Yva opytáva

Che mitã aja, ha’usetémiva’ekue durazno ipyahúva, hi’aju porãva. Ko’ag̃aite peve, añamindu’úvo aisu’uha peteĩ durazno hi’aju porãva, ha he’ẽtereíva chembojuru he’ẽ. Ojeiporavovo umi durazno hiʼaju porãmbáva, hi’are dos ára guive cuatro día peve oñembyai hag̃ua. Chemandu’a porãite amoirũrõguare che sy ha che hermano-kuérape ore kosináme roñongatu hag̃ua duraznos oñembyatývaʼekue invierno oúvape g̃uarã, botella oñemboty porãvape. Roñongatuporãramo umi durazno, upe yva he’ẽ porãitéva ikatúta oje’u heta ary aja, ndahaʼéi cuatro día peve añónte. Oñembosako’i porã ha oñemboyku porãramo, pe yva oĩ porãta oñembyai peve iséllo.

Crísto ohechauka ñandéve “tereho ha nereñói, … nde yva opyta hag̃ua”. Péina katu noñe’ẽi durazno rehe. Oñe’ẽhína jehovasa oguerekóva Tupã Ita’yrakuérape g̃uarã. Jajapo ha ñañongatúramo konveniokuéra Tupã ndive, umi jehovasa oúva ñane konveniokuéra ndive ikatu ojeipyso ko tekovégui ha ojesella ñande ári, térã ojepreserva, tapiaite g̃uarã, oikóvo chugui yva opytáva opa eternidad-pe g̃uarã.

Pe Espíritu Santo, Hembiaporã divínope Espíritu Marangatu promésa ramo, oselláta peteĩteĩ ordenánsa umi ijeroviarekóva ikonveniokuérape ári ovale hag̃ua mortalida rire. Espíritu Santo osellávo ñane ordenansakuéra iñimportanteterei jahupytyséramo umi jehovasa oñeprometeva’ekue eternidad-pe g̃uarã, oikóvo chugui yva opytáva tapiate g̃uarã.

Kóva iñimportánteterei jaje’exsaltaséramo. Presidente Russell M. Nelson ohekombo’e haguéicha, “ñañepyrỹva’erã jaguerekóvo pe ipaha ñane akãme. … Añetehápe, peteĩteĩ ñandéve g̃uarã, pe ‘ipaha’ jahupytysevéva ha’e jaiko hag̃ua tapiaite ñane familiakuéra ndive peteĩ estado exaltado-pe ñaimetahápe Tupã, ñande Ru Yvagagua ha Ita’ýra Jesucristo renondépe”. Presidente Nelson avei he’i: “Ñemenda Celestial ha’e peteĩ pehẽ tekotevẽva tekove ijapyra’ỹvape g̃uarã ñembosako’ipegua. Ñaikotevẽ ñamenda tapicha oĩporãvare, pe tenda oĩporãvape, pe autoridad oĩporãva rupive, ha ñaneñe’ẽrendu fielmente upe konvénio sagrádore. Upéicharõ ikatu ñaime seguro exaltación-re Tupã reino Yvagaguápe.”

¿Mba’épa ha’e hína umi jehovasa exaltación rehegua? Umívape oike jaiko Tupã ndive eternidad-pe ména ha tembireko háicha, jahupyty hag̃ua “tróno, rréino, principado ha poder, … ha peteĩ continuación umi semilla rehegua tapiaite peve”, ha jahupyty opa mba’e Tupã oguerekóva.

Ñandejára oikuaauka José Smith rupive:

“Gloria celestial-pe oĩ mbohapy yvága térã grado;

“Ha ojehupyty hag̃ua upe ijyvatevéva, pe tekove oikeva’erã ko sacerdocio órdenpe [péva heʼise, upe ñemenda konvénio pyahu ha opaveʼỹva];

“Ha ndojapóirõ, ndaikatúi ohupyty upéva.

“Ikatúta oike ambuévape, ha katu kóva haʼe pe irréino opaha; ndaikatúi okakuaave”.

Ápe ñaikũmby ikatuha ñaime rréino yvagapeguápe, térã jaiko Tupã renondépe, ha ñaime soltéro. Ha katu jaje’exalta hag̃ua pe grado ijyvatevévape, rréino celestial-guápe, ñamendava’erãha autoridad hekopete rupive ha upéi jahechukáva’erã fidelidad umi konvénio ojejapova’ekuépe upe matrimonio-pe. Jahechukávo fidelidad umi konveniokuérape, Espíritu Marangatu Promésa, ikatu osella ñande konvénio matrimonial. Ha umi jehovasa ojeselláva oñekonverti yva ipukúva tapiaite peve.

¿Mbaʼépa ñaikotevẽ ñakumpli hag̃ua hekopete pe konvénio pyahu ha opaveʼỹva ñemendápe?

Presidente Russel M. Nelson ohekombo’e oĩha mokõi lasos jaikévo konvénio matrimonial etérnope: peteĩ vínculo lateral ména ha tembireko ndive ha peteĩ vínculo vertical Tupã ndive. Umi jehovasa exaltación rehegua ojesella hag̃ua ñande ári ha opyta hag̃ua ko tekove rire, ñande fielva’erã umi konveniogua vínkulo lateral ha vertikálpe.

Ñañangareko hag̃ua vínculo lateral-re ñande kónjugue ndive, Tupã oñemoñe’ẽ ñandéve péicha “ejaihu [ne] ména térã ne [remirekópe] [ne] korasõ mbytete guive ha … eñemboja [hese] añoite ha ani avavetére”. Umi omendávape g̃uarã, peñemboja hese ha avavetére he’ise peñemoñe’ẽva’erãha mborayhúpe, pejoayhu ha peñangarekoha ojuehe, pemotenondeha tiempo pene ména térã pene rembireko ndive umi interés okaygua ári, ha avei pehenoiva’erãha Tupãme penepytyvõ pesupera hag̃ua pene rekokangykuéra. Avei he’ise ndaipóriha relaciones emocionales térã sexuales mba’evéichagua matrimónio okápe, jepe taha’e coqueteo terã ñese tapicha ambue sexogua ndive, ndaiporiva’erã pornografía, omoheñóiva lujuria.

Oñeñangareko hag̃ua vínculo lateral-re konvéniope, opaite paréha oĩseva’erã matrimonio ryepýpe. Presidente Dallin H. Oaks ramoiténte ohekombo’e: “Jaikuaa avei Ha’e, [Tupã] ndojopymo’ãiha avavépe peteĩ relación de sellamiento-pe ojeipota’ỹre. Umi jehovasa peteĩ relación ojesellávape ojeasegura opavave oñangarekóvape ikonvénio rehe ha katu araka’eve oñeimponeiva’erã peteĩ relación selláda ambue tapichápe noiméirõ digno térã ndoipotáivape.”

¿Mba’e ha’e vínculo vertical oñe’ẽvare Presidente Nelson? Vínculo vertical ha’e jajapóva Tupã ndive.

Ñamantene hag̃ua pe vínculo vertical Tupã ndive, ñande fiel umi ñane konvénio jajapova’ekue templo-pe umi léi obediencia, sacrificio, evangelio, castida ha consagración reheguáre. Avei jajapo konvénio Tupã ndive jajapyhývo ñane angirũ etérnope ha jaiko kónjugue ha tuvakuéra marangatúrõ. Ñañangarekóvo vínculo vertical-re, jaiko merecedores jahupyty hag̃ua umi jehovasa jaiko hag̃ua parte Tupã familia-gua konvénio Abrahámico rupive, oimehápe avei umi jehovasa posteridad-pegua, evangelio ha sacerdocio rehegua. Ko’ã jehovasa ha’e avei yva ipukúva tapiaite peve.

Jepe ñaha’arõ opavave oikéva pe konvénio pyahu ha opave’ỹvape opermanece fiel ha oguereko umi jehovasa ojeselláva hi’arikuéra opaite eternidad peve, sapy’ánte upe ideal ha’ete ku mombyryetereíva ñandehegui. Che ministerio pukukue aja ajuhu heta miembro ojapóva ha oñangarekóva ikonveniokuérare, ha iména térã hembireko ndojapói. Avei oĩ tapicha isoltérova ndoguerekóiva araka’eve oportunidad omenda hag̃ua ko yvy ape ári. Ha oĩ avei noñangarekóiva umi ikonvénio matrimonial-re. ¿Maba’éiko ojehu umi tapichakuérape opaite ko’ã circunstancia-pe?

1. Peñangarekóramo akóinte umi konvénio pejapova’ekuére peñeinvestirõ guare, pehupytýta umi jehovasa personal oñeprometéva upe investidúrape jepe pene ména térã pene rembireko omboyke ikonvénio térã ojeretira pe matrimonio-gui . Pejesellárõ ha upéi pejedivorsia, ha pende sellamiento noñekanseláirõ, umi jehovasa personal sellamiento-kuéra rehegua opytáta vigente peẽ pepytárõ jeroviarekópe.

   Sapy’ánte, umi temiandu traición rehegua rupi ha hasy añetetereígui, peteĩ cónyugue ijeroviarekóva ikatu okanselase isellamiénto iména térã hembireko iñinfiélva ndive oñemomombyry hag̃ua chugui, ko yvy ape ári ha eternidad-pe avei. Pejepy’apýramo oiméramo peñeñapytĩha peteĩ pende excónyuge-re noñearrepentíriva rehe, penemandu’áke, ndaupeichamo’ãi! Tupã ndojeruremo’ãi avavépe opyta peteĩ relación sellada-pe eternidad peve ha’ekuéra oipota’ỹre. Ñande Ru Yvagagua ojeaseguráta jahupytytaha opaite umi jehovasa ñande rembipota ha ñande jeiporavo ohejáva ñandéve.

   Ha katu, oñekanselasérõ sellamiento, ojerrespetáta albedrío. Ojejapova’erã procediemientos. Ha katu kóva ndojejapoiva’erã péicha péichante! Primera Presidencia oguereko llave ojokua hag̃ua ko yvy ape ári ha avei yvágape. Primera Presidencia he’i guive oñekanselakuaaha peteĩ sellamiénto, umi jehovasa upe sellamiénto rehegua noĩvéima; umíva oñekansela avei lateral ha verticalmente. Iñimportanteiterei ñaikũmby porã jahupyty hag̃ua umi jehovasa exaltación rehegua, jahechaukava’erãha ñaimeha ñembosako’ípe jaike hag̃ua pe konvénio pyahu ha opave’ỹvape ha ñañongatu hag̃ua fielmente, taha’e ko tekovépe térã pe oútavape.

2. Umi Tupao miembro soltero-pe, penemandu’amíke “Ñandejára oipotaháicha ha itiémpope, mba’evéichagua jehovasa ndojejokomo’ãi Isantokuéra ijeroviarekóvagui. Ñandejára ojusgáta ha orrekompesáta opaite tapichápe [ipotapy] añeteguágui ha hembiapokuére”.

3. Ha oimérõ napeñangarekói ra’e konveniokuéra templo-guáre, oĩgueteri esperanza? Heẽ! Jesucristo evangelio ha’e peteĩ evangelio esperanza rehegua. Upe esperanza ou Jesucristo rupive, peteĩ arrepentimiento sincero ha obediente jasegívo Cristo mbo’epykuéra. Ahecha tapichakuéra ojapóva mba’e ivaíva, ojapyharávo umi konvénio sagrado. Ahecha jepi sapy’a py’a, umi oñearrepentíva añetehápe, oñeperdona ha oho jey konvénio rapére. Oimérõ pemboyke pende konvénio templo-pegua, ha’e peẽme peñembojajey hag̃ua Jesucristo-re, peñemongueta pende obispo ndive, peñearrepenti ha pembosako’i pene ánga tuicha poder sanador-pe oĩva disponible Jesucristo Expiasión rupive.

Hermano ha hermana-kuéra, ñande Ru Yvagagua ñanderayhuetéva, ome’ẽ ñandéve konveniokuéra ikatu hag̃uáicha jaguereko acceso opaite mba’e Ha’e oguerekóvape ñandéve g̃uarã. Ko’ã Tupã jehovasa sagrado hetereive opaite yva yvy ape ariguágui. Ikatu ojeguereko ñandéve g̃uarã tapiaite, oikóvo chugui yva ipukúva tapiaite peve, ñande fiel ramo ñane konveniokuérape.

Atestifika Tupã orrestaurahague autorida oñeñapytĩ hag̃ua ko yvy ári ha yvágape. Upe autorida oime Jesucristo Tupao Santokuéra Ára Pahapeguápe. Ogueraha tenondépe Primera Presidencia ha Kórum Dósegua, ha oñemba’apo Presidente Russell M. Nelson poguýpe. Umi oikéva pe konvénio pyahu ha opave’ỹva ñemendápe ha oñangarekóva upe konvénio rehe ikatu oñeperfecciona ha arakuéra ohasávo, ikatu ohupyty plenitud ñande Ru gloria rehegua, taha’e ha’éva circunstancia-pe ikatúva ndaipóri ipoguýpe.

Ko’ã jehovasa oñeprometéva ñane konveniokuéra reheguáva ikatu ojesella ñande ári Espíritu Marangatu Promésa rupive ha ikatu oiko chugui yva opytáva akói ha tapiaite g̃uarã. Péicha atestifika Jesucristo rérape, Amén.