Ehenói, ani re’a

Ko ára añepyrũse atestifikávo aikuaa porãiteha che korasõme Tupã ohenduha ñane ñembo’e ha ombohovaiha ñandéve g̃uarãite.

Peteĩ múndo ohasavapehína ára oĩha jeikuaa’ỹ, mba’erasy, kyre’ỹpoi, ha mborayhu’ỹ, ikatu ñañandu jajeroviaveha umi ñande katupyrýre ha umi ñandéve ñande gustávare, upéicha avei umi kuaapy ha segurida múndogui oúvare. Péva rupi ikatu ñambotapykue mõgui ou pytyvõ ha ñangareko añete ikatúva ipu’aka umi desafío ko yvy arigua jeikovepeguáre.

Chemandu’a peteĩ ára oimérõguare hospital-pe cherasýgui, ha ndaikatúi ake. Amboguévo tesape ha iñypytũvo pe koty, ahecha peteĩ techauka mimbi téchore che renondépe he’íva, “Ehenói, ani re’a”. Cheñemondyirã, upe ára ko’ẽme ahecha pe marandu oñemoĩ jeyjey heta hendápe upe kotýpe.

Mba’ére imba’eguasuetéra’e upe marandu? Aporandúvo enfermera-pe upévare, ha’e he’i, “Péva ningo ani hag̃ua ejegolpea ha embotuichave pe mba’erasy aguerokómava voi”.

Ko tekove ijehegui ogueru umi tembiasa hasýva, oĩ ha’éva ñande rete rehegua, oĩ oúva ñane kangy térã jaiko’asy rupi, oĩ oúva mba’éichare ambuekuéra oiporu sãso orekóva oiporavo hag̃ua ha oĩ oúva jaiporu rupi sãso jarekóva jaiporavo hag̃ua.

Oiménepa promésa imbaretevéva pe Salvador Ijeheguiete ojapova’ekuégui Ha’e he’írõguare, “Pejerure ha oñeme’ẽta peẽme; peheka ha pejuhúta; pembota”, térã pehenói, “ha ojepe’áta peẽme”?

Ñembo’e ha’e mba’éichapa ñañemongeta hag̃ua ñande Ru Yvagagua ndive, ohejáva ñandéve “ñahenói ha ani ja’a”. Ha katu, oĩ situasiõ ikatuha ñapensa noñehenduiha upe ñehenói ndajahupytýigui peteĩ mbohovái pya’e térã peteĩ ñande ñaha’arõva’ekue.

Sapy’ánte oguerúva jepy’apy, vy’a’ỹ ha kyre’ỹpoi. Ha katu penemandu’áke Nefi jerovia rechauka Ñandejárare he’írõguare, “Mbaʼére piko ndaikatumoʼãi chemboʼe, ajapo hag̃ua peteĩ yga?” Ko’ág̃a, che aporandu peẽme, mba’ére piko Ñandejára ndaikatumoʼãi penerekomboʼe, ani hag̃ua pe’a?

Jerovia Tupã ñembohováire he’ise ñamboaje pe Ha’e ojapoháicha ndaha’eiha ñande jajapoháicha ha “opa mba’e ojehuva’erãha hi’árape”.

Jaikuaa porãvo ñande ha’eha peteĩ Túva Yvagagua imborayhúva ha iporiahuverekóva ra’y ha rajykuéra ha’eva’erã ñemokyre’ỹ ñahenói hag̃ua ñembo’e añetépe, tekopy reheve “ñañemboʼ[évo] tapiaite, ha nañanekan[gýi]; … [ñane] rembiapo haʼe hag̃ua [ñane] ánga ñeime porã[rã]”. Peimo’ãmínte pe Túva Yvagagua oñandúva opa ñembo’épe jajapo jave peteĩ jerure’asy Ita’ýra, Jesucristo rérape. Mba’e pu’aka ha kyrỹipa, che aguerovia, ojehechauka péicha jajapo jave!

Escritura-kuérape henyhẽ tembiecharã umi ohenoiva’ekuégui Tupãme ani hag̃ua ho’a. Helamán ha ijehérsito, ombohovake aja ijeiko’asykuéra, ohenoiva’ekue Tupãme, oñohẽvo hi’angakuéra ñembo’épe. Oñeme’ẽ chupekuéra ñemo’ã, py’aguapy, jerovia ha temira’arõ, ojapyhývo py’aguasu ha determinasiõ ohupyty peve hikuái imetakuéra.

Peimo’ãmi mba’éichapa Moisés ohenóira’e ha ojerure’asy Tupãme ojejuhúvo Mar Rojo ha egipcio-kuéra mbytépe oúva oataka hag̃ua, térã Abraham-pe iñe’ẽrendúvo apoukapýre ojuka hag̃ua ita’ýra Isacc-pe.

Aikuaa porã peteĩteĩ peẽ peguerekohague ha peguerekotaha umi tembiasa upe ñehenói ha’etahápe mbohovái ani hag̃ua pe’a.

Ojapo treinta ary, che rembireko ha che roñembosako’írõguare ore ñemenda civil ha ñemenda templo-pe g̃uarã, roñehenói oje’e hag̃ua oréve pe ñemenda civil ndojejapoihahína peteĩ huelga rupi. Roñehenóikuri mbohapy día upe ceremonia ára mboyve. Heta ñeha’ã rire ambue oficina-pe ha ndorojuhúivo cita disponible, roñepyrũ roñandu jepy’apy ha dúda ikatúpa añetehápe romenda oñeplanea haguéicha.

Che rembirekorã ha che “rohenóikuri” roñohẽvo ore ánga Tupãme ñembo’épe. Ipahápe, oĩkuri he’íva oréve oĩha peteĩ oficina peteĩ táva michĩme upe tavaguasu okápe, peteĩ roikuaáva oĩha mburuvicha ramo. Roduda’ỹre, roho hendápe ha rojerure chupe ikatúnepa oremomenda. Ore vy’arã, he’i ojapotaha. I-secretaria he’iporã oréve roguenohẽva’erãha peteĩ certificado upe távagui ha rontregava’erã opa umi documento ára uperiregua asajembyte mboyve.

Ára uperireguápe, roku’e upe táva michĩme ha roho estación de policía-pe rojerure hag̃ua pe documento oñeikotevẽva. Ore ñemondyirã, pe oficial he’i nome’ẽmo’ãiha oréve heta paréha imitãva okañy rupi ifamiliakuéragui omenda ñemi hag̃ua upe távape, añetehápe ndaha’éivakuri ore káso. Kyhyje ha vy’a’ỹ ou jey oréve.

Chemandu’a kirirĩháme ahenoihague che Ru Yvagaguápe ani hag̃ua ro’a. Ahupytýkuri hesakãva impresiõ che apytu’ũme, he’i jeyjeýva, “Templo-gua rrekomendasiõ, templo-gua rrekomendasiõ”. Upepete aguenohẽ che templo-pegua rrekomendasiõ ha ambohasa pe oficial-pe, omondýiva che rembirekorãme.

Tuichaite roñemondýi rohendúvo pe oficial he’i, “Mba’ére piko ndapejéi chéve peẽ ha’eha Jesucristo Tupao Santokuéra Ára Pahapeguáva? Che aikuaa porã pende tupao”. Pya’ete oñepyrũ ombosako’i pe documento. Roñemondyivéntema pe oficial osẽvo pe estación-gui mba’evete he’i’ỹre.

Ohasa quince minuto, ha ndouvéi. Ha’émakuri 11:55 pyhavere, ha rorekókuri medio dia pevénte rontrega hag̃ua umi kuatia. Upéi osẽ sapy’a peteĩ jagua’i reheve ha he’i oréve ha’eha peteĩ regalo de boda ha ome’ẽ oréve pe documento reheve.

Roñani pe mburuvicha oficina-pe ore documento ha ore jagua pyahu reheve. Upéi rohecha peteĩ vehículo oficial oúva ore roimeha gotyo. Añembo’y henonderãme. Pe mba’yru opyta, ha rohecha upe secretaria hyepýpe. Oma’ẽvo orerehe, ha’e he’i, “Ambyasy; ha’ékuri peẽme asaje mbyte. Ajapova’erã ambue mba’e”.

Añemomirĩ kirirĩháme, ahenóivo che Ru Yvagaguápe opa che korasõ reheve, ajerurévo pytyvõ peteĩ jey “ani hag̃ua ha’a”. Peichahágui, pe milagro oikókuri. Pe secretaria he’i oréve, “Iporãite pende jagua. Moõ ikatúne ajuhu peteĩ peichagua che membýpe g̃uarã?”

“Péva nemba’erã”, pya’e rombohovái.

Pe secretaria oma’ẽ orerehe ñemondýipe ha he’i, “Oĩporã, jaha katu oficina-pe ha jajapo tekotevẽva”.

Mokõi ára uperire, Carol ha che romenda, roplanea haguéicha, ha upéi rojesella Lima Peru Templo-pe.

Añete ningo, ñanemandu’ava’erã upe ñehenói ha’eha peteĩ mba’e jerovia ha mba’e’apo rehegua—jerovia jahechakuaa hag̃ua jaguerekoha peteĩ Túva Yvagagua ombohováiva ñane ñembo’e Iñarandu ijapyra’ỹvapeicha, ha upéi mba’e’apo ohóva upe jajerureva’ekue rehe. Ñañembo’e—ñehenói—ikatu ohechauka ñane ñeha’arõ. Ha katu ñamba’e’apo ñañembo’e rire ohechauka añeteguaha ñande jerovia—jerovia oñemoĩva a prueba ára oĩ jave mba’e’rasy, kyhyje, ha kyre’ỹpoi.

Ajerure peẽme pehechami hag̃ua ko’ã mba’e:

1. Akói pepensa Ñandejárare ha’eha pende opsiõ peteĩha ramo pytyvõrã.

2. Pehenói, ani pe’a. Peheka Tupãme ñembo’e añetépe.

3. Peñembo’e rire, pejapo opa mba’e ikatúva pehupyty hag̃ua umi jehovasa peñembo’ehague.

4. Peñemomirĩ pemoneĩ hag̃ua pe mbohovái Hi’árape ha Ha’e oipotaháicha.

5. Ani pepyta! Peñemotenonde meme konvénio rapére peha’arõ aja peteĩ mbohovái.

Ikatu oĩ tapicha ko’ág̃aite, umi mba’e ohasavahína rupi, oñandúva ho’ataha hikuái ha ohenoiséva José Smith ojapo haguéicha ojerure’asýrõguare: “O Tupã, moõ reime? … Araka’e pevépa rejokóta nde po?”

Jepe ko’ãichagua ñeiméme, peñembo’e ímpetu espiritual reheve, Presidente Russell M. Nelson ombo’e haguéicha, pene ñembo’e akói oñehendúgui!

Penemandu’a ko himno:

Ñañembo’e jave ñañandukuaa ñande Ru Yvagagua añuã, ombouva’ekue ITa’ýra Unihénito ombovevúi hag̃ua umi ñande kárga, Tupãme ñahenóiramo, che atestifika, ndaja’amo’ãiha. Jesucristo rérape. Amén.