʼekuépe ojuhu peve. Ha’e “ndoipotái ni peteĩ omano.”

“Péina ápe, che jyva poriahuvereko ojeipyso peẽme, ha opavave oúvape, che amog̃uahẽta.”

“Peguerekópa hasýva pende apytépe? Pegueru koʼápe. Peguerekópa ikarẽva, térã ohechaʼỹva, térã noĩporãmbáiva, hete oñekytĩvaʼekue, imbaʼasyvaíva, ijypíva, ohenduʼỹva, térã oguerekóva oimeháichagua mbaʼasy? Pegueru koʼápe ha che amongueráta chupekuéra, cheporiahuverekógui penderehe.”

Nombotovéi kuña orekóvape flujo de sangre; Ha’e ndoguevíri upe leproso rovake; Ha’e nombotovéi kuña ojepilláva adultério-pe, nombotovéi upe ipeniténtevape—oimporta’ỹre ipekádo. Ha haʼe nanderrechasamoʼãi ndéve ni umi rehayhúvape peguerúvo chupe pene korasõ ojepyʼapýva ha pende espíritu oñembyasýva. Péva ndaha’éi Iñintensiõ ni Idiséño, ni Iplan, propósito, potapy térã esperánsa.

Nahániri, Ha’e nomoĩri umi varrikáda ni varréra; Ha’e oipe’a umíva. Ha’e napenemboykéi; Ha’e penemog̃uahẽ porã Opa Iministério ha’e peteĩ declaración viva ko intensiõgui.

Upéi, katuete, oĩ Isacrificio expiatorio, hasyvéva ñandéve ñaentende hag̃ua, amo gotyove ñande kapasida mortal-gui ñaikũmby hag̃ua. Ha katu, ha kóva ha’e peteĩ “ha katu” importánte, ñaentende ramo, ikatu ñaikũmby, pe Isacrificio expiatorio intensiõ sánta ha salvadora.

Pe templo vélo oñeipeha’ã mokõime Jesús omanóvo kurusúre, omoha’angávo Túva rovaképe jeike ajepe’apaiteha: opavave ojerévape Hese, ojeroviávape Hese, toity hi’ári umi ikárga ha togueraha ijúgo hi’arikuéra konvénio konexiõ rupi.

Ambue ñe’ẽme, Túva plan ndojetratái obstáculo-re. Araka’eve ndaha’éikuri; Araka’eve ndaha’emo’ãi. Oĩpa jajapova’erã, tembiapouykapykuéra ñañongatuva’erã, ñande naturaleza aspecto ñamoambueva’erã? Héẽ. Ha katu Igrásiare, ko’ãva oĩ jahupyty hag̃uáicha, ndaha’éi jahupyty’ỹ hag̃uáicha.

Ko’ãva ha’e momarandu porã! Aime agradecido ja’ekuaa’ỹ hag̃uáicha ko’ã simple añeteguáre. Túva diseño, Iplan, Ipropósito, Iñintensiõ, Ipotapy ha Iñesperánsa opavave ha’e penemonguera hag̃ua, opavave ha’e ome’ẽ hag̃ua peẽme py’aguapy, opavave pendegueraha hag̃ua peẽme ha umi pehayhúvape ógape. Kóvagui che atestifika, Jesucristo, Ita’ýra rérape. Amén.