Epu’ã! Ha’e nerenói

Nda’aréi aporandúkuri che rembirekópe: “Eremína chéve, ¿mba’érepa, chemandu’aha peve, araka’eve ndajarekoi’akue problema igráveva ñande rekovépe?”

Ha’e omaña cherehe ha he’i: “!Upeichaite!, Ha’éta ndéve mba’érepa araka’eve ndajarekóikuri problema tuicháva, upéva niko ne memoria mbykyetereígui!”

Imbohovái pya’e ha ikatupyrýva ojapo tahechakuaa jey pe Jesucristo evanhélio jevivi ndoipe’áiha umi ñembyasy ha py’ara’ã, oñeikotevẽva jakakuaa hag̃ua.

Pe evanhélio ndaha’éi jajehekýi hag̃ua umi desafío ha problema-gui ha katu peteĩ solusiõ ñambokakuaa hag̃ua ñande jerovia ha jaikuaa mba’éichapa ñambohovakéta umíva.

Añandu’imíkuri upe añetegua ojapo pokã mese, peteĩ ára aguata aja, ha che visiõ iborroso, iñypytũ ha omỹimba. Añemondýi. Upérõ umi doctor he’i chéve: nereñepyrũirõ peteĩ tratamiento pya’eterei, ikatu reperde nde vista pokã semana-pe jepe. Añemondyivéntema.

Ha upéi he’i hikuái: Nde reikotevẽ inyección intravitreal, he’ise inyección che resaitépevoi, tesa ojepe’a guasúva, káda irundy semana, nde rekove pukukue aja.

Upéva ha’ékuri peteĩ ñehenói nemombáyva ndaigústoiva.

Upérõ ou peteĩ jepy’amongeta porandúicha. Añeporandu: Néi! Che visiõ físico naiporãi, ha katu ¿mba’etekópa che visiõ espiritual? ¿Aikotevẽpa tratamiento upépe? ¿Ha mba’épa he’ise jareko peteĩ visiõ espiritual hesakãva?”

Amedita peteĩ kuimba’e ohecha’ỹva ñemombe’úre, hérava Bartimeo, oñemombe’úva Marcos evanhéliope. Pe escritura he’i: “Ha ha’e ohendúvo ha’eha Jesús de Nazaret, oñepyrũ osapukái, ha he’i, Jesús, David ra’y, cheporiahuverekomína.”

Técnicamente niko, heta resa renondépe Jesús ha’ékuri José ra’ýnte, ¿mba’ére piko Bartimeo ohenói chupe “David Ra’y”? Sensillamente ohechakuaa haguére Jesús ha’eha añetehápe upe Mesías, upe ojeprofetisava’ekuégui heñoitaha David ñemoñare ramo.

Iñinteresánte upe kuimba’e ohecha’ỹva, ndorekóiva visiõ físico, ohechakuaa Jesús-pe. Ha’e ohechákuri espíritu-pe upe ndaikatúiva ohecha físicamente, upéva aja katu oĩ heta ambuekuéra ikatúva ohecha Jesús-pe físicamente, ha katu oĩ hikuái ohecha’ỹetépe espiritualmente.

Ko ñemombe’úgui ñañemoaranduve peteĩ visiõ espiritual hesakãvagui.

Ñamoñe’ẽ: “Ha heta omanda chupe okirirĩ hag̃ua; ha katu ha’e osapukái hatãve: David Ra’y, ndeporiahuverekomína chehegui.”

Opavave Ijerére he’i chupe okirirĩ hag̃ua, ha katu ha’e osapukái hatãve ha’e oikuaágui mávapa añetehápe ha’e Jesús. Ha’e nopenái umi ñe’ẽpúre ha osapukái hatãve.

Ha’e omba’e’apo oheja rangue toñemba’e’apo hi’ári. Jepe icircunstancia oĩ limitado, oiporu ijerovia oho hag̃ua ilimitasiõ mboypýri.

Upéicha, pe principio peteĩhajaikuaáva ha’e jaguereko peteĩ visiõ hesakãva ñañesentávo Jesucristo-pe ha japyta ñemova’ỹme umi jaikuaávape añeteguaha.

Hermano ha hermana-kuéra, jaguereko hag̃ua ñande visiõ espiritual intacto tekotevẽ jaiporavo ani ñahendu umi yvoragua ñe’ẽpu oĩva ñande jerére. Ko yvóra ikonfúso ha ikonfundídovape, japytava’erã ñandejeroviarekóvo umi jaikuaávape, jeroviareko ñane konveniokuérape, jeroviareko ñañongatúvo umi tembiapoukapykuéra ha ñamoañete ñande jegueroviakuéra, hatãve jepe, ojapo haguéicha ko kuimba’e. Jasapukái hatãveva’erã yvórape ñane testimonio Ñandejáragui. Ko kuimba’e oikuaákuri Jesús-pe, ijeroviareko upe ogueroviávape ha nopenái umi ñe’ẽpu oĩva ijerére.

Ko’ã árape oĩ heta ñe’ẽpu oñeha’ãva ombogue ñane ñe’ẽpu Jesucristo discípulo ramo. Umi yvoragua ñe’ẽpu oñeha’ã hína ñanemokirirĩ, ha katu upehaguereite ja’e hatãve ha mbareteveva’erã ñane testimonio pe Salvador-gui. Opa umi yvoragua ñe’ẽpu apytépe, Ñandejára okonta hína chendive ha penendive ñamomarandu hag̃ua ñane testimonio, jahupy hag̃ua ñane ñe’ẽpu ha ha’e hag̃ua Iñe’ẽpu. Ndajajapóirõ upéva, ¿máva otestifikáta Jesucristo-gui? ¿Mávapa oñe’ẽta Hérape, ha omombe’úta imisiõ divínogui?

Jaguereko peteĩ mandáto espiritual oúva ñande kuaapy Jesucristo-gui.

Ha katu ¿mba’e ojapókuri Bartimeo upéva rire?

Ñandejára mandáto guýpe opu’ã hag̃ua, omba’e’apo jey jerovia reheve.

Pe escritura he’i: “Ha ha’e, omombóvo imánto, opu’ã ha oho Jesús rendápe.”

Ko kuimba’e humilde ha ijeroviarekóva ontende ha’e ikatuha opu’ã peteĩ tekove porãvépe Jesús omandaháicha. Ha’e oikuaa ha’e iporãveha icircunstanciagui, ha peteĩha mba’e ha’e ojapova’ekue ohendúvo Jesús ohenoiha chupe omombo pe ijao mendigo ramo.

Jey, ha’e omba’e’apo oheja rangue toñemba’e’apo hi’ári.

Oiméne opensa: “Naikotevẽvéima kóva, ko’ág̃a Jesús oúmarõ che rekovépe. Kóva ha’e peteĩ ára pyahu. Ambopaháma ko teko’asy rekove. Jesús ndive añepyrũkuaa peteĩ vy’a ha vy’apavẽ rekove pyahu Ipype, Hendive, ha Ha’e rupive. Ha nacheimportái mba’épa opensa pe yvóra chehegui. Jesús che renói hína, ha Ha’e chepytyvõta avivi hag̃ua peteĩ tekove pyahu.

¡Mba’e ñemoambue hechapyrãitéva!

Omombóvo ijao mendigo rehegua, ojehekýi opaite excusa-gui.

Ha kóva ha’e principio mokõiha: jareko meme peteĩ visiõ espiritual hesakãva jahejávo tapykuépe pe yvypóra natural, ñañearrepenti ha ñañepyrũ peteĩ tekove pyahu Cristo-pe.

Ikatuháicha jajapo upéva ha’e jajapóvo ha ñañongatúvo konveniokuéra ñapu’ã hag̃ua peteĩ tekove porãvépe Jesucristo rupive.

Ñamoĩramo umi excusa ñañembyasy hag̃ua ñandejehe, ñande circunstancia ha problema-kuérare ha opa umi mba’e vai ojehúvare ñande rekovépe, ha opa umi hénte vaíre jepe ñapensávañanembovy’a’ỹva, ñañongatu pe mendigo ao ñande ati’ýre. Añetehápe sapy’ánte tapichakuéra, oikuaávo térã oikuaa’ỹvo, ñanembopy’arasykuaa. Ha katu ñande jaiporavova’erã ñamba’e’apo jerovia reheve Cristo-re jaipe’ávo pe mental ha emocional ao ikatúva gueteri ñamonde ñañomi hag̃ua umi excusa térã angaipa, ha ñamombo upéva, jaikuaávo Ha’e ikatuha ha ñanemonguerataha.

Araka’eve ndaipóri peteĩ excusa porã ja’e hag̃ua: “Che péicha umi circunstancia vai ha hasýva rupive. Ha ndaikatúi añemoambue, ha aĩ hustifikádo.”

Ñapensa vove upéicha, jaiporavo hína toñemba’e’apo ñande ári.

Ñañongatu pe mendigo ao.

Ñamba’e’apo he’ise jajerovia ñande Salvador-re, jagueroviávo Iñexpiasiõ rupive ikatuha ñapu’ãopa mba’e ári, Ha’e omandávo.

Pe pricipio mbohapyha oĩ umi irundy ñe’ẽ pahápe: “[ha’e] ou Jesús rendápe”.

¿Mba’éichapa ikatu ha’e oho Jesús rendápe ndohecháiramo? Peteĩete ikatuháicha ha’e oguatárõ Jesús gotyo ohendu rupi Iñe’ẽpu.

Ha kóva ha’e principio mbohapyha: Ñamantene peteĩ visiõ espiritual hesakãva ñahendúvo Ñandejára ñe’ẽpu ha jaheja Chupe tañandegia.

Upe kuimba’e omopu’ãháicha iñe’ẽpu umi ñe’ẽpu ijereregua ári, ikatúkuri ohendu Ñandejára ñe’ẽpu opa umi ambue ñe’ẽpu apytépe.

Kóva ha’e pe jeroviaite ohejáva Pedro toguata umi y ári oreko aja iñenfóke espiritual Ñandejárape ha ndojedistraéi umi yvytu ijerereguáre.

Upérõ, pe kuimba’e ohecha’ỹva ñemombe’u opa ko’ã ñe’ẽ reheve “ha’e ohupyty jey ivisiõ ha osegi Jesús-pe upe tapére.”

Peteĩ mbo’epy imba’egusuvéva ko ñemombe’úpe niko ko kuimba’e omomba’apohague jerovia añetegua Jesucristo-re ha ohupyty peteĩ milagro ojerure haguére intensiõ añete reheve, pe intensiõ añete osegi hag̃ua Chupe.

Ha kóva pe razón imba’eguasuvéva jahupyty haguére umi jehovasa ñande rekovépe, upéva ha’e jasegi Jesucristo-pe. Ha’e jahechakuaa Chupe, jajapo ha ñañongatu konveniokuéra Tupã ndive Ha’e rupi, ñamoambue ñande naturalesaite Ha’e rupive ha ñañeha’ãmbaite ipahaite peve jasegívo Chupe.

Chéve g̃uarã, ñamantene peteĩ visiõ espiritual hesakãva oho meme ñesentra Jesucristo-re.

Upéicharõ, hesakã piko che visiõ espiritual, ahupytývo umi inyección che resápe g̃uarã? ¿Néi, mávapa che ha’e hag̃ua? Ha katu cheaguijevete upe ahechávare.

Ahecha hesakã porã Ñandejára po ko tembiapo sagrádope ha che rekovépe.

Ahecha heta tapicha jerovia ahahápente, umi omombaretéva che jeroviaite.

Ahecha anhelkuéra opa che jerére.

Ahecha heta tapicha jerovia ndohecháiva Ñandejárape físicamente ha katu ohechakuaa Chupe espiritualmente, ha’ekuéra oikuaa porãitereígui Chupe.

Atestifika ko evanhélio ha’eha pe mbohovái opaite mba’épe g̃uarã, Jesucristo ha’égui pe mbohovái opavavépe g̃uarã. Cheaguijeterei upe ikatúvare ahecha asegívo che Salvador-pe.

Apromete ñahenduháicha Ñandejára ñe’ẽpu ha jaheja Chupe tañandegia pe Salvador konveniokuéra rapére, jajehovasáta peteĩ visiõ hesakãva, comprensión espiritual ha py’aguapy korasõme ha apytu’ũme opa ñande rekove pukukue.

Ajerure’asy tajaguerosapukái ñande testimonio Chugui, hatãve umi ñe’ẽpúgui oĩva ñande jerére, peteĩ yvórape oikotevẽva ohenduve Jesucristo-gui ha ndaha’éi pokãve. Ajerure’asy tajaipe’a ñandehegui pe mendigo ao ikatúva ñamonde gueteri ha tañapu’ã yvóra ári, peteĩ tekove porãvépe Cristo-pe ha Ha’e rupive. Ajerure’asy tajaheja opa excusa ani haĝua jasegi Jesucristo-pe ha katu tajajuhu opaite mba’e porãrepa jasegiva’erã Chupe, ñahenduháicha jahávo Iñe’ẽpu. Kóva ha’e che ñembo’e, Jesucristo rérape. Amén.