Opa mba’e oĩ porãta Templogua Konveniokuéra rupi

Che hermano ha hermana-kuéra ojehayhuetéva, ko conferencia general sesiõ ha’ékuri, chéve g̃uarã, peteĩ ára marangatu. Cheaguyje asignasiõ arekóvare añe’ẽ hag̃ua millones Santokuéra Ára Pahapegua ha ñane angirũnguéra opa mundoguápe. Che pohayhu, ha aikuaa Ñandejára penderayhuha.

Ohasáma 50 ary, arekohague tuicha priviléhio aservívo Colegio Universitario Ricks presidente ramo Rexburg, Idaho-pe. Junio 5, ary 1976 pyhareve, che rembireko, Kathy, ha che romaneha Rexburg-gui Idaho Fall Templo, Idaho-pe roasisti hag̃ua ore angirũ ag̃ui sellamiéntope. Añete ningo, upe ára irundy mitã’i reheve ore rógape, ore viáhe témplope ikatútakuri oiko peteĩ niñera ipy’aguasúva ñeipytyvõ reheve añoite! Roheja hendive ore mitã rohayhuetéva ha rojapo 30 minuto viáhe mbyky.

Ore rembiasa témplope upe ára hechapyrãite, jepiveguáicha. Upevére, oñembopaha rire templogua sellamiénto—ha roñembosako’ívo rojevy hag̃ua ógape—rohechakuaa heta templogua obrero ha umi opartisipáva jepy’apýpe oñemongeta templo vestíbulo-pe. Upe riremi, peteĩ templogua obrera he’i oréve rreprésa Teton oñemopu’ã ramóva Idaho este-pe ho’ahague! Hetave 300 millóne métro kúvikogui (80 mil millóne galón) y, osyrýkuri upe rrepresa rupive, og̃uahẽva umi 775 kilómetro cuadrado (300 milla cuadrado) valle jerereguápe. Hetave Rexburg táva oĩkuri y guýpe, umi óga ha kamiõ reheve y hetáre ojeguerotyryrýva. Dos tercios umi 9.000 residente-gui pya’ete opyta oga’ỹre.

Peimo’ãháicha, ore remiandu ha jepy’apy pya’ete oho ore mitã rohayhuetéva segurida ha ñeimeporãre, ciento estudiante universitario ha mbo’eharakuérare, ha komunida rohayhúvare. Roimékuri sa’ive 50 kilómetro (30 mílla) ógagui, ha upevére upe ára, mombyry teléfono ha mensaje de texto mboyve, ndororekóikuri roñekomunika pya’e hag̃ua ore mitãnguéra ndive, ni ndaikatúi romaneha Idaho Falls-gui Rexburg-pe, opa umi tape oñembotýgui.

Ore opsiõ peteĩete ha’ékuri ropyta hag̃ua upe pyhare peteĩ motel upepegua, Idaho Falls-pe. Kathy ha che roñesũ oñondive ore motel kotýpe ha ñemomirĩme rojerure Túva Yvagaguápe ore mitãnguéra seguridáre ha hetaite ambue tapichakuéra oĩvaíva ko mba’evaiete oikóva rupi. Chemandu’a Kathy oguata memévo ápe ha pépe ko’ẽmbota peve, jepy’apyetépe imembykuérare. Jepe chejepy’apy, ikatúkuri añembopy’aguapy ha upéi apyta ake.

Nda’arepukúi uperire che ára apyra’ỹmegua irũ porãite chemombáy ha he’i, “Hal, mba’éichaiko ikatu reke ko’ãichagua árape?”

Upérõ ko’ã ñe’ẽ ou hesakãporã che korasõ ha che akãme. Ha’éva che rembirekópe: “Kathy, tosẽ osẽháicha, opa mba’e oĩ porãta témplo rupi. Jajapova’ekue konvénio Tupã ndive ha jajesella familia eterna ramo”.

Upe javete, ha’ete pe Ñandejára Espíritu okonfirmáva ore korasõ ha ore akãme pe mokõivéva roikuaámava voi añeteguaha: umi sellamiénto ordenánsa, Ñandejára rógape añoite ojejuhúva ha oñeadministráva sacerdocio autorida oĩporãva rupi, orembojoajuhague ména ha ha tembireko ramo, ha ore mitãnguéra ojesellahague orendive. Natekotevẽikuri añetehápe rokyhyje, ha oreaguyje uperire roikuaávo ore mitãnguéra oĩporãha.

Oiméne ko Presidente Thomas S. Monson he’iva’ekue ohechauka porãve pe Kathy ha che roñanduva’ekue upe pyhare oreresarai’ỹvape. “Jaháramo templo-pe, oñeme’ẽkuaa ñandéve peteĩ nivel de espiritualida ha peteĩ temiandu py’aguapy rehegua. … Jaikuaáta mba’épa añetehápe he’ise pe Salvador ñe’ẽ he’írõguare: ‘Py’guapy aheja peẽme, py’aguapy che arekóva ame’ẽ peẽme. … Ani pene korasõ ojepy’apy, ni pekyhyje [Juan 14:27].’”

Areko jehovasa añandúre upe py’aguapy opa ára aikévo témplo marangatúpe. Chemandu’a peteĩha ára aikérõguare Lago Salado Témplope. Che ha’ékuri peteĩ mitãkaria’y.

Ajesarupi peteĩ técho yvate morotĩ gotyo omohesakãitéva pe koty ojoguáva ojepe’avaicha yvágape. Ha upe javete, ou che akãme peteĩ apytu’ũroky ñe’ẽ resakã reheve: “Che aimémakuri ko tenda hesakãvape”. Ha katu pya’e ou che akãme, ndaha’éi che ñe’ẽpu teépe, ko’ã ñe’ẽ: “Nahániri, nereimeiva’ekue ko’ápe araka’eve. Nemandu’ahína peteĩ ára renase mboyvegua. Reimeva’ekue peteĩ koichagua tenda sagrádope, Ñandejára ikatuhápe ou”.

Hermano ha hermana-kuéra, ñemomirĩme atestifika jaháramo témplope, ñañeromandu’akuaa umi ñande espíritu naturalésa ijapyra’ỹvagui, ñande rrelasiõ Túva ha Ita’ýra divíno ndive, ha potapy paha jarekóvagui jahajey hag̃ua ñande róga yvagaguápe.

Ndaha’ereguaréi conferencia discurso-pe, Presidente Russell M. Nelson ombo’e:

“Tenda isegurovéva peime hag̃ua espiritualmente ha’e peiko pene templogua konveniokuéra ryepýpe!”

Opa mba’e jagueroviáva ha peteĩteĩ promésa Tupã ojapova’ekue Ikonveniogua tavayguakuérape oñembyaty témplope.”

“Peteĩteĩ tekove ojapóva umi konvenio … témplope—ha oñongatúva—ohupytyve Jesucristo pu’aka.”

Ha’e avei ombo’e “peteĩ jey jajapo vove konvénio Tupã ndive, akói jahejáma terreno neutral. Tupã ndohejareimo’ãi Irrelasiõ umi ojapova’ekuépe koichagua joaju Hendive. Añetehápe, opa umi ojapova’ekue peteĩ konvénio Tupã ndive oguereko peteĩ mborayhu ha poriahuvereko peteĩtéva”.

Presidente Nelson liderazgo inspirado guýpe, Ñandejára ombopya’ékuri ha ombopya’e meméta ohóvo, templokuéra ñemopu’ã opa mundopýre. Kóva ohejáta opa Tupã ra’ykuéra tohupyty umi ordenánsa salvasiõ ha exaltasiõ rehegua ha tojapo ha toñongatu umi konvénio sagrádo. Ñakumpli umi rrekisíto jajapo hag̃ua umi konvenio sagrádo ndaha’éi ñeha’ã jajapóva peteĩ jeýnte ha katu peteĩ mba’e jajapóva tekove pukukue. Ñandejára he’i oñeikotevẽtaha opa ñane korasõ, ánga, apytu’ũ ha mbarete.

Japartisipa py’ỹi templogua ordenansakuérape ojapokuaa peteĩ devosiõ rechaukarã Ñandejárape. Peñongatúvo pene templogua konveniokuéra ha penemandu’a umívare, peinvita pe Espíritu Santo ñemoirũ penemombarete ha penemopotĩ hag̃ua.

Upérõ peñandukuaa peteĩ temiandu tesape esperánsa rehegua ha otestifikáva umi promésa añeteguaha. Peikuaáta peteĩteĩ konvénio Tupã ndivegua ha’eha peteĩ oportunida peñemoag̃uive hag̃ua Hese, upéi omoĩtava pene korasõme peteĩ potapy peñongatu hag̃ua templogua konveniokuéra.

Oñepromeva’ekue ñandéve, “Ñane konvénio rupi Tupã ndive, Ha’e araka’eve naikane’õmo’ãi Iñeha’ãgui ñanepytyvõ hag̃ua ha araka’eve nañambopamo’ãi Iñeha’erõkuaa poriahuvereko ñanendive g̃uarã.”

Umi sellamiénto konvénio témplope rupive jahupytykuaa ñemoañete umi familia mborayhu joaju oho memetaha ñemano rire ha odurataha opa ára apyra’ỹ meve. Ojerrespetávo umi ñemenda ha familia rehegua konvénio Tupã témplope ojejapóva ome’ẽta ñemo’ã umi mba’evai ha’évagui egoísmo ha orgullo.

Ñeñangareko tapia oñoermano ha oñoermanakuéra ojuehe oúta ñeha’ã meme rupive añoite pegia hag̃ua pende família Ñandejára oipotaháicha. Peme’ẽ oportunida mitãnguérape oñembo’e hag̃ua ojuehe. Pya’éke pehecha joavy moñepyrũ, ha pehechakuaa porãite umi mborayhupegua servicio apo, ko’ýte ojupe. Umi oñoermano oñembo’e jave ojuehe ha ojoservi, korasõ oñemohu’ũ ha ojere ojuehe ha ituvakuéra rehe.

En párte, upéva ha’e Malaquías omombe’úva he’i tenondérõguare proféta Elías-gui: “Ha’e omoĩ’atãta ta’yrakuéra korasõme umi promésa tuvakuérape ojejapova’ekue, ha umi ta’ýra korasõ ou jeýta ituvakuérape. Upeichaʼỹramo, opa pe yvy oñehundipaitéta ijejúpe.”

Umi jeipy’ara’ã, mba’e ijetu’úva ha mba’erasy katuete ñanderupytýta opavavépe. Avave ñandekuéra nañaiméi sãsóme umi “to’oguigua ñuatĩgui”. Upevére, jahávo témplope ha ñanemandu’ávo umi ñane konvéniore, ñañembosako’ikuaa jahupyty hag̃ua guia personal Ñandejáragui.

Kathy ha che romenda ha rojesellárõguare Logan Utah Témplope, upérõ Élder Spencer W. Kimball ojapókuri upe sellamiénto. Umi pokã ñe’ẽ he’iva’ekuépe, ha’e ome’ẽ ko ñemoñe’ẽ: “Hal ha Kathy, peikove ikatu hag̃uáicha, og̃uahẽ vove upe ñehenói, ikatu hag̃ua hasy’ỹme peheja opa mba’e.”

Iñepyrũme, noroikũmbýi mba’épa upe ñemoñe’ẽ he’ise oréve g̃uarã, ha katu rojapo opa ikatumíva rovivi hag̃ua ore rekove ikatu hag̃uáicha roñembosako’i rosẽ hag̃ua roservi Ñandejárape upe ñehenói ou vove. Haimete 10 ary romenda rire, ou peteĩ ñehenói roha’arõ’ỹva Tupagua Comisionado de Educación-gui, Neal A. Maxwell.

Pe ñemoñemo’ẽ mborayhu témplope ome’ẽva’ekue Presidente Kimball ikatu hag̃ua “hasy’ỹme roheja opa mba’e” hi’añetékuri. Kathy ha chéve oñeme’ẽ peteĩ ñehenói roheja hag̃ua pe ha’etéva peteĩ ñeime familiar porãite California-pe roservi hag̃ua peteĩ asignasiõme ha peteĩ tendápe che ndaikuaáivagui mba’eve. Upevére, ore familia oĩkuri listo rosẽ hag̃ua peteĩ proféta, peteĩ témplo marangatúpe, peteĩ rrevelasiõ renda, ohecha rupi peteĩ mba’e tenondeve oikótava ha upevarã roimékuri upérõ ñembosako’ípe.

Che hermano ha hermana-kuéra pohayhuetéva, ame’ẽ testimónio ndaiporiha mba’eve imba’eguasuvéva umi konvénio témplope pejapova’ekue térã pejapótava ñeñongatúgui. Noimportái moõitépa peime upe konvénio rapére, ajerure jeyjey peẽme pembyaty hag̃ua umi ojejeruréva ha ikatu hag̃ua pejeiporavo peho hag̃ua témplope. Peho upépe py’ỹive ikatumiháicha Pejapo ha peñongatu konveniokuéra marangatu Tupã ndive. Amoañetekuaa peẽme peteĩchaguaite añetegua akompartiva’ekue Kathy-ndi upe pyhare ojapo haimete 50 dekada peteĩ motel kotýpe Idaho Falls-pe: “Tosẽ osẽháicha, opa mba’e oĩ porãta templogua konveniokuéra rupi”.

Ame’ẽ peẽme che firme testimónio Jesús ha’eha pe Cristo. Ha’e oikove ha oisãmbyhy Itupao. Templokuéra ha’e umi Ñandejára róga. Presidente Russell M. Nelson ha’e Tupã proféta yvy arigua oikovéva. Che ahayhu chupe, ha pohayhu peteĩteĩ peẽme. Jesucristo réra marangatúpe, amén.