Eñembo’e, Ha’e oĩ Upépe

Mba’e tekotevẽ peikuaa?

Oĩ peteĩ purahéi ñembo’e rehegua, mitãnguéra Primaria-gua opurahéiva opa múndo jerére. Oñepyrũ peteĩ porandu reheve. Peikuaa mba’e purahéipa? Chepy’aguasu añete rire, apurahéiva’erãmo’ã peẽme!

“Padre Celestial díme, estás ahí? ¿Y escuchas siempre cada oración”?

Mba’éicha peikuaáta Túva Yvagagua añetehápe oĩha upépe, ndaikatúirõ jepe pehecha Chupe?

Presidente Russell M. Nelson peneinvitákuri “peñohẽ hag̃ua pene korasõ pende Ru Yvagaguápe. … Ha upéi pehendu!” Pehendu peñandúva pene korasõme ha umi temiandu oúva pene apytu’ũme.

Túva Yvagagua oreko peteĩ tete glorifikádo to’o ha kangueguiguáva ha ha’e nde espíritu Ru. Túva Yvagagua ipu’akapa ha oikuaapa rupi, Ha’e ohechakuaa opa Ita’ýra ha tajyrakuérape ha ohendu ha ombohovaikuaa opaite ñembo’e. Peẽ ikatu peikuaapendejehegui Ha’e oĩha upépe ha penderayhuha.

Peikuaa vove Túva Yvagagua ha´eha añetegua ha Ha’e penderayhuha, ikatu peiko py’aguasu ha esperánsa reheve! “Ora, Él está; habla, Él te escucha.”

Peñeñandúparaka´e peneaño? Peteĩ ára ore nieta Ashley orekórõnguare séi áño, ha’e añoite ndorekóiva peteĩ angirũ ohuga hag̃ua recreo aja ekuelape. Oñembo’y aja upépe, oñeñandúvo naimba´eguasuiha ha ndojehechaiha chupe, ou iñakãme peteĩ pensamientoite: “Eha’arõ! Naiméi cheaño! Che aguereko Cristo-pe!” Ashley oñesũ pe recreo oikoha korapy mbytetépe, okrusa ijyva, ha oñembo’e Túva Yvagaguápe. Ojehesape’ávo, peteĩ mitãkuña’imi ijavegua oñembo’y hína upépe oporandúvo chupe ohugasépa. Ashley oikuaákuri “ñande tuichamba’eha Ñandejárape g̃uarã, ha añetehápe araka’eve nañaineiha ñaneaño.”

Sapy’ánte ikatu peikuaase mba’érepa ojehu pende rekovépe mba’e hasýva térã mba’érepa ndapehupytýi peteĩ jehovasa peñembo’eva’ekuere. Py’ỹi porandu iporãveva jajapo hag̃ua Túva Yvagaguápe ndaha’éi mba’érepa ha katu mba’épa

Penemandu’ápa Nefi ha ifamília iñembyahýirõnguare oje’ói aja pe tave’ỹre? Nefi ha ijoyke’ykuéra ohórõnguare oheka tembi’u, Nefi omopẽ hi’arko. Ha katu ha’e noporandúi mba’érepa.

Nefi ojapókuri arko pyahu ha oporandu itúva Lehi-pe, moõpa ikatu oho ojuhu hag̃ua tembi’u. Lehi oñembo’e ha Ñandejára ohechauka chupekuéra moõpa ikatu oho Nefi. Túva Yvagagua pende giáta peporandúramo Chupe mba’épa ikatu pejapo ha mba’épa ikatu peikuaa.

Túva Yvagagua penepytyvõse pekakuaa hag̃ua! Ha’e ñanderayhueterei ha ombou Ita’ýra, Jesucristo, ohechauka hag̃ua ñandéve mba’éichapa jaikova’erãha. Jesús ohasa’asy, omano, ha oikovejeyva’ekue, ikatu hag̃ua ñañeperdona umi ñane angaipágui ha jakakuaa jajoguave hag̃ua Chupe.

Peẽpa pekakuaase pasiénsia ha tekoporãme? Peẽpa pekakuaase peteĩ katupyrýpe? Ikatu peneotĩ ha pekakuaase py’aguasúpe. “Peñembo’e, ha’e oĩ upépe!” Ijespíritu rupive, pene korasõ iñambuekuaa ha pehupytykuaa mbarete.

Che angirũ pyahu Jonah ohai, “Py’ỹi añeñandu nervioso eskuéla rapére pyharevekue. Chepy’apy og̃uahẽ ramo g̃uarã tárde, cheresarái peteĩ mba’égui, ha ajapo umi exámẽ. Arekórõnguare 10 áño, añepyrũ añembo’e aha aja eskuélape che sy ndive. Ajerure pytyvõ che aikotevẽvare, ha avei añembo’e che famíliare. Apensa avei umi mba’e cheaguyjeme´ẽva rehe. [Añembo’e Túva Yvagaguápe] chepytyvõkuri. Sapy’ánte nañandúi alívio aguejypamívo pe kamiõgui, ha katu ára aime aja che klásepe añandu py’aguapy.”

Jonah jerovia okakuaa hína ha’e oñembo’évo ára ha ára ha upéi ohovo tenonde gotyo.

Ikatu peñembo’e pytyvõre pehechaukahag̃ua Túva Yvagagua mborayhu ambuekuérape. Ijespíritu rupive, Túva Yvagagua penepytyvõta pehechakuaa hag̃ua umi ovy’a’ỹvape, pemoangapy hag̃ua chupekuéra. Ha’e ikatu penepytyvõ pehechauka Imborayhu reperdonávo peteĩ tapichápe. Ha’e ikatu penembopy’aguasu peservi hag̃ua tapichakuérape ha pekomparti hendivekuéra ha’eha hikuái Tupã ra’y ha rajykuéra. Peẽ peipytyvõkuaa ambuekuérape oikuaa ha ohayhu hag̃ua Jesús ha Túva Yvagaguápe peẽicha.

Che rekove pukukue aja añembo’ékuri che rúgui oiko hag̃ua Jesucristo Tupao Santokuéra Ára Pahapegua miembro. Chemitãkuña’írõ jepe, aikuaava´ekue mboy jehovasápa ha’e ikatu ohupyty. Ore família ikatúkuri ohupyty umi jehovasa ojesella hag̃ua eternidáre. Che família, angirũnguéra, ha che roñembo’e jepi hese, ha katu ha’e ndoikéi Tupaópe. Túva Yvagagua ndojopýi avavépe oiporavo hag̃ua. Ha’e ikatu ombohovái umi ñane ñembo’e ambue hendáicha.

Che edavemie rirema, ahupytyýkuri che jehovasa patriarcal. Upe jehovasápe, pe patriarca he’i chéve mba’e porãve ikatúva ajapo aipytyvõ hag̃ua che família toĩ oñondive yvágape ha’eha, ha’e hag̃ua peteĩ ehémplo Jesucristo evanhéliogui. Upéva ha’e pe ikatúva ajapo!

Che ru oikove 86 áño peve. Cinco dia omano rire, ahupytýkuri peteĩ temiandu vy’a rehegua isagrádova. Túva Yvagagua oikuaauka chéve Ijespíritu rupive che ru ohupytyseha umi Jesucristo evanhélio jehovasapy. Araka’eve ndacheresaraichéne ára añesúrõnguare témplo-pe altar jerére che hermana ha che hermano-kuéra ndive ajesella hag̃ua che tuvakuérape. Añepyrũkuri añembo’e ko’ã jehovasa rehe aimérõnguare Primaria-pe, ha ahupytýkuri ha’érõnguare abuela.

Ikatu oime peñembo’e hína pene família ha ambue pehayhúva ojehovasa hag̃ua. Ani peñeme’ẽ! Túva Yvagagua ohechaukáta mba’épa ikatu pejapo.

Pekomparti Túva Yvagagua ndive mba’épa oĩ pene korasõme. Pejerure añetéramo Ipytyvõ, pehupytýta Ijespíritu pende gia hag̃ua. Penẽmbo’évo ára ha ára penemyenyhẽta mborayhúgui Túva Yvagagua ha Jesucristo rehe. Kóva penepytyvõta pesegise hag̃ua Chupekuéra pende rekove pukukue aja!

Peimo’ãmi mba’épa oikóne opa mitãnguéra África, Sudamérica, Asia, Europa, Norte América, ha Australia-pe oñembo’éramo ára ha ára, Pe múndo tuichakue ojehovasáta hetave Tupã mborayhu reheve!